សម្តេចធិបតីបានដាស់តឿនពលរដ្ឋខ្លះ ដែលមានគំនិតអវិជ្ជមាន ចំពោះការពួនស្ទាក់ចាប់ របស់សមត្ថកិច្ចរបស់នគរបាល ដើម្បីបង្ការគ្រោះថ្នាក់ចរាចរណ៍។ គ្រោះថ្នាក់ចរាចរណ៍បានបង្កការស្លាប់ និងរបួសជាច្រើនពាន់នាក់ដល់ប្រជាពលរដ្ឋ ដែលធ្វើដំណើរតាមដងផ្លូវ។ ក្រសួងមានសមត្ថកិច្ចបានដាក់ចេញនូវមធ្យោបាយនានា ដើម្បីឱ្យវិធីកាត់បន្ថយគ្រោះថ្នាក់តាមដងផ្លូវនេះ ស្របតាមការដាក់ទិសរបស់រាជរដ្ឋាភិបាលអាណ្ណត្តិទី៧ ប៉ុន្តែពលរដ្ឋមួយចំនួន ត្រូវគេឃើញបានបង្ហាញទស្សនៈអវិជ្ជមានរបស់ខ្លួនទៅវិញ នៅពេលដែលនគរបាលបានធ្វើការពួនស្ទាក់តាមចាប់អ្នកប្រព្រឹត្តខុសច្បាប់ទាំងឡាយនោះ។ សម្តេចធិបតី បានថ្លែងកោតសរសើរការរួមចំណែករបស់សមត្ថកិច្ច ក្នុងការជួយពង្រឹងការអនុវត្តច្បាប់ចរាចរណ៍ និងបានលើកឡើងបង្ហាញពីបទពិសោធន៍នានា ដែលធ្លាប់កើតមាននៅខាងក្រៅប្រទេស។ សម្តេចធិបតី បានអំពាវនាវដល់ពលរដ្ឋត្រូវចូលរួមគោរពច្បាប់ចរាចរណ៍ឱ្យបានត្រឹមត្រូវ ដោយមិនត្រូវបើកបរក្នុងភាពស្រវឹង និងមិនត្រូវបើកបរក្នុងល្បឿនលឿនខុសច្បាប់ឡើយ។ គ្រោះថ្នាក់ចរាចរណ៍ក្នុងឆ្នាំ២០២៣ មានមនុស្សស្លាប់ ១ពាន់ ៥៩០នាក់ និងអ្នករងរបួសមាន ចំនួន ៤ពាន់ ៥១៥នាក់។ ក្នុងចំណោមមនុស្សរងគ្រោះថ្នាក់ទាំងនោះ គ្រោះថ្នាក់ខ្លះត្រូវគេរាយការណ៍ថា គឺបណ្តាលមកពីករណីបើកបរក្នុងពេលស្រវឹង។

ការផ្សាយព័ត៌មានប្រឌិតមួយចំនួនរបស់ជនបរទេស ដែលបានបំផ្លាញកិត្តិយសជាតិកម្ពុជា និងបង្អើលភាពភ័យខ្លាចដល់ទេសចរណ៍ បានប្រញាប់ឱ្យសម្តេចធិបតី បានបកស្រាយដើម្បីទប់ស្កាត់កុំឱ្យពិភពលោកមានការយល់ច្រឡំអំពីកម្ពុជា។ កម្ពុជាបានរងការចោទប្រកាន់ពីអំពើផ្សព្វផ្សាយមួយចំនួន ពីសំណាក់បរទេស ដែលនិយាយមួលបង្កាច់ថា ជាប្រទេសមានក្រុមទុច្ចរិតប្រព្រឹត្តអំពើចាប់បង្ខាំងមនុស្ស ឬមានការវះក្រលៀន លក់នោះជាដើម។ សម្តេចធិបតី ហ៊ុន ម៉ាណែត បានថ្លែងនៅថ្ងៃនេះលើកឡើងករណីផ្សាយរបស់បរទេសមួយចំនួន ដែលខុសពីការពិត និងជាព័ត៌មានប្រឌិតទាំងស្រុង។ អប្សរាណិតធ្វើសេចក្តីរាយការណ៍

រដ្ឋាភិបាលជប៉ុនបានផ្តល់ថវិកាជាង ៨០ម៉ឺនដុល្លារ ដែលជាជំនួយសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ ដល់ខេត្តមួយចំនួនរបស់កម្ពុជា។ ថវិកាចំនួន ៨២ម៉ឺន ៨ពាន់ ៥៤៦ដុល្លារ គឺសម្រាប់ការបោសសម្អាតមីនក្នុងខេត្តពោធិ៍សាត់, ខេត្តកំពង់ធំ និងខេត្តសៀមរាបផង និងសម្រាប់ការសាងសង់អគារបឋមសិក្សា និងការកែលម្អប្រតិបត្តិការកសិកម្ម នៅខេត្តបាត់ដំបង និងខេត្តរតនគិរី។ ថវិកានេះ ត្រូវបានប្រគល់ក្នុងពិធីចុះហត្ថលេខាមួយ នៅថ្ងៃទី១៥កុម្ភៈ ដោយឯកអគ្គរាជទូតប្រទេសជប៉ុនលោក អ៊ូអិណុ អាត់ស៊ូស៊ី និងអគ្គនាយកមជ្ឈមណ្ឌលសកម្មភាព កំចាត់មីនកម្ពុជាលោក ហេង រតនា។ គួររំលឹកដែរថា ជំនួយឥតសំណងរបស់ជប៉ុនចំនួនជិត ១៤លានដុល្លារ ត្រូវបានប្រគល់មកឱ្យកម្ពុជាផងដែរកាលពីថ្ងៃទី១៤កុម្ភៈ ដើម្បីសាងសង់អគារហ្វឹកហ្វឺនសកម្មភាពកំចាត់មីន នៅខេត្តកំពង់ឆ្នាំង និងអគារសារមន្ទីរតេជោសន្តិភាព នៅខេត្តសៀមរាប។

អ្នកឆ្លងថ្មីនៃជម្ងឺអុតស្វាត្រូវបានរកឃើញជាបន្ថែមទៀត ខណៈដែលប៉ុន្មានថ្ងៃមកនេះ ចំនួនអ្នកឆ្លងត្រូវបានរកឃើញជាបន្តបន្ទាប់។ ក្នុងសប្តាហ៍នេះ បុរសបីនាក់ត្រូវបានរកឃើញឆ្លងវីរុសអុតស្វានេះ ក្នុងរាជធានីភ្នំពេញ…ចំណែកអ្នករកឃើញចុងក្រោយ គឺជាមនុស្សទី៤ហើយ ដែលនាំឱ្យចំនួនអ្នកឆ្លងរកឃើញជាបន្តបន្ទាប់ បានកើនឡើងដល់ ១២នាក់ហើយ។ អ្នកឆ្លងរកឃើញចុងក្រោយនេះ គឺជាពលរដ្ឋរស់នៅក្នុងខណ្ឌមានជ័យ។ ជម្ងឺអុតស្វាអាចឆ្លងពីមនុស្សម្នាក់ទៅមនុស្សម្នាក់ទៀត តាមរយៈការរួមភេទគ្រប់ទម្រង់ជាមួយអ្នកកើតជំងឺនោះ, និងការប៉ះពាល់ដោយផ្ទាល់នឹងកន្លែងមានដំបៅ, ទឹកសារពាង្គកាយ, ទឹកមាត់, តំណក់តូចៗ តាមផ្លូវដង្ហើម និងសម្ភារៈប្រើប្រាស់ដែលប្រឡាក់ប្រឡូកជាមួយនឹងវីរុស រួមមានសម្លៀកបំពាក់ ពូក កន្លែង ឬសម្ភារៈ ស្លាបព្រា ចាន និងកែវទឹកជាដើម។ ជម្ងឺអុតស្វា ត្រូវគេរកឃើញកើតឡើងដំបូង ក្នុងប្រទេសកម្ពុជា កាលពីខែសីហា ឆ្នាំ២០២២ កើតលើជនជាតិនីហ្សេរីយ៉ា និងក្រោយមកទើបមានការកើតជាបន្តបន្ទាប់ នៅក្នុងរាជធានីភ្នំពេញ ក្នុងឆ្នាំ២០២៣។ ក្រសួងសុខាភិបាលបានថ្លែងថា ការផ្ទុះឆ្លងនៃជម្ងឺអុតស្វាគិតត្រឹមថ្ងៃទី២៥ មករា ឆ្នាំ២០២៤ នៅទូទាំងសកលលោក មានមនុស្សឆ្លងចំនួន ៩ម៉ឺន ៣ពាន់ ៣០នាក់ ក្នុងប្រទេសចំនួន១១៧ មានអ្នកស្លាប់ចំនួន ១៧៦នាក់។

បុរសម្នាក់ដែលបន្លំខ្លួនជាមន្ត្រីយោធាដើរជ្រើសរើសមនុស្សចូលបំរើកងទ័ពខុសច្បាប់ ត្រូវបានចាប់ខ្លួននៅក្នុងខេត្តឧត្តរមានជ័យ។ ជនសង្ស័យអាយុ ៤៧ឆ្នាំឈ្មោះ យ័ន្ត ដារ៉ា ត្រូវបានចាប់ខ្លួនកាលពីថ្ងៃទី១៤កុម្ភៈ យោងតាមដីការរបស់អយ្យការអមតុលាការយោធាពាក់ព័ន្ធ នឹងករណីដើរជ្រើសរើសមនុស្ស ដើម្បីចូលបម្រើកងទ័ពដោយខុសច្បាប់ និងគំរាមកំហែងលើទ្រព្យសម្បត្តិពលរដ្ឋ។ ជនសង្ស័យឈ្មោះ យ័ន្ត ដារ៉ា នោះ ត្រូវគេបញ្ជាក់ថា ជាភ្នាក់ងារសន្តិសុខមួយ ប៉ុន្តែមិនបានបញ្ជាក់ថា ធ្វើការនៅកន្លែងណាមួយឡើយ។ យោងតាមមេបញ្ជាការកងរាជអាវុធហត្ថខេត្តឧត្តរមានជ័យ លោក លី ដារិទ្ធ ជនសង្ស័យរូបនេះ កំពុងឃាត់ខ្លួននៅបញ្ជាការដ្ឋានកងរាជអាវុធហត្ថខេត្តឧត្តរមានជ័យ មុននឹងបញ្ជូនកាត់ទោសនៅតុលាការ។

ការព្យាយាមចង់សម្រុះសម្រួលផ្តល់សំណងប្រាក់ដល់កុមារាអាយុ ៤ឆ្នាំ ដែលបានស្លាប់នៅក្នុងរថយន្តដឹកសិស្សសាលា នៅក្នុងខេត្តកំពង់ធំនោះ មិនទទួលបានការយល់ព្រមពីគ្រួសារកុមាររងគ្រោះឡើយ។ កុមារាអាយុ ៤ឆ្នាំ យ៉ុម រ៉ៃយ៉ា នៃសិស្សមតេយ្យសាលាឯកជន «អន្តរជាតិកុលបុត្របញ្ញា» បានស្លាប់នៅក្នុងរថយន្តដឹកសិស្ស ក្នុងហេតុការណ៍មួយ កុមារនោះបានជាប់ក្នុងរថយន្តរយៈពេលប្រមាណជាង ៤ម៉ោងកាលពីថ្ងៃទី៥ កុម្ភៈ ឆ្នាំ២០២៤។ ស្ត្រីជាម្ចាស់រថយន្តឈ្មោះ ឡុង ស៊ីណែត ដែលជាអ្នកបើកបរបានគេចរត់គេចខ្លួន។ ឳពុករបស់កុមារឈ្មោះ អួច យ៉េត បានថ្លែងថាខាងភាគីម្ចាស់រថយន្តកាលពីថ្ងៃទី១០កុម្ភៈ បានចាត់តំណាងចង់សុំបញ្ចប់ការប្តឹងផ្តល់នោះ ដោយការសងសំណង ៩ពាន់ដុល្លារ ប៉ុន្តែក្រុមគ្រួសាររបស់កុមារមិនយល់ព្រមឡើយ។ ស្នងការរងនគរបាលខេត្តកំពង់ធំ លោក ញ៉ែម ឈុនលី បានថ្លែងថា សមត្ថកិច្ចកំពុងតែបន្តនីតិវិធីស្នើសុំដីកា ដើម្បីតាមចាប់ខ្លួនជនសង្ស័យក្នុងករណីនោះ។

សម្ដេចតេជោ ហ៊ុន សែន បានផ្ដល់ប្រាក់រង្វាន់លើកទឹកចិត្តចំនួន ៣៤ម៉ឺនដុល្លារដល់គ្រូបង្វឹក, គ្រូជំនួយ និងអត្តពលិក នៃជ័យលាភីកីឡាអាស៊ានប៉ារ៉ាហ្គេម លើកទី១១។ ព្រឹត្តិការណ៍កីឡាអាស៊ានប៉ារ៉ាហ្គេមលើកទី១១ ត្រូវបានធ្វើក្នុងប្រទេសឥណ្ឌូណេស៊ីកាលពីឆ្នាំ២០២២។ ក្នុងការប្រកួតនាពេលនោះ ក្រុមកីឡាជនពិការកម្ពុជា ដណ្ដើមបានមេដាយសរុប ២៨គ្រឿង រួមមានមាស ៧គ្រឿង, ប្រាក់ ១០គ្រឿង និងសំរឹទ្ធ ១១គ្រឿង ដែលនាំឱ្យកម្ពុជា បានស្ថិតក្នុងលំដាប់លេខរៀងទី៧ ក្នុងចំណោម ១១ប្រទេស។ ប្រាក់រង្វាន់លើកទឹកចិត្តចំនួន ៣៤ម៉ឺនដុល្លារនោះ ត្រូវបានប្រគល់ឱ្យកីឡាករ តាមរយៈសម្តេចពិជ័យសេនា ទៀ បាញ់ នាព្រឹកថ្ងៃទី១៥ កុម្ភៈ ឆ្នាំ២០២៤ នាទីស្តីការក្រសួងការពារជាតិ។

ស្នងការដ្ឋាននគរបាលរាជធានីភ្នំពេញ បានប្រញាប់ចាត់វិធានការភ្លាមៗ ប្រឆាំងភាពផុសផុល នៃការរីកសាយល្បែងផ្សងសំណាងអនឡាញ។ សម្តេចធិបតី ហ៊ុន ម៉ាណែត កាលពីថ្ងៃទី១៤កុម្ភៈ បានដាក់ចេញនូវបទបញ្ជាឱ្យរាជធានី និងខេត្តទូទាំងទាំងប្រទេស ធ្វើការទប់ស្កាត់ជាបន្ទាន់នូវល្បែងផ្សងសំណាងអនឡាញនោះ។ នៅក្នុងរាជធានីភ្នំពេញ នៅថ្ងៃទី១៥កុម្ភៈនេះ, អធិការដ្ឋាននគរបាលទាំង ១៤ខណ្ឌ ត្រូវបានកោះហៅប្រជុំជាមួយនឹងការដាក់ចេញនូវវិធានការម៉ឺងម៉ាត់ ដោយមានការចូលរួមពីស្នងការនគរបាលរាជធានី លោកឧត្តមសេនីយឯក ជួន ណារិន្ទ។ មន្ត្រីក្រសួងមហាផ្ទៃបានថ្លែងថា ល្បែងស៊ីសងខុសច្បាប់ជាង ៤០០ករណី និងមនុស្សជាង ៩០០នាក់ ត្រូវបានបង្ក្រាបក្នុងរយៈពេល៥ខែចុងក្រោយនេះ។ អ្នកនាំពាក្យរងក្រសួងមហាផ្ទៃលោក ទូច សុឃៈ បានថ្លែងថា គិតចាប់តាំងពីខែកញ្ញា ឆ្នាំ២០២៣ ដល់ខែមករា ឆ្នាំ២០២៤, សមត្ថកិច្ចនគរបាល បានបង្ក្រាបល្បែងស៊ីសងសរុបចំនួន ៤២៧ករណី និងឃាត់ខ្លួនអ្នកពាក់ព័ន្ធបានចំនួន ៩១២នាក់ ក្នុងនោះរួមមាន ស្រី ៤០៤នាក់។ ការបង្ក្រាបល្បែងស៊ីសងខុសច្បាប់ គឺការទិសដៅអាទិភាពមួយ ក្នុងចំណោមទិសដៅអាទិភាពទាំង៦ ដែលត្រូវបង្ក្រាប រួមមានបញ្ហាគ្រឿងញៀន, ចរាចរណ៍, បទល្មើសព្រហ្មទណ្ឌ, ក្មេងទំនើង, ការជួញដូរមនុស្ស និងបញ្ហានានា តាមបន្ទាត់ព្រំដែន ទាំងព្រំដែនគោក និងព្រំដែនទឹក។

ក្រសួងបរិស្ថាន គ្រោងនឹងបំពាក់កាមេរ៉ាបន្ថែម នៅតំបន់ជួរភ្នំក្រវាញ ដើម្បីតាមដានវត្តមានសត្វព្រៃ ដែលជាចំណីរបស់សត្វខ្លាធំ ដូចជាសត្វប្រើស, ខ្ទីង និងជ្រូកព្រៃជាដើម។ គួរបញ្ជាក់ថាក្រសួងបរិស្ថាន និងអង្គការសម្ព័ន្ធមិត្តសត្វព្រៃ WA បានរៀបចំដីព្រៃទំហំ ៩០ហិកតា ស្ថិតក្នុងដែនជម្រកសត្វព្រៃតាតៃ នៃតំបន់ជួរភ្នំក្រវាញ ដោយមានរបងដែក, ទ្រុងដែក, អាងទឹក និងសត្វព្រៃសម្រាប់ជាចំណី និងការបន្ស៊ាំសត្វខ្លាធំ ដែលគ្រោងទទួលពីរដ្ឋាភិបាលប្រទេសឥណ្ឌា មុនការលែងចូលតំបន់ស្នូល នៃតំបន់ការពារធម្មជាតិ។ យោងតាមរដ្ឋមន្រ្តីក្រសួងបរិស្ថានបណ្ឌិត អ៊ាង សុផល្លែត, គេគ្រោងដាក់ម៉ាស៊ីនថត ស្ថិតក្នុងចន្លោះប្រមាណមួយគីឡូម៉ែត្រពីគ្នា ដើម្បីប្រព័ន្ធកាមេរ៉ាអាចចាប់រូបភាព ដើម្បីឱ្យអ្នកជំនាញអាចវិភាគបាននូវប្រភេទសត្វជាអាហារសម្រាប់សត្វខ្លាធំ។ គួរបញ្ជាក់ថារវាងពីឆ្នាំ២០១៩ មកដល់ឆ្នាំ២០២៣, កាមេរ៉ាដែលបានបំពាក់មាន ចំនួន ៣៨២ទីតាំង នៅក្នុងឧទ្យានជាតិជួរភ្នំក្រវាញ ដើម្បីសិក្សាវត្តមានសត្វព្រៃ ក៏ដូចជាក្នុងគោលបំណង រៀបចំកំណត់តំបន់គ្រប់គ្រង និងផែនការគ្រប់គ្រង ព្រមជាមួយការសិក្សាពីដង់ស៊ីតេសត្វព្រៃ ដែលជាចំណីរបស់សត្វខ្លាធំ។ ការបំពាក់កាមេរ៉ានេះនឹងជួយផ្តល់នូវទិន្នន័យជាក់លាក់ នៃធនធានសត្វព្រៃ តើអាចមានចំនួនគ្រប់គ្រាន់សម្រាប់សត្វខ្លាធំដែរឬទេ? ឬបើក្នុងលក្ខខណ្ឌមិនមានសត្វព្រៃជាចំណីគ្រប់គ្រាន់, តើគេត្រូវបង្កាត់ពូជសត្វព្រៃជាបន្ថែម ឬត្រូវផ្តល់សត្វគោ ឬក្របីស្រុកជំនួសជាអាហារ ក្នុងការរៀបចំផែនការអភិរក្សសត្វខ្លាធំ ក្នុងព្រៃនៃប្រទេសកម្ពុជានេះដែរឬយ៉ាងណា។ គម្រោងស្តារសត្វខ្លាធំឡើងវិញនៅកម្ពុជានេះ ត្រូវបានបង្កើតឡើងបន្ទាប់ពីបាត់វត្តមានសត្វខ្លាទាំងនេះ ចេញពីទឹកដីកម្ពុជាកាលពីអំឡុងឆ្នាំ២០០៧ ខណៈនៅទូទាំងពិភពលោក…

ភាពប្រកួតប្រជែងក្នុងបរិវត្តកម្មឌីជីថលក្នុងតំបន់ បានធ្វើឱ្យកម្ពុជាបានទទួលពានរង្វាន់ នៃកម្មវិធី Verify.gov.kh។ ក្នុងពិធីសម្ពោធអគារសាកលវិទ្យាល័យជាតិគ្រប់គ្រង សាខាវាលស្បូវ ដែលបំរើការសិក្សាថ្នាក់មហាវិទ្យាល័យសេដ្ឋកិច្ចបច្ចេកវិទ្យាឌីជីផល, សម្តេចធិបតី ហ៊ុន ម៉ាណែត បានរំលឹកអំពីជោគជ័យមួយ នៃស្នាដៃបង្កើតរបស់កម្ពុជា ដែលបានជោគជ័យ និងទទួលពានរង្វាន់ក្នុងតំបន់អាស៊ានថែមទៀត។ សង្គ្រាមជិត៣០ឆ្នាំក្នុងប្រទេសកម្ពុជា បានបំផ្លាញហេដ្ឋារចនាសម្ព័ន្ធ និងធនធានមនុស្ស និងធ្វើឱ្យកម្ពុជាស្ថិតក្នុងប្រទេស នៃបាតតារាងរបស់សកលលោក។ ក្រោមនយោបាយឈ្នះឈ្នះ ដាក់ចេញដោយសម្តេចតេជោ ហ៊ុន សែន, កម្ពុជាបានទទួលសុខសន្តិភាពពិតប្រាកដ នាចុងឆ្នាំ១៩៩៨ និងកម្ពុជាបានប្រឹងប្រែងដោយខ្លួនឯងបន្តិចម្តងៗ ក្នុងការនាំប្រទេសចេញពីអនក្ខរភាព នៃបច្ចេកវិទ្យា និងបោះជំហានបន្តិចម្តងៗរហូតបានដូចសព្វថ្ងៃ។ កម្ពុជាត្រូវបានចាត់ទុកថាជាប្រទេសមួយដែលកំពុងក្រេបជញ្ជក់នូវបច្ចេកវិទ្យាឌីជីថល ដើម្បីជម្រុញការអភិវឌ្ឍន៍សេដ្ឋកិច្ច និងសង្គមរបស់ខ្លួន។ ចំណេះដឹងបច្ចេកវិទ្យា គឺជាចំណេះដឹងមួយដ៏មានសារៈសំខាន់ ពីព្រោះពិភពលោកកំពុងតែធ្វើដំណើរក្នុងរបត់បច្ចេកវិទ្យា ដែលមនុស្សម្នាក់ៗត្រូវតែរៀននូវបច្ចេកវិទ្យានេះ មិនអាចមើលរំលងចោលបានឡើយ។ សម្តេចធិបតីបានលើកទឹកចិត្តការសិក្សារៀនសូត្រ ដើម្បីបង្កើនធនធានមនុស្ស ក្នុងការជួយនាំប្រទេសជាតិ ដើម្បីសម្រេចបាននូវមហិច្ឆិតាឆ្នាំ២០៥០ នៃប្រទេសដែលមានចំណូលខ្ពស់។ សម្តេចធិបតីបានថ្លែងថា រាជរដ្ឋាភិបាលបាននិងកំពុងយកចិត្តទុកដាក់ជាខ្លាំង លើការធ្វើបរិវត្តកម្មឌីជីថលសេដ្ឋកិច្ច និងសង្គមដោយបានដាក់ចេញនូវក្របខណ្ឌនយោបាយសង្គម និងសេដ្ឋកិច្ចឌីជីថលឆ្នាំ២០២១-២០៣៥ ដែលមានចក្ខុវិស័យកសាងសង្គមសេដ្ឋកិច្ចឌីជីថល តាមរយៈការរៀបចំមូលដ្ឋានគ្រឹះជម្រុញការធ្វើបរិវត្តកម្មឌីជីថល នៅក្នុងគ្រប់តួអង្គសង្គម ទាំងរដ្ឋ, ពលរដ្ឋ និងធុរជន ដើម្បីជម្រុញសន្ទុះកំណើនសេដ្ឋកិច្ចថ្មី និងលើកកម្ពស់សុខមាលភាពសង្គម។…