ប្រជាពលរដ្ឋដែលបានទទួលការចាក់វ៉ាក់សាំងក្នុងរយៈពេល២៤ម៉ោងកន្លងមកនេះ មានចំនួន ៩ពាន់៩៥១នាក់ ក្នុងនោះការចាក់វ៉ាក់សាំងលើមនុស្សអាយុលើសពី១៨ឆ្នាំមានចំនួន ៥ពាន់ ១៣៣នាក់។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន២ម៉ឺន៥ពាន់៨៤៣ ករណី និងការស្លាប់ថ្មីមានចំនួន៤៣៤នាក់។ ប្រទេសដែលមានការឆ្លងថ្មី ក្នុងរយៈ ពេល២៤ម៉ោងចុងក្រោយ នេះ នៅអាស៊ានមានចំនួន១០ប្រទេស។ ចំណែកការស្លាប់ថ្មីមានក៏មាន១០ប្រទេសផងដែរ៕

តួលេខឆ្លងកូវីដ១៩ក្នុងរយៈពេល២៤ម៉ោងចុងក្រោយនេះបានបន្តធ្លាក់ចុះទៀតដែលជាសញ្ញាវិជ្ជមានកាន់តែប្រ សើរចំពោះកម្ពុជាដែលត្រៀមនឹងបើកដំណើរការសេដ្ឋកិច្ចសាឡើងវិញនាចុងឆ្នាំ២០២១។ ការឆ្លងថ្មីនៅថ្ងៃនេះ មាន១១២ករណីដែលថយចុះ៤ករណីបើប្រៀបធៀបនឹងម្សិលមិញ។

រដ្ឋបាលរាជធានី បានដាស់តឿនពលរដ្ឋដែលមិនទាន់បានទទួលវ៉ាក់សាំងដូសទី៣ សូមប្រញាប់ប្រញាល់ទៅ ទទួលយកវ៉ាក់សាំងដូសជម្រុញនោះ។ ការដាស់តឿនបានធ្វើឡើងតាមលិខិតជួនដំណឹងថ្ងៃទី២៦តុលា ទន្ទឹមនឹង យុទ្ធនាការចាក់វ៉ាក់សាំងដូសជម្រុញលើខណ្ឌចំនួន១១ក្នុងរាជធានីនឹងគ្រោងបញ្ចប់នាចុងខែតុលាខាងមុខនេះហើយ។ យុទ្ធនាការដូសជម្រុញក្នុខណ្ឌកំបូល, ខណ្ឌដង្កោ, ខណ្ឌមានជ័យ, ខណ្ឌពោធិ៍សែនជ័យ, ខណ្ឌទួល គោក, ខណ្ឌឫស្សីកែវ, ខណ្ឌ៧មករា, ខណ្ឌបឹងកេងកង, ខណ្ឌចំការមន, ខណ្ឌច្បារអំពៅ និងខណ្ឌសែនសុខ បាន ចាប់ផ្តើមតាំងពីថ្ងៃទី១១តុលា។

កម្ពុជាគ្រោងនឹងបើកដំណើរការទេសចរណ៍វ៉ាក់សាំងជាលើកដំបូងនាចុងខែវិច្ឆិកាខាងមុខនេះ។ កម្ពុជាដែល បានបិទដំណើរការទេសចរណ៍បរទេសមួយរយៈពេលដោយសារតែការទប់ស្កាត់ការឆ្លងរាលដាលជម្ងឺកូវីដ១៩ បានធ្វើយុទ្ធនាការចាក់វ៉ាក់សាំងលើពលរដ្ឋដែលរហូតមកទល់នឹងពេលនេះ បានសម្រេចជាង៨៥ភាគរយនៅទូ ទាំងប្រទេស។

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ត្រូវបានចុះហត្ថលេខាជាផ្លូវការ រួចរាល់ហើយនៅថ្ងៃទី២៦តុលានេះ។ ពិធីចុះហត្ថលេខាតាមរយៈប្រព័ន្ធវីដេអូពីចម្ងាយ បានធ្វើឡើង រវាងរដ្ឋមន្ត្រីក្រសួងពាណិជ្ជកម្មកម្ពុជាលោក ប៉ាន សូរស័ក្តិ និងរដ្ឋមន្ត្រីពាណិជ្ជកម្មកូរ៉េ លោកយ៉េវ ហានឃូ។

កិច្ចប្រជុំកំពូលអាស៊ានលើកទី៣៨ និងលើកទី៣៩រយៈពេល៣ថ្ងៃ ក្រោមប្រធានបទ «យើងយកចិត្តទុកដាក់ យើងរៀបចំត្រៀមលក្ខណ:, យើងរីកចម្រើនទៅមុខ» បានបើកជាផ្លូវការនៅព្រឹកថ្ងៃទី២៦ ខែតុលា ឆ្នាំ២០២១ តាមប្រព័ន្ធវីដេអូអនឡាញ ចេញពីប្រទេសប្រ៊ុយណេដែលធ្វើជាម្ចាស់ផ្ទះនៃកិច្ចប្រជុំកំពូល។

ព្រះករុណា ព្រះមហាក្សត្រខ្មែរបាន ផ្ញើព្រះរាជសារមួយអបអរសាទរអគ្គទេសាភិបាលនៃប្រទេសនូវែលហ្សេ ឡង់។ លោកជំទាវ CINDY KIRO ត្រូវបានព្រះរាជវាំងនៃប្រទេសនូវែលហ្សេឡង់ បានតែងតាំងជាអគ្គទេសាភិ បាលទី២២របស់ប្រទេសនូវែលហ្សេឡង់កាលពីថ្ងៃទី២១តុលាឆ្នាំ២០២១។

បណ្ដារាជធានី និងខេត្ដចំនួន១៤ នឹងទទួលរងនូវជំនន់ទឹកភ្លៀង ក្នុងសប្ដាហ៍ទៅមុខទៀតនេះ ក្នុងពេលដែល ការព្យាករណ៍បានបង្ហាញថាមានសម្ពាធទាបសកម្មមួយ បាននិងកំពុងស្ថិតនៅក្នុង សមុទ្រចិន ខាងត្បូង។