អតីតយុទ្ធជនចំនួន២០៥នាក់ នៅក្នុងខេត្តព្រះវិហារ ទទួលបានការបំពាក់គ្រឿងឥស្សរិយយសពីរាជរដ្ឋាភិបាល។ ការបំពាក់គ្រឿងឥស្សរិយយសនេះ ធ្វើឡើងនៅថ្ងៃទី១៣មិថុនា ក្រោមការចូលរួមពីទេសរដ្ឋមន្រ្តី មាស សុភា។ អប្សរាណិតរាយការណ៍

ក្រសួងបរិស្ថានបានធ្វើជំរឿនសត្វត្មាតនៅក្នុងទីតាំងអភិរក្សចំនួន៣ដោយរកឃើញថាមានចំនួនសត្វត្មាត១៣១ក្បាល។ សត្វត្មាតគឺជាប្រភេទសត្វដែលមនុស្សមិនសូវចូលចិត្តឡើយ ដោយសារវាស៊ីសាកសពស្អុយជាអាហារ។ មន្ត្រីនាំពាក្យក្រសួងបរិស្ថាន លោករដ្ឋលេខាធិការ នេត្រ ភក្ត្រា បានថ្លែងនៅថ្ងៃទី១៤ ខែមិថុនា ឆ្នាំ២០២៣នេះថា ជំរឿនសត្វត្មាតទាំង១៣១ក្បាលនោះ គឺជាជំរឿនលើកទី២ ក្នុងចំណោមការងារជំរឿនសត្វត្មាត ៥ ដងក្នុងមួយឆ្នាំ ដែលក្រុមអភិរក្សសត្វត្មាតកម្ពុជារៀបចំឡើង។ លោកបានថ្លែងបន្តថា ក្នុងចំណោមសត្វត្មាត ដែលបានរាប់កាលពីថ្ងៃទី៩ ខែមិថុនា ឆ្នាំ២០២៣នោះ រួមមានត្មាតភ្លើងចំនួន ១២ក្បាល, ត្មាតផេះ ៧៧ ក្បាល និងត្មាតត្មោតចំនួន ៤២ ក្បាល។ ជំរឿនសត្វត្មាតនេះធ្វើឡើងនៅក្នុងតំបន់អភិរក្សចំនួន ៣ រួមមានដែនជម្រកសត្វព្រៃសៀមប៉ាង ខេត្តស្ទឹងត្រែង ដែលមានចំនួន៩៣ ក្បាល, ដែនជម្រកសត្វព្រៃឆែប ក្នុងខេត្តព្រះវិហារ មានចំនួន ៣១ក្បាល និងនៅក្នុងព្រៃទឹកលិចទន្លេមេគង្គ ក្នុងខេត្តក្រចេះមានចំនួន ៧ ក្បាល។ ក្រសួងបរិស្ថាន បានអំពាវនាវដល់ប្រជាពលរដ្ឋទាំងអស់ចូលរួមអភិរក្ស និងការពារសត្វត្មាត ដោយបញ្ឈប់សកម្ម ភាពបរបាញ់ ឬការជួញដូរសត្វព្រៃ។ ក្រសួងបរិស្ថានបានថ្លែងថា សត្វត្មាតគឺជាសត្វស្លូត និងជាអ្នកដែលសម្អាត បរិស្ថាន ដោយស៊ីគម្រង់សាកសពសត្វផ្សេងទៀតជាអាហារ។ ក្រសួងបរិស្ថានបានពន្យល់ថា…

បណ្ឌិត ហ៊ុន ម៉ាណែត បានថ្លែងក្នុងពិធីសម្ពោធសមិទ្ធិផលសាសនាក្នុងរាជធានីភ្នំពេញថា «សន្តិភាព, សិទ្ធិសេរីភាព និងជីវភាព» គឺជាគន្លឹះសំខាន់ ៣ ដែលបង្កលក្ខណៈដល់ការកសាងសមិទ្ធផលទាំងផ្នែកពុទ្ធចក្រ និងអាណាចក្រ។ ប្រសាសន៍ថ្លែងរបស់បណ្ឌិត ហ៊ុន ម៉ាណែត ដែលជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត បានធ្វើឡើងក្នុងពិធីសម្ពោធអគារធម្មសាលា, ព្រះពុទ្ធរូបចតុទិស និងសមិទ្ធផលនានា នៅក្នុងវត្តភ្នៀតសិម្ពលី ស្ថិតក្នុងសង្កាត់ស្នោរ ក្នុងខណ្ឌកំបូល នៅថ្ងៃទី១៤ មិថុនា ឆ្នាំ២០២៣។ វិស័យសាសនាបានរស់រានមានជីវិតសាឡើងវិញក្រោយថ្ងៃរំដោះ៧មករាឆ្នាំ១៩៧៩។ បណ្ឌិត ហ៊ុន ម៉ាណែត បានថ្លែងថា ចាប់តាំងពីថ្ងៃរំដោះ៧ មករា, ការលើកស្ទួយវិស័យសាសនាឡើងវិញ ត្រូវបានចាត់ទុកជាអាទិភាពមួយក្នុងចំណោមកិច្ចការជាច្រើន។ លោកបានថ្លែង កិច្ចការលើកស្ទួយវិស័យសាសនានាអតីតកាលនោះ មិនមែនងាយស្រួលឡើយ ពីព្រោះនៅពេលនោះ រដ្ឋាភិបាលត្រូវប្រើដៃម្ខាងទប់ស្កាត់ការវិលមកវិញនៃរបបខ្មែរក្រហម ចំណែកដៃម្ខាងទៀត ត្រូវរៀបចំស្តារកសាងសង្គម-សេដ្ឋកិច្ចឡើងវិញ។ លោកបានថ្លែងថាបច្ចុប្បន្ន នៅទូទាំងប្រទេស, កម្ពុជាមានវត្តព្រះពុទ្ធសាសនាប្រមាណជាង ៥ពាន់វត្ត និងព្រះសង្ឃជាង ៧ ម៉ឺនអង្គ។ លោកបានថ្លែងថាក្រៅពីព្រះពុទ្ធសាសនា, នៅទូទាំងប្រទេស មានសាសនាផ្សេងៗជាច្រើនទៀត ដែលពលរដ្ឋបាន…

ប្រទេសមួយចំនួននៅអាស៊ាននៅតែបន្តមានករណីឆ្លង និងស្លាប់ដោយសារកូវីដ១៩ ក្នុងនោះកម្ពុជាក៏បន្តរកឃើញឆ្លងថ្មី ១ករណី ថែមទៀតផងដែរ ក្នុងរយៈពេល២៤ម៉ោងចុងក្រោយនេះ។ យោងតាមក្រសួងសុខាភិបាល ការឆ្លងថ្មី១ករណីនៅថ្ងៃនេះ ជាតួលេខបន្តថយចំនួន ១ករណី ថែមទៀតបើប្រៀបធៀបនឹងម្សិលមិញ។ តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ មានចំនួន ១ពាន់ ៥៦ករណី ដែលជាតួលេខឆ្លងបន្តថយចុះច្រើនដល់ចំនួន ១ពាន់ ១៥៦ករណី ធៀបនឹងការឆ្លងកាលពីថ្ងៃម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន ៥ នៅអាស៊ានរួមមានប្រទេសឥណ្ឌូនេស៊ី, ហ្វីលីពីន, វៀតណាម, មីយ៉ាន់ម៉ា និងប្រទេសកម្ពុជា។ ប្រទេសហ្វីលីពីន គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ៧២៧ករណី។ តួលេខឆ្លងតិចជាងគេ គឺប្រទសកម្ពុជា ដែលមានការឆ្លងតែ ១ករណីប៉ុណ្ណោះ។ ប្រទេសសឹង្ហបុរី, ម៉ាឡេស៊ី, ឡាវ, ប្រុយណេ និងប្រទេសថៃ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោងចុងក្រោយនេះ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ៥នាក់ ដែលជាពលរដ្ឋនៃប្រទេសឥណ្ឌូនេស៊ី។ គិតសរុបរួមនៃប្រទេសទាំង១០ អាស៊ាននាពេលនេះ…

គ្រាប់បែកដៃចំនួន៩គ្រាប់ ដែលសេសសល់តាំងពីសម័យសង្គ្រាម ត្រូវបានពលរដ្ឋនៅស្រុករលាប្អៀរ ខេត្តកំពង់ឆ្នាំង បានប្រទះឃើញនៅក្នុងប្រអប់ដែកមួយកប់ក្នុងដីក្រោយផ្ទះរបស់ខ្លួន។ ខេត្តកំពង់ឆ្នាំង គឺជាខេត្តទី៩ ដែលត្រូវបានប្រកាសជាខេត្តអស់មីន ប៉ុន្តែការរកឃើញកាលពីថ្ងៃទី១២មិថុនានោះ គ្រាប់ផ្ទុះដែលស្ថិតក្នុងដីមិនមែនជាគ្រាប់មីនឡើយ។ សេចក្តីរាយការណ៍ពីអធិការនគបាលស្រុករលាប្អៀរ លោកវរៈសេនីយ៍ឯក ទឹម ចន្ធី បានឲ្យដឹងថា ការរកឃើញនេះបានកើតនៅថ្ងៃទី១២ មិថុនា ឆ្នាំ២០២៣ ខណៈដែលស្ត្រីវ័យ៦០ ឆ្នាំម្នាក់ នៅភូមិត្រោកកើត នៃឃុំស្រែថ្មី បានប្រទះឃើញប្រអប់ដែកកប់ក្នុងដៃគ្រាដែលគាត់កំពុងជីកដីដាំដំណាំ។ កម្ពុជាបានរំដោះផ្ទៃដីពីការគំរាមដោយសារមីន និងសំណល់ជាតិផ្ទុះពីសង្រ្គាមបានចំនួន ២ពាន់៥៥៤ គីឡូម៉ែត្រក្រឡា ដោយរកឃើញ និងកំទេចចោលមីន និងសំណល់ជាតិផ្ទុះពីសង្គ្រាមជាច្រើនលានគ្រាប់។ កម្ពុជាបានដាក់ទិសដៅបោសសំអាតគ្រាប់មីនឱ្យអស់ក្នុងឆ្នាំ២០២៥។

បាតុភូត ភ្លៀង ផ្គរ រន្ទះ និងខ្យល់កន្ត្រាក់ នៅតែបន្ដកើតមានក្នុងសប្ដាហ៍ទៅមុខនេះ ខណៈសីតុណ្ហភាពកម្តៅ បានកើនមកវិញរវាងពី១ទៅ៣អង្សាសេ។ យោងតាមក្រសួងធនធានទឹក និងឧតុនិយម បាតុភូតប្រែប្រួលនេះ គឺដោយសារកម្ពុជាបានទទួលរងនូវឥទ្ធិពល ពីជ្រលង សម្ពាធទាប (ITCZ) ដែលអូសបន្លាយលើភាគខាងជើងនៃប្រទេសមីយ៉ាន់ម៉ា ឡាវ និងវៀតណាម គួបផ្សំនិងខ្យល់មូសុងនិរតីក្នុងកម្រិតពីមធ្យមទៅបង្គួរ។ តាមការព្យាករណ៍ រវាងពីថ្ងៃទី១៤ រហូតដល់ថ្ងៃទី២០ ខែមិថុនា, នៅតំបន់ទំនាបកណ្តាល គឺសីតុណ្ហភាពកម្ដៅអប្បបរមា រវាងពី ២៥ទៅ២៧ អង្សាសេ, សីតុណ្ហភាពកម្ដៅអតិបរមា មានរវាងពី ៣៤ទៅ៣៦ អង្សាសេ ដែលសីតុណ្ហភាពកម្ដៅទាំងពីរនេះ គឺមានការកើនឡើងចំនួន២អង្សាសេ បើប្រៀបធៀបនឹងសប្ដាហ៍មុន។ យោងតាមការព្យាករណ៍, ក្នុងតំបន់ទំនាបកណ្ដាលដែលរួមមាន៖ រាជធានីភ្នំពេញ, ខេត្ដកណ្តាល, ខេត្ដស្វាយរៀង, ខេត្ដព្រៃវែង និងខេត្ដតាកែវ អាចមានភ្លៀងធ្លាក់ក្នុងកម្រិតពីខ្សោយទៅមធ្យម និងបង្គួរដោយផ្នែកខ្លះ លាយឡំដោយ ផ្គរ រន្ទះ និងខ្យល់កន្ត្រាក់។ ចំណែកនៅតំបន់ខ្ពង់រាប សីតុណ្ហភាពកម្ដៅអប្បបរមា មានរវាងពី ២៤ ទៅ ២៦ អង្សាសេ…

មន្ត្រីជាន់ខ្ពស់គណបក្សភ្លើងទៀន លោក ស សាឡុងដេត បានសារភាពទោសកំហុសរបស់ខ្លួន តាមរយៈវីដេអូផ្សាយជាសាធារណៈមួយ ក្រោយសេចក្តីរាយការណ៍ការព្យាយាមគេចខ្លួន ដោយសារតែសម្តីចោទប្រកាន់ដាក់លើការរៀបចំព្រឹត្តិការណ៍កីឡាស៊ីហ្គេម។ លោក ស សាឡុងដេត ត្រូវគេរាយការណ៍លោកបានព្យាយាមគេចខ្លួន ក្រោយការប្រើពាក្យសម្តីចោទប្រកាន់នោះ បន្ទាប់ពីគណៈកម្មការរៀបចំកីឡាស៊ីហ្គេម ត្រៀមនឹងដាក់ពាក្យប្តឹងចោទប្រកាន់លើលោក ស សាឡុងដេតនោះ។ សម្តេចតេជោ ហ៊ុន សែន បានថ្លែងកាលពីព្រឹកថ្ងៃទី១៣មិថុនា អំពាវនាវលោក ស សាឡុងដេត កុំគេចខ្លួនរត់ចោលស្រុក។ ក្រោយប្រសាសន៍អំពាវនាវរបស់ប្រមុខរាជរដ្ឋាភិបាល, លោក ស សាឡុងដេត និងអ្នកធ្វើដំណើរជាមួយគ្នាម្នាក់ បានថ្លែងសុំទោស ចំពោះភាពខុសឆ្គងរបស់ខ្លួន និងបានសន្យាផ្តាច់ខ្លួនចេញពីទណ្ឌិត សម រង្ស៊ី និងចេញពីគណបក្សភ្លើងទៀន ហើយស្នើសុំចូលរួមរស់ជីវភាពនយោបាយជាមួយគណបក្សប្រជាជនកម្ពុជា។ សម្តេចតេជោ ហ៊ុន សែន ក្រោយសម្តីសារភាពសុំទោសរបស់លោក ស សាឡុងដេត បានសរសេរតាមបណ្តាញសង្គមស្នើដល់ក្រសួងយុត្តិធម៌ សូមធ្វើការជាមួយដើមបណ្តឹង និងតុលាការ ដើម្បីបញ្ចប់រឿងក្តីរបស់ ស សាឡុងដេត តាមវិធីដែលអាចធ្វើទៅបាន។

បណ្ឌិត ហ៊ុន ម៉ាណែត បានអញ្ជើញជាអធិបតីក្នុងពិធីសម្ពោធឆ្លងអគារពុទ្ធិកបឋមសិក្សាកម្រង និងសមិទ្ធផលនានា ក្នុងវត្តកែវមុនី ដែលមានអាយុកាល៧៧ឆ្នាំ ស្ថិតនៅក្នុងស្រុកកងមាស ខេត្តកំពង់ចាម។ បណ្ឌិត ហ៊ុន ម៉ាណែត ដែលជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានថ្លែងក្នុងពិធីសម្ពោធនៅថ្ងៃអង្គារទី១៣ ខែមិថុនាថា «គ្រប់សាសនាទាំងអស់ បានអប់រំមនុស្សឱ្យរស់នៅប្រកបដោយធម៌ និងផ្តល់នូវពុទ្ធិបញ្ញាញាណ ដើម្បីបែងចែករវាងអំពើអាក្រក់និងអំពើល្អ ព្រមទាំងចៀសវាងការប្រើប្រាស់ចំណេះដឹង និងជំនាញទៅក្នុងផ្លូវខុសដែលអាចនាំមកនូវការបំផ្លិចបំផ្លាញដល់បុគ្គលខ្លួនឯង និងសង្គមជាតិ»។ វិស័យសាសនា បានរស់រានសាឡើងវិញ ក្រោមការជួយសង្គ្រោះរបស់គណបក្សប្រជាជនកម្ពុជា ដែលបានដឹកនាំរណសិរ្សសាមគ្គីសង្គ្រោះជាតិជួយរំដោះប្រទេសរួចចាកផុតពីរបបកាប់សម្លាប់ខ្មែរក្រហមនៅថ្ងៃទី៧មករាឆ្នាំ១៩៧៩។ ក្រោយថ្ងៃរំដោះ៧មករា, ជីវិតជាតិនិងប្រជាជនរួមនឹងសាសនាបានរស់រានមានជីវិតសាឡើងវិញ។ គណបក្សប្រជាជនកម្ពុជា នៅបានចូលរួមបង្កើតព្រះរាជាណាចក្រទី២ សាជាថ្មីម្តងទៀត បន្ទាប់របបរាជានិយមត្រូវបានផ្តួលរំលំ ក្នុងរដ្ឋប្រហារថ្ងៃទី១៨ មីនា ឆ្នាំ១៩៧០។ ថ្នាក់ដឹកនាំគណបក្សនាពេលនោះបានចូលរួមតស៊ូក្នុងព្រៃម៉ាគី តាមការអំពាវនាវរបស់អង្គអតីតព្រះមហាក្សត្រ។ ក្រោយកិច្ចព្រមព្រៀងទីក្រុងប៉ារីស ឆ្នាំ១៩៩១, គណបក្សប្រជាជនកម្ពុជា បានចូលរួមបង្កើតរបបរាជានិយមអាស្រ័យរដ្ឋធម្មនុញ្ញឡើងវិញ និងបន្តគោរពប្តូរផ្តាច់ការពារយ៉ាងម៉ឺងម៉ាត់រហូតមកដល់បច្ចុប្បន្ន និងតទៅអនាគត។ បណ្ឌិត ហ៊ុន ម៉ាណែត បានថ្លែងថា “សម័យតេជោសន្តិភាព” ដែលបានចាប់កកើតឡើងពីចុងឆ្នាំ១៩៩៨ ក្រោមនយោបាយឈ្នះ-ឈ្នះ បានធ្វើឱ្យកម្ពុជាមានសន្តិភាពពេញលេញ, ឯកភាព…