សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានផ្ញើសាររំលែកទុក្ខ ជូនដល់ប្រធានាធិបតីចិន ចំពោះមរណភាពរបស់អតីតនាយករដ្ឋមន្ត្រីចិនលោក លី ខឺឈាង។ លោក លី ខឺឈាង បានទទួលមរណភាពកាលពីយប់ម៉ោង ១២ និង១០នាទីយប់ ឈានចូលថ្ងៃទី២៧ ខែតុលានេះ។ សារលិខិតសម្តេចតេជោថ្ងៃទី២៧តុលា ជូនចំពោះលោកប្រធានាធិបតី ស៊ី ជីនពីង បានសរសេរថា «ខ្ញុំមានសេចក្ដីក្រៀមក្រំជាទីបំផុត ដោយបានដឹងពីមរណភាពរបស់ឯកឧត្តម លី ខឺឈាង សមាជិកគណៈកម្មាធិការអចិន្ត្រៃយ៍ នៃការិយាល័យនយោបាយ នៃគណៈកម្មាធិការកណ្តាល នៃបក្សកុម្មុយនិស្តចិន និងជាអតីតនាយករដ្ឋមន្ត្រី នៃក្រុមប្រឹក្សារដ្ឋ»។ សារលិខិតដដែលបានបន្តថា «មរណភាពរបស់ឯកឧត្តម លី ខឺឈាង តំណាងឱ្យការបាត់បង់ដ៏ធំមួយសម្រាប់ប្រជាជនចិន និងបក្ស»។ សម្តេចតេជោក្នុងសារលិខិត បានចាត់ទុក «ឯកឧត្តម លី ខឺឈាង គឺជាមិត្តដ៏ល្អរបស់កម្ពុជា ហើយប្រជាជនកម្ពុជានឹងចងចាំជានិច្ចនូវការរួមចំណែកដ៏មានតម្លៃរបស់ឯកឧត្តម ចំពោះទំនាក់ទំនងមិត្តភាពដ៏ជិតស្និទ្ធរវាងប្រជាជាតិ និងប្រជាជន នៃប្រទេសយើងទាំងពីរ ដែលត្រូវបានគូសបញ្ជាក់ដោយទំនាក់ទំនងនយោបាយដ៏រឹងមាំរវាងគណបក្សយើងទាំងពីរ»។

នៅអាស៊ានក្នុងរយៈពេល ២៤ម៉ោងកន្លងមកនេះ មានតែប្រទេសហ្វីលីពីន១ប៉ុណ្ណោះ ដែលមានករណីឆ្លងថ្មីជំងឺកូវីដ១៩។ ប្រទេសហ្វីលីពីនថ្ងៃនេះ មានករណីឆ្លងថ្មីចំនួន ១៥២ករណី ដែលកើនឡើងចំនួន ៣៧ករណី បើប្រៀបធៀបនឹងម្សិលមិញ។ ប្រទេសកម្ពុជាមិនមានរកឃើញអ្នកឆ្លងថ្មីឡើយនៅថ្ងៃនេះ។ ប្រទេសអាស៊ាននារយៈពេល ២៤ម៉ោងចុងក្រោយនេះ មិនមានអ្នកស្លាប់ដោយសារជំងឺកូវីដឡើយ។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៦លាន ៣៩ម៉ឺន ៣៩៤ករណី, និងការស្លាប់សរុបមានចំនួន ៣៦ម៉ឺន ៨ពាន់ ៨៦២នាក់។ បើគិតសរុបនៅលើសាកលលោកនោះវិញ ការឆ្លងវីរុសកូវីដ១៩ សរុបមានចំនួនជាង ៦៩៦លានករណី, និងការស្លាប់មានជាង ៦លាន ៩៣ម៉ឺននាក់៕

កម្រិតធ្លាក់ទឹកភ្លៀងត្រូវគេព្យាករណ៍ថា នឹងថមថយក្នុងសប្តាហ៍ទី៤ ខែតុលានេះ បើទោះជាកម្ពុជាទទួលឥទ្ធិពលសម្ពាធទាបនៅសមុទ្ទចិនខាងត្បូងក៏ដោយ។ ក្រសួងធនធានទឹក និងឧតុនិយមបានថ្លែងថា នៅថ្ងៃទី៣០តុលា នឹងមានប្រព័ន្ធសម្ពាធខ្ពស់មួយទៀត ពីប្រទេសចិនគ្របដណ្ដប់លើផ្នែកខាងជើងប្រទេសថៃ លាតសន្ធឹងទៅដល់សមុទ្រចិនខាងត្បូង ខណៈខ្យល់នឹងប្ដូរទិសដៅបក់ពីទិសឦសាន មកលើប្រទេសកម្ពុជា។ យោងតាមការព្យាករណ៍បណ្ដាខេត្តមួយចំនួននៅតំបន់មាត់សមុទ្ទ និងបណ្តាខេត្តមួយចំនួន ក្នុងតំបន់ទំនាបកណ្តាល រួមទាំងរាជធានីភ្នំពេញ រវាងពីថ្ងៃទី២៦ រហូតដល់ ថ្ងៃទី២៩ ខែតុលា នឹងមានភ្លៀងធ្លាក់ក្នុងកម្រិតបង្គួរ លាយឡំជាមួយផ្គរ រន្ទះ និងខ្យល់កន្រ្តាក់ ដែលគ្របដណ្ដប់ លើផ្ទៃដីពី ៥០ភាគរយ ទៅ ៦០ភាគរយ។ បណ្ដាខេត្តមួយចំនួនក្នុងតំបន់ខ្ពង់រាប នឹងមានភ្លៀងធ្លាក់ក្នុងកម្រិតពីតិចទៅបង្គួរ គ្របដណ្តប់ លើផ្ទៃដីពី ៣០ភាគរយ ទៅ ៤០ភាគរយ។ នៅថ្ងៃទី៣០ ខែតុលា នៅតំបន់ទំនាបកណ្ដាលនិងតំបន់មាត់សមុទ្រ នឹងមានភ្លៀងធ្លាក់ ក្នុងកម្រិតមធ្យម គ្របដណ្តប់លើផ្ទៃដីពី ៣០ ភាគរយ ទៅ ៤០ភាគរយ ហើយនៅតំបន់ខ្ពង់រាបនឹងមានភ្លៀងធ្លាក់កម្រិតខ្សោយ គ្របដណ្ដប់លើផ្ទៃដីពី ១០ ភាគរយ ទៅ ២០ភាគរយ។

ធនាគារអភិវឌ្ឍន៍អាស៊ី ADB បានសន្យាចំពោះក្រសួងធនធានទឹក និងឧតុនិយម ជុំវិញការបន្ថែមទុនវិនិយោគលើការងារជួសជុលថែទាំប្រព័ន្ធធារាសាស្រ្តក្នុងប្រទេសកម្ពុជា។ ការសន្យាបន្ថែមទុនវិនិយោគនេះ បានធ្វើឡើងក្នុងជំនួបពិភាក្សារវាងតំណាងធនាគារ ADB លោកស្រី យ៉ូតសាណា វ៉ាម៉ា Jyotsana Varma ជាមួយនឹងលោករដ្ឋមន្ត្រី ថោ ជេដ្ឋា នៅទីស្តីការក្រសួងធនធានទឹក និងឧតុនិយម នាព្រឹកថ្ងៃទី២៦ តុលា ឆ្នាំ២០២៣។ លោករដ្ឋមន្ត្រីបានប្រាប់ ADB ថា ដើម្បីទប់ទល់នឹងការប្រែប្រួលអាកាសធាតុ និងហានិភ័យ នៃគ្រោះធម្មជាតិ, លោកសូមស្នើដល់ធនាគារអភិវឌ្ឍន៍អាស៊ីពិចារណាពង្រីកទុនវិនិយោគបន្ថែមទៀត លើវិស័យគ្រប់គ្រងធនធានទឹក និងឧតុនិយមនេះ។ លោករដ្ឋមន្ត្រីបានស្នើឱ្យធនាគារអភិវឌ្ឍន៍អាស៊ីបង្កើនកិច្ចសហប្រតិបត្តិការកែលម្អផែនការ រយៈពេលវែងរបស់ខ្លួន លើកិច្ចការវិនិយោគវិស័យធនធានទឹក និងឧតុនិយម ចាប់ពីឆ្នាំ២០២៤-២០៣៩ ឈានទៅកាត់បន្ថយបានជាអតិបរមានូវជំនន់គ្រប់ប្រភេទ និងហានិភ័យនៃគ្រោះរាំងស្ងួត និងបង្កើនជាអតិបរមានូវបរិស្ថានបៃតង និងអេកូទេសចរណ៍។ លោកស្រីនាយិកា ADB ប្រចាំកម្ពុជា បានទទួលយកនូវសំណើនេះ និងបានសន្យាបន្ថែមទុនវិនិយោគ ជាមួយក្រសួងធនធានទឹក និងឧតុនិយម លើការងារជួសជុលថែទាំប្រព័ន្ធធារាសាស្រ្ត ដើម្បីរួមចំណែកទ្រទ្រង់ដល់ការអភិវឌ្ឍសេដ្ឋកិច្ចកម្ពុជា។ ធនាគារ ADB រហូតមកទល់នឹងបច្ចុប្បន្ននេះ បានធ្វើការវិនិយោគជាបន្តបន្ទាប់ ដើម្បីធ្វើទំនើបកម្មលើហេដ្ឋារចនាសម្ព័ន្ធគ្រប់គ្រងវិស័យធនធានទឹក និងឧតុនិយម ចាប់ពីខ្នាតមធ្យមដល់ខ្នាតធំ។…

សម្តេចតេជោ ហ៊ុន សែន បានទទួលជួបប្រធានក្រុមហ៊ុនមីនីបៀ ដែលបានសន្យាថានឹងជួយកៀរគរបណ្តាក្រុមហ៊ុនធំៗ របស់ជប៉ុន មកបណ្តាក់ទុនវិនិយោគនៅកម្ពុជា។ ក្រុមហ៊ុនមីនីបៀ ដែលផលិតគ្រឿងអេឡេត្រូនិច នាំចេញទៅក្រៅប្រទេស គឺជាក្រុមហ៊ុនដែលបានធ្វើការបណ្តាក់ទុនរកស៊ីក្នុងប្រទេសកម្ពុជា រយៈពេល ១២ឆ្នាំរួចមកហើយ។ អប្សរាណិតធ្វើសេចក្តីរាយការណ៍

កម្ពុជាបានបញ្ជាក់ប្រាប់រុស្ស៊ីនូវគោលនយោបាយការបរទេសរបស់ខ្លួន ដែលមិនមានការប្រែប្រួលអ្វីឡើយ ជាពិសេសនៅក្នុងទំនាក់ទំនងទ្វេភាគីរវាងកម្ពុជា-រុស្ស៊ី។ ការបញ្ជាក់ប្រាប់នេះ បានធ្វើឡើងនៅថ្ងៃទី២៦តុលា ឱកាសដែលសម្តេចមហាបវរធិបតី ហ៊ុន ម៉ាណែត បានអនុញ្ញាតឱ្យឯកអគ្គរដ្ឋទូតសហព័ន្ធរុស្សីប្រចំាកម្ពុជា លោក អាណាតូលី បូរីវីក Anatoly Borovik ចូលជួបសម្តែងការគួរសម និងពិភាក្សាការងារនៅវិមានសន្តិភាព។ អប្សរាណិតរាយការណ៍

កម្ពុជាត្រៀមនឹងរៀបចំព្រះរាជពិធីរំលឹកខួបលើកទី១៩ នៃការឡើងគ្រងរាជសម្បត្តិព្រះករុណា ព្រះមហាក្សត្រខ្មែរ សម្តេចព្រះបរមនាថ នរោត្តម សីហមុននី នាថ្ងៃអាទិត្យចុងសប្តាហ៍នេះ ដែលនឹងមានការរៀបបាញ់កាំជ្រួច និងការសម្តែងតន្តី្រសិល្បៈបុរាណ និងសម័យជូនពលរដ្ឋទស្សនាកំសាន្តថែមទៀត។ សម្តេចព្រះបរមនាថ នរោត្តម សីហមុនី ត្រូវបានក្រុមប្រឹក្សារាជសម្បត្តិ បោះឆ្នោតជ្រើសរើសជាឯកច្ឆ័ន្ទនៅថ្ងៃទី១៤ តុលា ឆ្នាំ២០០៤ ជាព្រះមហាក្សត្រ នៃព្រះរាជាណាចក្រកម្ពុជា។ ព្រះរាជាណាចក្រកម្ពុជាបានសម្រេចយកថ្ងៃទី២៩ តុលា ឆ្នាំ២០០៤ ជាទិវាប្រវត្តិសាស្ត្រ នៃការឡើងគ្រងព្រះបរមរាជសម្បត្តិ។ គណៈកម្មាធិការជាតិរៀបចំបុណ្យជាតិ និងអន្តរជាតិ បានថ្លែងថា នៅមុនថ្ងៃព្រះរាជពិធីរំលឹកខួបឡើងគ្រងរាជ្យ នឹងឈានមកដល់ គេនឹងមានការរៀបចំតុបតែងលម្អភ្លើងពណ៌, លើកទង់ជាតិ, ទង់សាសនា, ទង់ព្រះមហាក្សត្រ និងមានការរៀបចំក្រុមតន្ត្រីនៅតាមទីសាធារណៈ ក្នុងរាជធានី និងតាមបណ្តាខេត្ត ដើម្បីឱ្យប្រជាពលរដ្ឋបានកម្សាន្តសប្បាយនៅទូទាំងប្រទេស។ នៅជាមួយគ្នានេះដែរ គេបានចាត់តាំងឱ្យមានកម្មវិធីចុះសួរសុខទុក្ខអ្នកជម្ងឺ តាមមន្ទីរពេទ្យបង្អែក, តាមកុមារកំព្រា, ជនពិការនិងចាស់ជរាគ្មានទីពឹង។ យោងតាមគណៈកម្មាធិការជាតិរៀបចំបុណ្យជាតិ និងអន្តរជាតិ ពិធីអុជកាំជ្រួចអបអរសាទរ នៅចំថ្ងៃអាទិត្យ ទី២៩ តុលា នឹងធ្វើនៅម៉ោង៧យប់។

ប្រទេសហ្វីលីពីន ដែលបាត់មិនមានករណីឆ្លងជំងឺកូវីដ១៩ ជាង ១០សប្តាហ៍មកហើយ ថ្ងៃនេះស្រាប់តែមានការឆ្លងជាថ្មីច្រើនដល់១១៥ករណី។ ការឆ្លងកូវីដ១៩ នៅអាស៊ាន ក្នុងរយៈពេល ២៤ម៉ោងចុងក្រោយនេះ មានចំនួន ១២៣ករណី និងបានកើតលើប្រទេសចំនួន៣ នៅអាស៊ាន។ ការឆ្លងនៅថ្ងៃនេះ បានកើនឡើងចំនួន ១១៨ករណី បើប្រៀបធៀបនឹងម្សិលមិញ។ ប្រទេសកម្ពុជាមិនមានរកឃើញអ្នកឆ្លងថ្មីឡើយនៅថ្ងៃនេះ។ ប្រទេសទាំង៣ នៅអាស៊ាន ដែលរកឃើញមានឆ្លងថ្មីថ្ងៃនេះ រួមមានប្រទេសហ្វីលីពីន មានការឆ្លង ១១៥ករណីច្រើនជាងគេ, ប្រទេសវៀតណាមមានការឆ្លង ៥ករណី និងប្រទេសឡាវ មានការឆ្លង ៣ករណីតិចជាងគេ។

ការដាច់ភ្លើងបណ្តោះអាសន្នប្រចាំសប្តាហ៍ បានមកដល់ទៀតហើយ។ ការដាច់ភ្លើងក្នុងសប្តាហ៍នេះ មានរយៈពេល៤ថ្ងៃ គឺរវាងពីថ្ងៃទី២៦ រហូតដល់ថ្ងៃទី២៩ តុលា ដែលមានរយៈពេលពី៦ម៉ោង ទៅដល់៩ម៉ោង។ តើការដាច់ភ្លើងដែលនឹងមានក្នុងរាជធានីភ្នំពេញ និងខេត្តកណ្តាល ក្នុងសប្តាហ៍នេះ នឹងមាននៅទីណាខ្លះ? អប្សរាណិតរាយការណ៍

កងទ័ពជើងគោកកម្ពុជា និងកងស្វ័យការពារជើងគោកជប៉ុន បានឯកភាពពង្រឹងចំណងកិច្ចសហការទំនាក់ទំនងទ្វេភាគី ឲ្យកាន់តែស៊ីជំរៅ និងកាន់តែរឹងមាំ។ ការឯកភាពគ្នានេះបានធ្វើឡើងក្នុងកិច្ចប្រជុំលើកទី១ រវាងក្រុមការងារក្រុមការងារកងស្វ័យការពារជើងគោកជប៉ុន និងក្រុមការងារកងទ័ពជើងគោក នៃកងយោធពលខេមរភូមិន្ទ ប្រព្រឹត្តទៅនៅទីក្រុងតូក្យូក្នុងថ្ងៃទី២៤តុលា។ មន្ត្រីកម្ពុជាបានថ្លែងថា កិច្ចសហការពង្រឹងទំនាក់ទំនងទ្វេភាគីនេះ បានផ្តោតលើការផ្លាស់ប្តូរទស្សនកិច្ចគ្រប់កម្រិត, ការផ្លាស់ប្តូរអ្នកជំនាញ និងវគ្គហ្វឹកហ្វឺន, ការផ្លាស់ប្ដូរបទពិសោធន៍, វគ្គបណ្ដុះបណ្ដាល និងកិច្ចសហប្រតិបត្តិការផ្លាស់ប្ដូរព័ត៌មាន, បច្ចេកវិទ្យានិងសម្ភារៈយោធា។ កិច្ចប្រជុំរវាងកងទ័ព នៃប្រទេសទាំង២នេះ ត្រូវគេបញ្ជាក់ថាគឺអនុលោមតាមស្មារតីលក្ខខណ្ឌ កិច្ចសហប្រតិបត្តិការរវាងកងទ័ពជើងគោក នៃកងយោធពលខេមរភូមិន្ទ និងកងស្វ័យការពារជើងគោកជប៉ុន ដែលបានចុះហត្ថលេខាដោយថ្នាក់ដឹកនាំយោធា នៃប្រទេសទាំងពីរ កាលពីថ្ងៃទី១៥ ខែកុម្ភៈ ឆ្នាំ២០២២៣កន្លងមក នៅរាជធានីភ្នំពេញ៕