សម្តេចនាយករដ្ឋមន្ត្រីកម្ពុជា បានអំពាវនាវប្រទេសម្ចាស់ជំនួយ និងដៃគូអភិវឌ្ឍ សូមបន្តគាំទ្រដល់សកម្មភាព បោសសម្អាតមីន ដើម្បីការសម្រេចបានចក្ខុវិស័យ កម្ពុជាគ្មានមីនឆ្នាំ២០២៥។ សារអំពាវនាវរបស់សម្តេចតេ ជោ ហ៊ុនសែន បានធ្វើឡើងក្នុងឱកាសខួបលើកទី២៣នៃទិវាជាតិយល់ដឹងអំពីមីនថ្ងៃ ទី២៤កុម្ភៈ ២០២២។

តួលេខឆ្លងក្នុងប្រទេសអាស៊ាន ក្នុងរយៈពេល ២៤ម៉ោងចុងក្រោយនេះ មានចំនួន ១៩ម៉ឺន ៦ពាន់ ៩៧២ករណី និងការស្លាប់ថ្មីមានចំនួន ៦៣៨នាក់ ។ តួលេខឆ្លងនៅថ្ងៃនេះ កើនឡើងចំនួន ៥ម៉ឺន ៩៥៥នាក់ និងការស្លាប់ បានកើនឡើង ២៤៨នាក់ បើប្រៀបធៀបជាមួយនឹងការឆ្លង និងការស្លាប់កាលពីថ្ងៃម្សិលមិញ ។ ក្នុងចំណោមតួលេខឆ្លងថ្មីនៃប្រទេសទាំង១០ ក្នុងរយៈពេល២៤ម៉ោងចុងក្រោយនេះ គឺប្រទេសឥណ្ឌូនេស៊ី ជាប្រទេសមានតួលេខឆ្លងច្រើនជាងគេបង្អស់ ។

តួលេខអ្នកចាក់វ៉ាក់សាំងទូទាំងប្រទេស បានកើនជាង៩០ភាគរយហើយ ក្រោយភាពស្ទុះស្ទាររបស់មនុស្សជា ច្រើនក្រោយការឃើញតួលេខឆ្លងកាន់តែកើនឡើង។ ដោយឡែកតួលេខអ្នកចាក់វ៉ាក់សាំងដូសទី៣ និងដូសទី៤ ត្រូវគេកត់សម្គាល់ថា ក៏មានចំនួនកើនឡើងជាងកាលពីម្សិលមិញផងដែរទន្ទឹមនឹងសេចក្តីអំពាវនាវរបស់ក្រសួង សុខាភិបាលនិងរាជរដ្ឋាភិបាល។

ការធ្វើអាជីវកម្មហួសហេតុលើគ្រឿងបរិក្ខានិងថ្នាំពេទ្យបង្ការការឆ្លងកូវីដ១៩ នឹងត្រូវប្រឈមការផ្តន្ទាទោសតាម ច្បាប់។ រដ្ឋលេខាធិការក្រសួងសុខាភិបាលលោកស្រី ឱ វណ្ណឌីន បានចេញសារសម្លេងព្រមាននៅថ្ងៃទី២៣កុម្ភៈ នេះទន្ទឹមនឹងសេចក្តីរាយការណ៍ជុំវិញតម្រូវការខ្លាំងក្លារបស់មនុស្សមួយចំនួនដែលបានឈរតម្រង់ជួយនៅតាមគ្លីនីកឯកជនមួយចំនួនដើម្បីទិញថ្នាំព្យាបាលជម្ងឺឆ្លងរាតត្បាតនេះ ប៉ុន្តែក្នុងនោះកន្លែងលក់ខ្លះ ត្រូវគេនិយាយថា បានឆ្លៀតតម្លើងថ្លៃលើទំនិញសម្រាប់ព្យាបាលនេះ។

កម្ពុជាក្នុងរយ:ពេល២៤ម៉ោងកន្លងមកនេះ មានអ្នកស្លាប់ដោយសារជំងឺកូវីដម្នាក់ទៀត ដែលជាករណីស្លាប់ បន្តបន្ទាប់ជាប់គ្នារយៈពេល៤ថ្ងៃមកហើយ។ យោងតាមក្រសួងសុខាភិបាល, ករណីស្លាប់៤ថ្ងៃជាប់គ្នាមកនេះ មានចំនួន៨នាក់ហើយ។ តួលេខមនុស្សស្លាប់ដោយសារកូវីដ១៩ បានកើនឡើងដល់ចំនួន៣ពាន់២៣នាក់ គិតត្រឹមថ្ងៃទី២៣កុម្ភៈ។

ប្រធានគណបក្សអនាគតជាតិ លោក ឃឹម ឡាក់គី ត្រូវបានគេរាយការណ៍ថា បានបញ្ជាក់ការចូលរួមរបស់ ខ្លួនជាមួយនឹងគណបក្ស ភ្លើងទៀន ខណៈការបោះឆ្នោតឃុំនិងសង្កាត់នឹងមកដល់រយៈពេល១០២ថ្ងៃខាង មុខនេះ។ លោកឃឹម ឡាក់គី គឺជាអតីត​តំណាងរាស្ត្រ​គណបក្សសង្ក្រោះជាតិ។

សម្តេចក្រឡាហោម ស ខេង បានថ្លែងនៅថ្ងៃម្សិលមិញនេះដាក់ចេញនូវបទបញ្ជាថែរក្សាសុវត្ថិភាពតាមមូលដ្ឋានឱ្យបាន ល្អ ប្រសើរខណៈកម្ពុជាត្រៀមនឹងរៀបចំការបោះឆ្នោតឃុំនិងសង្កាត់នាប្រមាណ៣ខែទៅមុខទៀតនេះ។ ប្រសាសន៍ រប​ស់សម្តេចក្រឡាហោម បានធ្វើឡើងនៅព្រឹកថ្ងៃទី២៣កុម្ភៈក្នុងឳកាសចូលរួបកិច្ចប្រជុំបូកសរុប លទ្ធផលការ ងារឆ្នាំ២០២១ និងការលើក ទិសដៅបន្ដរបស់ក្រសួងមហាផ្ទៃ។

រដ្ឋមន្ត្រីការបរទេសកម្ពុជាលោក ប្រាក់ សុខុន បានរួមជាមួយនឹងរដ្ឋមន្ត្រីការបរទេសពីចំនួន៣០មកពីតំបន់ អាស៊ីនិងអឺរ៉ុប ជួបពីភាក្សាក្នុងវេទិកាមួយថ្នាក់រដ្ឋមន្ត្រីសម្រាប់កិច្ចសហប្រតិបត្តិការនៅឥណ្ឌូប៉ាស៊ីហ្វិកក្នុងក្រុង ប៉ារីសនៃប្រទេសបារាំង។

រដ្ឋមន្ត្រីក្រសួងកសិកម្មលោក វេង សាខុន បានទទួលរងការស្តីបន្ទោសជាខ្លាំងពីប្រមុខដឹកនាំរាជរដ្ឋាភិបាលកម្ពុជា ដោយសារតែលោករដ្ឋមន្ត្រីកសិកម្មនោះ ជាបុគ្គលដែលធ្វើការមិនចេះសហការជាមួយនឹងក្រសួងស្ថាប័នដទៃ។ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ស្តីបន្ទោសនេះនារសៀលថ្ងៃទី២៣កុម្ភៈនេះ ក្នុងពេល អញ្ជើញចូលរួមបិទកិច្ចប្រជុំបូកសរុបលទ្ធផលរបស់ក្រសួងមហាផ្ទៃ។ លោកវេងសាខុន បានរងនឹងការរិះគន់ ជុំវិញការដោះស្រាយមិនបានសម្រេចក្នុងរឿងនីតិវិធីដេញថ្លៃនាំចូលជ្រូករស់ដែលធ្វើឱ្យពលរដ្ឋមានភាពថ្នាំងថ្នាក់។

សម្តេចនាយករដ្ឋមន្ត្រី បានថ្លែងប្រាប់មន្ត្រីក្រោមបង្គាប់ត្រូវសន្សំសំចែលើការចំណាយនិងអំពាវនាវលើការជំរុញ ជួយប្រមូលពន្ធដាខណៈរាជរដ្ឋាភិបាលបានប្តេជ្ញាបន្តការចំណាយបន្ថែមច្រើនទៀតប្រឆាំងនឹងជម្ងឺកូវីដ១៩។ ប្រសាន៍របស់សម្តេចបានធ្វើឡើងនារសៀលថ្ងៃទី២៣កុម្ភៈក្នុងឳកាសចូលរួមបិទកិច្ចប្រជុំបូកសរុប លទ្ធផលការ ងារឆ្នាំ២០២១ និងការលើក ទិស ដៅបន្ដរបស់ក្រសួងមហាផ្ទៃ។