តុលាការបានផ្តន្ទាទោស សម រង្ស៉ី និងមេខ្លោងចំនួន៦នាក់ឱ្យជាប់ក្នុងពន្ធនាគារចំនួន១០ឆ្នាំ នៅក្នុងផែនការផ្តួលរំលំរដ្ឋាភិបាល។ អ្នករួមគំនិតចំនួន១៤នាក់ ក៏ត្រូវតុលាការកាត់ ទោសឱ្យ ជាប់គុកម្នាក់ៗចំនួន៥ឆ្នាំ ប៉ុន្តែពួកគេត្រូវបានអនុញ្ញាតព្យួរទោសមួយចំនួន។

តួលេខឆ្លងកូវីដ១៩ ក្នុងប្រទេសអាស៊ាន ក្នុងរយៈពេល ២៤ម៉ោងចុងក្រោយនេះ មានចំនួន ២៦ម៉ឺន ១ពាន់ ៤០៣ករណី និងការស្លាប់ថ្មីមានចំនួន ៦១០នាក់ ។ តួលេខឆ្លងនៅថ្ងៃនេះ មាន ការកើនឡើងចំនួន ៦៣ករណី និងការស្លាប់មានការកើនឡើងចំនួន ១៣៦នាក់ បើប្រៀប ធៀបជាមួយនឹងការឆ្លង និងការស្លាប់កាលពីម្សិលមិញ ។ ក្នុងចំណោមតួលេខឆ្លងថ្មីនៃប្រទេសទាំង១០ នៅថ្ងៃនេះ ប្រទេសវៀតណាម នៅតែជាប្រទេស មានតួលេខឆ្លងច្រើនជាងគេបង្អស់ដដែល ។

តួលេខអ្នកចាក់វ៉ាក់សាំងដូសទី៤ នៅថ្ងៃនេះមានចំនួនកើនឡើង បើប្រៀបធៀបនឹងម្សិលមិញ ។ យោងតាមក្រសួងសុខាភិបាលតួលេខអ្នកចាក់វ៉ាក់សាំងដូសទី៤ ក្នុងរយៈពេល២៤ ម៉ោង កន្លងមកនេះមានចំនួន ៥ពាន់ ៨៦៩នាក់ ដែលជាតួលេខចាក់កើនឡើងជាងម្សិលមិញចំនួន ៦៨៨នាក់ ។ គិតត្រឹមថ្ងៃនេះតួលេខអ្នកចាក់វ៉ាក់សាំងដូសទី៤ រយៈពេល ៦៣ថ្ងៃមកនេះ ទើប បានចំនួនសរុប ១លាន ១០ម៉ឺន ៣ពាន់ ១៨៤នាក់ ។

តួលេខមនុស្សឆ្លងជំងឺកូវីដ១៩ក្នុងប្រទេសកម្ពុជាបានថយចុះទៀតនៅថ្ងៃនេះ បើទោះបីជាស្ថិត ក្នុងខ្ទង់ជាង១០០ករណីក៏ដោយ។ យោងតាមក្រសួងសុខាភិបាលក្នុងរយ:ពេល២៤ម៉ោងកន្លងមកនេះការឆ្លងថ្មីមានចំនួន១៣២ករណី ដែលថយចុះ៨ករណីបើប្រៀបធៀបនឹងម្សិលមិញ។ ការឆ្លងចូលក្នុងសហគមន៍ នៅថ្ងៃនេះត្រូវគេ រាយការណ៍ថាមានចំនួន១២៤ករណី, ចំណែក៨ ករណីទៀត គឺជាការឆ្លងនាំមកពីក្រៅប្រទេស ។ ការស្លាប់សរុបមានចំនួន៣ពាន់៤៩នាក់ ជាដដែល។

បណ្ឌិត ហ៊ុន ម៉ាណែត ដែលជាតំណាងដ៏ខ្ពង់ខ្ពស់របស់សម្តេចតេជោ ហ៊ុន សែន បានអញ្ជើញ ចូលរួមសម្ពោធដាក់ឱ្យប្រើប្រាស់ផ្លូវបេតុងនិងផ្លូវកៅស៊ូ និងការបើកការដ្ឋានសាងសង់ស្ពាន បេតុង៩កន្លែង នៅក្នុងស្រុកស្រីសន្ធរ ខេត្តកំពង់ចាមនៅថ្ងៃទី១៧មីនានេះ។ បណ្ឌិតហ៊ុនម៉ាណែតបានថ្លែងថាក្រោមដំបូលសុខសន្តិភាព កម្ពុជាមានលទ្ធភាពកសាងសមិទ្ធ ផលផ្លូវស្ពាន ដែលបានក្លាយជាប្រយោជន៍ដ៏ធំធេងសម្រាប់ប្រជាជនកម្ពុជា។

រដ្ឋមន្រ្តីការបរទេសអារ៉ាប៊ីសាអូឌីត ដែលជាសែរាជវង្ស គ្រោងនឹងយាងមកបំពេញទស្សនកិច្ច ផ្លូវការនៅកម្ពុជានៅថ្ងៃសុក្រស្អែកនេះ។  ព្រះអង្គម្ចាស់ ហ្វាសាល់ ប៊ីន ហ្វាហាន់ អាល់សូដ នឹងដឹកនាំគណៈប្រតិភូអារ៉ាប៊ីសាអូឌីត យាងមកបំពេញទស្សនកិច្ចផ្លូវការ នៅកម្ពុជា នៅថ្ងៃទី ១៨ ខែមីនា ឆ្នាំ២០២២ ដែលព្រះរាជដំណើរទស្សនកិច្ចនេះ គឺតបតាមការយាងអញ្ជើញរបស់ រដ្ឋមន្រ្តីការបរទេសកម្ពុជាលោក​ ប្រាក់ សុខុន។

ប្រេងសាំងបានកើនឡើងតម្លៃហើយ ដែលការកើនតម្លៃនេះ ត្រូវគេបន្ទោសថាគឺដោយសារ  សង្គ្រាមក្នុងប្រទេសអ៊ុយក្រែនបង្កឡើងដោយប្រទេសរុស្ស៊ី។ សម្តេចនាយករដ្ឋមន្ត្រីនៅថ្ងៃទី ១៧មីនា បានបញ្ជាក់បន្ថែមជុំវិញមូលហេតុសាំងឡើងថ្លៃ។