មនុស្សចំនួន២៨៣នាក់ ត្រូវបានឃាត់ខ្លួនរយៈពេល២៤ម៉ោងកន្លងមកនេះ ក្នុងអំពើល្មើសបំពានវិធានរដ្ឋបាល និងវិធានសុខាភិបាល ក្នុងស្ថានការណ៍ដែលរាជរដ្ឋាភិបាលកំពុងបន្តឹងការអនុវត្តច្បាប់ប្រឆាំងនឹងការឆ្លង កូវីដ ១៩។ មន្ត្រីគណៈកម្ម ការអន្តរក្រសួងដើម្បីប្រយុទ្ធនឹងជម្ងឺកូវីដ-១៩ លោកឧត្តមសេនីយ៍ឯក ម៉ៅ ពៅ បាន ថ្លែង ថានៅថ្ងៃទី៨កញ្ញានេះថា សមត្ថកិច្ចនូវបានឃាត់រថយន្ដចំនួន ៧គ្រឿង, ម៉ូតូ៣១គ្រឿង និងផាកពិន័យជា ប្រាក់ បានចំនួន ២លាន៤សែនរៀល ក្នុងការអនុវត្តវិធានការច្បាប់ចំនួន ៩៦ករណី នៅថ្ងៃនេះ ។

ប្រជាពលរដ្ឋដែលបានទទួលការចាក់វ៉ាក់សាំងក្នុងរយៈពេល២៤ម៉ោងកន្លងមកនេះ មានចំនួន៣ម៉ឺន៦ពាន់ ៩២៨នាក់។ យោងតាមក្រសួងសុខាភិបាលតួលេខនៃចំនួនសរុបដែលពលរដ្ឋទូទាំងប្រទេសបានទទួលការ ចាក់វ៉ាក់សាំងគិតត្រឹមថ្ងៃទី៨ ខែកញ្ញានេះ បានកើនដល់ ១១លាន៣សែន២ម៉ឺន៨ពាន់ ៣៩៣នាក់ហើយ, ក្នុង នោះ អ្នកបានចាក់វ៉ាក់សាំងដូសទី២រួចមានចំនួន៩លាន៧ម៉ឺន៩ពាន់៦៧១នាក់។

មន្ត្រីក្រសួងសុខាភិបាលបានថ្លែងថា ស្ដ្រីមានផ្ទៃពោះ ឬស្ត្រីកំពុងបំបៅកូនដោយទឹកដោះក្តី ក៏អាចចាក់វ៉ាក់ សាំងការពារជំងឺកូវីដបានដែរ ។ ការថ្លែងរបស់រដ្ឋលេខាធិការក្រសួងសុខាភិបាលលោកស្រី ឱ វណ្ណឌីន បានធ្វើ ឡើងក្នុងពេលដែលស្ត្រីមានផ្ទៃពោះនិងស្ត្រីដែលមានកូនខ្ចីត្រូវបំបៅកូនដោយទឹកដោះម្តាយនោះ មិនហ៊ានមក ទទួលការចាក់វ៉ាក់សាំងបង្កាកូវីដ១៩ឡើយ។

ការឆ្លងជំងឺកូវីដ១៩នៅក្នុងសហគមន៍នៅក្នុងរយ:ពេល២៤ម៉ោងកន្លងមកនេះបានបន្តកើនឡើងចំនួន៨៥ ករណីបើបៀបធៀបនឹងម្សិលមិញ។ ការឆ្លងថ្មីនៅថ្ងៃនេះចំនួន៥៩៦ករណី ក្នុងនោះរួមមានការឆ្លងចូលក្នុង សហគមន៍៤១៩ករណី និងការឆ្លងមកពីក្រៅប្រទេស១៧៧ករណី។ បើប្រៀបធៀបនឹងម្សិលមិញ, តួលេខឆ្លងក្នុង សហគមន៍ថ្ងៃនេះ បានកើនឡើង៦០ករណី, រីឯតួលេខឆ្លងមកពីក្រៅប្រទេសបានកើនឡើង២៥ករណី។ ការស្លាប់ ថ្មីក្នុងរយៈពេល២៤ម៉ោង ចុងក្រោយនេះ មានចំនួន ៦នាក់ ដែលថយចុះ៥នាក់បើប្រៀបធៀបនឹងម្សិលមិញ។ ចំនួនមនុស្ស ដែលបានឆ្លងក្នុងព្រឹត្តិការណ៍សហគមន៍២០កុម្ភៈ រយៈពេល១៩៩ថ្ងៃកន្លងមកនេះ បានកើនឡើង ដល់៨ម៉ឺន៦២៥ករណី ។

ពាក់ព័ន្ធនឹងការផ្សាយដដែលរបស់វិទ្យុវីអូឌី, ការផ្សាយមួយរបស់វិទ្យុដដែលនេះជុំវិញការចោទប្រកាន់ថាអាជ្ញាធរ បានគំរាមចាប់យុវជន២នាក់ដែលជាអ្នកការពារបរិស្ថាននៅសង្កាត់បឹងទំពន់១ក្នុងខណ្ឌមានជ័យរាជធានីភ្នំពេញ ត្រូវបានអ្នកនាំពាក្យស្នងការដ្ឋាននគរបាលរាជធានី បានបដិសេធនិងប្រញាប់បំភ្លឺតបប្រាប់សាធារណជនវិញ។

អ្នកនាំពាក្យក្រសួងព័ត៌មានបានទាត់ចោលការចោទប្រកាន់សមាគមសម្ព័ន្ធអ្នកសារព័ត៌មានកម្ពុជាដែលចោទ ជុំវិញការគម្រាមកំហែងរបស់អាជ្ញាធរខណៈអ្នកសារព័ត៌មានបានចុះយកព័ត៌មានក្នុងជម្លោះរឿងដីធ្លីមួយកន្លែង ពាក់ព័ន្ធនឹងគម្រោងអភិវឌ្ឍន៍អាកាសយានដ្ឋានអន្តរជាតិភ្នំពេញថ្មីនៅក្នុងខេត្តកណ្តាល។

រដ្ឋមន្ត្រីការបរទេសចិនលោកវ៉ាងយី បានជ្រើសយកកម្ពុជាគឺជាប្រទេសដំបូងក្នុងដំណើរទស្សនកិច្ច៤ប្រទេស របស់លោកដែលនឹងមានរយៈពេល៥ថ្ងៃនៅអាស៊ី។ ប្រទេសទាំង៤ដែលលោករដ្ឋមន្ត្រីការបរទេសចិននឹងធ្វើ ទស្សនកិច្ចនោះ រួមមានប្រទេសកម្ពុជា, វៀតណាម, សឹង្ហបុរី, និងប្រទេសកូរ៉េខាងត្បូង។

សេចក្តីព្រាងច្បាប់ចំនួន៧ក្នុងនោះរួមមានទាំងសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង ពាណិជ្ជកម្មសេរីរវាងរាជរដ្ឋាភិបាលកម្ពុជានិងរដ្ឋាភិបាលចិនផងដែរ នឹងត្រូវយកទៅពិភាក្សានិងអនុម័តក្នុងកិច្ច ប្រជុំរដ្ឋសភាពេញអង្គនៅថ្ងៃទី៩កញ្ញាស្អែកនេះ។ មន្ត្រីរដ្ឋាភិបាលកម្ពុជានិងប្រទេសចិន បានចុះហត្ថលេខាលើ កិច្ចព្រមព្រៀងពាណិជ្ជកម្មសេរីរវាងប្រទេសទាំង២ តាំងពីថ្ងៃទី១២តុលាឆ្នាំ២០២០នោះមកក្នុងដំណើរទស្សន កិច្ចរបស់រដ្ឋមន្ត្រីក្រសួងការបរទេសចិនលោកវ៉ាងយី។