សមត្ថកិច្ចបានរកឃើញអាល់កុលក្លែងក្លាយជាង២៨តោនក្នុងខណ្ឌចំនួន២នៅរាជធានីភ្នំពេញ។ ការបង្រ្កាបនោះ បានធ្វើឡើងកាលពីថ្ងៃទី៣០ខែសីហា ឆ្នាំ២០២១ ក្នុងខណ្ឌពោធិ៍សែនជ័យនិងខណ្ឌទួលគោក។

ក្រុមហ៊ុន ជីប ម៉ុង បានឧបត្ថម្ភថវិកា២០ម៉ឺនដុល្លារ និងថ្នាំបុរាណចិនលៀន ហ័រ ឈីងវឹន ១ម៉ឺនប្រអប់ ជូនដល់ សមាគមគ្រូពេទ្យស្ម័គ្រចិត្តយុវជនសម្ដេចតេជោ។ ពិធីប្រគល់និងទទួលនោះគឺបានធ្វើឡើងនៅថ្ងៃទី៣១ ខែ សីហាឆ្នាំ២០២១ ក្រោម វត្តមាន ប្រធានក្រុមប្រឹក្សាភិបាលក្រុមហ៊ុន ជីប ម៉ុង អ្នកឧកញ៉ា លាង ឃុន និងអនុ ប្រ ធានក្រុមប្រឹក្សាភិបាល សមាគមគ្រូពេទ្យស្ម័គ្រចិត្តយុវជនសម្ដេចតេជោលោកស្រីបណ្ឌិត ពេជ ចន្ទមុន្នី ។

តុលាការរាជធានីបានធ្វើសវនាការលើករណីសំណុំរឿង លោក ហូ វ៉ាន់ និងសមាជិកក្រុមប្រឆាំងចំនួនជាង ១០រូបទៀតនៅថ្ងៃនេះ ពាក់ព័ន្ធនឹង ករណីញុះញង់បង្កឱ្យមានភាពវឹកវរ កាលពីឆ្នាំ២០២០។ មន្ត្រីតុលាការបាន ថ្លែងថាសាលក្រមនៃសវនាការនេះ នឹងត្រូវប្រកាសនៅថ្ងៃទី២៨ ខែកញ្ញា ឆ្នាំ២០២១។ ជនជាប់ចោទសម្រាប់ការ ជំនុំជម្រះថ្ងៃទី៣១សីហានេះ រួមមានឈ្មោះ ជុំ វុទ្ធី, ឈួ ផេង , ថា ឡាវី , មាន ព្រហ្មមុនី, មួង សុភ័ក្រ្ត , កើត សា រ៉ាយ, អេង ម៉ាឡៃ, ហ៊ុន វណ្ណៈ, ឈឿន ដារ៉ាវី, គង់ សំអាន និង ឈ្មោះសេង ម៉េងប៊ុនរ៉ុង។

ស្នងការដ្ឋាននគរបាលរាជធានី បានជម្រុញមន្ត្រីក្រោមបង្គាប់ត្រូវពន្លឿនការធ្វើអត្តសញ្ញាណបណ្ណដល់ពលរដ្ឋ ដែលការជម្រុញនេះ បានប្រព្រឹត្តទៅក្នុងពេលដែលកម្ពុជាត្រៀមនឹងរៀបចំដំណើរការបោះឆ្នោតឃុំសង្កាត់ក្នុងឆ្នាំ ២០២២ និងការបោះឆ្នោតសកលឆ្នាំ២០២៣។

សហព័ន្ធកីឡាបាល់ទាត់កម្ពុជាបានស្នើដេញថ្លៃដើម្បីធ្វើជាម្ចាស់ផ្ទះនៃការប្រកួតបាល់ទាត់ពាន រង្វាន់ស៊ុហ្ស៊ុយ គីខាប់ ឆ្នាំ២០២០នាចុងឆ្នាំ២០២១។ ពានរង្វាន់ AFF Suzuki Cup 2020 ត្រូវបានពន្យារពេលចំនួន ២លើករួចមក ហើយដោយសារការរីករាលដាលខ្លាំងនៃជំងឺកូវីដ-១៩ ក្នុងតំបន់ ក៏ដូចជាលើពិភពលោក។

ក្រសួងបរិស្ថាន បានស្វាគមន៍នូវគម្រោងរបស់ប្រទេសអូស្ត្រាលីជុំវិញការផលិតអគ្គិសនីដោយប្រើប្រាស់ឧស្ម័ន អ៊ីដ្រូសែន។

ខេត្តកំពត បានរកឃើញអ្នកឆ្លងជំងឺកូវីដ១៩ ចំនួន ១៩ នាក់ ថែមទៀត នៅថ្ងៃនេះ ដែលជាតួលេខឆ្លង ថយចុះ ចំនួន ១១នាក់ធៀបនឹងម្សិលមិញ ។

ខេត្តកោះកុងបានរកឃើញអ្នកឆ្លងកូវីដ១៩ចំនួន១០នាក់ដែលជាតួលេខថយចុះ២នាក់ប្រៀបធៀបនឹងម្សិលមិញ ។ យោងតាមរដ្ឋបាលខេត្ត ការឆ្លងថ្ងៃនេះ រួមនៅស្រុកកោះកុង៦នាក់, ស្រុកគីរីសាគរ២នាក់, ស្រុកស្រែអំបិល ម្នាក់និងនៅក្រុងខេមរភូមិន្ទម្នាក់។ ខេត្តកោះកុងក៏ជាខេត្តដែលបានរកឃើញការឆ្លងវីរុសបំប្លែងថ្មី Delta ចំនួន ៣ករណីផងដែរ។

ខេត្តមណ្ឌលគិរី បានបន្តរកឃើញអ្នកឆ្លងកូវីដ១៩ ចំនួន ៤៧នាក់ ថែមទៀតហើយ ក្នុងរយៈពេល ២៤ម៉ោង ចុង ក្រោយនេះ ដែលជាតួលេខឆ្លងកើនឡើងចំនួន ១៤នាក់ ធៀបនឹងការរកឃើញពីម្សិលមិញ ។

ខេត្តព្រះវិហារ បានរកឃើញអ្នកឆ្លងជំងឺកូវីដ១៩ ចំនួន ៤៤នាក់ ថែមទៀត ក្នុងរយៈពេល ២៤ម៉ោង ចុងក្រោយ នេះ ដែលជាតួលេខឆ្លងកើនលើសពីមិ្សលមិញចំនួន ៩នាក់ ។