កៀវ៖ ក្រុមឧទ្ទាមហ៊ូទីយេម៉ែនដែលគាំទ្រដោយអ៊ីរ៉ង់ បានបញ្ចេញវីដេអូមួយ បង្ហាញពីសកម្មភាពរបស់ពួកគេ រឹបអូសកប៉ាល់ដឹកទំនិញមួយគ្រឿង ឈ្មោះថា Galaxy Leader ដែលមានទំនាក់ទំនងជាមួយអ៊ីស្រាអែល និងបាននាំទៅកាន់ឆ្នេរសមុទ្រយេម៉ែន។ ការបញ្ចេញវីដេអូរឹបអូសកប៉ាល់ដឹកទំនិញមួយគ្រឿង រួមទាំងក្រុមនាវិកអន្តរជាតិនៅលើនោះ ២៥នាក់កាលពីថ្ងៃអាទិត្យសប្តាហ៍មុន បានកើតឡើងតែប៉ុន្មានថ្ងៃប៉ុណ្ណោះ ក្រោយក្រុមចលនាប្រដាប់អាវុធហ៊ូទីយេម៉ែន បានគំរាមដាក់គោលដៅលើនាវា ឬកប៉ាល់របស់អ៊ីស្រាអែល ជាការឆ្លើយនឹងសង្គ្រាមរវាងអ៊ីស្រាអែល និងក្រុមហាម៉ាសនៅតំបន់ហ្គាហ្សា។ លោកឧត្តមសេនីយ អាលី អាល់ ម៉ូស្គី ដែលជាមន្ត្រីយោធាក្រុមហ៊ូទីយេម៉ែន បានប្រាប់ស្ថានីយទូរទស្សន៍ អាល់ ម៉ាស៊ីរ៉ាហ៍ ថា នាវា ឬកប៉ាល់អ៊ីស្រាអែល គឺជាគោលដៅស្របច្បាប់សម្រាប់ពួកយើងនៅគ្រប់ទីកន្លែង ហើយយើងនឹងមិនស្ទាក់ស្ទើរចាត់វិធានការទេ។ មន្ត្រីយេម៉ែនម្នាក់បាននិយាយថា ក្រុមហ៊ូទីបាននាំកប៉ាល់ដឹកទំនិញដែលរឹបអូសនោះ ទៅកាន់កំពង់ផែ សាលីហ្វ នៃទីក្រុង ហូដេដា ដែលគ្រប់គ្រងដោយក្រុម ហ៊ូទី។ រីឯខាងអ៊ីស្រាអែលបានបដិសេធថា កប៉ាល់នេះមិនមែនជាកម្មសិទ្ធិរបស់ខ្លួនទេ ហើយក៏មិនមានពលរដ្ឋអ៊ីស្រាអែលណាម្នាក់ស្ថិតនៅកប៉ាល់នេះនោះដែរ។ បើតាមអាជ្ញាធរអ៊ីស្រាអែល កប៉ាល់នេះជាកម្មសិទ្ធិនៃក្រុមហ៊ុនមួយរបស់អង់គ្លេស និងប្រតិបត្តិការដោយក្រុមហ៊ុនជប៉ុន ហើយបានចេញដំណើរចាកចេញពីតួកគី ឆ្ពោះទៅកាន់ប្រទេសឥណ្ឌា៕ ប្រភព៖ AFP ប្រែសម្រួលដោយ៖ ឈឹម ទីណា

ឡុងដ៍៖ វិមាន Downing Street បាននិយាយនៅថ្ងៃចន្ទថា ប្រធានាធិបតីកូរ៉េខាងត្បូង លោក យូន ស៊ុកយុល នឹងបើកការចរចាលើកិច្ចព្រមព្រៀងពាណិជ្ជកម្មសេរីថ្មីមួយជាមួយអង់គ្លេស ក្នុងអំឡុងដំណើរទស្សនកិច្ចផ្លូវរដ្ឋរបស់លោក រយៈពេលបីថ្ងៃក្នុងសប្តាហ៍នេះ។ ប្រធានាធិបតីកូរ៉េខាងត្បូង លោក យូន ស៊ុកយុល នឹងជួបពិភាក្សាទ្វេភាគី ជាមួយនាយករដ្ឋមន្រ្តីអង់គ្លេស រីសស៊ី ស៊ូណាក់ ហើយបើតាមវិមាន Downing Street ពាណិជ្ជកម្ម និងការវិនិយោគ គឺជារបៀបវារៈសំខាន់។ បន្ថែមលើនេះ រដ្ឋមន្រ្តីក្រសួងពាណិជ្ជកម្មអង់គ្លេស-កូរ៉េខាងត្បូង ក៏នឹងរៀបចំពិធីចុះហត្ថលេខាលើកិច្ចព្រមព្រៀងមួយ ដើម្បីចាប់ផ្តើមការចរចាលើកិច្ចព្រមព្រៀងពាណិជ្ជកម្មសេរី (FTA) និងឈានមុខគេលើពិភពលោក នៅក្នុងថ្ងៃពុធសប្តាហ៍នេះ។ លោក ស៊ូណាក់ និយាយថា នៅពេលដែលប្រទេសទាំងពីរផ្តោតលើការច្នៃប្រឌិត, ការប្រើប្រាស់បច្ចេកវិទ្យាថ្មីៗ និងការការពារសណ្តាប់ធ្នាប់ ដែលផ្អែកលើច្បាប់អន្តរជាតិនោះ អង់គ្លេស និងកូរ៉េខាងត្បូង គឺជាដៃគូមានលក្ខណៈដូចគ្នាពីធម្មជាតិ។ រដ្ឋាភិបាលទីក្រុងឡុងដ៍បានបញ្ជាក់ថា ដំណើរទស្សនកិច្ចរបស់លោក យូន នឹងទទួលបានការវិនិយោគ ២១ពាន់លានផោន ឬប្រហែល ២៦,២ពាន់លានដុល្លារ ពីក្រុមហ៊ុនកូរ៉េខាងត្បូងនៅចក្រភពអង់គ្លេស សម្រាប់ការគាំទ្រដល់គម្រោងកកើតឡើងវិញ និងប្រព័ន្ធហេដ្ឋារចនាសម្ព័ន្ធ។ យោងតាមតួលេខចុងក្រោយបានបង្ហាញថា ពាណិជ្ជកម្មប្រចាំឆ្នាំលើទំនិញ…

បាងកក៖ ក្រសួងការបរទេសថៃ នៅថ្ងៃអាទិត្យកន្លងទៅ បានបញ្ជាក់ថា ពលរដ្ឋថៃដែលកំពុងជាប់គាំងនៅភាគខាងជើងប្រទេសមីយ៉ាន់ម៉ា ប្រមាណ ២៥០នាក់ នឹងត្រូវបានជម្លៀសចេញតំបន់កំពុងមានជម្លោះរវាងកងកម្លាំងយោធាមីយ៉ាន់ម៉ា និងក្រុមប្រដាប់អាវុធជនជាតិភាគតិច តាមរយៈច្រកព្រំប្រទល់ជាមួយប្រទេសចិន។ ក្នុងសេចក្ដីរាយការណ៍មួយ ក្រសួងការបរទេសថៃ បានបញ្ជាក់ថា ខ្លួនបានរៀបចំយន្ដហោះចំនួន ២ នៅទីក្រុងគន់មីង (Kunming) ដើម្បីត្រៀមទទួលប្រជាជនដែលជម្លៀសខ្លួន មកទីក្រុងបាងកក។ ប្រជាជនទាំងនោះក៏នឹងត្រូវបានពិនិត្យមើលពីប្រវត្តិផ្ទាល់ខ្លួន ដើម្បីជៀសវាងបញ្ហាជួញដូរមនុស្សជាដើម។ ពលរដ្ឋថៃប្រមាណ ៤១នាក់ ក៏ត្រូវបានជម្លៀសចេញពីតំបន់ជម្លោះកាលពីថ្ងៃសៅរ៍ សប្ដាហ៍មុនរួចមកហើយ ដោយមានការជួយអន្ដរាគមន៍ពីរដ្ឋាភិបាលមីយ៉ាន់ម៉ា និងថៃផងដែរ។ បច្ចុប្បន្ន ពលរដ្ឋថៃប្រមាណ ២៦៦នាក់ត្រូវបានជម្លៀសចេញពីមីយ៉ាន់ម៉ា ត្រលប់មកប្រទេសថៃវិញ ក្រោយជម្លោះផ្ទុះឡើង និងរីករាលដាលកាន់តែខ្លាំងឡើងៗ។ គួរបញ្ជាក់ថា ជម្លោះរវាងយោធាមីយ៉ាន់ម៉ា និងក្រុមប្រដាប់អាវុធជនជាតិភាគតិច បានផ្ទុះឡើងតាំងពីចុងខែតុលា។ តំបន់ភាគខាងជើងរដ្ឋ Shan ដែលនៅជាប់ព្រំដែនជាមួយចិន និងសំបូរទៅដោយព្រៃក្រាស់ គឺជាតំបន់ដែលមានការប្រយុទ្ធក្ដៅគគុក។ ការប្រយុទ្ធគ្នាកំពុងខិតជិតទៅដល់ទីក្រុង Laukkai ដែលជាទីក្រុងល្បីល្បាញចំពោះល្បែងស៊ីសង ការផ្ដល់សេវាកម្មផ្លូវភេទ និងការបោកប្រាស់តាមរយៈអនឡាញជាដើម៕ ប្រភព៖ AFP ប្រែសម្រួលដោយ៖ សាន ស្រីលក្ខណ៍