រាជរដ្ឋាភិបាលកម្ពុជា បានបញ្ជាក់ការតាំងចិត្តនឹងបញ្ជូនកម្លាំងនារី ក្នុងការចេញបំពេញបេសកកម្មកងកម្លាំងមួកខៀវអង្គការសហប្រជាជាតិ ឱ្យបានលើស ២០ភាគរយ ខណៈបច្ចុប្បន្នកម្ពុជាទទួលបានលេខរៀងទី១០ លើ១២៣ប្រទេស ផ្នែកបរិច្ចាគកងកម្លាំង និងលេខរៀងទី១ ក្នុងអាស៊ាន។ ការបញ្ជាក់ប្តេជ្ញាចិត្តនេះបានលើកឡើងក្នុងជំនួបពិភាក្សាការងាររវាងអគ្គនាយកមជ្ឈមណ្ឌលជាតិរក្សាសន្តិភាព នាយឧត្តមសេនីយ៍ សែម សុវណ្ណនី ជាមួយនឹងឧបការីអគ្គលេខាធិការអង្គការសហប្រជាជាតិ លោកជំទាវ ជេន ហ្រ្វង់សេស ខូណ័រ Jane Frances Connors។ នាយឧត្តមសេនីយ៍ សែម សុវណ្ណនី បានថ្លែងថាកម្ពុជា បានបញ្ជូនកម្លាំងនារី នៅតំបន់បេសកកម្មរហូតដល់ ៤៧ភាគរយនៅសាធារណរដ្ឋស៊ូដង់ខាងត្បូង , ៤៨ភាគរយ នៅសាធារណរដ្ឋម៉ាលី និងក៏មានមេបញ្ជាការជានារី នៅសាធារណរដ្ឋអាហ្រ្វិកកណ្តាលផងដែរ។ លោកបានបញ្ជាក់ការតាំងចិត្ត នឹងបញ្ជូនកម្លាំងនារីឱ្យបានលើស ២០ភាគរយថែមទៀត។ នាយឧត្តមសេនីយ៍ សែម សុវណ្ណនី ដើម្បីពង្រីកចំណេះដឹងកម្លាំងឱ្យកាន់តែទូលំទូលាយ បានស្នើសុំដល់អង្គការសហប្រជាជាតិ ផ្តល់វគ្គហ្វឹកហ្វឺន អប់រំ និងផ្សព្វផ្សាយបន្ថែម ស្តីអំពីច្បាប់ការពារជនស៊ីវិល ស្រ្តី និងកុមារ ដល់កងកម្លាំងមុនចល័តទៅតំបន់បេសកកម្ម។ លោកជំទាវជេន ខូណ័រ Jane Connors បានសម្តែងក្តីរីករាយ ចំពោះសំណើរកការពង្រីកចំណេះដឹងនេះ…

ជម្លោះរិះគន់មួយដែលកើតឡើងដោយសារតែតារាកំប្លែងនាយក្រឹម ដែលគេចោទថា បាននិយាយប៉ះពាល់ដល់មនុស្សភេទទី៣ម្នាក់ បាននាំឱ្យមានការខឹងសម្បារពីអង្គការសហគមន៍ ឥន្ទធនូកម្ពុជា។ ក្នុងកម្មវិធី Cambodia’s Got Talent នារាត្រីថ្ងៃសៅរ៍ទី២៨តុលា, តារាកំប្លែងឈ្មោះ អ៊ូ បុណ្ណារ៉ាត់ ដែលស្គាល់ទូទៅថាជានាយក្រឹម ត្រូវបានអង្គការសហគមន៍ឥន្ទធនូកម្ពុជា ចោទថាការបញ្ចេញមតិរបស់លោក បានបង្កនូវភាពរើសអើងធ្វើឱ្យប៉ះពាល់ដល់សិទ្ធិ និងសេចក្តីថ្លៃថ្នូររបស់បេក្ខជនមួយរួប ដែលគេចាត់ទុកថាជាមនុស្សស្រឡាញ់ភេទដូចគ្នា។ អង្គការសហគមន៍ឥន្ទធនូកម្ពុជា បានធ្វើលិខិតមកប្រធានសមាគមសិល្បៈករខ្មែរ និងបានបន្តប្តឹងមកគណៈកម្មាធិការសិទ្ធិមនុស្សកម្ពុជា ដើម្បីរកការបញ្ចៀសនូវភាពរើសអើង និងការគោរពសេចក្តីថ្លៃថ្នូររបស់បុគ្គលដែលស្រឡាញ់ភេទដូចគ្នា។ គណៈកម្មាធិការសិទ្ធិមនុស្សកម្ពុជា នៅថ្ងៃទី៣១តុលានេះ បានចេញវីដេអូមួយដែលប្រមូលការជួបជុំនាយក្រឹម, ប្រធានសមាគមសិល្បៈករខ្មែរលោកស្រី ចន ចន្ទលក្ខិណា និងភាគីពីខាងសហគមន៍ឥន្ទធនូកម្ពុជា ដើម្បីរកការផ្សះផ្សាគ្នា បញ្ចៀសការភាន់ច្រឡំទាំងនេះ។ នាយក្រឹម បានថ្លែងក្នុងពេលនោះថា សម្តីរបស់លោកដែលមានចរឹតជាភាពកំប្លែង និងលើសលស់ខ្លះ មិនបានគិតថាបាននាំមកនូវភាពរើសអើងនោះទេ។ លោកបានស្នើសុំមិនឱ្យប្រកែប្រកាន់ឡើយ និងសុំរកការអធ្យាស្រ័យ។ នាយក្រឹមបានថ្លែងបញ្ជាក់បន្ទាប់មានការសម្របសម្រួលគ្នាចុងក្រោយមកនេះនាថ្ងៃទី៣១ តុលា ឆ្នាំ២០២៣។

រដ្ឋមន្ត្រីក្រសួងការពារជាតិ នៃប្រទេសកម្ពុជាបានថ្លែងថា កម្ពុជាគ្មានការរារែកបញ្ជូនកងទ័ព របស់ខ្លួនក្នុងប្រតិបត្តិការរក្សាសន្តិភាព ក្រោមឆត្រអង្គការសហប្រជាជាតិនោះឡើយ។ ប្រសាសន៍ថ្លែងរបស់នាយឧត្តមសេនីយ៍ ទៀ សីហា ដែលជាឧបនាយករដ្ឋមន្រ្តីផងដែរនោះ បានធ្វើទៅកាន់ថ្នាក់ដឹកនាំក្រសួងការពារជាតិ និងកងទ័ពជាង ៦០ប្រទេស ដែលបានចូលរួមនៅក្នុងវេទិកាសៀងសាន លើកទី១០ នៅទីក្រុងប៉េកាំង ប្រទេសចិន កាលពីថ្ងៃទី៣០តុលា។ នាយឧត្តមសេនីយ៍ ទៀ សីហា បានថ្លែងបញ្ជាក់ប្រាប់អ្នកចូលរួមទៀតថា ការបញ្ជូនកងទ័ព របស់កម្ពុជា ដើម្បីចូលរួមប្រតិបត្តិការរក្សាសន្តិភាព ក្រោមឆត្រអង្គការសហប្រជាជាតិនោះ គឺជាសក្ខីភាព នៃការយកចិត្តទុកដាក់របស់កម្ពុជា ក្នុងការឲ្យតម្លៃចំពោះសន្តិភាព។ លោកបានថ្លែងបញ្ជាក់ថា «ក្នុងនាមជាប្រទេសដែលចូលរួមចំណែកបរិច្ចាគកងទ័ព ក្នុងប្រតិបត្តិការរក្សាសន្តិភាព, កម្ពុជានៅតែប្រកាន់ខ្ជាប់ នូវការប្តេជ្ញាចិត្តរបស់ខ្លួន ចំពោះប្រតិបត្តិការរក្សាសន្តិភាព ដែលជាសក្ខីភាព នៃការយកចិត្តទុកដាក់របស់យើង ចំពោះសន្តិភាព សន្តិសុខ និងស្ថិរភាពអន្តរជាតិ និងដែលជាកត្តាសំខាន់ សម្រាប់ការអភិវឌ្ឍប្រកបដោយចីរភាព»។ កម្ពុជាក្នុងរយៈពេល១៧ឆ្នាំមកនេះ បានបញ្ជូនកងកម្លាំងនៃកងយោធពលខេមរភូមិន្ទ សរុបចំនួន ៩ពាន់ ២០៥នាក់ ក្នុងនោះនារីមានចំនួន ៧២៦នាក់។ ប្រទេសដែលកម្ពុជា បានបញ្ជូនកងទ័ពរបស់ខ្លួន ក្រោមឆត្រអង្គការសហប្រជាជាតិ គឺរួមមានប្រទេសសាធារណរដ្ឋស៊ូដង់, ស៊ូដង់ខាងត្បូង, ឆាដ, អាហ្វ្រិកកណ្តាល,…

សម្តេចធិបតី ហ៊ុន ម៉ាណែត បានរំលេចសារៈសំខាន់ នៃអាកាសយានដ្ឋានអន្តរជាតិសៀមរាប-អង្គរ ខណៈដែលមានសេចក្តីរាយការណ៍ជុំវិញការទទួលបានភ្ញៀវទេសចរកើនឡើង ចាប់តាំងពីដាក់ឱ្យដំណើរការតាំងពីថ្ងៃទី១៦ តុលា ឆ្នាំ២០២៣នោះមក។ អាកាសយានដ្ឋានអន្តរជាតិសៀមរាប-អង្គរ ដែលជាសមិទ្ធផលមួយ នៃគំនិតផ្តួចផ្តើមផ្លូវ និងខ្សែក្រវាត់ បានចាប់ផ្តើមសាងសង់កាលពីខែមីនា ឆ្នាំ២០២០ ក្រោមទុនវិនិយោគប្រមាណ ១ពាន់ ១០០លានដុល្លារអាមេរិក ដែលជាការវិនិយោគ BOT ក្នុងរយៈពេល ៥៥ឆ្នាំ។ សម្តេចធិបតីបានសរសេរក្នុងបណ្តាញសង្គមនៅថ្ងៃទី៣១តុលាថា «កាលានុវត្តភាពថ្មីនេះ នឹងក្លាយជាសក្តានុពលស្រូបទាញដ៏ខ្លាំងក្លា និងសំខាន់សម្រាប់វិស័យទេសចរណ៍ ក្នុងខេត្តសៀមរាប និយាយដោយឡែក ព្រមទាំងវិស័យទេសចរណ៍ទូទាំងប្រទេសនិយាយជារួម»។ សម្តេចធិបតីបានសរសេរទៀតថា «ការណ៍នេះនឹងអាចទាក់ទាញដល់វិនិយោគិន ក៏ដូចជាផ្តល់ប្រយោជន៍សេដ្ឋកិច្ចមូលដ្ឋានដល់ប្រជាពលរដ្ឋ»។ អាកាសយានដ្ឋានអន្តរជាតិសៀមរាប-អង្គរ គឺជាព្រលានយន្តហោះដែលអាចទទួលចុះចត នូវយន្តហោះប្រភេទធុនធំប៊ូអ៊ីង Boeing747 និង Airbus A340 និងអាចមានលទ្ធភាពទទួលអ្នកដំណើរចំនួន ៧លាននាក់ ក្នុងមួយឆ្នាំ សម្រាប់ផែនការរយៈពេលខ្លី និង២០លាននាក់ក្នុងមួយឆ្នាំសម្រាប់ផែនការរយៈពេលវែង។

តួលេខឆ្លងជំងឺកូវីដ១៩ ក្នុងរយៈពេល ៧២ម៉ោងកន្លងមកនេះ មានចំនួន ៣៧១ករណី។ ការឆ្លងក្នុងរយៈពេល ៧២ម៉ោងកន្លងមកនេះ បានកើតលើប្រទេសចំនួន ៦នៅអាស៊ាន លើកលែងតែប្រទេសម៉ាឡេស៊ី សឹង្ហបុរី ប្រុយណេ និងប្រទេសកម្ពុជា ដែលមិនមានការឆ្លងថ្មីឡើយ។ ក្នុងចំណោមប្រទេសទាំង ៦ ដែលរកឃើញឆ្លងថ្មីនោះ គឺប្រទេសហ្វីលីពីន មានការឆ្លងចំនួន ២៤៥ករណី ច្រើនជាងគេ ខណៈប្រទេសឡាវ មានការឆ្លងចំនួន ១ករណីប៉ុណ្ណោះ។ នារយៈពេល ៧២ម៉ោងចុងក្រោយនេះ នៅអាស៊ាន មានអ្នកស្លាប់ដោយសារជំងឺកូវីដ១៩ ចំនួន ៣នាក់ ដែលជាពលរដ្ឋនៃប្រទេសថៃ និងប្រទេសហ្វីលីពីន។

បណ្តាខេត្តដែលជាប់នឹងមាត់ទន្លេទូទាំងប្រទេស បានរៀបចំធ្វើពិធីបញ្ចុះទូកក្នុងទឹក ដើម្បីការចូលរួមប្រណាំងអបអរសាទរក្នុងពិធីអកអំបុកសំពះព្រះខែ ដែលនឹងមកដល់នាពេលខាងមុខនេះ។ នៅក្នុងខេត្តពោធិ៍សាត់ពិធីក្រុងពាលីទូកងឈ្មោះ តេជៈសែនជ័យបារមីនាគស របស់ស្នងការដ្ឋាននគរបាលខេត្ត បានធ្វើនៅថ្ងៃទី៣០តុលានេះ។ អប្សរាណិតរាយការណ៍

កម្ពុជានៅមិនទាន់អស់ភ្លៀងទេបើទោះជាបានចេញរដូវវស្សាក៏ដោយ។ ក្រសួងធនធានទឹក និងឧតុនិយម បានព្យាករណ៍ថាបាតុភូតភ្លៀង ផ្គរ រន្ទះ និងខ្យល់កន្ត្រាក់ នៅបន្ដកើតមានក្នុងសប្ដាហ៍ទៅមុខនេះទៀត ខណៈកម្ពុជាបានទទួលរងនូវឥទ្ធិពលពីប្រព័ន្ធសម្ពាធខ្ពស់ នៃប្រទេសចិន ដែលគ្របដណ្ដប់ផ្នែកខាងជើងប្រទេសថៃ និងលាតសន្ធឹងទៅដល់សមុទ្រចិនខាងត្បូង។ យោងតាមការព្យាករណ៍ ខេត្តមួយចំនួននៅក្នុងតំបន់មាត់សមុទ្ទ និងតំបន់ខ្ពង់រាប នឹងមានភ្លៀងធ្លាក់ក្នុងកម្រិតពីតិចទៅបង្គួរលាយឡំជាមួយផ្គររន្ទះ និងខ្យល់កន្ត្រាក់ដែលគ្របដណ្តប់លើផ្ទៃដីពី៣០ភាគរយ ទៅ៥០ភាគរយ។ ចំពោះរាជធានីភ្នំពេញ និងខេត្តមួយចំនួន នៅក្នុងតំបន់ទំនាបកណ្ដាល នឹងមានភ្លៀងធ្លាក់ពីកម្រិតមធ្យមទៅបង្គួរលាយឡំជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដីពី ៤០ភាគរយ ទៅ ៦០ភាគរយ។ យោងតាមការព្យាករណ៍ដដែល, រវាងពីថ្ងៃទី៣១ ខែតុលា រហូតដល់ថ្ងៃទី០៣ ខែវិច្ឆិកា ភ្លៀងនឹងបន្តធ្លាក់លើខេត្តមួយចំនួនក្នុងតំបន់មាត់សមុទ្ទ និងតំបន់ខ្ពង់រាប ក្នុងកម្រិតពីតិចទៅបង្គួរលាយឡំជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដីពី ៣០ភាគរយ ទៅ ៥០ភាគរយ។ ចំណែកនៅរាជធានីភ្នំពេញ និងបណ្ដាខេត្តមួយចំនួននៅក្នុងតំបន់ទំនាបកណ្ដាល នឹងមានភ្លៀងធ្លាក់ពីកម្រិតមធ្យមទៅបង្គួរ លាយឡំជាមួយផ្គររន្ទះ និងខ្យល់កន្ត្រាក់ គ្របដណ្តប់លើផ្ទៃដី ពី៤០ភាគរយ ទៅ ៦០ភាគរយ។

កម្ពុជាបានឈានចូលដល់បុណ្យកឋិនទានហើយដែលពុទ្ធបរិស័ទខ្មែរតែងប្រារព្ធធ្វើ រវាងពីថ្ងៃ១រោច ខែអស្សុជ ដល់១៥កើត ខែកត្តិកជារៀងរាល់ឆ្នាំ។ ក្រុមគ្រួសាររបស់សម្តេចតេជោ ហ៊ុន សែន បានចូលរួមជាបរិស័ទនានា នៅថ្ងៃដំបូង នៃបុណ្យកឋិនទាននេះ ដែលប្រារព្ធធ្វើនាវត្តបុទុមវត្តីរាជវរារាម ដែលមានការដង្ហែរមកពីប្រទេសថៃផងដែរ។ សូមទស្សនាសេចក្តីរាយការណ៍

សម្តេចធិបតី ហ៊ុន ម៉ាណែត បានលើកឡើងជុំវិញសារៈសំខាន់ នៃ «ការបង្កើតការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ» បន្ទាប់ពីគណៈរដ្ឋមន្ត្រី ទើបបានអនុម័តនាពេលថ្មីៗកន្លងមកនេះ។ អាជ្ញាធរជាតិដោះស្រាយវិវាទក្រៅប្រព័ន្ធតុលាការ គឺជាយន្តការថ្នាក់ជាតិមួយសម្តៅលើកកម្ពស់គុណភាព, ប្រសិទ្ធភាព និរន្តរភាព នៃការដោះស្រាយវិវាទក្រៅប្រព័ន្ធតុលាការ។ សេចក្តីព្រាងព្រះរាជក្រឹត្យដែលរួមមាន ៦ជំពូក និង២២មាត្រា ស្តីពី «ការបង្កើតការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ» ក្រោយការអនុម័តរបស់គណៈរដ្ឋមន្ត្រីកាលពីថ្ងៃទី២៧តុលា ត្រូវបានបញ្ជូនថ្វាយដល់ព្រះមហាក្សត្រខ្មែរ ដើម្បីព្រះអង្គយាងពិនិត្យ និងឡាយព្រះហស្ថលេខា ដើម្បីការប្រើប្រាស់ជាផ្លូវការ។

សម្តេចធិបតីបានថ្លែងថាឆ្នាំ២០២៤ គឺជាឆ្នាំដែលត្រូវពិនិត្យការវាយតម្លៃលើកិច្ចការរបស់ខ្លួនឯង ដែលបានធ្វើកន្លងមក។ គួរកត់សម្គាល់ថាសម្តេចធិបតី ហ៊ុន ម៉ាណែត ក្រោយការឡើងកាន់តំណែងភ្លាមនោះមក បានដាក់ចេញនូវគោលនយោបាយអាទិភាពចំនួន ៦ ដែលត្រូវធ្វើរហូតដល់ចុងឆ្នាំ២០២៣។ អប្សរាណិតធ្វើសេចក្តីរាយការណ៍