តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ បានកើន ឡើងចំនួន ២៨៨ករណី បើប្រៀបធៀបនឹងតួលេខឆ្លងសរុបកាលពីថ្ងៃម្សិលមិញ ។ តួលេខឆ្លងថ្មីកូវីដ១៩ ក្នុងរយៈពេល ២៤ម៉ោងមកនេះមានចំនួន ៨ពាន់ ៩១២ករណី ដែលបានឆ្លងលើប្រទេសចំនួន ៩ នៅអាស៊ាន រួមមានប្រទេសឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ម៉ា, សឹង្ហបុរី, ប្រុយណេ, ហ្វីលីពីន, ឡាវ និង ប្រទេសកម្ពុជា ។ ប្រទេសឥណ្ឌូនេស៊ី ជាប្រទេសដែលមានតួ លេខឆ្លងច្រើនជាងគេដដែល ដែលមានចំនួន ២ពាន់ ៩៧៧ករណី ។ តួលេខឆ្លងតិចជាងគេ គឺប្រទេសមីយ៉ាន់ម៉ា ដែលមានចំនួន ១២ករណី ។ ប្រទេសថៃ ជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ៥៧នាក់ ក្នុងនោះប្រទេសឥណ្ឌូណេស៊ី មានមនុស្សស្លាប់ចំនួន ២៧នាក់ ជាតួលេខស្លាប់…

ក្នុងរយៈពេល ២៤ម៉ោងចុងក្រោយនេះ ការឆ្លងថ្មីកូវីដ១៩មានចំនួន ២០ករណី ដែលកើនឡើងថែមទៀតចំនួន ៦ករណី បើប្រៀបធៀបនឹងចំនួនឆ្លងកាលពីម្សិលមិញ។ តួលេខឆ្លងកូវីដ១៩ កាលពីម្សិលមិញមានចំនួន ១៤ករណី ដែលសកម្មភាពកម្រើកសាឡើងវិញនេះ គឺជាតួលេខកើនខ្ពស់គួរឲ្យកត់សម្គាល់ ក្នុងរយៈពេលជាង ២ខែកន្លងមកនេះ ។ យោងតាមក្រសួងសុខាភិបាល ការឆ្លងទាំង ១៩ករណីវេលា ២៤ម៉ោងចុងក្រោយនេះ គឺកើតឡើងក្នុងរង្វង់សហគមន៍ទាំងអស់ ។ កម្ពុជានៅតែបន្តការចាក់វ៉ាក់សាំងកូវីដ១៩ ជាដដែល ដើម្បីជម្រុញភាពស៊ាំក្នុងសហគមន៍ ។ តួលេខអ្នកចាក់វ៉ាក់សាំងដូសមូលដ្ឋានទូទាំងប្រទេស គិតត្រឹមថ្ងៃទី៩ ធ្នូ បានកើនដល់ចំនួន ១៥លាន ២៣ម៉ឺន ១ពាន់ ៣៦៦នាក់ ដែលស្មើនឹង ៩៥,២០ភាគរយ ៕

ពលរដ្ឋខ្មែរដែលរស់នៅក្នុងទ្វីបអឺរ៉ុប បានបន្តផ្ញើសារជាច្រើនមកថែមទៀតនៅថ្ងៃនេះ ដែលបញ្ជាក់ការស្វាគមន៍រង់ចាំទទួលសម្តេចតេជោ ហ៊ុន សែន ដែលនឹងអញ្ជើញដល់ទ្វីបបអឺរ៉ុប សប្តាហ៍ក្រោយនេះហើយ។ សម្តេចតេជោ ហ៊ុន សែន នឹងអញ្ជើញចូលរួមក្នុងកិច្ចប្រជុំកំពូលអាស៊ីអឺរ៉ុបលើកទី៤៥ដែលនឹងប្រព្រឹត្តទៅនៅថ្ងៃទី១៤ ធ្នូ ក្នុងក្រុងប្រុចសែល នៃប្រទេសបែលហ្ស៊ីក។ ពលរដ្ឋនិងនិស្សិតខ្មែរក្នុងប្រទេសបារាំង, អាល្លឹម៉ង់ និងប្រទេសបែកហ្ស៊ីក បានថ្លែងថា គេប្តេជ្ញានឹងទុកចោលការងារនៅថ្ងៃដែលសម្តេចអញ្ជើញដល់នោះ ដើម្បីរង់ចាំការទទួល សម្តេច និងគណៈប្រតិភូ។

មន្ត្រីកម្ពុជា និងមន្ត្រីសហរដ្ឋអាមេរិក បានប្ដេជ្ញាផ្លាស់ប្ដូរបទពិសោធន៍ ក្នុងការដោះស្រាយវិវាទការងារក្រៅប្រព័ន្ធតុលាការ ខណៈភាពចម្រូងចម្រាសរវាងអតីតកម្មករធ្វើបាតុកម្មនៅក្រុមហ៊ុនកាស៊ីណូណាហ្គា នៅមិនទាន់អាចដោះស្រាយបាននៅឡើយ។ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ីត សំហេង និង ប្រធានបណ្ឌិត្យសភាជាតិអាជា្ញកណ្តាល សហរដ្ឋអាមេរិកលោក អាឡាន់ ស៊ីម៉ូណែត Alan Symonette កាលពីរសៀលថ្ងៃទី៨ ធ្នូ ឆ្នាំ២០២២ បានជួបពិភាក្សាគ្នាផ្លាស់ប្តូរបទពិសោធន៍លើករណីវិវាទការងារក្រៅប្រព័ន្ធតុលាការនេះ និងបានជជែកលើបញ្ហាសំខាន់មួយចំនួន។ ជំនួបពិភាក្សាបានផ្តោត លើការបញ្ជូនសំណុំរឿងទៅក្រុមប្រឹក្សាអាជ្ញាកណ្តាល, ការពង្រីកសេវាកម្មនៃក្រុមប្រឹក្សា អាជ្ញាកណ្តាល, នីតិវិធីដោះស្រាយវិវាទ ក៏ដូចជាដើម្បីពិនិត្យលើលទ្ធភាពក្នុងការកសាងកិច្ចសហប្រតិបត្តិការ និងទំនាក់ទំនងភាពជាដៃគូរវាងបណ្ឌិត្យសភាជាតិអាជ្ញាកណ្តាល ជាមួយនឹងក្រសួងការងារ និងបណ្តុះបណ្តាលវិជ្ជាជីវៈផងដែរ។ ក្នុងជំនួបពិភាក្សានោះ រដ្ឋមន្ត្រីក្រសួងការងារបានលើកឡើងជុំវិញស្ថានការណ៍ នៃវិស័យការងាររបស់កម្ពុជា និងការប្តេជ្ញារបស់កម្ពុជាក្នុងការអនុវត្តច្បាប់។ បណ្ឌិត្យសភាជាតិអាជ្ញាកណ្តាលសហរដ្ឋអាមេរិកបានបញ្ជាក់ជុំវិញកិច្ចសហការជាមួយ ក្រុមប្រឹក្សាអាជ្ញាកណ្តាលកម្ពុជា ក៏ដូចជាក្រសួងការងារ និងបណ្ដុះបណ្ដាលវិជ្ជាជីវៈ ក្នុងការដោះស្រាយវិវាទការងារក្រៅប្រព័ន្ធតុលាការនៅប្រទេសកម្ពុជាជាបន្តថែមទៀត។

រដ្ឋមន្ត្រីក្រសួងមហាផ្ទៃបានថ្លែងថា គេបានរកឃើញនូវភាពមិនប្រក្រតីរបស់មន្ដ្រីក្រុមប្រឹក្សាឃុំសង្កាត់មួយចំនួន ពាក់ព័ន្ធការអនុវត្តកម្មវិធីឧបត្ថម្ភសាច់ប្រាក់ជូនប្រជាពលរដ្ឋ។ សម្ដេចក្រឡាហោម ស ខេង ក្នុងលិខិតមួយផ្ញើជូនអភិបាលរាជធានី-ខេត្ត ដែលបណ្ដាញព័ត៌មាន ទទួលបាននៅថ្ងៃទី០៩ ខែធ្នូ បានឲ្យដឹងថា ភាពមិនប្រក្រតីដែលត្រូវបានរកឃើញនោះ រួមមាន ការយកកម្រៃសេវាពីប្រជាពលរដ្ឋដែលមកផ្ទៀងផ្ទាត់ឈ្មោះទទួលប្រាក់ឧបត្ថម្ភ, ការឃុបឃិតនិងបន្លំយកប័ណ្ណសមធម៌ និងកាតវីង ដើម្បីដកយកថវិការបស់អ្នកទទួលផល ពីកម្មវិធីជាដើម។ លិខិតរបស់រដ្ឋមន្ត្រីក្រសួងមហាផ្ទៃមិនបានបញ្ជាក់ចំឈ្មោះថាអំពើមិនប្រក្រីនោះ ជារបស់បុគ្គលណាមួយឡើយ ប៉ុន្តែសម្តេចក្រឡាហោម ស ខេង បានណែនាំដល់រដ្ឋបាលរាជធានី-ខេត្ត នូវការងារចាំបាច់មួយចំនួន ដើម្បីធានាបាននូវ ប្រសិទ្ធភាព តម្លាភាព គណនេយ្យភាព និងសុចរិតភាពក្នុងការអនុវត្តកម្មវិធីជាតិជំនួយសង្គម ជាពិសេសកម្មវិធីឧបត្ថម្ភសាច់ប្រាក់របស់រាជរដ្ឋាភិបាលកម្ពុជា។ គួរបញ្ជាក់ថាថ្មីៗកន្លងមកនេះ, អង្គភាពប្រឆាំងនឹងអំពើពុករលួយ បានចាប់ខ្លួនស្មៀនសង្កាត់ម្នាក់ក្នុងសង្កាត់តាខ្មៅខេត្តកណ្តាល ក្រោយការរកឃើញ អំពើពុករលួយកេងបន្លំប្រាក់ជាង៧០លានរៀល ដែលជាប្រាក់ជំនួយឧបត្ថម្ភពលរដ្ឋក្រីក្រ ក្នុងពេលជួបវិបត្តិឆ្លងកូវីដ១៩។

ប្រេសិតពិសេសរបស់ប្រធានអាស៊ានទទួលបន្ទុកបញ្ហាមីយ៉ាន់ម៉ាលោក ប្រាក់ សុខុន បានលុបចោលគម្រោងធ្វើទស្សនកិច្ចលើកទី៣ នៅប្រទេសមីយ៉ាន់ម៉ា។ មន្ត្រីនាំពាក្យក្រសួងការបរទេសកម្ពុជាលោក ជុំ សុន្ទរី បានថ្លែងនៅថ្ងៃទី៩ ខែធ្នូ ឆ្នាំ២០២២នេះថា ការលុបចោលដំណើរទស្សនកិច្ចរបស់លោកឧបនាយករដ្ឋមន្ត្រី ដោយសារតែជាប់រវល់នឹងកិច្ចប្រជុំកំពូលរំលឹក ខួបអាស៊ាននិងសហភាពអឺរ៉ុប។ លោក ប្រាក់ សុខុន ដែលជារដ្ឋមន្ត្រីក្រសួងការបរទេសកម្ពុជា ក្នុងឆ្នាំ២០២២នេះ បានធ្វើទស្សនកិច្ចការងារចំនួន២លើករួចមកហើយក្នុងប្រទេសមីយ៉ាន់ម៉ា។ ទស្សនកិច្ចលើកទី១ បានធ្វើឡើងនៅថ្ងៃទី២១ ដល់ថ្ងៃទី២៣ ខែមីនា និងដំណើរទស្សនកិច្ចលើកទី២ បានធ្វើរវាងពីថ្ងៃទី២៩ ខែមិថុនា ដល់ថ្ងៃទី០៣ ខែកក្កដា។ ប៉ុន្តែដំណើរទស្សនកិច្ច លើកទី៣ដែលគ្រោងធ្វើនៅចុងឆ្នាំនេះ នឹងមិនត្រូវបានធ្វើឡើយ។ មន្ត្រីនាំពាក្យក្រសួងការបរទេសកម្ពុជា បានបញ្ជាក់ថា «ដោយសារតែមានឧបសគ្គពេលវេលា ជាពិសេសកិច្ចប្រជុំកំពូលរំលឹកខួបអាស៊ាន និងសហភាពអឺរ៉ុប នៅទីក្រុងប្រ៊ុចសែល នាពេលខាងមុខនេះ ទើបប្រេសិតពិសេសប្រធានអាស៊ាន មិនអាចសម្រេចតាមផែនការ ដែលគ្រោងទុកនោះឡើយ»។

កម្ពុជាបានចុះហត្ថលេខាទទួលឥណទានសម្បទានពីកូរ៉េខាងត្បូងនៅថ្ងៃទី៩ ធ្នូ ឆ្នាំ២០២២ ក្នុងនោះរួមមានទាំងឥណទានថវិកាសម្រាប់កសាងស្ពាន «មិត្តភាពកម្ពុជា សាធារណរដ្ឋកូរ៉េ» ពីផ្សារចាស់ទៅ ជ្រោយចង្វារ និងពីជ្រោយចង្វារទៅអរិយក្សត្រផងដែរ។ ការចុះហត្ថលេខាទទួលយកឥណទានសម្បទានកូរ៉េខាងត្បូងតម្លៃសរុប១ពាន់៨១៥លាន៩០ម៉ឺន៩ពាន់ដុល្លារ នៃជំនួយជួយអភិវឌ្ឍន៍សេដ្ឋកិច្ចកម្ពុជានេះ បានចុះហត្ថលេខាទទួលយកក្នុងពិធីមួយនាថ្ងៃសុក្រ នៅវិមានសន្តិភាព ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន។ នៅចំថ្ងៃដែលមានការចុះហត្ថលេខាទទួលជំនួយនោះ មន្ត្រីក្រសួងសាធារណការបានជូនដំណឹងថាដំណើរការសាងសង់ស្ពានឆ្លងកាត់ទន្លេនាកណ្តាលរាជធានីភ្នំពេញ នឹងចាប់ផ្តើមនាចុងឆ្នាំ២០២៣។ អប្សរាណិតរាយការណ៍