រដ្ឋមន្ត្រីក្រសួងអធិការកិច្ច លោក ហួត ហាក់ បានធ្វើការបកស្រាយ ជុំវិញសមត្ថកិច្ចរបស់ក្រសួងលោក ដែលកន្លងមកតែងមានការនិយាយថា បានធ្វើកិច្ចការជាន់គ្នាជាមួយនឹងអាជ្ញាធរសវនកម្មជាតិ និងអង្គភាពប្រឆាំងអំពើពុករលួយ។ លោករដ្ឋមន្ត្រីបានថ្លែងថាអាជ្ញាធរសវនកម្មជាតិ គឺជាស្ថាប័នឯករាជ្យ ចំណែកអង្គភាពប្រឆាំងនឹងអំពើពុករលួយ មានសិទ្ធិកោះហៅ និងចាប់ខ្លួននរណាម្នាក់ ពេលរកឃើញមានកំហុស។ ហើយអង្គភាពប្រឆាំងអំពើពុករលួយ ក៏មានសិទ្ធិដោះលែងវិញដែរ បើសិនអ្នកត្រូវបានឃាត់ខ្លួននោះ ត្រូវគេរកឃើញមិនមានកំហុស។ ចំណែកក្រសួងអធិការកិច្ចវិញ គឺជាក្រសួងមានសមត្ថកិច្ចចុះត្រួតពិនិត្យស្រាវជ្រាវ នៅតាមស្ថាប័នទាំងរឿងល្អ និងមិនល្អ។ លោកថា បើឃើញថាស្ថាប័ននោះល្អ ក្រសួងនឹងជួយផ្សព្វផ្សាយឲ្យយកជាគម្រូ ប៉ុន្តែបើធ្វើអធិការកិច្ចទៅមានកំហុស ក្រសួងអធិការកិច្ចនឹងបន្តនីតិវិធី។ លោកបានថ្លែងថានីតិវិធីនោះ បើសិនជាកំហុសតូចតាច, ស្ថាប័ននោះនឹងត្រូវណែនាំអប់រំ និងកែប្រែ ប៉ុន្តែបើធ្ងន់ធ្ងរ ត្រូវស្រាវជ្រាវឲ្យច្បាស់ និងធ្វើរបាយការណ៍ជូនសម្តេចនាយករដ្ឋមន្ត្រីដើម្បីចាត់វិធានការ។ ទោះជាយ៉ាងណាក៏ដោយលោកបានថ្លែងនៅថ្ងៃទី៤មករា នៅក្នុងក្រសួងអធិការកិច្ច តាមរយៈវេទិកាពិភាក្សាមួយរបស់ក្លឹបអ្នកកាសែតកម្ពុជា បញ្ជាក់ថា ក្រសួងទាំងបី មានភារកិច្ចរួមគ្នាមួយនោះ គឺការប្រឆាំងអំពើពុករលួយ និងភាពអសកម្មនានា កើតឡើងក្នុងប្រទេសកម្ពុជា។

ក្រសួងមហាផ្ទៃ បានកំណត់អាណត្តិច្បាស់លាស់សម្រាប់កិច្ចការរបស់នាយ និងនាយរងប៉ុស្ដិ៍នគរបាល ជាមួយនឹងការកំណត់ចំនួនមនុស្ស ដែលត្រូវធ្វើការសម្រាប់ច្រកទ្វារព្រំដែនអន្តរជាតិ និងច្រកទ្វារអន្ដរជាតិ។ ការកំណត់នេះ បានធ្វើឡើងតាមរយៈប្រកាសមួយរបស់រដ្ឋមន្ត្រីក្រសួងមហាផ្ទៃ ដែលបណ្តាញសារព័ត៌មានទើបបានទទួលនៅថ្ងៃនេះ។ ការកំណត់នេះ បានទន្ទឹមនឹងសេចក្តីរាយការណ៍ខ្លះនិយាយថា ចំនួននាយរងប៉ុស្ដិ៍នគរបាលតាមច្រកខ្លះ មានច្រើន ដែលក្រសួងចាំបាច់ត្រូវតែកំណត់ឱ្យបានច្បាស់លាស់។ ក្នុងចំណោមប៉ុស្តិ៍នគរបាលសម្រាប់ច្រកទ្វារព្រំដែនអន្តរជាតិ និងច្រកទ្វារអន្ដរជាតិចំនួន២៧, ប៉ុស្តិ៍នគរបាលច្រកទ្វារអន្តរជាតិបាវិត និងនៅប៉ោយប៉ែត ត្រូវបានកំណត់ចំនួននាយរងប៉ុស្តិ៍ច្រើនជាងគេដល់ចំនួន ២៤នាក់។ ក្រៅពីនោះ ច្រកខ្លះមានរវាងពី ៤រូប ដល់ ១៥រូបនោះទេ។ ប៉ុស្តិ៍នគរបាល ច្រកទ្វារកំពង់ផែអន្តរជាតិឧកញ៉ាម៉ុង និងច្រកទ្វារអន្តរជាតិស្ទឹងហាវ ត្រូវបានកំណត់ឱ្យមាននាយរងប៉ុស្តិ៍ចំនួន ៤នាក់តិចជាងគេ។ ប្រកាសរបស់រដ្ឋក្រសួងមហាផ្ទៃដដែល បានបញ្ជាក់ថានាយ និងនាយរងប៉ុស្តិ៍នគរបាលច្រកទ្វារព្រំដែនអន្តរជាតិ និងច្រកទ្វារអន្តរជាតិ នឹងត្រូវបម្រើការងាររយៈពេល ៤ឆ្នាំយ៉ាងយូរ។ ប្រកាសដដែលបាននិយាយបន្តថា នាយ និងនាយរងប៉ុស្តិ៍នគរបាលច្រកទ្វារ ដែលត្រូវបានចប់អាណត្តិ នឹងត្រូវតែងតាំងមុខតំណែងថ្មី ឬត្រូវតែងតាំងជានាយ ឬនាយរងប៉ុស្តិ៍នគរបាល ច្រកទ្វារផ្សេងទៀតសម្រាប់អាណត្តិបន្ទាប់។ ប្រកាសដដែលនិយាយថា ចំនួនមុខតំណែងនាយរងប៉ុស្តិ៍នគរបាលច្រកទ្វារណា ដែលមានចំនួនលើសពីការកំណត់ ត្រូវរក្សាទុកនៅដដែលសិន។ ប្រកាសដដែលបន្តថា ក្នុងករណីមុខតំណែងនោះនៅទំនេរដោយមូលហេតុ ចូលនិវត្តន៍ ឬផ្ទេរចេញ ឬមូលហេតុផ្សេងទៀតនោះ នឹងមិនត្រូវបានបំពេញបន្ថែមឡើយ ដោយរក្សាទុករហូតដល់មានចំនួន…

ក្រសួងសុខាភិបាល បានប្រកាសរកឃើញករណីជំងឺអុតស្វាចំនួន ២ករណីបន្ថែមទៀត ដែលនាំឲ្យការរកឃើញអ្នកឆ្លងជំងឺអុតស្វា បានកើនឡើងចំនួន ៤ករណីហើយ។ ក្រសួងសុខាភិបាលតាមរយៈសេចក្តីប្រកាសមួយរបស់ខ្លួននាថ្ងៃទី៣ មករា មិនមានបញ្ជាក់អត្តសញ្ញាណលើអ្នកឆ្លងជំងឺអុតស្វា ២ករណីចុងក្រោយនេះឡើយ។ សេចក្តីរាយការណ៍ពីក្រសួងសុខាភិបាលគ្រាន់តែបានបញ្ជាក់ថា បច្ចុប្បន្នអ្នកជំងឺទាំងពីរនាក់នោះ ត្រូវដាក់ឲ្យនៅដាច់ដោយឡែក នៅក្នុងមន្ទីរពេទ្យយ៉ាងត្រឹមត្រូវ។ វីរុសអុតស្វានេះ ត្រូវគេរាយការណ៍ថា មានប្រភពកើតនៅតំបន់ដាច់ស្រយ៉ាល នៃអាហ្វ្រិកកណ្ដាល និងអាហ្វ្រិកខាងលិច និងក្រោយមកបានឆ្លងរាលដាលមកប្រទេសដទៃ តាមរយៈទេសចរណ៍មកពីទ្វីបអាហ្វ្រិច។ ជម្ងឺអុតស្វានេះ ត្រូវគេរកឃើញកើតឡើងដំបូង ក្នុងប្រទេសកម្ពុជា កាលពីខែសីហា ឆ្នាំ២០២២ កើតលើជនជាតិនីហ្សេរីយ៉ា និងក្រោយមកកើតលើបុរសម្នាក់ទៀតនៅក្នុងរាជធានីភ្នំពេញ ក្នុងឆ្នាំ២០២៣។ ជម្ងឺអុតស្វា អាចឆ្លងពីមនុស្សម្នាក់ទៅមនុស្សម្នាក់ទៀត តាមរយៈការរួមភេទគ្រប់ទម្រង់ ជាមួយអ្នកកើតជំងឺនោះ, និងការប៉ះពាល់ដោយផ្ទាល់នឹងកន្លែងមានដំបៅ, ទឹកសារពាង្គកាយ, ទឹកមាត់, តំណក់តូចៗ តាមផ្លូវដង្ហើម និងសម្ភារៈប្រើប្រាស់ដែលប្រឡាក់ប្រឡូក ជាមួយនឹងវីរុស រួមមានសម្លៀកបំពាក់ ពូក កន្លែង ឬសម្ភារ ស្លាបព្រា ចាន និងកែវទឹកជាដើម។ វីរុសអុតស្វា ក៏អាចឆ្លងពីម្តាយទៅកូនតាមរយៈ ទងសុក ក្នុងអំឡុងពេល ឬក្រោយពេលសម្រាល តាមរយៈការប៉ះពាល់បើស្ត្រីមានផ្ទៃពោះ ឬឪពុកម្តាយមានជំងឺអុតស្វា។

បណ្តឹងដីធ្លី គឺជាបណ្តឹងដែលបានកើតឡើងច្រើនបំផុតក្នុងរយៈពេលបីខែចុងឆ្នាំនេះ។ លេខាធិការដ្ឋានរដ្ឋសភា បានថ្លែងថា រយៈពេលជាង៣ខែមកនេះ គេបានទទួលពាក្យបណ្ដឹង និងសំណើសុំអន្តរាគមន៍ពីប្រជាពលរដ្ឋសរុបចំនួន ១០៦រឿង ក្នុងនោះករណីទំនាស់ដីធ្លីមានចំនួនច្រើនជាងគេ។ អគ្គលេខាធិការរដ្ឋសភា លោក ឡេង ប៉េងឡុង នៅក្នុងសន្និសីទសារព័ត៌មានមួយនៅថ្ងៃទី៤ មករា ឆ្នាំ២០២៤ បានថ្លែងថា គណៈកម្មការរបស់រដ្ឋសភាទទួលបន្ទុកសិទ្ធិមនុស្ស បានទទួលពាក្យបណ្ដឹង និងសំណើសុំអន្តរាគមន៍ពីប្រជាពលរដ្ឋសរុប ចំនួន ១០៦រឿង ហើយបានបញ្ជូនសំណុំរឿងទាំងនោះទៅក្រសួងស្ថាប័នពាក់ព័ន្ធ។ លោកបានថ្លែងថាសមត្ថកិច្ចបានធ្វើការដោះស្រាយចំនួន ៤៤រឿង កំពុងពិនិត្យសិក្សាចំនួន ៦១រឿង និងទទួលលិខិតឆ្លើយតបអំពីលទ្ធផលដោះស្រាយ របស់ក្រសួងស្ថាប័នមានសមត្ថកិច្ចចំនួន ១៤រឿងទៀត។ ទំនាស់ដីធ្លី គឺជាទំនាស់ដ៏រ៉ាំរ៉ៃដែលកើតមានស្ទើរនៅគ្រប់ខេត្ត និងក្រុងនានា ខណៈដែលមានសេចក្តីរាយការណ៍ខ្លះចោទថា ការដោះស្រាយខ្លះ បានលំអៀងទៅបុគ្គលនេះ ឬបុគ្គលនោះ ដោយសារតែអំណាចលុយកាក់ និងអំណាចជាដើម ប៉ុន្តែសម្តេចធិបតី ហ៊ុន ម៉ាណែត ដែលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ បានដាក់បញ្ជាការពង្រឹងដោយប្រសិទ្ធភាព នៃប្រព័ន្ធយុត្តិធម៌។ សម្តេចធិបតីបានបង្កើតយន្តការដោះស្រាយវិវាទក្រៅប្រព័ន្ធតុលាការ បន្ថែមលើយន្តការដែលមានស្រាប់ ដើម្បីជួយសម្រុះសម្រួលដោះសា្រយវិវាទឱ្យបានឆាប់រហ័ស ជាពិសេសសសវិវាទរបស់ប្រជាពលរដ្ឋតាមមូលដ្ឋាន ការជម្រុញ និងពន្លឿនការដោះស្រាយរឿងក្តីនៅតាមតុលាការ ឱ្យបានឆាប់រហ័ស សម្តៅលើកកម្ពស់គុណភាព និងប្រសិទ្ធភាព…

ក្តីសង្ស័យមួយពាក់ព័ន្ធនឹងការឃើញយន្តហោះ Airbus 330-202 ដែលបានហោះក្រឡឹងទៅ ក្រឡឹងមក ប្រមាណជា ៤០ជុំនៅពីលើចំណុចខេត្តកែប នៃប្រទេសកម្ពុជា រយៈពេលជាង ៣ម៉ោងនារសៀលថ្ងៃទី៣មករារួចមកនេះ ត្រូវបានបកស្រាយចម្ងល់ហើយ។ អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថាបានថ្លែងបញ្ជាក់ថា យន្តហោះ Airbus 330-202 ដែលផ្ទុកអ្នកដំណើរជិត ២០០នាក់ បានចេញពីអាកាសយានដ្ឋានភូគុក PHU QUOC នៃប្រទេសវៀតណាម ទៅកាន់ប្រទេសម៉ុងហ្គោលី។ ប៉ុន្តែដោយសារ តែយន្តហោះនេះ បានជួបនឹងបញ្ហាច្ចេកទេសនៅត្រង់ស្លាបរបស់ខ្លួន នាវេលាម៉ោង៣ និង៣៥នាទីរសៀលថ្ងៃទី៣ ខែមករា ឆ្នាំ២០២៣នោះ គឺតម្រូវឱ្យយន្តហោះនេះ ត្រូវវិលត្រឡប់ទៅកាន់ព្រលានដើមរបស់ខ្លួននៅវៀតណាមវិញ ដោយមិនហ៊ានប្រថុយការធ្វើដំណើររយៈពេល ១៥ម៉ោង ៥៩នាទីទៅកាន់ប្រទេសម៉ុងហ្គោលីឡើយ។ យោងតាមបច្ចេកទេស, យន្តហោះដែលមានប្រេងសាំងពេញត្រៀមធ្វើដំណើរឆ្ងាយដល់ប្រមាណ១៦ម៉ោងនេះ នឹងអាចចុះចតដោយសុវត្ថិភាពវិញបាន លុះត្រាណាតែសាំងនៅសល់តិច។ ហេតុដូច្នេះហើយ ដើម្បីរក្សាសុវត្ថិភាព យន្តហោះ Airbus 330-202 ត្រូវគេឃើញបានហោះហើរក្នុងគន្លងវិលជុំដដែល ដើម្បីធ្វើឱ្យសាំងនៅសល់តិច ទើបអាចចុះចតវិញបាន។ រដ្ឋលេខាធិការដ្ឋានអាកាសចរណ៍ស៊ីវិល បានថ្លែងថា យន្តហោះ Airbus 330-202 មិនបានហោះចូលក្នុងដែនអាកាសកម្ពុជាឡើយ។…

សមត្ថកិច្ចបានចោទប្រកាន់ជនបរទេស៤រូប ក្នុងចំណោម ៣៧រូប ដែលបានឃាត់ខ្លួន ក្រោយហេតុការណ៍ឈ្លោះប្រកែក និងបានចាក់សម្លាប់ជនជាតិចិនម្នាក់ នៅចំណុចខុនដូ Prince International Plaza ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ គួរបញ្ជាក់ថា ជនបរទេសប្រុសស្រីជាច្រើនសិបនាក់ បានធ្វើការផឹកស៊ីជួបជុំគ្នា និងមានប្រើប្រាស់គ្រឿងញៀនផងទៀត។ នៅក្នុងហេតុការណ៍នោះ ស្រាប់តែមានទំនាស់រឿងលុយជំពាក់ ក៏កើតចេញជាជម្លោះដេញវាយគ្នា ពេញក្នុងអាគារតាំងពីជាន់ខាងលើ រហូតមកដល់ជាន់ផ្ទាល់ដី។ បុរសម្នាក់ត្រូវគេនិយាយថា បានដកកាំបិតចាក់ទៅលើជនរងគ្រោះម្នាក់ បានស្លាប់រួចជនដៃដល់នោះ បានរត់គេចខ្លួនចេញពីកន្លែងកើតហេតុបាត់ទៅ។ រីឯបក្ខពួកជាច្រើននាក់ទៀត បាននាំគ្នារត់គេចទៅសំងំនៅជាន់ខាងលើ។ អ្នកយាមប្រចាំការក្នុងអគារ បានរាយការណ៍ទៅអធិការដ្ឋាននគរបាលខណ្ឌសែនសុខ ដែលបានដឹកនាំកម្លាំងចុះមកបង្ក្រាបតែម្តង។ សមត្ថកិច្ចបានចាប់ខ្លួនជនជាតិចិន ៣៥នាក់ និងជនជាតិវៀតណាម ២នាក់ រួមនឹងវត្ថុតាង កាំភ្លើងខ្លីមួយដើម, កាំបិត, ដំបងឆក់, ថ្នាំញៀន និងវត្ថុតាងមួយចំនួនផ្សេងទៀត។ សមត្ថកិច្ចនៅថ្ងៃនេះបានចោទប្រកាន់ជនជាតិចិន ៤នាក់ពាក់ព័ន្ធនឹងការធ្វើឱ្យបុរសជាតិចិនជាជនរងគ្រោះបានស្លាប់។ អ្នកនាំពាក្យស្នងការដ្ឋាននគរបាលរាជធានីលោកវរសេនីយ៍ឯក សំ វិច្ឆិកា នារសៀលថ្ងៃទី៤មករា បានបញ្ជាក់នូវចំណាត់ការរបស់ស្នងការដ្ឋាននគរបាលរាជធានីភ្នំពេញ ជុំវិញក្រុមបរទេសដែលប្រព្រឹត្តអំពើខុសច្បាប់នេះ។

ពលរដ្ឋនិងនិស្សិតខ្មែររស់នៅក្នុងបណ្តាប្រទេសនៃទ្វីបអឺរ៉ុប បានបន្តធ្វើសារសម្លេងតាមបណ្តាញសង្គម ក្រោយព័ត៌មានដែលប្រកាសជាផ្លូវការថា សម្តេចមហាបវរធិបតី ហ៊ុន ម៉ាណែត គ្រោងបំពេញទស្សនកិច្ចនៅប្រទេសបារាំង និងប្រទេសស្វីស នាពាក់កណ្តាលខែមករា ឆ្នាំ២០២៤។ សម្តេចធិបតីនាយករដ្ឋមន្ត្រី និងលោកជំទាវ នឹងបំពេញទស្សនកិច្ចជាផ្លូវការក្នុងសាធារណរដ្ឋបារាំង តបតាមការអញ្ជើញរបស់ប្រធានាធិបតីបារាំងលោក អេម៉ានូអែល ម៉ាក្រុង និងអញ្ជើញចូលរួមនៅក្នុងកិច្ចប្រជុំកំពូលប្រចាំឆ្នាំ របស់វេទិកាសេដ្ឋកិច្ចពិភពលោក WEF នៅប្រទេសស្វីស។ ក្នុងដំណើរទស្សនកិច្ចក្នុងប្រទេសបារាំងរវាងពីថ្ងៃទី១៨ដល់១៩មករា, សម្តេចធិបតីនឹងជួបសវនាការជាមួយប្រធានាធិបតីបារាំងលោក អេម៉ានូអែល ម៉ាក្រុង ក្នុងវិមានប្រធានាធិបតី Élysée។ ដោយឡែកកិច្ចប្រជុំកំពូលប្រចាំឆ្នាំរបស់វេទិកាសេដ្ឋកិច្ចពិភពលោក នៅក្នុងប្រទេសស្វីស រវាងពីថ្ងៃទី១៥ ដល់ដល់១៩មករា សម្តេចធិបតីនឹងមានគំរោងជួបជាមួយប្រជាពលរដ្ឋខ្មែរ រស់នៅក្រៅប្រទេសថែមទៀត។ ដំណើរចាកចេញរបស់សម្តេចធិបតី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ត្រូវគេរាយការណ៍ថា គ្រោងនឹងធ្វើនៅមុនថ្ងៃទី១៥មករា។ ពលរដ្ឋខ្មែរក្នុងទ្វីបអឺរ៉ុបរួមមានពីប្រទេសបារាំង, ស្វីស, អាល្លឺម៉ង់, ប្រទេសអង់គ្លេស និងប្រទេសដទៃទៀត បានធ្វើសារសម្លេងអបអរសាទរដំណើរទស្សនកិច្ច របស់សម្តេចធិបតី និងបញ្ជាក់ការររង់ចាំទទួលស្វាគមន៍

ការឆ្លងជំងឺកូវីដ១៩ ក្នុងរយៈពេល ២៤ម៉ោងកន្លងមកនេះ នៅអាស៊ានមានចំនួន ៤០៤ករណី ក្នុងនោះកម្ពុជាមានឆ្លងថ្មី១ករណីផងដែរ។ តួលេខឆ្លងថ្មីថ្ងៃនេះ បានថយចុះមកវិញច្រើនដល់ចំនួន ២ពាន់ ៩២០ករណី បើប្រៀបធៀបការឆ្លងកាលពីថ្ងៃម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន៤ រួមមាន ប្រទេសហ្វីលីពីន ដែលមានការឆ្លង ២៩២ករណី, ប្រទេសថៃ មាន៨៥ករណី, មីយ៉ាន់ម៉ា ២៦ករណី និងប្រទេសកម្ពុជាមានការឆ្លង ១ករណី។ អាស៊ាននារយៈពេល ២៤ម៉ោងចុងក្រោយនេះ មានអ្នកស្លាប់ដោយសារជំងឺកូវីដ១៩ ចំនួន ១១នាក់ ដែលជាពលរដ្ឋនៃប្រទេសហ្វីលីពីន និងប្រទេសថៃ។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបបានកើនដល់ចំនួន ៣៦លាន ៧២ម៉ឺន ៣ពាន់ ៦៥៨ករណីហើយ, និងការស្លាប់សរុបមានចំនួន ៣៦ម៉ឺន ៩ពាន់ ២៥៦នាក់។ បើគិតសរុបនៅលើសាកលលោកនោះវិញ ការឆ្លងវីរុសកូវីដ១៩ សរុបមាន ចំនួនជាង ៧០០លានករណី, និងការស្លាប់មានជាង ៦លាន ៩៦ម៉ឺននាក់ហើយ៕

អង្គការស៊ីម៉ាក់បានបោសសម្អាតផ្ទៃដីចម្ការមីនបានទំហំ ១ពាន់ ៧៣៥គីឡូម៉ែត្រក្រឡានិងប្រមូលគ្រាប់សរុបជាង ៣លានគ្រាប់ហើយ ក្នុងរយៈពេល ២១ឆ្នាំកន្លងមក គិតត្រឹមចុងឆ្នាំ២០២៣។ គួរបញ្ជាក់ថាប្រតិបត្តិបោសសំអាតគ្រាប់មីន និងការរំដោះផ្ទៃដីនេះ បានធ្វើចាប់តាំងពីឆ្នាំ១៩៩២នោះមក។ សេចក្តីរាយការណ៍រៀបរាប់ថា ក្នុងចំណោមគ្រាប់ទាំងជាង ៣លានគ្រាប់នោះ រួមមាន មីនប្រឆាំងមនុស្សជាង ៥៨ម៉ឺនគ្រាប់, គ្រាប់មីនប្រឆាំងរថក្រោះចំនួន ១ម៉ឺន ១ពាន់គ្រាប់, យុទ្ធភណ្ឌមិនទាន់ផ្ទុះចំនួន ២លាន ៤សែនគ្រាប់, គ្រាប់បែកទម្លាក់ពីយន្តហោះរួម និងគ្រាប់បែកចង្កោមចំនួន ១សែន ២ម៉ឺនគ្រាប់ផងដែរ។ ក្រៅពីកិច្ចការទាំងនេះ, ក្រុមដោះមីនស៊ីម៉ាក់ នៅបានចូលរួមធ្វើការផ្សព្វផ្សាយដល់ពលរដ្ឋ ជុំវិញគ្រោះថ្នាក់គ្រាប់មីន និងបានផ្តល់បទពិសោធន៍ ដោះគ្រាប់មីនរបស់ខ្លួន ដល់ប្រទេសមួយចំនួនដូចជា ដល់ប្រទេសឡាវ វៀតណាម ថៃ ស្រីលង្កា អ៊ីរ៉ាក់ អង់ហ្គោឡា អ៊ុយក្រែន បណ្តាប្រទេសនៅទ្វីបអាហ្វ្រីក និងប្រទេសកូឡុំប៊ី ជាដើម។ អង្គភាពស៊ីម៉ាក់បានរាយការណ៍ថាសម្រាប់ទិសដៅឆ្នាំ២០២៤ គេបានដាក់ចេញនូវផែនការបោសសម្អាតគ្រាប់មីន និងសំណល់យុទ្ធភណ្ឌសង្រ្គាមលើផ្ទៃដីទំហំប្រមាណ ២៨៤គីឡូម៉ែត្រក្រឡា និងផ្តល់ការអប់រំយល់ដឹងពីគ្រោះថ្នាក់មីនដល់ប្រជាជនគោលដៅប្រមាណ ២លាននាក់រួម និងផែនការស្រាវជ្រាវថ្មីឡើងវិញផងដែរ។ កម្ពុជាបានដាក់ចេញនូវផែនការសំអាតគ្រាប់មីនសេសសល់ ពីអតីតកាលសង្គ្រាមស៊ីវិល ឱ្យអស់ក្នុងឆ្នាំ២០២៥។

ការផ្សាយតាមបណ្តាញសង្គមតេឡេក្រាមមួយ ដែលផ្សព្វផ្សាយការជ្រើសរើសពលករ ទៅបំរើការនៅក្នុងប្រទេសអ៊ីស្រាអែល បានប្រញាប់ឱ្យក្រសួងការងារ បានបញ្ជាក់ប្រាប់ថាជាអំពើក្លែងបន្លំខុសច្បាប់។ លោករដ្ឋមន្ត្រី ហេង សួរ បានឱ្យដឹងនារសៀលថ្ងៃទី៣មករាថា តេឡេក្រាមឈ្មោះ MEAN Sodara និងឈ្មោះ Israel Work 2024 ដែលផ្សព្វផ្សាយការជ្រើសរើសពលករ ទៅធ្វើការក្នុងប្រទេសអ៊ីស្រាអែលនោះ គឺជាអំពើខុសច្បាប់។ លោករដ្ឋមន្ត្រី ហេង សួរ ថ្លែងថា បច្ចុប្បន្នកម្ពុជាមិនទាន់បានចុះកិច្ចព្រមព្រៀង ក្នុងការបញ្ជូនពលករទៅធ្វើការនៅប្រទេសអ៊ីស្រអែលនៅឡើយទេ។ លោកថាគេកំពុងស្ថិតនៅក្នុងដំណាក់កាលពិភាក្សាគ្នានៅឡើយ ដូច្នេះការចេញទៅធ្វើការនៅប្រទេសអ៊ីស្រាអែល តាមរយៈមេខ្យល់ ឬរូបភាពក្លែងបន្លំឯកសារជាសិស្ស ឬជានិស្សិត គឺជាករណីខុសច្បាប់ និងជាបទល្មើស នៃការជួញដូរមនុស្ស»។ លោករដ្ឋមន្រ្ដី បានអំពាវនាវដល់សាធារណជន មិនត្រូវចាញ់បោកការផ្សាយតាមបណ្តាញសង្គមទាំង២នោះឡើយ។