ទំនប់បង្អៀរទឹកព្រែកកំចាយខេត្តកំពត តម្លៃ២លានមួយសែនដុល្លារ បានបើកការដ្ឋានសាងសង់ហើយ។ ពិធីបើកការដ្ឋានសាងសង់ទំនប់បង្ហៀរទឹកព្រែកំចាយបានធ្វើនៅថ្ងៃទី១០ ខែធ្នូ ឆ្នាំ២០២២ ក្រោមវត្តមានរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍លោក អ៊ុំ សុថា។ ទំនប់បង្ហៀរនេះ ត្រូវគេរាយការណ៍ថាមានប្រយោជន៍ច្រើន ក្នុងការជួយទប់ទឹកប្រៃមិនឱ្យហូរចូលព្រែកដែលធ្វើឱ្យខូចទឹកសាប និងអាចរក្សាជាអាងស្តុកទឹកសាប ដែលអាចបូមប្រើប្រាស់បានប្រមាណ ១សែនម៉ែត្រត្រីគុណក្នុង១ថ្ងៃ និងអាចផ្គត់ផ្គង់ទឹក ២៤ម៉ោងលើ២៤មោង។ គម្រោងរបស់រាជរដ្ឋាភិបាលដែលផ្តល់អត្ថប្រយោជន៍ពហុវិស័យមួយនេះ បានប្រើប្រាស់ថវិកា ជំនួយឧបត្ថម្ភពីក្រុមហ៊ុនស៊ីណូហាយដ្រូកំចាយ។ ការសាងសង់គ្រោងនឹងបញ្ចប់រួចរាល់នៅថ្ងៃទី៣០ ខែមិថុនា ឆ្នាំ២០២៣។ អគ្គនាយកក្រុមហ៊ុន ស៊ីណូហាយដ្រូកំចាយ លោកវ៉ាងទីហ្វេង Wang Tiefeng បានបញ្ជាក់ថា សំណង់ទំនប់បង្ហៀរនេះ មានប្រវែង៧៧ម៉ែត្រ, មានកម្ពស់ ១ម៉ែត្រ៨តឹកទទឹងខ្នងទំនប់១ម៉ែត្រ កន្លះ, ជើងទេរ៥ម៉ែត្រ ជញ្ជាំងការពារច្រាំងប្រវែង៥២ម៉ែត្រ និងរបងការពារប្រវែង៥២ម៉ែត្រ ព្រមទាំងផ្លូវសម្រាប់មច្ឆាឆ្លងកាត់ដែលមានទំហំ ១.៨៤៨ម៉ែតការ៉េ។ ក្រុមអ្នកជំនាញបញ្ជាក់ថា បន្ទាប់ពីបានកសាងរួចរាល់គឺគេអាចរក្វាជាអាងស្តុកទឹកសម្រាប់ បូមប្រើប្រាស់ប្រមាណ១០ម៉ឺនម៉ែត្រគូបក្នុងមួយថ្ងៃ, ការផ្ដល់នូវផ្លូវចរាចរណ៍សម្រាប់មច្ឆជាតិ និងការពារប្រព័ន្ធអេកូឡូស៊ីបរិស្ថានក្នុងតំបន់និងរចនាបទទំនប់នេះ អាចបន្ថែមនូវចំនុចទាក់ទាញផ្នែកទេសចរណ៍មួយថែមទៀតសម្រាប់ខេត្តកំពត។

កិច្ចសន្យាសាងសង់ផ្លូវល្បឿនលឿន ភ្នំពេញ-បាវិត នឹងគ្រោងចុះហត្ថលេខានៅដើមឆ្នាំ២០២៣ ដើម្បីអនុញ្ញាតឱ្យក្រុមហ៊ុនសាជីវកម្មស្ពានថ្នល់ចិន CRBC កសាងថ្នល់ល្បឿនលឿនលើកទី២។ ក្រុមហ៊ុនសាជីវកម្មស្ពានថ្នល់ចិន CRBC គឺជាក្រុមហ៊ុនដែលទទួលបានជោគជ័យ ក្នុងការកសាងផ្លូវល្បឿនលឿនភ្នំពេញ-ខេត្តព្រះសីហនុតម្លៃ២ពាន់លានដុល្លារកន្លងមកនេះ។ ទេសរដ្ឋមន្ត្រី ស៊ុន ចាន់ថុល កាលពីថ្ងៃទី១០ ខែធ្នូ ឆ្នាំ២០២២ បានដឹកនាំកិច្ចប្រជុំ ដើម្បីពិនិត្យពិភាក្សាបញ្ចប់ លើសេចក្តីព្រាងនៃកិច្ចសន្យាភាពជាដៃគូរវាងរដ្ឋ និងឯកជន នៃគម្រោងហេដ្ឋារចនាសម្ព័ន្ធផ្លូវ ល្បឿនលឿនតភ្ជាប់ពី រាជធានីភ្នំពេញ ទៅក្រុងបាវិត ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ និងតំនាងក្រុមហ៊ុនសាជីវកម្មស្ពានថ្នល់ចិន CRBC ។ ផ្លូវល្បឿនលឿនទី២ភ្នំពេញ បាវិត តម្លៃ១ពាន់៦៣៨លានដុល្លារ នឹងគ្រោងបើកការដ្ឋានសាង សង់នៅក្នុងឆ្នាំ២០២៣ និងគ្រោងបញ្ចប់នៅចុងឆ្នាំ២០២៦ ឬដើមឆ្នាំ២០២៧។ កម្ពុជាគ្រោង នឹងរៀបចំកសាងផ្លូវល្បឿនលឿនមួយទៀតពីភ្នំពេញទៅខេត្តសៀមរាបដែលនឹងក្លាយជា ផ្លូវល្បឿនលឿនជាលើកទី៣របស់កម្ពុជា។

ស្ពានឆ្លងកាត់ទន្លេមេគង្គខេត្តក្រចេះ និងគម្រោងលើកកម្ពស់គុណភាពផ្លូវជាតិលេខ៧ គ្រោងនឹងរៀបចំបើកការដ្ឋាននាដើមខែមករាឆ្នាំ២០២៣។ រដ្ឋលេខាធិការក្រសួងសាធារណការ និងដឹកជញ្ជូន លោក លឹម ស៊ីដេនីន នាព្រឹកថ្ងៃទី១២ ខែធ្នូ ឆ្នាំ ២០២២ បានបញ្ជាក់ជុំវិញគម្រោងបើកការដ្ឋានសំណង់ស្ពាន និងការដ្ឋានផ្លូវថ្នល់នាភាពឥសានប្រទេសនេះ ដែលនឹងប្រព្រឹត្តទៅក្រោមអធិបតីភាពសម្តេចតេជោ ហ៊ុន សែន។ ការដ្ឋាននៃគម្រោងសាងសង់ស្ពានទន្លេមេគង្គ ខេត្តក្រចេះ និងគម្រោងលើកកម្ពស់គុណភាពផ្លូវជាតិលេខ៧ ចាប់ពីស្គន់ដល់ក្រុងកំពង់ចាម គឺជាហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន។ គួរបញ្ជាក់ថាកាលពីសប្តាហ៍កន្លងមកនេះ, កម្ពុជានៅបានទទួលជំនួយឥណទានសម្បទានពី រដ្ឋាភិបាលកូរ៉េខាងត្បូងតម្លៃសរុប១ពាន់៨១៥លាន៩០ម៉ឺន៩ពាន់ដុល្លារ ដែលក្នុងនោះរួមមានទាំងជំនួយកសាងស្ពាន «មិត្តភាពកម្ពុជា សាធារណរដ្ឋកូរ៉េ» ពីផ្សារចាស់ទៅ ជ្រោយចង្វារ និងពីជ្រោយចង្វារទៅអរិយក្សត្រផងដែរ។ កម្ពុជាទើបតែក្នុងសម័យដឹកនាំរបស់សម្តេចតេជោ ហ៊ុន សែន ដែលបានជួយឱ្យប្រទេសអស់ សង្គ្រាម និងមានសន្តិភាពពិតប្រាកដក្រោមនយោបាយឈ្នះឈ្នះនេះទេ ទើបមានឱកាស កសាង និងអភិវឌ្ឍន៍ប្រទេសបានលឿនទៅមុខ ដែលមិនធ្លាប់មានក្នុងសម័យអតីតកាល ឡើយ។

ការវាយកុដិបុរាណ អាយុជិត១០០ឆ្នាំចំនួន៣កន្លែងក្នុងវត្តឧណ្ណាលោម បានប្រញាប់ឱ្យរដ្ឋមន្ត្រីក្រសួង វប្បធម៌ និងវិចិត្រសិល្បៈ បានប្រញាប់ថ្វាយលិខិតទៅសម្តេចមហាសង្ឃរាជ ទេព វង្ស ដើម្បីរកការបញ្ឈប់សកម្មភាពនេះ។ យោងតាមលិខិតរដ្ឋមន្ត្រីក្រសួងវប្បធម៌លោកជំទាវ ភឿង សកុណា កុដិបុរាណចំនួន ៣ គឺកុដ្ឋលេខ៤៣, លេខ៤៤ និងលេខ៤៥ ដែលបានកសាងនាកំឡុងឆ្នាំ១៩៣០ ត្រូវបានគេរុះរើ និងវាយកម្ទេច គឺដើម្បីកសាងព្រះចេតិយ។ លិខិតរបស់ក្រសួងវប្បធម៌ បានបញ្ជាក់ថាកុដិទាំបីនេះ ត្រូវបានក្រសួងបានចាត់ទុកជាសម្បត្តិបេតិកភណ្ឌជាតិ និងបានចុះបញ្ជីរបស់មន្ទីរវប្បធម៌ និងវិចិត្រសិល្បៈ រាជធានីភ្នំពេញ កាលពីឆ្នាំ២០១៧ ។ លិខិតរបស់រដ្ឋមន្ត្រីក្រសួងវប្បធម៌បានសរសេរថា « ក្រសួងមានការសោកស្តាយជាខ្លាំង…» ចំពោះករណីវាយកម្ទេចកុដិទាំង៣នោះ។ ក្រសួងបានថ្លែងថាការវាយកុដ្ឋិបុរាណនោះ នាំឱ្យមានការរិះគន់យ៉ាងផុសផុលពីមហាជនតាមបណ្តាញសង្គម។ លោកស្រីរដ្ឋមន្ត្រីបានទូលថ្វាយសម្តេព្រះមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស ថា «សកម្មភាពនៃការរុះរើ និងវាយកម្ទេចកុដិចាស់ ដោយពុំបានសិក្សាពិគ្រោះ និងការអនុញ្ញាតពី ក្រសួងវប្បធម៌ និងវិចិត្រសិល្បៈ គឺជាទង្វើដែលផ្ទុយនឹងច្បាប់ ព្រមទាំងសារាចររបស់រាជរដ្ឋាភិបាលដែលជាឯកសារគតិយុត្តិជាធរមាន»។ រដ្ឋមន្ត្រីក្រសួងវប្បធម៌បានថ្លែងថា « រាល់ការជួសជុលព្រះវិហារ ឬសំណង់អគារបេតិកភណ្ឌនានាត្រូវស្នើសុំការអនុញ្ញាតពីក្រសួងវប្បធម៌ និងវិចិត្រសិល្បៈ ដែលជាក្រសួងជំនាញ ។…

បណ្ឌិត ហ៊ុន ម៉ាណែត បានថ្លែងនៅថ្ងៃទី១២ ធ្នូថា «ធនធានមនុស្សគឺជាទ្រព្យដ៏សំខាន់ និងចាំបាច់បំផុតសម្រាប់ដំណើរការកសាងអភិវឌ្ឍប្រទេសឱ្យមានការរីកចម្រើន»។ ប្រសាសន៍ថ្លែងនេះបានធ្វើឡើងក្នុងឱកាសអញ្ជើញចូលរួមជាអធិបតីក្នុងពិធីប្រគល់សញ្ញាបត្រជូននិស្សិតជាជ័យលាភីនៅសាកលវិទ្យាល័យគ្រប់គ្រង និងសេដ្ឋកិច្ច (UME) នៃសាខាខេត្តបាត់ដំបង។ អប្សរាណិតរាយការណ៍

សម្តេចតេជោ ហ៊ុន សែន បានជួបសំណេះសំណាលជាមួយប្រជាពលរដ្ឋខ្មែរដែលធ្វើដំណើរ មកពីបណ្តាប្រទេសនានាក្នុងទ្វីបអឺរ៉ុបរង់ចាំទទួលស្វាគមន៍សម្តេចដែលអញ្ជើញមកដល់ សណ្ឋាគារក្នុងប្រទេសបែលហ្ស៊ីក។ សម្តេចបានចាកចេញពីកម្ពុជាកាលពីម៉ោង១០យប់ថ្ងៃទី១១ ធ្នូ ឆ្នាំ២០២ ម៉ោងនៅកម្ពុជា និងបានអញ្ជើញដល់ប្រទេសបែលហ្ស៊ីកនាវេលាម៉ោង៩កន្លះ ព្រឹកថ្ងៃទី១២ ធ្នូ។ ម៉ោងរវាងកម្ពុជា និងប្រទេសបែលហ្ស៊ីកខុសគ្នា៦ម៉ោង។ នេះជាទិដ្ឋភាព នៃការអញ្ជើញដល់របស់សម្តច និងការសំណេះខ្លះ ពេលដែលសម្តេចទើបមកដល់សណ្ឋាគារ វត្តមានរបស់សម្តេចក្នុងប្រទេសបែលហ្ស៊ីកក្នុងសប្តាហ៍នេះ គឺដើម្បីការធ្វើជាសហប្រធាន ជាមួយលោក Charles Michel ឆាល មីស្ហែលល ប្រធានក្រុមប្រឹក្សាអឺរ៉ុប ក្នុងវេទិកានៃកិច្ច ប្រជុំកំពូលរំលឹកខួបអនុស្សាវរីយ៍លើកទី៤៥ នៃទំនាក់ទំនងដៃគូសន្ទនារវាងអាស៊ាន-សហភាពអឺរ៉ុប។