កាណាដា បានផ្តល់ថវិកាជាង ២៦ម៉ឺនដុល្លារ គាំទ្រដំណើរការរៀបចំកិច្ចប្រជុំកំពូលសៀមរាប-អង្គរ ស្តីពីពិភពលោកដែលគ្មានមីន នៃរដ្ឋភាគីអនុសញ្ញាអូតាវ៉ាឆ្នាំ២០២៤។ ការប្រកាសជំនួយនេះ បានធ្វើឡើងដោយលោក Alan Bowman អគ្គនាយកប្រចាំតំបន់អាស៊ីអាគ្នេយ៍ និងអូសេអានី នៃក្រសួងការបរទេសពាណិជ្ជកម្ម និងអភិវឌ្ឍន៍ របស់ប្រទេសកាណាដា ក្នុងពេលជួបជាមួយទេសរដ្ឋមន្ត្រី លី ធុជ ដែលជាអនុប្រធានទី១ អាជ្ញាធរមីនកម្ពុជា នាថ្ងៃទី២០ ខែកុម្ភៈ ឆ្នាំ២០២៤ នៅទីស្នាក់ការអាជ្ញាធរមីន។ លោក Alan Bowman បានសម្តែងនូវការអបអរសាទរចំពោះភាពជាប្រធាន និងម្ចាស់ផ្ទះ នៃអនុសញ្ញាអូតាវ៉ាឆ្នាំ២០២៤ ព្រមទាំងបានផ្តល់នូវការគាំទ្រដល់ដំណើរការរៀបចំនេះ។ កម្ពុជាបានដាក់ចេញនូវចក្ខុវិស័យបំបាត់គ្រាប់មីនឱ្យអស់ចេញពីកម្ពុជានៅក្នុងឆ្នាំ២០២៥។ ប៉ុន្តែមុននឹងឆ្នាំនៃចក្ខុវិស័យនោះឈានមកដល់, កម្ពុជានឹងត្រូវធ្វើជាប្រធានពេញមួយឆ្នាំ នៃកិច្ចប្រជុំកំពូល នៃគោលដៅដើម្បីការគ្មានគ្រាប់មីនរបស់ពិភពលោក ក្នុងនោះរួមមាន កិច្ចប្រជុំនៅតាមបណ្តាប្រទេសនានា លើសកលលោក និងចុងក្រោយ គឺកិច្ចប្រជុំដ៏ធំបង្អស់មួយទៀត នៅក្នុងខែវិច្ឆិកា ដែលកម្ពុជានឹងធ្វើជាម្ចាស់ផ្ទះ ជាមួយនឹងការចូលរួមពីបណ្តាប្រទេសជាង ១៦០ មកពីសកលលោក។ លោក លី ធុជ ដែលជាប្រធានអនុសញ្ញាអូតាវ៉ាឆ្នាំ២០២៤ បានថ្លែងអំណរគុណដល់រដ្ឋាភិបាល និងប្រជាជនកាណាដា ដែល «បានរួមចំណែកដល់ការអភិវឌ្ឍននៅកម្ពុជា ក៏ដូចជាបានរួមចំណែកគាំទ្រដល់វិស័យសកម្មភាពមីនមនុស្សធម៌…

ក្មេងទំនើងជាង ៥០នាក់ ត្រូវបានឃាត់ខ្លួនក្នុងសប្ដាហ៍កន្លងទៅនេះ គ្រាដែលតួលេខនេះ ត្រូវគេចាត់ទុកថាបានធ្លាក់ចុះជាលំដាប់។ យោងតាមក្រសួងមហាផ្ទៃ, ការបង្ក្រាបក្មេងទំនើងទូទាំងប្រទេសក្នុងមួយខែមករាកន្លងមក មាន ១២៤ករណី ជាមួយមនុស្ស ២៨០នាក់ ដែលតួលេខនេះ គឺស្មើនឹង ៧០នាក់ ក្នុងមួយសប្តាហ៍។ អ្នកនាំពាក្យរងក្រសួងមហាផ្ទៃលោក ទូច សុឃៈ ក្នុងមួយសប្ដាហ៍កន្លងទៅនេះ ការបង្ក្រាបក្មេងទំនើងមាន ២២ករណី ជាមួយឃាត់ខ្លួនចំនួន ៥៧នាក់។ អ្នកនាំពាក្យរងក្រសួងមហាផ្ទៃដដែលបានថ្លែងថា ការបង្ក្រាបក្មេងទំនើង គឺជាអាទិភាពមួយ របស់គោលនយោបាយភូមិឃុំមានសុវត្ថិភាព។ លោក ទូច សុឃៈ បានថ្លែងថា បើទោះបីជាការបង្ក្រាបមានតួលេខធ្លាក់ចុះក៏ដោយ សមត្ថកិច្ចនឹងបន្ធូរដៃឡើយ។ លោកបានអំពាវនាវ មាតាបិតា និងអ្នកអាណាព្យាបាលទាំងឡាយ គប្បីបង្កើនការយកចិត្តទុកដាក់អប់រំសីលធម៌ ដល់សមាជិកគ្រួសារ ពិសេសតាមតម្រង់ផ្លូវល្អដល់កូនចៅរបស់ខ្លួនដែលជាយុវជន។

បទបញ្ជាម៉ឺងម៉ាត់របស់សម្តេចធិបតី ហ៊ុន ម៉ាណែត ប្រឆាំងដាច់ខាតនឹងបញ្ហាគ្រឿងញៀន តាមក្រសួងស្ថាប័ន និងរដ្ឋបាលថ្នាក់ក្រោមជាតិ បានទទួលការគាំទ្រពីមជ្ឈដ្ឋាននានា ទាំងក្នុងនិងក្រៅប្រទេស។ គ្រឿងញៀនបាននិងកំពុងវាយលុកជាខ្លាំង នៅលើពិភពលោក ជាពិសេសក្នុងចំណោមស្រទាប់យុវជន។ សេចក្តីរាយការណ៍ឆ្នាំ២០២១ បាននិយាយថា មនុស្សដែលប្រើប្រាស់គ្រឿងញៀននៅលើពិភពលោក មានចំនួនជាង ២៩៦លាននាក់ ដែលកើនឡើង ២៣ភាគរយ ប្រៀបធៀបនឹងប្រមាណជាង ១០ឆ្នាំកន្លងមក។ អប្សរាណិតធ្វើសេចក្តីរាយការណ៍

កិច្ចប្រជុំរដ្ឋសភាថ្ងៃទី២១កុម្ភៈ បានបោះឆ្នោតគាំទ្រការបំពេញបន្ថែមសមាសភាពមន្ត្រីជាន់ខ្ពស់ ៣រូប របស់រាជរដ្ឋាភិបាល ក្នុងនោះរួមមានឧបនាយករដ្ឋមន្ត្រីម្នាក់ និងទេសរដ្ឋមន្ត្រី ២នាក់។ សមាជិក សមាជិកា រដ្ឋសភា ចំនួន ១២០រូប បានបោះឆ្នោតគាំទ្រលោក ហ៊ុន ម៉ានី អាយុ ៤៧ឆ្នាំ ដែលជារដ្ឋមន្ត្រីក្រសួងមុខងារសាធារណៈ មានតួនាទីខ្ពស់មួយទៀតជាឧបនាយករដ្ឋមន្ត្រី។ រដ្ឋសភាបានគាំទ្រការបំពេញបន្ថែមលោក ស្រ៊ី ថាមរុង្គ ជាទេសរដ្ឋមន្ត្រីទទួលបន្ទុកបេសកកម្មពិសេស និងលោក ប៉ែន វិបុល ជាទេសរដ្ឋមន្ត្រីទទួលបន្ទុកបេសកកម្មពិសេស។ ក្រោយការបោះឆ្នោតគាំទ្រការបំពេញបន្ថែមនេះរួចមក, ព្រះមហាក្សត្របានចេញព្រះរាជក្រឹត្យ តែងតាំងមន្ត្រីជាន់ខ្ពស់ទាំងបី ដើម្បីចូលបំរើកិច្ចការយោងតាមការត្រាស់បង្គាប់។

សម្តេចធិបតី ហ៊ុន ម៉ាណែត បានថ្លែងបង្ហាញនៅថ្ងៃទី២១កុម្ភៈនេះ ជុំវិញគោលដៅបច្ចេកវិទ្យា និងវិទ្យាសាស្ត្រ ដែលជាមុខព្រួញសម្រាប់រាជរដ្ឋាភិបាលអាណ្ណត្តិទី៧ ត្រូវទាញយកមកប្រើប្រាស់ ដើម្បីជាកម្លាំងសម្រាប់ជំរុញដំណើរសេដ្ឋកិច្ចទៅមុខរបស់ជាតិ។ ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, សម្តេចធិបតីបានលើកឡើងនូវគោលការណ៍របស់រាជរដ្ឋាភិបាល ដែលចាប់យកកត្តាបច្ចេកវិទ្យា និងវិទ្យាសាស្ត្រ សម្រាប់ការប្រើប្រាស់បំរើដល់ប្រយោជន៍ជាតិ។ កម្ពុជា និងពិភពលោក កំពុងស្ថិតក្នុងសម័យរីកចំរើនជឿនលឿន នៃបច្ចេកវិទ្យាឌីជីថល ក្នុងនោះបច្ចេកវិទ្យាថ្មីៗ ត្រូវបានបញ្ជ្រាបចាប់តាំងពីប្រព័ន្ធផ្សព្វផ្សាយតាមបណ្តាញសង្គម, ប្រព័ន្ធកំណត់ទីតាំងសកល GPS រហូតដល់បច្ចេកវិទ្យាសិប្បនិម្មិត AI និងបច្ចេកវិទ្យា Digital Twins ដែលបាននិងកំពុងធ្វើឱ្យពិភពលោកមានការប្រែប្រួលជាខ្លាំង។ កម្ពុជាត្រូវបានចាត់ទុកថា ជាប្រទេសមួយដែលកំពុងក្រេបជញ្ជក់នូវបច្ចេកវិទ្យាឌីជីថល ដើម្បីជម្រុញការអភិវឌ្ឍន៍សេដ្ឋកិច្ច និងសង្គមរបស់ខ្លួន។ ចំណេះដឹងបច្ចេកវិទ្យា គឺជាចំណេះដឹងមួយដ៏មានសារៈសំខាន់ ពីព្រោះពិភពលោកកំពុងតែធ្វើដំណើរក្នុងរបត់បច្ចេកវិទ្យា ដែលមនុស្សម្នាក់ៗ ត្រូវតែរៀននូវបច្ចេកវិទ្យានេះ មិនអាចមើលរំលងចោលបានឡើយ។ បច្ចេកវិទ្យាឌីជីថលបានផ្លាស់ប្តូរពិភពលោកស្ទើរតែគ្រប់កន្លែងអស់ទៅហើយ ជាពិសេសនៅក្នុងប្រទេសកម្ពុជា ដែលការធ្វើទំនាក់ទំនងគ្នាទៅវិញទៅមក មិនចាំបាច់ការធ្វើដំណើរចុះឡើងដូចពីមុនទៀតឡើយ ដោយគ្រាន់តែមានទូរស័ព្ទ Smart មួយជាមួយនឹងការភ្ជាប់ទំនាក់ទំនង នៃប្រព័ន្ធ Internet គឺគេអាចធ្វើការប្រាស្រ័យទាក់ទងគ្នាភ្លាមៗបានទៅហើយ។ ម្យ៉ាងទៀតបច្ចេកវិទ្យាឌីជីថល ក៏អាចកត់ត្រានូវទិន្នន័យរបស់មនុស្សម្នាក់ៗ…

សម្តេចតេជោ ហ៊ុន សែន បានធ្វើទស្សនកិច្ចឯកជនច្រើនម៉ោង ក្នុងប្រទេសថៃ នៅថ្ងៃទី២១ កុម្ភៈ ឆ្នាំ២០២៤ ដើម្បីជួបជាមួយនឹងលោក ថាក់ស៊ីន ស៊្ហីណាវ៉ាត្រា ដែលទើបត្រូវបានដោះលែងចេញពីពន្ធនាគារ បន្ទាប់បានស្ម័គ្រចិត្តជាប់ក្នុងគុកជាច្រើនខែ ដើម្បីការទទួលទោសតាមការចោទប្រកាន់។ សម្តេចតេជោ ហ៊ុន សែន អាយុ៧១ឆ្នាំ និងលោក ថាក់ស៊ីន ស៊្ហីណាវ៉ាត្រា អាយុ ៧៤ឆ្នាំ គឺជាបងប្អូនធម៌រវាងគ្នាទៅវិញទៅមក។ សម្តេចតេជោ បានបង្ហោះរួបភាពក្នុងបណ្តាញសង្គមនៅថ្ងៃទី២១កុម្ភៈ សរសេរបញ្ជាក់ថា «ខ្ញុំបានមកសួរសុខទុក្ខបងធម៌ដល់ផ្ទះនៅទីក្រុងបាងកក»។ លោក ថាក់ស៊ីន ត្រូវបានដោះលែងចេញពីពន្ធនាគារកាលពីថ្ងៃអាទិត្យ ទី១៨ កុម្ភៈ បន្ទាប់បានជាប់ក្នុងពន្ធនាគាររយៈពេល៦ខែ ដែលជាទោសត្រូវបានកាត់បន្ថយអស់ជាច្រើន នៃរយៈពេលត្រូវជាប់សរុប៨ឆ្នាំនោះ តាមរយៈព្រះរាជសារសណ្តោសប្រណី របស់ព្រះមហាក្សត្រថៃ។ ក្នុងជំនួបច្រើនម៉ោងក្នុងគេហស្ថានរបស់លោក ថាក់ស៊ីន ក្នុងសង្កាត់ Bang Phlat នៃទីក្រុងបាងកក, សម្តេចតេជោ ហ៊ុន សែន បានសរសេរថា «ឯកឧត្តម ថាក់ស៊ីន ទោះបីមានជម្ងឺ ក៏បានទទួលយើងក្នុងនាមជាបងប្អូនដោយមានការចូលរួមអ៊ុងអ៊ីង ជាកូនស្រីពៅ និងជាប្រធានគណបក្សភឿថៃផងដែរ»។ សម្តេចតេជោបានសរសេរក្នុងបណ្តាញសង្គមទៀតថា…

ក្រសួងធនធានទឹក និងឧតុនិយម បានព្យាករណ៍ថា កម្ពុជានឹងមានភ្លៀងធ្លាក់ ក្នុងកម្រិតខ្សោយ នៅសប្ដាហ៍នេះ ខណៈសីតុណ្ហភាពកម្តៅមានការកើនខ្ពស់។ យោងតាមការព្យាករណ៍រវាងពី ថ្ងៃទី២០ រហូតដល់ថ្ងៃទី២២ ខែកុម្ភៈ សីតុណ្ហភាពកម្តៅអប្បបរមា មាន ២៥អង្សាសេ រីឯសីតុណ្ហភាពកម្តៅអតិបរមាមាន ៣៦អង្សាសេ។ នៅតំបន់វាលទំនាបនេះ ផ្ទៃមេឃ គឺមានពពកពីតិចទៅមធ្យម និងមានភ្លៀងធ្លាក់ក្នុងកម្រិតខ្សោយ គ្រប់ដណ្តប់លើផ្ទៃដីប្រមាណ ៥ភាគរយ។ ចំណែកនៅតំបន់ខ្ពង់រាប សីតុណ្ហភាពកម្តៅអប្បបរមាមាន ២៤អង្សាសេ និងសីតុណ្ហភាព កម្តៅអតិបរមាមា ៣៧អង្សាសេ។ នៅតំបន់ខ្ពង់រាបនេះ ផ្ទៃមេឃមានពពកតិច ខ្យល់បក់មកពីទិសបូព៌ មានល្បឿន ២ម៉ែត្រ ក្នុងមួយវិនាទី។ ដោយឡែកនៅខេត្តកំពង់ស្ពឺ មានភ្លៀងធ្លាក់ខ្សោយគ្រប់ដណ្តបលើផ្ទៃដី៥ភាគរយ។ នៅតំបន់មាត់សមុទ្ទនោះវិញ សីតុណ្ហភាពក្តៅអប្បបរមា ២៥អង្សាសេ និងសីតុណ្ហភាពក្តៅ អតិបរមាមាន ៣៦អង្សាសេ។ នៅតំបន់មាត់សមុទ្ទនេះ ផ្ទៃមេឃមានពពកពីតិចទៅមធ្យម និងមានភ្លៀងធ្លាក់ក្នុងកម្រិតខ្សោយគ្រប់ដណ្តប់លើផ្ទៃដី ២០ភាគរយ។

តុក្កតាយក្សចំនួន៩ ដែលនឹងមានកម្ពស់១០ម៉ែត្រ នឹងត្រៀមដង្ហែរនៅក្នុងក្រុងសៀមរាប ដែលជាផ្នែកមួយ នៃការទាក់ទាញភ្ញៀវទេសចរណ៍ជាតិ និងអន្តរជាតិ។ ក្រុមអ្នករៀបចំបានថ្លែងថាតុក្កតាយក្សទាំង៩ គឺជាប្រភេទសត្វដាយណួស៊័រដែលនឹងមានទំហំ និងប្រវែងទទឹងពី ១៥ ទៅ ២០ម៉ែត្រ។ តុក្កត្តាយក្សទាំងនេះ កំពុងតំឡើងដោយក្រុមកុមារ ប្រមាណ ៦៥០នាក់ មកពីសាលារដ្ឋឯកជន និងដោយអង្គការក្រៅរដ្ឋាភិបាលចំនួន១៩។ តុក្កតាយក្សទាំងនេះ នឹងគ្រោងដង្ហែរនៅថ្ងៃទី២៤កុម្ភៈ ដោយចេញពីវត្តដំណាក់ យកទៅដាក់តាំងនៅក្នុងសួនច្បារព្រះដំណាក់ និងរក្សាទុករយៈពេល ៥ថ្ងៃ ដើម្បីឲ្យភ្ញៀវទេសចរជាតិ និងអន្តរជាតិ ថតរួបទុកធ្វើជាអនុស្សាវរីយ៍។ សម្រាប់ឆ្នាំ២០២៤នេះ គឺជាឆ្នាំទី១៣ហើយ ដែលគម្រោងតំឡើង និងមានការដង្ហែរតុក្កតាយក្សជាប្រចាំឆ្នាំ ជាមួយការចូលរួម និងគាំទ្រពីសំណាក់ប្រជាពលរដ្ឋយ៉ាងច្រើនកុះករ នៅក្នុងខេត្តសៀមរាប។

រថភ្លើងសណ្តោងដឹកប្រេង បានបុករថយន្តមួយគ្រឿងផ្ទុកមនុស្ស ៥នាក់ ខណៈកំពុងធ្វើដំណើរឆ្លងឆ្លងកាត់ផ្លូវនៅក្នុងខេត្តពោធិ៍សាត់។ ហេតុការណ៍បានកើតឡើងនារសៀលម៉ោង៤ និង២០នាទី ថ្ងៃទី១៩កុម្ភៈ ស្ថិតនៅភូមិក្រពើរោទិ៍, ឃុំស្នាមព្រះ នៃស្រុកបាកាន។ សាក្សីបាននិយាយថា មុនពេលកើតហេតុគេបានឮស្នូរស៊ីប្លេរថភ្លើងបន្លឺឱ្យយានយន្តឆ្លងកាត់ទាំងឡាយ ត្រូវប្រុងប្រយ័ត្នពេលកំពុងធ្វើដំណើរមកដល់កន្លែងឆ្លងកាត់ ប៉ុន្តែរថយន្តហ៊ីយុនដាយមួយគ្រឿងស្លាក លេខព្រះសីហនុ 3A-8596 ផ្ទុកមនុស្ស ៥នាក់ នៅតែបន្តបើកឆ្លងកាត់ផ្លូវទន្ទឹមនឹងរថភ្លើងបានមកដល់។ មនុស្សបួននាក់រងរបួសធ្ងន់ និងម្នាក់រងរបួសស្រាលក្នុងហេតុការណ៍រថភ្លើងបុករថយន្តនោះ។ ក្នុងហេតុការណ៍នោះ រថយន្តត្រូវបានរក្សាទុក ប៉ុន្តែរថភ្លើងមិនបានឃាត់ទុកឡើយ ដោយគ្រាន់តែទុកលេខទូរស័ព្ទសម្រាប់ទាក់ទង។

ការប្រមូលចំណូលពន្ធតាមប្រព័ន្ធគ្រប់គ្រងទិន្នន័យអនឡាញ បានថយចុះប្រមាណ ២លានដុល្លារនៅក្នុងខែមករា ឆ្នាំ២០២៤។ អគ្គនាយកដ្ឋានពន្ធដារ បានថ្លែងថា ការប្រមូលពន្ធតាមប្រព័ន្ធគ្រប់គ្រងទិន្នន័យចំណូលអនឡាញ បានចំនួនជាង ២៩៨ក្បៀស ៥៥លានដុល្លារ នៅក្នុងមករា ឆ្នាំ២០២៤។ អគ្គនាយកនៃអគ្គនាយកដ្ឋានពន្ធដារ លោក គង់ វិបុល នៅក្នុងកិច្ចប្រជុំបួកសរុបលទ្ធផលការងារគ្រប់គ្រងប្រមូលចំណូលពន្ធប្រចាំខែមករា ឆ្នាំ២០២៤ បានថ្លែងថា ចំណូលនេះមានការធ្លាក់ចុះប្រមាណ ២លានដុល្លារ បើធៀបនឹងរយៈពេលដូចគ្នា នៃឆ្នាំ២០២៣។