វត្តសីហរតនារាម ស្ថិតនៅកណ្តាលក្រុងដូនកែវ ខេត្តតាកែវ ត្រូវបានបិទបណ្តោះអាសន្ននៅថ្ងៃនេះក្រោយការ រកឃើញការឆ្លងកូវីដ១៩។ ក្នុងការធ្វើតេស្តលើព្រះសង្ឃនិងបរិស័ទជាង១០០អង្គ និងនាក់តាំងពីថ្ងៃទី១៩និង ២០កក្កដានេះមក, គេបានរកឃើញព្រះសង្ឃឆ្លងកូវីដចំនួន២០អង្គនិងនាក់។ យោងតាមរដ្ឋបាលខេត្ត អាជ្ញាធរ បានសម្រេចយកសាលាឆាន់ និងសាលាពុទ្ធិកបឋមសិក្សា នៅក្នុងវត្តផ្ទាល់ ក្នុងការធ្វើជាកន្លែងព្យាបាល និង កន្លែងធ្វើចត្តាឡីស័កលើព្រះសង្ឃ ៕

អាជ្ញាធរខណ្ឌដូនពេញ បានសម្រេចបិទខ្ទប់វត្តបទុមវតី ជាបណ្ដោះអាសន្នសិនក្រោយរកឃើញព្រះសង្ឃនិង ពលរដ្ឋមានកូវីដ-១៩ ចំនួន២០អង្គនិងនាក់។ វត្តបទុមវតីដែលនឹងបិទរយៈពេល១៤ថ្ងៃ មានទីតាំងតាមបណ្តោយ វិថីឧកញ៉ា ស៊ូស្រ៊ុន, ស្ថិតក្នុងភូមិ៣, សង្កាត់ចតុមុខ ក្នុងខណ្ឌដូនពេញ។ សេចក្តីរាយការណ៍បញ្ជាក់ថាអ្នកវិជ្ជមាន កូវីដ១៩ទាំង២០អង្គនិងនាក់ បានរកឃើញក្រោយការធ្វើតេស្តលើសង្ឃចំនួន១៧៧ អង្គ , និស្សិត ចំនួន២១៥ នាក់ , ពុទ្ធបរស័ទក្នុងវត្តចំនួន៧នាក់ និងជាងសំណង់ ចំនួន៤ នាក់ ។ ក្នុងចំណោមការឆ្លងទាំង២០អង្គនិងនាក់ នោះរួមមានព្រះសង្ឃ១០អង្គ និងសិស្សនិស្សិត១០នាក់។

អគ្គិភ័យបានឆាបឆេះផ្សារសេះស កណ្តាលក្រុងកែប បណ្តាលឱ្យខូចខាតកន្លែងលក់ចំនួន១២១តូប ។ ហេតុ ការណ៍ បានកើតឡើងកាលពីព្រលប់ថ្ងៃទី១៩ ខែកក្កដា ឆ្នាំ២០២១ ស្ថិតក្នុងផ្សារសេះស ក្នុងភូមិអូរក្រសារ សង្កាត់អូរក្រសារ នៃក្រុងកែប បន្ទាប់ពីក្រុមអាជីវករនាំគ្នាបិទតូបហើយធ្វើដំណើរទៅផ្ទះរៀងៗខ្លួន។ សមត្ថកិច្ច បានសន្និដ្ឋានថា មូលហេតុដែលនាំអោយកើតមានជាអគ្គីភ័យនោះ គឺបណ្តាល មកពីទុស្សេចរន្តអគ្គិសនី។ សមត្ថកិច្ចថ្លែងថា គេបានប្រើប្រាស់រថយន្តពន្លត់អគ្គីភ័យចំនួន៨គ្រឿងក្នុងការជួយអន្តរាគមន៍បាញ់ពន្លត់។

ម្ចាស់មេដាយមាសកីឡាម៉ូតូទឹកអាស៊ី សាលី អ៊ូមើត បានខកខានចូលរួមការប្រកួតម៉ូទឹកពិភព លោកនៅក្នុង ប្រទេសប៉ូឡូញដោយសារបញ្ហាវិបត្តិជំងឺកូវីដ-១៩។ ការប្រកួតកីឡាប្រម៉ូតូទឹកពិភពលោក Jet Ski World Series 2021-2022 ជុំទី១ នឹងប្រព្រឹត្តទៅនៅប្រទេសប៉ូឡូញក្នុងសប្តាហ៍នេះ ប៉ុន្តែការមិនផ្តល់ទិដ្ឋាការដោយប្រទេសក្នុង តំបន់អឺរ៉ុបដោយសារតែករណីវិបត្តិកូវីដ១៩ បានធ្វើឲ្យលោកសាលី អ៊ូមើតមិនអាចចូលរួមក្នុងការប្រកួតនោះ បានឡើយ។