នៅថ្ងៃទី២៤ សីហា២០២១ ឆ្លើយតបតាមសំណើររបស់ប្រជាពលរដ្ឋយើង ដែលមានបំណងវិលត្រឡប់មកកម្ពុជាវិញ ស្ថានអគ្គកុងស៊ុលកម្ពុជាប្រចាំខេត្តស្រះកែវប្រទេសថៃបានអន្តរាគមន៏ជាមួយអាជ្ញាធរថៃ និងជួលរថយន្តដឹកជញ្ជូនពលរដ្ឋខ្មែរ ដែលបានប្រមូលផ្តុំគ្នាមកពីតំបន់ផ្សេងៗក្នុងប្រទេសសរុបចំនួន ២៦៤នាក់ ទៅកម្ពុជាវិញតាមច្រកអូរបីជាន់ ប្រគល់ជូនអាជ្ញាធរកម្ពជាទទួល និងចាត់ការតាមនិតិវិធីសុខាភិបាល។សួង ពិសិដ្ឋ

យោងតាមរដ្ឋបាលខេត្ត ការឆ្លងថ្ងៃនេះ បានកើតឡើងលើពលរដ្ឋ រស់នៅក្នុងក្រុងក្រចេះ ចំនួន៤២នាក់ ,ស្រុកសំបូរម្នាក់,ស្រុកស្នួលម្នាក់,ស្រុកឆ្លូង ៣នាក់, ស្រុកព្រែកប្រសព្វម្នាក់ និងស្រុកចិត្របុរីម្នាក់។ ខេត្តក្រចេះគិតមកទល់ពេលនេះមានអ្នកឆ្លងជំងឺកូវីដ១៩សរុប ចំនួន៦១៩នាក់ ព្យាបាលជាសះស្បើយ ចំនួន៤៣១ និងមានអ្នកស្លាប់ចំនួន៩នាក់៕

យោងតាមរដ្ឋបាលខេត្តការឆ្លងថ្មីទាំង១៦នាក់ថ្ងៃនេះ រួមមាននៅក្រុងកំពង់ចាមម្នាក់, ស្រុកជើងព្រៃម្នាក់, ស្រុកព្រៃឈរ៣នាក់, ស្រុកស្ទឹងត្រង់៨នាក់ និងមកពីខេត្តត្បូងឃ្មុំ៣នាក់។ ខេត្តកំពង់ចាមគិតមកដល់បច្ចុប្បន្ននេះ មានករណីឆ្លងជំងឺកូវីដ-១៩សរុបចំនួន៤ពាន់៨៣៦ករណី ក្នុងនោះករណីបំប្លែងថ្មីដែលតា(Delta)ចំនួន១៨ករណី, បានជាសះស្បើយចំនួន៤ពាន់១៩២នាក់ និងមានអ្នកស្លាប់ ចំនួន១១៥នាក់។

យោងតាមក្រសួងសុខាភិបាលនៅថ្ងៃទី២៤សីហាឆ្នាំ២០២១ បានឲ្យដឹងថា នៅថ្ងៃ២៣សីហាឆ្នាំ២០២១ គេបានរកឃើញអ្នកវិជ្ជមានកូវីដ-១៩ចំនួន៤៦៦នាក់ ដែលក្នុងនោះអ្នកដំណើរមកពីបរទេសចំនួន៩៤នាក់ និងករណីឆ្លងសហគមន៍៣៧២នាក់។ ជាមួយគ្នានេះ ក្រសួងសុខាភិបាលប្រកាសថា នៅថ្ងៃ២៣សីហា មានអ្នកជាសះស្បើយពីជំងឺកូវីដ-១៩ ចំនួន៥១២នាក់ និងមានអ្នកស្លាប់១៣នាក់។ យោងតាមរបាយការណ៍របស់ក្រសួងសុខាភិបាល គិតមកដល់ថ្ងៃទី២៣សីហាឆ្នាំ២០២១ កម្ពុជាមានអ្នកឆ្លងជំងឺកូវីដ-១៩ ចំនួន៩ម៉ឺន១០៧នាក់ ក្នុងនោះបានព្យាបាលជាសះស្បើយចំនួន៨ម៉ឺន៦ពាន់១៣០នាក់ និងអ្នកស្លាប់ដោយសារជំងឺកូវីដ-១៩ចំនួន១ពាន់៨២១នាក់ហើយ។

យោងតាមរដ្ឋបាលខេត្ត អ្នកឆ្លងថ្មីទាំងនោះ គឺរួមមានពលរដ្ឋក្នុង ស្រុកពួក៣៨នាក់, ក្រុងសៀមរាប៤៨នាក់, ស្រុកសូទ្រនិគមន២នាក់ និងស្រុកប្រាសាទបាគង៥នាក់។ ជាមួយគ្នានោះ រដ្ឋបាលខេត្តសៀមរាបក៏បានបញ្ជាក់ថា ក្នុងរយៈពេល២៤ម៉ោងចុងក្រោយខេត្តមានអ្នកជំងឺកូវីដ-១៩ចំនួន២០៩នាក់បានជាសះស្បើយផងដែរ។ ខេត្តសៀមរាប មានអ្នកឆ្លងជំងឺកូវីដ-១៩សរុបចំនួន៧ពាន់១៨៨នាក់, ព្យាបាលជាសះ ស្បើយចំនួន៥ពាន់៩៤៥នាក់និងស្លាប់៧៥នាក់។

ពិធីប្រគល់-ទទួលជំនួយរបស់អង្គការសុខភាពពិភពលោក (WHO) ជូនរាជរដ្ឋាភិបាលកម្ពុជា ក្រោមអធិបតីភាពរបស់រដ្ឋមន្រ្តីក្រសួងសុខាភិបាល លោកសាស្រ្តាចារ្យ ម៉ម ប៊ុនហេង រួមជាមួយលោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោក ប្រចាំនៅកម្ពុជា។ ពិធីនោះធ្វើឡើងនៅព្រឹកថ្ងៃទី២៤សីហាឆ្នាំ២០២១ នៅឃ្លាំងឱសថកណ្ដាល នៃក្រសួងសុខាភិបាល ក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ជំនួយទាំងនោះរួមមាន រថយន្តបំពាក់ប្រព័ន្ធត្រជាក់ធុនធ្ងន់សម្រាប់ដឹកវ៉ាក់សាំង ចំនួន៣គ្រឿង , សម្ភារៈបរិក្ខារវេជ្ជសាស្រ្ត រួមមាន ម៉ាសចំនួន ១៦ម៉ឺនម៉ាស, ស្រោមដៃចំនួន១៦ម៉ឺន, ជែលលាងដៃ ចំនួន ៨ពាន់៧៥០ដប និង សម្ភារៈអប់រំសុខភាព ចំនួន៣០ម៉ឺន ដែលសរុបជាទឹកប្រាក់ចំនួន ៣២ម៉ឺន៨ពាន់៧៦ដុល្លារកន្លះ។ ក្នុងឱកាសនោះ តំណាងអង្គការសុខភាពពិភពលោកប្រចាំកម្ពុជា លោកស្រីវេជ្ជបណ្ឌិត Li Ailan បានសម្ដែងនូវការកោតសរសើរចំពោះរាជរដ្ឋាភិបាលកម្ពុជា និងក្រសួងសុខាភិបាល ព្រមទាំងស្ថាប័នដែលពាក់ពន្ធ័ អាជ្ញាធរមូលដ្ឋានគ្រប់លំដាប់ថ្នាក់ និងប្រជាជនកម្ពុជាទាំងអស់ដែលបានចូលរូមការពារទប់ស្កាត់ការរីករាលដាលនៃវីរុសកូវីដ-១៩ ដែលរហូតមកដល់ពេលនេះស្ថានភាពនៃការរាលដាលព្រឹត្តិការណ៍សហគន៍២០កុម្ភៈឆ្នាំ២០២១ អាចគ្រប់គ្រងបាន។ លោកស្រីវេជ្ជបណ្ឌិត បានបន្តថា អង្គការសុខភាពពិភពលោកនឹងនៅតែបន្តកិច្ចសហការ និងគាំទ្រវិស័យសុខាភិបាលកម្ពុជា មិនត្រឹមតែការប្រយុទ្ធនឹងជំងឺកូវីដ-១៩ប៉ុណ្ណោះទេ។ រដ្ឋមន្ត្រីក្រសួងសុខាភិបាលលោកសាស្ត្រាចារ្យម៉ម ប៊ុនហេង បានថ្លែងអំណរគុណចំពោះអង្គការសុខភាពពិភពលោកដែលតែងតែជួយឧបត្ថម្ភគាំទ្រទាំងថវិកា…