ខេត្តត្បូងឃ្មុំ បានរកឃើញអ្នកឆ្លងកូវីដ១៩ថ្មី ចំនួន ១២នាក់ ថែមទៀត ក្នុងរយៈពេល ២៤ម៉ោងចុងក្រោយនេះ ។ ការរកឃើញថ្មីនៅថ្ងៃនេះបានកើនឡើងចំនួន២នាក់បើប្រៀបធៀបនឹងម្សិលមិញ។

ខេត្តកំពង់ចាមបានរកឃើញអ្នកមានវិជ្ជមានកូវីដ-១៩ថ្មីចំនួន៥០នាក់បន្ថែមទៀតក្នុងរយៈពេល២៤ ម៉ោងចុង ក្រោយនេះ។ យោងតាមរដ្ឋបាលខេត្ត ក្នុងណោមអ្នកឆ្លងទាំងនោះរួមមាននៅក្រុងកំពង់ចាមម្នាក់, នៅស្រុក កំពង់សៀម១០នាក់, ស្រុកព្រៃឈរ១៥នាក់, ស្រុកបាធាយ៨នាក់, ស្រុកស្រីសន្ធរ៧នាក់, ស្រុកជើងព្រៃ៧នាក់ និងស្រុកចំការលើ២នាក់។

ខេត្តព្រៃវែងមានអ្នកឆ្លងជំងឺកូវីដថ្មីចំនួន៣៣នាក់ និងមានមនុស្សស្លាប់៣នាក់ ក្នុងរយៈពេល២៤ម៉ោងចុង ក្រោយនេះ។ យោងតាមរដ្ឋបាលខេត្ត អ្នកឆ្លងថ្មីទាំងនោះ រួមមាននៅក្រុងព្រៃវែងម្នាក់, ស្រុកព្រះសេ្តច ចំនួន ១៩នាក់, ស្រុកពារាំង៧នាក់, ស្រុកស្វាយអន្ទរម្នាក់, ស្រុកពាមរក៍ម្នាក់, ស្រុកបាភ្នំ ម្នាក់, ស្រុកស៊ីធរកណ្ដាលម្នាក់, ស្រុកពោធិ៍រៀងម្នាក់ និងអ្នកធ្វើដំណើរមកពីខេត្តកណ្តាលម្នាក់។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន២ម៉ឺន៧ពាន់៤៨៧ ករណី និងការស្លាប់ថ្មីមានចំនួន៥៣១នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុប ចំនួន៦៧៨ករណី ក្នុងនោះ៦២០ករណីជាការឆ្លងក្នុងសហគមន៍, និង៥៨ករណីទៀតជាការនាំចូលពីក្រៅ ប្រទេស។

ការឆ្លងកូវីដ១៩ថ្មីចូលក្នុងសហគមន៍ក្នុងរយ:ពេល២៤ម៉ោងកន្លងមកនេះមានការថយចុះចំនួន៨៨ករណីបើប្រៀបធៀបនឹងម្សិលមិញ។ ការឆ្លងចូលក្នុងសហគមន៍នៅថ្ងៃនេះមានចំនួន៦២០ករណី, ចំណែកការឆ្លងចូលក្នុងសហគមន៍កាលពីម្សិលមិញមានចំនូន៧០៨ករណី។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍ ២០កុម្ភៈ រយៈពេល១២២ថ្ងៃកន្លងមកនេះ បានកើនឡើងដល់៤ម៉ឺន២ពាន់៣២៥នាក់ហើយ ។

ចំនួនប្រជាពលរដ្ឋទទួលបានការចាក់វ៉ាក់សាំង បានកើនជាង៣លាន៤សែននាក់ហើយនៅទូទាំងប្រទេស។ យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី២១មិថុនាឆ្នាំ២០២១ កម្ពុជាបានចាក់វ៉ាក់សាំង ជូនប្រជាពលរដ្ឋបានចំនួន៣លាន៤សែន១ម៉ឺន៦ពាន់៧៥នាក់ហើយដែលស្មើនឹង៣៤,១៦%នៃចំនួនប្រជាជន ដែលគ្រោងនឹងចាក់ជាង១០លាននាក់ ក្នុងនោះបានចាក់វ៉ាក់សាំងទី២ដូសរួចមានចំនួន២លាន៧សែន ៥ម៉ឺន ៥ពាន់១៩៤នាក់។

កិច្ចសន្ទនាគោលនយោបាយជាន់ខ្ពស់ ស្ដីពី «កិច្ចប្រជុំអាស៊ី-អឺរ៉ុបគម្រប់ខួប២៥ឆ្នាំ បានប្រព្រឹត្តទៅនៅថ្ងៃនេះ តាមប្រព័ន្ធវីដេអូ Conference ដោយមានការអញ្ជើញចូលរួមពីរដ្ឋមន្ត្រីក្រសួងការបរទេសកម្ពុជា លោកប្រាក់ សុខុន។

ក្រសួងមហាផ្ទៃ បានអនុញ្ញាតការបង្កើតគណបក្សបេះដូងជាតិ យោងតាមសេចក្តីស្នើសុំរបស់ក្រុមអ្នកនយោបាយ ប៉ុន្តែត្រូវស្នើសុំចុះបញ្ជីនៅក្រសួងមហាផ្ទៃ ស្របតាមច្បាប់ស្ដីពីគណបក្សនយោបាយ។

មេខ្លោងធ្វើសកម្មភាពប្រឆាំងរាជរដ្ឋាភិបាលនៅក្រៅប្រទេស បានព្យាយាមនិយាយការពារសកម្មជន មាតាធម្មជាតិ ដោយការប្រើសម្តីប្រមាថដាក់លើព្រះមហាក្សត្រខ្មែរជាទីគោរពសក្ការៈថែមទៀត។

ភស្តុតាងនៃអំពើក្បត់ជាតិ, អំពើប្រមាថព្រះមហាក្សត្រជាទីគោរពសក្ការៈ និងអំពើរួមគំនិតក្បត់របស់សកម្មជន មាតាធម្មជាតិ ក្រោមការបង្គាប់បញ្ជាពីជនបរទេស ត្រូវបានបណ្តាញសង្គមមួយបានបកអាក្រាតនៅថ្ងៃនេះ ដែល ជាភស្តុតាងមិនអាចប្រកែកបាន។