ពលរដ្ឋនិងយុវជនក្នុងប្រទេសកម្ពុជា បានថ្កោលទោសជុំវិញការអនុម័តសភាកុងហ្គ្រេសអាមេរិកជុំវិញសេចក្តី ស្នើច្បាប់ប្រជាធិបតេយ្យកម្ពុជាឆ្នាំ ២០២១ ដើម្បីការដាក់ទណ្ឌកម្មលើកម្ពុជា។ ពលរដ្ឋនិងយុវជនខ្មែរបានចាត់ទុក កិច្ចប្រឹងប្រែងរបស់សភាអាមេរិកនោះ មិនបានជួយប្រជាពលរដ្ឋខ្មែរក្នុងប្រទេសនោះទេ ប៉ុន្តែមានតែបំផ្លាញដល់ ភាពសុខសាន្តរបស់ពលរដ្ឋខ្មែរតែប៉ុណ្ណោះ។

មន្រ្តីរាជការទូទាំងប្រទេសច្រើនម៉ឺននាក់នឹងតម្រូវការធ្វើតេស្តរហ័សក្រោយពិធីបុណ្យភ្ជុំបិណ្ឌ ត្រូវបានបញ្ចប់។ ការបង្គាប់ដាក់ចេញការធ្វើតេស្តរហ័សនេះ បានបញ្ជាក់តាមរយៈសារាចររបស់រាជរដ្ឋាភិបាលកាលពីថ្ងៃទី៣តុលា គឺនៅបីថ្ងៃមុនពេលដែលពិធីបុណ្យភ្ជុំនឹងត្រូវបញ្ចប់។

តម្លៃប្រេងឥន្ធនៈ បានកើនឡើងមកវិញតិចតួច សម្រាប់ការលក់រយៈពេល១៥ថ្ងៃខាងមុខនេះ។ យោងតាម ក្រសួងពាណិជ្ជកម្ម, តម្លៃប្រេងឥន្ធនៈ សម្រាប់ការលក់ចាប់ពី ថ្ងៃទី១ រហូតដល់ថ្ងៃទី១៥ ខែតុលា ឆ្នាំ២០២១នេះ គឺប្រេងសាំងធម្មតា មានតម្លៃ៤ពាន់១០០រៀលក្នុង១លីត្រ ដែលតម្លៃនេះគឺកើនឡើងចំនួន១០០រៀល បើធៀប ទៅការ លក់រយៈពេល១៥ ថ្ងៃមុនដូចគ្នា។ ចំណែកប្រេងម៉ាស៊ូតវិញ មានតម្លៃ៣ពាន់៨០០ រៀល ក្នុង១លីត្រ ដែលតម្លៃនេះ បានកើនឡើងចំនួន១៥០រៀល បើធៀបទៅនឹងការលក់រយៈ ពេល១៥ថ្ងៃមុន។

ក្មេងស្រីវ័យជំទង់២នាក់នៅក្នុងខេត្តក្រចេះ បានស្លាប់ដោយសារករណីលង់ទឹក។ ហេតុការណ៍បានកើតឡើង កាលពីរសៀលថ្ងៃទី៣០ ខែកញ្ញា ស្ថិតនៅក្នុងស្រះទឹកមួយកន្លែងនៃភូមិទ្រៀក ឃុំស្រែចារ ក្នុងស្រុកស្នួល។  

កម្ពុជាបាននាំចេញកសិផលទៅក្រៅប្រទេសសរុបចំនួន ៥ លាន៩៣ម៉ឺន២ពាន់ ៩២៣តោន ទៅកាន់ ៦៨ ប្រទេសក្នុងរយ:ពេល៩ខែក្នុងឆ្នាំនេះ។

កន្លែងដុតភ្លើងគប់ក្នុងវិមានកីឡដ្ឋាននៃពហុកីឡដ្ឋានជាតិមរតកតេជោ បាននឹងកំពុងដំណើរការសាងសង់ដោយ មានការរៀបចំបំពាក់នូវប្រព័ន្ធសុវត្ថិភាពខ្ពស់បំផុត សម្រាប់ត្រៀមពិធីបើក-បិទ ការប្រកួតកីឡាស៊ីហ្គេម និង អាស៊ានប៉ារ៉ាហ្គេម ឆ្នាំ២០២៣ នៅក្នុងព្រះរាជាណាចក្រកម្ពុជា។

កងទ័ពមួកខៀវកម្ពុជា ២៩៨ នាក់បានចាកចេញពីកម្ពុជាហើយនៅថ្ងៃទី១តុលានេះ ដើម្បីធ្វើការផ្លាស់ប្តូរវេន នៅប្រទេសម៉ាលីក្រោមការបំរើបេសកកម្មអង្គការសហប្រជាជាតិ។ ពិធីចាកចេញនៅថ្ងៃនេះ បានប្រព្រឹត្តទៅ ក្រោមអធិបតីភាពអគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និង កាកសំណល់សង្គ្រាម នាយឧត្តមសេនីយ៍ សែម សុវណ្ណនី។ កម្ពុជាគិតចាប់តាំងពីឆ្នាំ២០០៦ រហូតមកដល់ពេលនេះ បានបញ្ជូនកងកម្លាំងរក្សាសន្តិភាពជាង៧ពាន់នាក់ហើយ ទៅបំពេញបេសកកម្មមនុស្សធម៌ជាមួយអង្គការសហប្រជាជាតិ នៅក្នុងប្រទេសចំនួន៩ រួមមាន៖ ស៊ូដង់, ស៊ូដង់ ខាងត្បូង, ឆាដ, លីបង់, ស៊ីរី, ម៉ាលី, អាហ្វ្រិកកណ្តាល សាយប្រឹស និងប្រទេសយ៉េមែន។

ក្រុមហ៊ុនអូស្ត្រាលី ចាប់ផ្តើមស្វែងរុករករ៉ែមាស នៅក្នុងខេត្តត្បូងឃ្មុំហើយ បន្ទាប់ពីជោគជ័យលើការរុករកមាស នៅខេត្តមណ្ឌលគីរី។ គួរបញ្ជាក់ថាកម្ពុជា បានអនុញ្ញាតឲ្យក្រុមហ៊ុន ឈ្មោះ រ៉ឺនេសង់ មីនើរ៉ល (ខេមបូឌា) លីមីតធីត បានចាប់ផ្ដើមរុករករ៉ែមាសមួយកន្លែងទៀត នៅក្នុងនៅតំបន់សំពៅលូន, ឃុំជាំតា ម៉ៅ នៃស្រុកមេ មត់។ យោងលិខិតរបស់ក្រុមហ៊ុនរុករកមាសរបស់អូស្ត្រាលីនេះ ការចាប់ផ្តើមស្វែងរុករករ៉ែមាស នឹងចាប់ផ្តើម ចាប់ពីថ្ងៃទី០១ ខែតុលា ឆ្នាំ២០២១នេះតទៅ។

រដ្ឋមន្ត្រីក្រសួងសាធារណការបានដោះលែងរថយន្តដឹកលើសទម្ងន់កំណត់ចំនួន២២៩គ្រឿងដែលបានឃាត់ ទុករយៈពេលច្រើនខែដោយសារការដឹកជញ្ជួនល្មើសនឹងច្បាប់កំណត់ និងថ្លែងព្រមាននៅថ្ងៃនេះថា បើសិនជា ម្ចាស់រថយន្តហ៊ានប្រព្រឹត្តល្មើសច្បាប់នោះទៀត ក្រសួងនឹងមិនធ្វើការដោះលែងរថយន្តល្មើសនោះជាលើក ទី២ឡើយ។

កម្ពុជានិងកូរ៉េខាងត្បូង បានប្ដេជ្ញាចុះហត្ថលេខាលើកិច្ចព្រមព្រៀងពាណិជ្ជកម្មសេរី ឲ្យបាននៅក្នុងខែតុលានេះ ខណៈ ទំហំពាណិជ្ជកម្មរយៈពេល៨ខែរវាងប្រទេសទាំង២ មានជាង៥១៤លានដុល្លារអាមេរិក។