​កម្ពុជា បាននាំចេញទំនិញទៅជប៉ុនមានតម្លៃជាង ១ពាន់៦០០លានដុល្លារ ក្នុងរយៈពេល១១ខែ ឆ្នាំ២០២១។ ទិន្នន័យពីអង្គការពាណិជ្ជកម្មក្រៅប្រទេសជប៉ុន (Jetro) បានបញ្ជាក់ថាក្នុងរយៈពេល១១ខែ ឆ្នាំ២០២១ កម្ពុជា បាននាំចេញទំនិញទៅកាន់ទីផ្សារជប៉ុន មានតម្លៃជាង១ពាន់ ៦២៣លានដុល្លារ កើនឡើងជិត១០% បើធៀប នឹងរយៈពេលដូចគ្នា កាលពីឆ្នាំ២០២០។

តួលេខភ្ញៀវទេសចរណ៍ដើរកំសាន្តនាចុងសប្តាហ៍មានចំនួនសរុប៤៥ម៉ឺន៦ពាន់៣៣៤នាក់ដែលតួលេខនេះ បានបង្ហាញនូវសកម្មភាពកម្រើកសាឡើងវិញខ្លះនៃវិស័យទេសចរណ៍ក្នុងស្រុក។ យោងតាមក្រសួងទេសចរណ៍, រវាងពីថ្ងៃទី៧ដល់ថ្ងៃទី៩ ខែមករា ឆ្នាំ២០២២ តួលេខភ្ញៀវទេសចរសរុបមានចំនួន៤៥ម៉ឺន៦ពាន់៣៣៤នាក់ ក្នុង នោះភ្ញៀវជាតិមានចំនួន៤៤ម៉ឺន៣ពាន់៣៧៨នាក់ និងភ្ញៀវបរទេសផ្ទៃក្នុង ១ម៉ឺន២ពាន់៩៥៦នាក់។

គណបក្សប្រជាជនកម្ពុជាឃុំធ្លកវៀន នៃខេត្ដកំពង់ឆ្នាំង បានរៀបចំពិធីសន្និបាតបូកសរុបនៃការអនុវត្តន៍គោល នយោបាយអភិវឌ្ឍ ឃុំ ក្នុង អាណត្តិទី៥និងលើកទិសដៅបន្តរបស់ខ្លួន។ ឃុំធ្លកវៀន គឺជាឃុំមួយដែលស្ថិតក្នុង ស្រុកសាមគ្គីមានជ័យ។

នៅតែប្រមាណជាង៤ខែទៀតប៉ុណ្ណោះ, កម្ពុជានឹងឈានដល់ការបោះឆ្នោតជ្រើសរើសក្រុមប្រឹក្សាឃុំសង្កាត់ អា ណ្ណត្តិទី៥។ ការបោះឆ្នោតថ្នាក់មូលដ្ឋាននេះ គឺជាការបោះឆ្នោតដ៏មានសារៈសំខាន់ណាស់ដែលមិនត្រឹមតែបាន បង្ហាញនូវការលើកកម្ពស់ដំណាក់កាលលទ្ធិប្រជាធិបតេយ្យតាមថ្នាក់មូលដ្ឋានប៉ុណ្ណោះទេ ប៉ុន្តែជាដំណើរការដ៏ មានសារៈសំខាន់នៃការជួយឱ្យឃុំសង្កាត់នីមួយៗមានការអភិវឌ្ឍន៍ថែមទៀត។ កម្មវិធីអប្សរាណិតថ្ងៃនេះ មាន បទវិចារណកថាមួយដែលមានចំណងជើងថា «ដំណើរឆ្ពោះទៅកាន់ការបោះឆ្នោតក្រុមប្រឹក្សាឃុំសង្កាត់អាណ្ណត្តិ ទី៥ឆ្នាំ២០២២-២០២៧»។

សិស្សសាលាបានចូលរៀនសាជាថ្មី ក្នុងទិវាបើកបវេសនកាលឆ្នាំសិក្សា២០២១-២០២២ ថ្ងៃទី១០មករានេះ ក្រោមនយោបាយចាក់វ៉ាក់សាំងស្រោចស្រពពាសពេញប្រទេស ដោយបានធ្វើឱ្យតួលេខឆ្លងកូវីដ-១៩ ស្ថិត ក្នុង ស្ថានភាពគ្រប់គ្រងបាន។ សម្តេចនាយករដ្ឋមន្ត្រី បានថ្លែងបញ្ជាក់បន្ថែមនាថ្ងៃទី១០មករាឆ្នាំ២០២២។

តួលេខឆ្លងក្នុងប្រទេសអាស៊ានទាំង១០រយៈពេល៧២ម៉ោងចុងក្រោយនេះ មានចំនួន ១៨ម៉ឺន៧ពាន់ ៤០៣ករណី ដែលច្រើនជាងសប្តាហ៍មុននោះទៅទៀត។ គួរបញ្ជាក់ថាកាលពីសប្តាហ៍មុន, រយៈពេល៧២ម៉ោង ដូចគ្នានេះ មានការឆ្លងតែ៨ម៉ឺន៤ពាន់និង២ករណីតែប៉ុណ្ណោះ។ ក្នុងចំណោមប្រទេសទាំង១០របស់អាស៊ាន, តួលេខឆ្លង៧២ម៉ោងចុងក្រោយនេះ គឺប្រទេសហ្វីលីពីនជា ប្រទេស មានការឆ្លងច្រើនជាងគេបង្អស់។

តួលេខឆ្លងវីរុសកូវីដ១៩ ថ្ងៃច័ន្ទនេះ មានចំនួន១៥ករណីដែលសុទ្ធជាវីរុសបំប្លែងថ្មីអូមីក្រុង នាំចូលមកពីបរទេស និងក្នុងសហគមន៍។ បើប្រៀបធៀបពីម្សិលមិញ ការឆ្លងថ្ងៃនេះ ថយចុះ១៥ករណី។ ការរកឃើញវីរុសអូមីក្រុង១៥ ករណីថ្ងៃនេះ បាននាំឱ្យការឆ្លងវីរុសអូមីក្រុងចូលក្នុងប្រទេសកម្ពុជាបានកើនដល់១៩៥ករណីហើយ។ វីរុសអូមី ក្រុង គឺជាប្រភេទវីរុសដែលគេចាត់ទុកថាជាវីរុសឆ្លងលឿនបំផុត។

សម្តេចនាយករដ្ឋមន្ត្រី បានអំពាវនាវការចាក់ដូសជម្រុញ ខណៈក្នុងរយៈពេល២៤ម៉ោងកន្លងមកនេះ តួលេខអ្នក ចាក់វ៉ាក់សាំងដូសទី៣ មានចំនួនជាង២ម៉ឺននាក់ ។ វ៉ាក់សាំងដូសទី៣ ឬវ៉ាក់សាំងដូសជម្រុញគឺជាវ៉ាក់សាំងដែល មន្ត្រីសុខាភិបាលបញ្ជាក់ថាអាចមានលទ្ធភាពក្នុងការជួយបង្ការការទប់ស្កាត់ការឆ្លងវីរុសកូវីដ-១៩ ជា ពិសេស វីរុសបំប្លែងថ្មីអូមីក្រុង ដែលកំពុងធ្វើឱ្យពិភពលោកមានក្តីបារម្ភ។

មនុស្សចំនួន៥នាក់បានស្លាប់​ និងរបួសដោយសារការផ្ទុះមីនចំនួន២លើកនៅក្នុងខេត្តព្រះវិហារ។ អគ្គនាយក នៃអង្គការស៊ីម៉ាក់ លោក ហេង រតនា បានអោយដឹងថា ហេតុការណ៍ផ្ទុះទាំង២នោះបានកើតឡើង នៅថ្ងៃទី១០ ខែមករា ឆ្នាំ២០២២ ស្ថិតនៅក្នុងភូមិសែនតេជៈ ឃុំមរកត នៃស្រុកជាំក្សាន្ត។