តម្លៃប្រេងសាំង នៅតែបន្ដកើនឡើងថែមទៀត សម្រាប់ការលក់រយៈពេល១០ ថ្ងៃខាងមុខ នេះ។ យោងតាមក្រសួងពាណិជ្ជកម្ម តម្លៃប្រេងឥន្ធនៈ សម្រាប់ការលក់ចាប់ពីថ្ងៃទី១១រហូត ដល់ថ្ងៃទី២០ ខែឧសភា ឆ្នាំ២០២២នេះ គឺប្រេងសាំងធម្មតា មានតម្លៃ៥ពាន់៥៥០រៀលក្នុង១ លីត្រ ដែលតម្លៃ នេះបានកើនឡើង ៣០០ រៀល បើធៀបទៅការលក់រយៈ ពេល១០ ថ្ងៃ មុន…ចំណែក ប្រេងម៉ាស៊ូតវិញ មានតម្លៃ៥ពាន់៨០០រៀល ក្នុង១លីត្រ មានការកើនឡើង ចំនួន២០០រៀល បើធៀបទៅនឹងការលក់រយៈពេល១០ ថ្ងៃមុន។

ខេត្តសៀមរាប បានបង្កើតសារមន្ទីរកុលាលភាជន៍ដំបូងគេបង្អស់មួយនៅក្នុងប្រទេស ដែល បានសាងសង់ឡើងនៅលើទីតាំងស្ថានីយបុរាណវិទ្យាផ្ទាល់ ។ សារមន្ទីរកុលាលភាជន៍ នោះ គឺជាមជ្ឈមណ្ឌលតាំងបង្ហាញកុលាលភាជន៍ច្រើនប្រភេទ ដែលនឹងអាចប្រាប់ឱ្យពលរដ្ឋជំនាន់ ក្រោយដឹងបន្ថែមពីជីវភាព របៀបរបបរស់នៅប្រចាំថ្ងៃ ពាណិជ្ជកម្ម និងការវិវឌ្ឍនៃសិប្បកម្ម កុលាល ភាជន៍របស់បុព្វបុរសខ្មែរសម័យអង្គរបាន ។

តួលេខនៃចំនួនអ្នកធ្វើដំណើរតាមផ្លូវអាកាស​មកកម្ពុជាបានកើនឡើងដូចដើមវិញហើយ យោងតាមតួលេខមួយកាលពីខែមេសាកន្លងមកនេះ។ មន្ត្រីនាំពាក្យអាកាសចរណ៍ស៊ីវិល លោក ស៊ិន ចាន់សិរីវុត្ថា ត្រូវបានគេដកស្រង់សម្តីដែលបញ្ជាក់ថាក្នុងរយៈពេលពេញមួយខែ មេសាឆ្នាំ២០២២កន្លងមកនេះ តួលេខអ្នកធ្វើដំណើរតាមផ្លូវអាកាស តាមរយៈអាកាសយានដ្ឋានអន្តរជាតិទាំង៣របស់កម្ពុជា មានចំនួនជាង១២ម៉ឺននាក់ ដែលកើនឡើងជាង៥០០% បើប្រៀបធៀបរយៈពេលខែមេសានេះទៅនឹងខែមេសាឆ្នាំ២០២១។