​គណៈអចិន្ត្រៃយ៍​គណៈកម្មាធិកា​រ​កណ្តាល​ បានសម្រេច​កោះប្រជុំ​សន្និបាត​គណៈកម្មាធិការ​កណ្ដាល​វិសាមញ្ញ​របស់គណបក្ស នៅ​ថ្ងៃ​សៅរ៍ និង​អាទិត្យ ទី​0៩ និង​ទី​១០ ខែកក្កដា ឆ្នាំ​២០២២ (​រយៈពេល​ពីរ​ថ្ងៃ​) នៅវិមាន​៧​មករា​។ ​នេះ​បើ​យោងតាម​សេចក្តីជូនដំណឹង​របស់​ខុទ្ទកាល័យ​នៃ​គណៈកម្មាធិការ​កណ្តាល​នៅ​ថ្ងៃទី​0៧ ​ខែ​​មិថុនា ឆ្នាំ​២០២២​។

តំណាង​សមាគម​ពលរដ្ឋ​ខ្មែរ​នៅ​ប្រទេស​អូស្ត្រាលី​ ដែល​បាន​អញ្ជើញ​មក​សង្កេតមើល​ដោយផ្ទាល់​នូវ​បោះឆ្នោតជាតិ​ជ្រើសរើស​ក្រុមប្រឹក្សាឃុំ​ សង្កាត់ ​នីតិកាល​ទី​៥ នៅ​កម្ពុជា​កាលពី​ថ្ងៃទី0៥ ខែមិថុនា ឆ្នាំ​២០២២ បានបញ្ជាក់​នៅក្នុង​សេចក្តីថ្លែងការណ៍​ផ្លូវការ​របស់ខ្លួន​ដោយ​បញ្ជាក់ថា​ ដំណើរការ​បោះឆ្នោត​នេះ​បាន​ប្រព្រឹត្ត​ទៅដោយ​សន្តិវិធី និង​តាម​ល​ទ្ធិ​ប្រជាធិបតេយ្យ​។ បើទោះជា​លទ្ធិ​ប្រជាធិបតេយ្យ​នៅ​កម្ពុជា​នៅមាន​ភាព​ក្មេងខ្ចី ក៏ប៉ុន្តែ​របប​លទ្ធិ​ប្រជាធិបតេយ្យ​របស់​កម្ពុជា អាច​ចាត់ទុកជា​គំរូ​ដ៏​ល្អ​សម្រាប់​ប្រទេស​ក្រោយ​សង្គ្រាម (Post-conflict countries) ដែល​ប្រកាន់​ភ្ជាប់​នូវ​ការបោះឆ្នោត​តាម​លទ្ធិប្រជាធិបតេយ្យ​។​ យើងខ្ញុំ​ពិតជា​មាន​ពេញ ចិត្តខ្លាំង​ចំពោះ​សមិទ្ធផល​ដ៏​អស្ចារ្យ​ក្នុង​ដំណើរការ​បោះឆ្នោត​និង​ការវិវឌ្ឍ​នៃ​លទ្ធិប្រជាធិបតេយ្យនៅ​កម្ពុជា​។

ក្រុម​អ្នកសង្កេតការណ៍​អន្តរជាតិ​របស់ ICAPP បានចេញ​សេចក្តីថ្លែងការណ៍​រួមមួយ​ដោយ​បញ្ជាក់ថា ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥ របស់​កម្ពុ​ជានា​ថ្ងៃទី​០៥ ខែមិថុនា ឆ្នាំ​២០២២ បាន​ប្រព្រឹត្តទៅ​ស្របតាម​ការបោះឆ្នោត​ជា​សកល​ ដោយ​ការបោះឆ្នោត​សម្ងាត់​ និង​ស្របតាម​គោលការណ៍​លទ្ធិប្រជាធិបតេយ្យ សេរី​ពហុបក្ស នីតិរដ្ឋ និង​សិទ្ធិមនុស្ស​សកល ដែលមាន​ចែង​ក្នុង​រដ្ឋធម្មនុញ្ញ​កម្ពុជា និង​ច្បាប់​សិទ្ធិមនុស្ស​អន្តរជាតិ ដែល​កម្ពុជា​ជា​ភាគី​។

លទ្ធផលនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ត្រូវបានអបអរសាទរពីគ្រប់ភាគីពាក់ព័ន្ធនឹងការបោះឆ្នោត មានគណបក្សនយោបាយចូលរួមប្រកួតប្រជែងក្នុងការបោះឆ្នោត រួមទាំងអ្នកសង្កេតការណ៍ជាតិ អន្តរជាតិ បានវាយតម្លៃថា ការបោះឆ្នោតបានប្រព្រឹត្តទៅដោយរលូនល្អ សេរី យុត្តិធម៌ តម្លាភាព គ្មានការគំរាមកំហែង គ្មានអំពើហិង្សា ឬភាពមិនប្រក្រតីណាមួយកើតឡើងឡើយ។ នេះបើតាមការបញ្ជាក់របស់ គ.ជ.ប នៅថ្ងៃទី០៧ ខែមិថុនា ឆ្នាំ២០២២។

“​ចំពោះ​ដំណើរការ​បោះឆ្នោត​ជ្រើសរើស​ក្រុមប្រឹក្សាឃុំ​សង្កាត់​អាណត្តិ​ទី​៥​នេះ​គណបក្ស​ខ្មែរ​ស្រឡាញ់​ជាតិ គាំទ្រ និង​ទទួលយក​លទ្ធផល​នៃ​ការបោះឆ្នោត​នេះ​តាម​ឆន្ទៈ​ប្រជាពលរដ្ឋ​ពិតប្រាកដ​”​។ នេះ​ជាការ​បញ្ជាក់​របស់លោក​ខឺ​យ ស៊ី​នឿន អនុប្រធាន​គណបក្ស​ខ្មែរ​ស្រឡាញ់​ជាតិ ថ្លែងប្រាប់ AMS នៅ​ព្រឹក​ថ្ងៃទី​៧ ខែមិថុនា ឆ្នាំ​២០២២​។​

គណបក្សភ្លេីងទៀន បានប្រកាសទទួលយកលទ្ធផលនៃការបោះឆ្នោតជ្រេីសរេីសក្រុមប្រឹក្សាឃុំ​ សង្កាត់​ អាណត្តិទី៥​ ឆ្នាំ២០២២​ ដែលបានប្រព្រឹត្តទៅកាលពីថ្ងៃទី០៥​ ខែមិថុនា​ ឆ្នាំ២០២២​ និងបានប្រកាសថា​ មិនមានផែនការប្រឆាំងនឹងលទ្ធផលបោះឆ្នោតនោះទេ​។

លោក សួន សេរីរដ្ឋា ប្រធានក្រុមប្រឹក្សាភិបាលវេទិកាសន្តិភាពនៃកម្ពុជា បានមានប្រសាសន៍ប្រាប់ AMS នៅល្ងាចថ្ងៃទី៦ ខែមិថុនានេះថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ បានប្រព្រឹត្តទៅកាលពីថ្ងៃទី០៥ ខែមិថុនា ឆ្នាំ២០២២ គឺមានប្រជាពលរដ្ឋជាង៨០ភាគរយ បានចេញទៅបោះឆ្នោត ដែលនេះបង្ហាញថា ប្រជាពលរដ្ឋមានជំនឿជឿជាក់លើប្រព័ន្ធប្រជាធិបតេយ្យ សេរី ពហុបក្ស នៅក្នុងប្ររទេសកម្ពុជា ដែលប្រជាពលរដ្ឋសម្រេចចិត្តចេញទៅបោះឆ្នោត ដើម្បីជ្រើសរើសតំណាងនៅថ្នាក់ឃុំ សង្កាត់ ជាពិសេស ដើម្បីជ្រើសរើសមេឃុំ ចៅសង្កាត់ ក្នុងអាណត្តិទី៥ សម្រាប់បម្រើសេវារដ្ឋបាលមូលដ្ឋានដល់ពួកគាត់រស់នៅក្នុងឃុំសង្កាត់នីមួយៗទូទាំងព្រះរាជាណាចក្រកម្ពុជា។

អ្នកនាំពាក្យ​គណ​:​ក​ម្មា​ធិ​ការ​ជាតិ​រៀបចំ​ការបោះឆ្នោត(គ.ជ.ប) ឯកឧត្តម សោម សូ​រី​ដា បានមានប្រសាសន៍ ប្រាប់ AMS នៅ​ល្ងាច​ថ្ងៃទី០​៦ ខែមិថុនា​នេះ​ថា គណបក្សនយោបាយ​ចំនួនបួនដែល​នាំមុខគេ​ក្នុង​ការទទួល​ការគាំទ្រ​ពី​ប្រជាពលរដ្ឋ​ក្នុងការ​បោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥ ឆ្នាំ​២០២២ គឺ​១.គណបក្ស​ប្រជាជន​កម្ពុជា ទទួលបាន​សំឡេង ៥.៣៣៧.៧៥៤ សំឡេងគិត​ជា​ភាគរយ​ស្មើ ៧៤,៣២ភាគរយ​។ ២. គណបក្ស​ភ្លើងទៀន ទទួលបាន ១.៦១០.៤៣៤​សំឡេង ស្មើ ២២,២៦ភាគរយ។ ៣. គណបក្ស​ហ្វ៊ុនស៊ិនប៉ិច ទទួលបាន​ ៩១.៧៩៣​សំឡេង ស្មើ ១,២៧ភាគរយ និង​គណបក្ស​ខ្មែរ​រួបរួម​ជាតិ ទទួលបាន​ ៦៣.៩៤៧​សំឡេ ស្មើ ០,៨៨ភាគរយ​។ ចំណែកគណបក្ស​ខ្មែរ​ស្រឡាញ់​ជាតិ ទទួលបាន​សំឡេង ៣៣.៣០៥​សំឡេង ស្មើ ០,៥២ភាគរយ។

គណបក្សនយោបាយ​ដែល​បាន​ចូលរួម​ប្រកួតប្រជែង​ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់​អាណត្តិ​ទី​៥ បាន​អះអាងថា ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់​អាណត្តិ​ទី​៥​ដែល​បាន​ប្រព្រឹត្តទៅ​កាលពី​ថ្ងៃទី​៥ ខែមិថុនា ឆ្នាំ​២០២២ មាន​ភាពល្អប្រសើរ ដោយសារ​គ្រប់ ភាគី​ពាក់ព័ន្ធ​មាន​ភាពចាស់ទុំ​ខាង​នយោបាយ​ធ្វើឱ្យមាន​ភាពរលូន​គ្មាន​ការរំខាន និង​គ្មាន​អំពើ ហិង្សា​ណាមួយ​បាន​កើតឡើង​នោះទេ និង​អាច​ទទួលយកបាន​។​

ការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់ អាណត្តិ​ទី​៥ ឆ្នាំ​២០២២​នេះដែលបាន​ប្រព្រឹត្តទៅ​នៅ​ព្រឹក​ថ្ងៃអាទិត្យ ទី​៥ ខែមិថុនា ឆ្នាំ​២០២២ នេះ ចាប់ពី​ម៉ោង ៧​ព្រឹក ដល់​ម៉ោង ៣នេះ រសៀលបាន​បិទ​បញ្ចប់​ហើយនៅតាម​ការិយាល័យ​បោះឆ្នោត​កំពុងតែ​ដំណើការ​រាប់​សន្លឹកឆ្នោត ។