សាន់ ហ្វ្រាន់ស៊ីសស្កូ៖ ក្រុមហ៊ុន Google ដែលជាអាណាព្យាបាលរបស់ Alphabet នៅថ្ងៃ២៤ ខែតុលា ឆ្នាំ២០២៣ បានរាយការណ៍ពីប្រាក់ចំណេញប្រចាំត្រីមាសចំនួន ១៩.៧ពាន់លានដុល្លារ ដោយសារតែការផ្សាយពាណិជ្ជកម្មតាមអនឡាញ (Ads), Youtube, និងសេវាកម្មខ្លោដ (Cloud Services)។ ក្រុមហ៊ុន Alphabet បានយកឈ្នះលើការរំពឹងទុករបស់ទីផ្សារ ដោយរកប្រាក់ចំណូលបានចំនួន ៧៦.៧ពាន់លានដុល្លារ បើធៀបនឹង ៦៩ពាន់លានដុល្លារក្នុងរយៈពេលដូចគ្នាកាលពីឆ្នាំមុន។ ជាមួយគ្នានេះ នាយកប្រតិបត្តិការក្រុមហ៊ុន Alphabet លោក Sundar Pichai បាននិយាយនៅក្នុងការចេញផ្សាយរបាយការណ៍ប្រាក់ចំណូលយ៉ាងដូច្នេះថា ខ្ញុំរីករាយនឹងលទ្ធផលហិរញ្ញវត្ថុរបស់យើង និងសន្ទុះផលិតផលរបស់យើងក្នុងត្រីមាសនេះ។ លោក Pichai បន្ថែមថា Alphabet កំពុងបន្តផ្តោតលើការធ្វើឱ្យបញ្ញាសិប្បនិម្មិត (AI) កាន់តែមានប្រយោជន៍សម្រាប់មនុស្សគ្រប់ៗគ្នា ដោយលោកបានសន្យាថា វឌ្ឍនភាពដ៏គួរឱ្យរំភើបនឹងមកដល់នាពេលខាងមុខ។ សូមបញ្ជាក់ថា Google ក៏ដូចជាក្រុមហ៊ុនបច្ចេកវិទ្យាធំៗភាគច្រើនដទៃទៀតដែរ បានមើលឃើញតម្លៃភាគហ៊ុនរបស់ខ្លួនកើនឡើងយ៉ាងខ្លាំងនៅឆ្នាំ២០២៣ ខណៈដែលអ្នកវិនិយោគរំពឹងថា បញ្ញាសិប្បនិម្មិត (AI) នឹងបង្កើតប្រាក់ចំណូលថ្មី និងបើកទីផ្សារថ្មី៕ ប្រភព៖ AFP ប្រែសម្រួលដោយ៖ ឈឹម…