រដ្ឋសភាគ្រោងនឹងធ្វើកិច្ចប្រជុំពេញអង្គក្នុងសប្តាហ៍នេះ ដើម្បីធ្វើការបោះឆ្នោតផ្តល់សេចក្តីទុកចិត្តលើប្រធានថ្មីនៃ គណៈកម្មាធិការជាតិរៀបចំការបោះឆ្នោត។

មនុស្ស ០៤នាក់បានស្លាប់ និង០៩នាក់រងរបួសធ្ងន់ស្រាល ក្នុងគ្រោះថ្នាក់ចរាចរណ៍ទូទាំងប្រទេសថ្ងៃទី២១ មិថុនានេះ។ សេចក្តីរាយការណ៍ទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស បានបញ្ជាក់ថា គ្រោះថ្នាក់ ដែលបង្កឲ្យមានមនុស្សស្លាប់ និងរបួសសរុប១៣នាក់នៅថ្ងៃនេះ គឺកើតឡើងដោយសារហេតុការណ៍ប៉ះទង្គិច ចំនួន ០៩លើក។

សមត្ថកិច្ចបានឃាត់ខ្លួនជនសង្ស័យចំនួន៣២នាក់ នៅក្នុងការបង្រ្កាបគ្រឿងញៀនទូទាំងប្រទេសនៅថ្ងៃទី ២១ មិថុនា ។ ក្នុងចំណោមជនសង្ស័យដែលបានឃាត់ខ្លួនទាំង៣២នាក់មានមុខសញ្ញាជួញដូរគ្រឿងញៀនចំនួន១១ នាក់ និង អ្នកប្រើប្រាស់២១នាក់ ។

ក្រុមហ៊ុនមួយដែលមានទុនវិនិយោគសរុបចំនួន៥លានដុល្លាអាមេរិក គ្រោងនឹងបង្កើតរោងចក្រផលិតកាបូប និងថង់យួរគ្រប់ប្រភេទ នៅខេត្តកំពង់ស្ពឺ ដែលអាចបង្កើតការងារបានចំនួន១ពាន់៣៨៣នាក់។

ខ្យល់កន្ត្រាក់បានបំផ្លាញផ្ទះប្រជាពលរដ្ឋចំនួន៥ខ្នងនៅខេត្តកំពង់ឆ្នាំង។ សេចក្តីរាយការណ៍បញ្ជាក់ថា ហេតុការណ៍នោះគ្រោះធម្មជាតិនោះ បានកើតឡើងកាលពីយប់ថ្ងៃទី២០ ខែមិថុនា ឆ្នាំ២០២១ ស្ថិតនៅក្នុងភូមិត្រពាំងពោធិ៍ ឃុំខុនរ៉ង ស្រុកបរិបូណ៌។

បុរស៤នាក់បានស្លាប់ក្នុងករណីសង្ស័យពុលស្រាសនៅក្នុងខេត្តព្រៃវែង។ ករណីពុលស្រាសដែលមានមនុស្សស្លាប់ ត្រូវគេរាយការណ៍ជាបន្តបន្ទាប់ដែលមុននេះបានកើតនៅក្នុងខេត្តកណ្តាល, ក្រោយមកនៅខេត្តកំពត និងចុងក្រោយនេះ បានកើតនៅក្នុងខេត្តព្រៃវែង។

បុរស៤នាក់ ដែលក្លែងបន្លំធ្វើជាមន្ត្រីនគរបាលប្រឆាំងបទល្មើសគ្រឿងញៀន និងបានដើរជំរិតយកប្រាក់ពី ប្រជាពលរដ្ឋ ត្រូវសមត្ថកិច្ចចាប់ខ្លួន ។

ថ្នាំញៀនជាង១គីឡូក្រាម និងជនសង្ស័យ៤នាក់ត្រូវសមត្ថកិច្ចបានបង្ក្រាបនៅខេត្តបន្ទាយមានជ័យដែលជា ខេត្តមានការកក្រើកខ្លាំងជុំវិញករណីចរាចរណ៍គ្រឿងញៀន។ កាលពីសប្តាហ៍កន្លងមកគ្រឿងញៀនជិត៤០គីឡូ និងជនសង្ស័យ១២នាក់ត្រូវបានចាប់ខ្លួននៅក្នុងខេត្តបន្ទាយមានជ័យដែលរួមមានទាំងជនជាតិថៃផងដែរ។

កីឡាការិនីស្នូកឃ័រឆ្នើមរបស់កម្ពុជា លោកស្រី ស្រួង ភាវី បានឈ្នះជើងឯកលើកដំបូង ក្នុងការប្រកួត កីឡា ស្នូកឃ័រ ការ៉ុម ដណ្ដើមពានរង្វាន់ Blue One Resort LPBA Championship ផ្នែកនារី នៅសាធារណរដ្ឋកូរ៉េ។ ការឈ្នះជើងឯកនោះ បន្ទាប់ពីយកឈ្នះកីឡាការិនីម្ចាស់ផ្ទះ Kim Gayoung ជនជាតិកូរ៉េ ដោយលទ្ធផល ៣សិតទល់នឹង១សិត នៅក្នុងវគ្គផ្ដាច់ព្រ័ត្រ នៅថ្ងៃទី២០មិថុនា ឆ្នាំ២០២១ ។

តុលាការសម្រេចឃុំខ្លួនមនុស្ស៣នាក់ ក្រោយការចាប់ខ្លួនពាក់ព័ន្ធនឹងការធ្វើសកម្មភាពប្រឆាំងនឹងរាជរដ្ឋាភិបាលតាមការបញ្ជាពីចៅហ្វាយនាយជាជនជាតិបរទេស។ ជនសង្ស័យទាំង ៣ ដែលត្រូវបានចាប់ខ្លួនកាលពីថ្ងៃទី១៦ មិថុនា ត្រូវគេស្គាល់ថាជាសកម្មជនមាត្រាធម្មជាតិ ដែលបានធ្វើកិច្ចការប្រឆាំង ក្រោមការបញ្ជាពីជនបរទេស ឈ្មោះអាឡិចហ្សង់ដ្រូ ហ្គុងសាឡេ ដាវីដសុន ដែលជាជនជាតិ អេស្ប៉ាញ។