មនុស្សវ័យ១៨ឆ្នាំឡើង បានបន្តទទួលការចាក់វ៉ាក់សាំងបន្ថែមទៀត បើទោះបីជាផែនការដាក់ចេញការចាក់លើ មនុស្សចំនួន១០លាននាក់ បានគ្រប់តាមផែនការណ៍រួចមកហើយនោះក៏ដោយ។ សេចក្តីរាយការណ៍២៤ម៉ោង ចុងក្រោយនេះ បានបញ្ជាក់ថាតួលេខចាក់វ៉ាក់សាំងលើពលរដ្ឋវ័យ១៨ឆ្នាំឡើង បានកើនដល់១០លាន១ម៉ឺន ១ពាន់៤២១នាក់ហើយ ។ យោងតាមក្រសួងសុខាភិបាលប្រជាពលរដ្ឋដែលបានទទួលការចាក់វ៉ាក់សាំងក្នុងរយៈ ពេល២៤ម៉ោងកន្លងមកនេះ មានចំនួន៥ម៉ឺន៥ពាន់៣៤៦នាក់ ។

ចំនួនអ្នកស្លាប់ដោយសារកូវីដ-១៩ មានចំនួនសរុប៧នាក់នៅថ្ងៃពុធនេះ ក្នុងនោះអ្នកស្លាប់ដោយសារមិនទាន់ បានចាក់វ៉ាក់សាំងមានច្រើនដល់៥នាក់។ អ្នកស្លាប់ដោយសារមិនបានចាក់ថ្នាំបង្កាកូវីដ១៩ ត្រូវគេរកឃើញមាន តួលេខខ្ពស់គួរឲ្យកត់សម្គាល់។ គិតត្រឹមរយៈពេល១៦ថ្ងៃជាបន្តបន្ទាប់មកនេះ ក្នុងចំណោមអ្នកស្លាប់ ១៣៧នាក់ ដោយសារឆ្លងកូវីដ១៩ គឺមានចំនួន៩៤នាក់ ដែលជាអ្នកមិនបានចាក់វ៉ាក់សាំង។

តួលេខអ្នកឆ្លងកូវីដ-១៩និងកំពុងស្ថិតក្នុងការព្យាបាល នៅសល់ចំនួន៣ពាន់៦៧៦នាក់ ក្រោយការជាសះស្បើយ ចំនួន៩៤នាក់ ក្នុងរយៈពេល២៤ម៉ោងចុងក្រោយនេះ។ តួលេខអ្នកជាសះស្បើយក្នុងមួយថ្ងៃៗ ត្រូវគេឃើញថា មានចំនួនច្រើនជាងអ្នកឆ្លង ក្នុងរយៈពេលច្រើនថ្ងៃបន្តបន្ទាប់មកនេះ។ កាលពីម្សិលមិញ តួលេខអ្នកព្យាបាលជា សះស្បើយមានចំនួន១១៥នាក់ខណៈអ្នកឆ្លងមាន៨៩នាក។ ចំណែកនៅថ្ងៃទី៣វិច្ឆិកានេះ តួលេខឆ្លងមាន៨៥ នាក់ខណៈតួលេខអ្នកព្យាបាលជាសះស្បើយមានចំនួន៩៤នាក់។ គិតត្រឹមថ្ងៃទី៣វិច្ឆិកានេះ, តួលេខអ្នកឆ្លងកូវីដ ១៩ដែលកំពុងស្ថិតក្នុងការព្យាបាល នៅសល់តែចំនួន៣ពាន់៦៧៦នាក់។

សមត្ថកិច្ចរាជធានី បានបើកកិច្ចប្រជុំមួយនៅថ្ងៃទី៣វិច្ឆិកានេះ ក្នុងការពង្រឹងសណ្តាប់ធ្នាប់ស្របពេលដែលរាជ រដ្ឋាភិបាលបានប្រកាសបើកប្រទេសសាឡើងវិញ៕

រាជធានីភ្នំពេញ បើទោះបីជាមានការបើកអាហារដ្ឋានបៀរហ្គាដិននោះមែន ប៉ុន្តែអាជីវកម្មខារ៉ាអូខេនិងក្លឹប កំសាន្ត នៅបន្តបិទនៅឡើយទេ។ អភិបាលរាជធានីភ្នំពេញលោកឃួង ស្រេង ក្នុងកិច្ចប្រជុំ តាមប្រព័ន្ធវីដេអូអន ឡាញ កាលពីល្ងាចថ្ងៃទី០២ ខែវិច្ឆិកា បានដាក់បទបញ្ជាឲ្យអាជ្ញាធរខណ្ឌទាំង១៤និងកម្លាំងប្រដាប់អាវុធ ត្រូវអនុ វត្តឲ្យបានម៉ឺងម៉ាត់បំផុតនូវការហាមមិនឲ្យបើកការ៉ាអូខេនិងក្លឹបកំសាន្តនោះ។ អភិបាលរាជធានីភ្នំពេញបានថ្លែង ថា បើទោះបីជារាជរដ្ឋាភិបាលបានបើកប្រទេសឲ្យដំណើរការឡើងវិញលើគ្រប់វិស័យនោះមែន ប៉ុន្តែចំពោះក្លឹប កំសាន្តនិងខារ៉ាអូខេ គឺនៅមិនអនុញ្ញាតឲ្យបើកដំណើរការនៅឡើយនោះទេ ។