ខេត្តបន្ទាយមានជ័យ បានបន្តរកឃើញអ្នកឆ្លងជំងឺកូវីដ១៩ ចំនួន ១៩៩នាក់ នៅថ្ងៃនេះ ដែលជាតួលេខ ថយចុះ ចំនួន៨៣នាក់ ធៀបនឹងម្សិលមិញ។ យោងតាមរដ្ឋបាលខេត្ត អ្នកទើបរកឃើញឆ្លងថ្មីនៅថ្ងៃនេះ គឺជាករណីឆ្លង នៅក្នុងសហគមន៍ដែលមានចំនួន ១០១នាក់, ករណីឆ្លងលើពលករដែលទើបត្រឡប់មកពីប្រទេសថៃ ៨៨, ចំណែក១០នាក់ដទៃទៀត គឺជាករណីឆ្លងនៅក្នុងមណ្ឌលកែប្រែជីវិតថ្មីភ្នំបាក់នៃក្រុងសិរីសោភ័ណ ។ អ្នកឆ្លងថ្មីទាំងនោះ ជាពលរដ្ឋមានអាសយដ្ឋាននៅក្នុងក្រុងប៉ោយប៉ែត, ស្រុងស្វាយចេក, ស្រុកមង្គលបុរី, ស្រុកភ្នំ ស្រុក, ក្រុងសិរីសោភ័ណ, ស្រុកម៉ាឡៃ, ស្រុកព្រះនេត្រព្រះ, ស្រុកអូរជ្រៅ, ស្រុកថ្មីពួក និងពលរដ្ឋមកពីខេត្តផ្សេង រួមមាន៖ ខេត្តកំពត, កំពង់ធំ, ព្រៃវែង, សៀមរាប, កណ្តាល, កំពង់ចាម, បាត់ដំបង, ត្បូងឃ្មុំ, ព្រះវិហារ, តាកែវ, ស្វាយរៀង និងខេត្តកំពង់ស្ពឺ ។ ខេត្តបន្ទាយមានជ័យ នៅថ្ងៃនេះ បានព្យាបាលអ្នកជំងឺកូវីដ១៩ បានជាសះស្បើយ ឡើងវិញចំនួន ១០៥ នាក់ ផងដែរ ៕

អ្នកឧកញ៉ា ឡេង ណាវ៉ាត្រា និងភរិយាបានឧបត្ថម្ភថវិកាចំនួន១ពាន់លានរៀល ជូនសមាគមគ្រូពេទ្យស្ម័គ្រចិត្ត យុវជនសម្តេចតេជោ (TYDA)ក្នុងយុទ្ធនាការប្រឆាំងជំងឺកូវីដ-១៩។ សមាគមគ្រូពេទ្យស្ម័គ្រចិត្តយុវជន សម្តេច តេជោ (TYDA) បានចាត់ទុកការចូលរួមនោះ គឺជាទឹកចិត្ត និងសប្បុរសធម៌ជួយគ្នានៅក្នុងគ្រាដែលប្រទេសជាតិ កំពុងជួបគ្រោះអាសន្នដោយសារការរីករាលដាលនៃជំងឺកូវីដ-១៩ ។ សមាគមគ្រូពេទ្យស្ម័គ្រចិត្តយុវជនសម្តេចតេជោ TYDA នៅបានថ្លែងអំណរគុណចំពោះ សប្បុរសជនទាំងអស់ ដទៃទៀតដែលបានចូលរួមសកម្មភាពមនុស្សធម៌ជាមួយសមាគមគ្រូពេទ្យស្ម័គ្រចិត្តយុវជនសម្តេតេជោតាម រយៈ ការឧបត្ថម្ភថវិកា សម្ភារៈ ដើម្បីផ្តល់លទ្ធភាពឱ្យសមាគមបំពេញបេសកកម្មមនុស្សធម៌សម្រាប់ជាតិ និងមាតុភូមិ។ សូមបញ្ជាក់ថា គិតត្រឹមថ្ងៃទី២៣ សីហា ឆ្នាំ២០២១ ខណ:ដែលចំនួនអ្នកកើតជំងឺកូវីដ-១៩ នៅតែបន្តមានចំនួន ច្រើននោះ សប្បុរសជនជាច្រើន ត្រូវគេជើញបានចូលរួមឧបត្ថម្ភជាថវិកា, ភេសជ្ជ:, អាហារ និងសម្ភារៈជូនដល់ ក្រុមគ្រូពេទ្យស្ម័គ្រចិត្តយុវជនសម្តេចតេជោ ដែលកំពុងចូលរួមយ៉ាងខ្លាំងក្លាប្រយុទ្ធប្រឆាំងជំងឺកូវីដ១៩ដើម្បី សុវត្ថិភាពប្រជាពលរដ្ឋទូទាំងប្រទេស ។

មនុស្សចំនួន ៦០៦នាក់ ត្រូវបានឃាត់ខ្លួនរយៈពេល២៤ម៉ោងកន្លងមកនេះ ក្នុងអំពើល្មើសបំពានវិធានរដ្ឋបាល និងវិធានសុខាភិបាល។ មន្ត្រីគណៈកម្មការអន្តរក្រសួងដើម្បីប្រយុទ្ធនឹងជម្ងឺកូវីដ-១៩ លោកឧត្តមសេនីយ៍ឯក ម៉ៅ ពៅ បាន ថ្លែងនៅថ្ងៃច័ន្ទនេះថា ក្នុងប្រតិបត្ដិការនេះ សមត្ថកិច្ចបានឃាត់យានយន្តបានចំនួន ១៨៥ និងផាកពិ ន័យជាប្រាក់បានចំនួន ២លានរៀល ក្នុងការអនុវត្តវិធានការច្បាប់ចំនួន ២២៩ ករណី។ នេះជាតួលេខបង្ហាញ ការកាន់តែថយចុះនូវសកម្មភាពបំពានវិធានការរដ្ឋបាលក្រោយសមត្ថកិច្ចរឹតបន្តឹងវិធានការច្រើនថ្ងៃកន្លងមកនេះ ។ បទល្មើសមិនគោរពវិធានការដ្ឋបាល ត្រូវផាកពិន័យអន្តរការណ៍ពី ១លានទៅ ៥លានរៀល, ត្រូវ ផ្ដន្ទាទោស ដាក់ពន្ធនាគារពី៦ខែទៅ៣ឆ្នាំ និងពិន័យជាប្រាក់ពី ២លាន ទៅ ១០លានរៀល បើអំពើនោះបាន បណ្ដាលឲ្យ មានការ ចម្លង ជំងឺ កូវីដ-១៩ដល់អ្នកដទៃ និងត្រូវផ្ដន្ទាទោសដាក់ពន្ធនាគារពី២ឆ្នាំទៅ៥ឆ្នាំ និងពិ ន័យ ជាប្រាក់ពី ៥លាន ទៅ ២០ លានរៀលបើអំពើនោះបានបណ្ដាលឲ្យប៉ះពាល់ធ្ងន់ធ្ងរដល់សុខភាពសាធារណៈ។

ប្រទេសអាស៊ានទាំង១០ក្នុងរយៈពេល៧២ម៉ោងចុងក្រោយនេះ ការឆ្លងកូវីដ១៩ មានចំនួន២៥ម៉ឺន២ពាន់ ៤០៧ករណី និងការស្លាប់ថ្មីមានចំនួន៦ពាន់៩៦៩នាក់។ ប្រទេសដែលមានការឆ្លងថ្មីក្នុងរយៈ ពេល៧២ម៉ោងចុង ក្រោយនេះនៅអាស៊ាន រួមមាន១០ប្រទេស។ ចំណែកប្រទេសដែល មានការ ស្លាប់ថ្មីរយៈពេល៧២ម៉ោង ចុង ក្រោយនេះ មាន ៩ប្រទេស។

ចំនួនប្រជាពលរដ្ឋដែលបានទទួលការចាក់វ៉ាក់សាំងបានកើនជាង៩លាន៧សែននាក់ហើយគិតត្រឹម ថ្ងៃទី២៣ សីហានេះ។ យោងតាមក្រសួងសុខាភិបាលពលរដ្ឋដែលបានទទួលវ៉ាក់សាំង មានចំនួនសរុប៩លាន៧សែន ១ម៉ឺន៧ពាន់២៥៨នាក់ ក្នុងនោះអ្នកចាក់វ៉ាក់សាំងបាន២ដូសរួចមានចំនួន៧លាន៨សែន៧ម៉ឺន៤ពាន់៩៣៨នាក់។ កម្ពុជាដែលមានប្រជាពលរដ្ឋសរុបចំនួន១៦លាននាក់ ទំហំភាគរយនៃការចាក់វ៉ាក់សាំងនាពេលនេះ កើនបាន ប្រមាណ៦០,៧៣%ហើយ, ចំណែកការចាក់ដូសទី៣ ឬដូសជម្រុញវិញ ទើប ចាក់បានលើពលរដ្ឋចំនួន ៤៨ម៉ឺន៦ ពាន់៨៣៤នាក់នោះទេ។

ការឆ្លងជំងឺកូវីដ១៩នៅក្នុងរយ:ពេល២៤ម៉ោងកន្លងមកនេះមានចំនួន៤១០ករណីដែលជាតួលេខឆ្លងធ្លាក់ចុះ ទាបជាងគេក្នុងខែសីហានេះ។ ការឆ្លង៤១០ ករណីថ្ងៃ នេះរួមការឆ្លងចូលក្នុងសហគមន៍ចំនួន២៧៨ករណី និងការឆ្លងមកពីក្រៅប្រទេស១៣២ករណី។ បើប្រៀបធៀបនឹងម្សិលមិញ តួលេខឆ្លងក្នុងសហគមន៍ថ្ងៃនេះ បានថយចុះ៨៦ករណី, ចំណែកតួលេខឆ្លងមកពី ក្រៅប្រទេស ក៏បានថយចុះ៤៤ករណីផងដែរ។ ការស្លាប់ ថ្មីក្នុងរយៈពេល២៤ម៉ោង ចុងក្រោយនេះ មានចំនួន ១៦នាក់ ដែលចំនួននេះកើនឡើង២នាក់ បៀបធៀបនឹង ម្សិលមិញ។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍ ២០កុម្ភៈ រយៈពេល១៨៤ថ្ងៃកន្លងមកនេះ បានកើនឡើងដល់៧ម៉ឺន៥ពាន់៣៤០ករណី ។ កម្ពុជាគិតត្រឹមថ្ងៃ ទី២៣ខែសីហា, ការឆ្លងសរុបទូទាំងប្រទេស មានចំនួន៨ម៉ឺន៩ពាន់៦៤១ករណី, ការស្លាប់សរុបកើនចំនួន ១ពាន់៨០៨នាក់ និងការព្យាបាលជាសះស្បើយ សរុបមានចំនួន ៨ម៉ឺន៥ពាន់៦១៨នាក់។

កម្ពុជាបានរកឃើញអ្នកឆ្លងវីរុសកូវីដ១៩បំប្លែងថ្មីDelta សរុបជិត១ពាន់អ្នកហើយ។ យោងតាមសេចក្តីប្រកាស ព័ត៍មានរបស់ក្រសួងសុខាភិបាលគិតត្រឹមថ្ងៃទី២២សីហារាជធានីនិងខេត្តចំនួន២៣ហើយដែលគេបានរកឃើញ ការឆ្លងវីរុសបំប្លែងថ្មី Delta ចំនួន៩៩៩ករណី, ក្នុងនោះ រាជធានីភ្នំត្រូវបានគេរកឃើញមានការឆ្លងច្រើនជាងគេ ចំនួន ២៣៨ករណី, ខេត្តឧត្តរមានជ័យជាខេត្តដែលបានរកឃើញការឆ្លងច្រើនលំដាប់ទី២ចំនួន១៧៦ករណី, ខេត្ត សៀមរាប១៣៨ករណី, បន្ទាយមានជ័យ ១៤៦ករណី, ខេត្តព្រះវិហារ ៥១ករណី, ខេត្តប៉ៃលិន២៧ករណី, ខេត្ត បាត់ដំបង២៧ករណី, ខេត្តស្វាយរៀង៣៨ករណី, ខេត្តកំពង់ធំ ៣៩ករណី, ខេត្តត្បូងឃ្មុំ១២ករណី, ខេត្តកំពង់ចាម ១៨ករណី, ខេត្តរតនគិរី ១០ករណី, ខេត្តកំពង់ស្ពឺ ៧ករណី, ខេត្តកណ្តាល ២៩ករណី, ខេត្តព្រៃវែង ៣ករណី , ខេត្ត កំពត២ករណី, ខេត្តស្ទឹងត្រែង១៩ករណី, ខេត្តកំពង់ឆ្នាំង ១ករណី , ខេត្តពោធិសាត់ ៤ករណី , ខេត្តកោះកុង ១ករណី, ខេត្តមណ្ឌលគិរី៦ករណី, ខេត្តព្រះសីហនុ ៣ករណី , និងខេត្តតាកែវ ៤ករណី។ ខេត្តចំនួន២ផ្សេងទៀត ដែលមិនទាន់មានការឆ្លងវីរុសបំប្លែងថ្មី…

វ៉ាក់សាំងស៊ីណូហ្វាមចំនួន៦០ម៉ឺនដូសដែលជាវ៉ាក់សាំងជំនួយនៃប្រទេសចិន បានដឹកមកដល់កម្ពុជានៅថ្ងៃទី ២៣សីហានេះ តាមរយៈជើងយន្តហោះ២ដាច់ដោយឡែកពីគ្នា ក្នុងនោះវ៉ាក់សាំងជំនួយ៥០ម៉ឺនដូសនៃជំនួយ សម្រាប់ក្រសួងការពារជាតិ បានដឹកមកដល់វេលារសៀល និងវ៉ាក់សាំង១០ម៉ឺនដូសទៀតសម្រាប់កាកបាទ ក្រហមកម្ពុជាត្រូវបានដឹកមកដល់វេលាល្ងាចថ្ងៃដដែលនេះ។ ពិធីទទួលវ៉ាក់សាំង៥០ម៉ឺនដូស នៃជំនួយសម្រាប់ ក្រសួងការពារជាតិ បានអញ្ជើញទៅទទួលដោយសម្តេចពិជ័យសេនាទៀបាញ់ដោយមានការអញ្ជើញចូលរួមពី ឯកអគ្គរដ្ឋទូតចិនប្រចាំកម្ពុជាលោកវ៉ាងវិនធៀន ។ យោងស្ថានទូតចិន, ក្រសួងការពារជាតិកម្ពុជាទទួលបានវ៉ាក់សាំងជំនួយពីប្រទេសចិនចំនួន៣លាន៧សែនដូស ហើយរាប់ទាំងវ៉ាក់សាំង៥០ម៉ឺនដូសចុងក្រោយនេះថែមទៀត។ លោកឯកអគ្គរដ្ឋទូតចិនវ៉ាងវិនធៀន បានថ្លែងថា ដរាបណាកម្ពុជានៅមិនទាន់អស់ការឆ្លងកូវីដ១៩, ជំនួយវ៉ាក់សាំងរបស់ចិនចំពោះកម្ពុជា គឺនៅតែបន្តជារៀងរហូត ។ ឯកអគ្គរដ្ឋទូតលោកវ៉ាងវិនធៀនបានថ្លែងបញ្ជាក់ថាចិនតែងចាត់ទុកការលំបាកដែលកម្ពុជាបានប្រឈមគឺជាការ លំបាកនិងការប្រឈមរបស់ប្រទេសចិនផងដែរ។ លោកបន្តថាចិននឹងបន្តការផ្គត់ផ្គង់សម្ភារៈបង្កាកូវីដ១៩និងបន្ត ធ្វើជាបង្អែកយុទ្ធសាស្ត្រនៃការផ្គត់ផ្គង់ប្រភពវ៉ាក់សាំងសម្រាប់កម្ពុជា។ ដោយឡែកនាល្ងាចថ្ងៃទី២៣សីហាដដែលនេះផងដែរ វ៉ាក់សាំងស៊ីណូហ្វាម១០ម៉ឺនដូសផ្សេងទៀតដែលជាវ៉ាក់ សាំងជំនួយពីសមាគមជាតិកាកបាទក្រហមចិន បានប្រគល់មកកាកបាទក្រហមកម្ពុជាផងដែរក្នុងពិធីមួយដែល មានការអញ្ជើញចូលរួមដោយសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន។ សេចក្ដីប្រកាសព័ត៌មានរបស់កាកបាទក្រហមកម្ពុជា ចាត់ទុកថា វ៉ាក់សាំងកូវីដ-១៩ដែលជាជំនួយរបស់កាក បាទក្រហមចិន បានចូលរួមជាមួយរាជរដ្ឋាភិបាលកម្ពុជា ជាមធ្យោបាយដ៏មានអានុភាពបន្ថែមទៀត ក្នុងការបន្ត កិច្ចខិតខំប្រឹងប្រែងប្រយុទ្ធប្រឆាំងនឹងជំងឺកូវីដ-១៩។ កាកបាទក្រហមកម្ពុជា បានបញ្ជាក់ជុំវិញការប្ដេជ្ញាបន្តខិតខំចូលរួម និងសហការជាមួយនឹងរាជរដ្ឋាភិបាល ឲ្យ កាន់តែខ្លាំងក្លាមួយកម្រិតទៀត ក្នុងការប្រយុទ្ធប្រឆាំងនឹងជំងឺកូវីដ-១៩ តាមរយៈការចូលរួមចំណែកអប់រំផ្សព្វ ផ្សាយដល់ប្រជាពលរដ្ឋតាមសហគមន៍ដើម្បីអនុវត្តវិធាការសុខាភិបាល និងវិធានការរដ្ឋបាល ដើម្បីសុខភាព ល្អរបស់គ្រួសារមួយ សហគមន៍មួយ និងសង្គមជាតិទាំងមូល។

សម្តេចអគ្គមហាពញាចក្រី ហេង សំរិន បានចូលរួមមហាសន្និបាតអន្តរសភាអាស៊ាន ដែលហៅកាត់ថា AIPA លើកទី៤២ តាមប្រព័ន្ធវីដេអូ និងបានថ្លែងជុំវិញបច្ចេកវិទ្យា Digital ដែលកំពុងដើរតួនាទីកាន់តែសំខាន់ក្នុងការ ជម្រុញសន្ទុះនៃកំណើនសេដ្ឋកិច្ចឡើង វិញនៅក្រោយវិបត្តិជម្ងឺកូវីដ១៩។ មហាសន្និបាតប្រចំាឆ្នាំលើកទី៤២ អន្តរសភាអាស៊ាន AIPA តាមប្រព័ន្ធវីដេអូនៅថ្ងៃទី២៣សីហាដោយមានការចូលរួមពីថ្នាក់ដឹកនាំសភាអាស៊ាន ទាំង១០ប្រទេសនាពេលនេះ គឺប្រទេសព្រុយណេបានធ្វើជាម្ចាស់ ផ្ទះ។ មហាសន្និបាតអន្តរសភាអាស៊ានឆ្នាំ ២០២១ បានធ្វើឡើងក្រោមមូលបទ “ជំរុញកិច្ចសហប្រតិបត្តិការ សភាលើបរិយាប័ន្នឌីជីថល ឆ្ពោះទៅសហគមន៍ អាស៊ានឆ្នាំ២០២៥” ។ សម្តេច ហេង សំរិន បានថ្លែងប្រាប់អ្នកចូលរួមថាក្នុងការឈានឆ្ពោះទៅរកឌីជីថលូបនីយកម្ម គឺរមែងត្រូវប្រឈម ទៅនឹងបច្ច័យអវិជ្ជមានដូចជាគម្លាតនៃការអភិវឌ្ឍន៍ឌីឌីថល, អក្ខរកម្មឌីជីថលនិងសន្តិសុខតាមប្រព័ន្ធអ៊ិនថឺណិត ដែលជាបញ្ហាប្រឈមដ៏ធំមួយរបស់សកលលោកទាំងមូល, ជាពិសេសប្រទេសកំពុងអភិវឌ្ឍន៍ដែលមានធនធាន និងសមត្ថភាពនៅមានកម្រិត។ សម្តេចហេងសំរិនបានថ្លែងថា ដូច្នេះគេចាំបាច់ត្រូវវិនិយោគនិងបែងចែកធន ធានថែមទៀតដើម្បីលើកកម្ពស់អក្ខរកម្មឌីជីថលនិងសមត្ថភាពរបស់ប្រជាជន។ គួរបញ្ជាក់ថា ក្នុងឆ្នាំ ២០២២ ខាងមុខនេះ បន្ទាប់ពីប្រទេសប្រុយណេហើយ កម្ពុជានឹងក្លាយជាប្រធានអាយប៉ាលើកទី៤៣។