យ៉ាងហោចមានផ្ទះ២៣ខ្នង បានរងការខូចខាតដោយសារ ខ្យល់កន្ត្រាក់នៅក្នុងខេត្តបន្ទាយមានជ័យ។ អាជ្ញាធរ មូលដ្ឋានបានបញ្ជាក់ថា ហេតុការណ៍ខ្យល់កន្ត្រាក់នោះបានកើតឡើងកាលពីវេលាម៉ោង៦យប់ ថ្ងៃទី២ខែកុម្ភៈ ឆ្នាំ ២០២២ ក្នុងភូមិចំនួន២ គឺភូមិអភិវឌ្ឍន៍និងភូមិសន្តិភាព ក្នុងឃុំទួលពង្រ នៃស្រុកម៉ាឡៃ។

គ្រួសារសពអតីតយុទ្ធជន១៣នាក់ក្នុងខណ្ឌចំនួន៨នៅរាជធានីបានទទួលថវិកា៥២លានរៀលដែលជាការឧបត្ថម្ភរបស់រាជរដ្ឋាភិបាល។

គណៈកម្មាធិការជាតិរៀបចំការបោះឆ្នោត បានចេញសេចក្តីជួនដំណឹងជុំវិញការដាក់ពាក្យចុះឈ្មោះសង្កេត ការណ៍ជាតិនិងអន្តរជាតិនិងភ្នាក់ងារគណបក្សនយោបាយ នៅមុនការបោះឆ្នោតក្រុមប្រឹក្សាឃុំសង្កាត់អាណត្តិ ទី ៥កាន់តែខិតកៀកជិតមកដល់។

កម្ពុជាកំពុងជំរុញការនាំចេញផ្លែទុរេនទៅកាន់ទីផ្សារក្នុងប្រទេសចិនថែមទៀត បន្ទាប់ពីការនាំចេញផ្លែចេកនិង ផ្លៃស្វាយរួចមកហើយនេះ។ ដំណាំទុរេន គឺជាដំណាំដែលមានសក្តានុពលផ្នែកសេដ្ឋកិច្ចខ្ពស់ ដែលទាមទារ បច្ចេកទេសដាំតាក់តែងមែក, ការកំណត់ចំនួនផ្លែក្នុងដើមនីមួយៗ ទៅតាមអាយុកាល, ការផ្តល់ជី និងទឹក និង ការមើលថែរក្សា ការពារជំងឺ និងសត្វល្អិតចង្រៃ ដោយត្រូវយកចិត្តទុកដាក់ប្រាកដប្រជា ទើបទទួលបាន ទិន្ន ផលខ្ពស់។

ការព្យាករណ៍សម្រាប់រដូវប្រាំងនិងរដូវវស្សាឆ្នាំនេះ បានបង្ហាញថាកម្ពុជានឹងរងបាតុភូតត្រជាក់ La Nina ច្រើន ជាងបាតុភូតកម្តៅ El Nino ដែលនឹងធ្វើមានភ្លៀងធ្លាក់ច្រើនជាងឆ្នាំទៅ។ អប្សរាណិតរាយការណ៍ជុំវិញការព្យាករ អាកាសធាតុរដូវប្រាំងនិងរដូវវស្សាឆ្នាំ២០២២

កីឡាករបាល់ទាត់កម្ពុជា លោក ចាន់ វឌ្ឍនាកា នឹងត្រូវធ្វើការវះកាត់ជង្គង់ខាងស្តាំរបស់ខ្លួននៅថ្ងៃសៅរ៍ ចុងស​ប្តាហ៍ខាងមុខនេះ ហើយបន្ទាប់ពីការរងរបួសរយៈពេល១០ថ្ងៃ។ លោកចាន់វឌ្ឍនាកា​ បានសរសេរក្នុង បណ្តាញសង្គមរបស់លោកថា ការវះកាត់នៅថ្ងៃទី៥កុម្ភៈខាងមុខនេះ នឹងធ្វើនៅក្នុងមន្ទីរពេទ្យមួយនៅរាជធានី ភ្នំពេញ។

តួលេខនៃចំនួនអ្នកដំណើរទេសចរអន្តរជាតិមកកាន់កម្ពុជា មានការកើនឡើងថែមទៀតក្រោយព្រឹត្តិការណ៍ វេទិកាទេសចរណ៍អាស៊ានលើកទី៤០នៅក្នុង ខេត្តព្រះសីហនុ។ មន្ត្រីនាំពាក្យរដ្ឋលេខាធិការដ្ឋានអាកាសចរណ៍ ស៊ីវិល លោកជាអូន បានថ្លែងថារហូតមកដល់ពេលនេះ ចំនួនអ្នកដំណើរអន្តរជាតិធ្វើដំណើរតាមផ្លូវអាកាសចូល មកកម្ពុជា មានកំណើនឡើងជាង១៦% ដោយជើងហោះហើរបានកើនពី៧ទៅដល់១២ជើងក្នុងមួយថ្ងៃ។

តួលេខឆ្លងក្នុងប្រទេសអាស៊ានទាំង១០ រយៈពេល ២៤ម៉ោងចុងក្រោយនេះ មានចំនួន ៥ម៉ឺន ៤ពាន់ ១៣៥ករណី ដែលជាតួលេខឆ្លងថយចុះជាងពីម្សិលមិញចំនួន ២ពាន់ ២៤ករណី ។ ចំណែកការស្លាប់ថ្មីនោះវិញ មានចំនួន ១០៧នាក់ ដែលជាតួលេខស្លាប់កើនឡើងចំនួន ២០នាក់ បើប្រៀបធៀបនឹងម្សិលមិញ ។ ក្នុងចំណោមតួលេខឆ្លង ថ្មីនៃប្រទេសទាំង១០ ក្នុងរយៈពេល២៤ម៉ោងចុងក្រោយនេះ គឺប្រទេសឥណ្ឌូនេស៊ី បានឆ្លងច្រើនជាងគេ ។

តួលេខអ្នកចាក់វ៉ាក់សាំងដូសទី៣ និងទី៤ ក្នុងរយៈពេល២៤ម៉ោងចុងក្រោយនេះ មានចំនួន ៣ម៉ឺន ៤ពាន់ ១៣៥នាក់។ យោងតាមក្រសួងសុខាភិបាល ពលរដ្ឋនៅរាជធានីភ្នំពេញដែលបានមកចាក់វ៉ាក់សាំងដូសទី៤ ក្នុងរយៈពេល ២៤ ម៉ោងកន្លងមកនេះមានចំនួនតែ ៧ពាន់ ៧០៣នាក់ ដែលនាំឲ្យតួលេខអ្នកចាក់វ៉ាក់សាំងដូស ជម្រុញទី២ រយៈ ពេល ២១ថ្ងៃ កន្លងមកនេះបានកើនដល់ចំនួន ៤៦ម៉ឺន៧ពាន់ ៦៣៣នាក់ហើយ ។ ដោយឡែក ការចាក់វ៉ាក់សាំងដូសទី៣ នៅថ្ងៃនេះបានចំនួន ២ម៉ឺន ៦ពាន់ ៤៣២នាក់ ។