រាជធានីភ្នំពេញ៖ នៅថ្ងៃទី ២៦ ខែ មេសាឆ្នាំ ២០២១នេះឯកឧត្តម គឹម សន្តិភាព រដ្ឋលេខាធិការនិង ជាមន្រ្តីនាំពាក្យក្រសួងយុត្តិធម៌ បានធ្វើការពន្យល់ណែនាំដល់អ្នកធ្វើដំណើរចេញពីតំបន់ដែលមានផ្ទុះការឆ្លងរាលដាលធ្ងន់ធ្ងរនៃជំងឺកូវីដ-១៩ ទៅកាន់ខេត្តដទៃទៀតដែលត្រូវអនុវត្តខ្លួនឱ្យបានត្រឹមត្រូវ។           ការលើកឡើងរបស់ មន្រ្តីអ្នកនាំពាក្យក្រសួងយុត្តិធម៌បែបនេះធ្វើឡើងដើម្បីពន្យល់បន្ថែមពីសេចក្តីណែនាំរាជរដ្ឋាភិបាលកម្ពុជាក្នុងការការពង្រឹងការអនុវត្តវិធានការដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងការពង្រឹងការអនុវត្តវិធានការនៅក្នុងភូមិសាស្ត្រដែលត្រូវបានបិទខ្ទប់។ បើយោងតាមទំព័រហ្វេសប៊ុកផ្ទាល់ខ្លួន ឯកឧត្តម គឹម សន្តិភាព បានបញ្ជាក់ថា សម្រាប់អ្នកធ្វើដំណើរចេញពីតំបន់ដែលមានផ្ទុះការឆ្លងរាលដាលធ្ងន់ធ្ងរនៃជំងឺកូវីដ-១៩ ទៅកាន់ខេត្តដទៃ ត្រូវ៖ -យកសំណាក និងធ្វើចត្តាឡីស័ក ចំពោះអ្នកធ្វើដំណើរដែលវិលត្រឡប់មករស់នៅ ឬស្នាក់​នៅរយៈពេលវែង(រយៈពេលចាប់ពី១សប្តាហ៍ឡើងទៅ) -យកសំណាក និងត្រូវរាយការណ៍អំពីទីកន្លែងស្នាក់នៅជូនអាជ្ញាធរមានសមត្ថកិច្ច ចំពោះអ្នកធ្វើដំណើរបំពេញការងារ អ្នកធ្វើដំណើរឆ្លងកាត់ ឬអ្នកធ្វើដំណើរស្នាក់នៅរយៈពេលខ្លី (តិចជាង១សប្តាហ៍) ចំពោះលទ្ធផលនៃការវិភាគរហ័សរកមេរោគកូវីដ-១៩ ដែលអនុវត្តនៅក្នុងភូមិសាស្រ្តនៃខេត្តមួយ មានសុពលភាពសម្រាប់ភូមិសាស្រ្តនៃខេត្តដទៃ នៅក្នុងថ្ងៃតែមួយ៕

អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី២៦មេសាឆ្នាំ២០២១ បានជូនដំណឹងថា មានអ្នកជំងឺកូវីដ-១៩ គឺជាបុគ្គលិកធ្វើការនៅធនាគារភ្នំពេញពាណិជ្ជ សាខាផ្លូវនរោត្តម សង្កាត់ទន្លេបាសាក់ ខណ្ឌចំការមនរាជធានីភ្នំពេញ ហើយបុគ្គលិកនោះបានធ្វើការចាប់ពីថ្ងៃទី១៧មេសាដល់ថ្ងៃទី២៤មេសា ឆ្នាំ២០២១។អនុគណៈកម្មការស្រាវជ្រាវជំងឺកូវីដ-១៩ឲ្យប្រជាពលរដ្ឋ ដែលបានទៅកាន់ធានាគារនោះ ត្រូវដាក់ខ្លួនដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬបានទៅទីកន្លែងមានហានិភ័យនោះ។

អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី២៦មេសាឆ្នាំ២០២១ បានជូនដំណឹងថា មានអ្នកជំងឺកូវីដ-១៩ ចំនួន២នាក់ បានទៅផ្សារ ទំនើប AEON Maxvalu ExPress មានទីតាំងនៅ ផ្លូវ៥១ កែង ផ្លូវ៣៦០ សង្កាត់បឹងកេងកង១ ខណ្ឌបឹងកេងកង ចាប់ពីម៉ោង៥និង២៩នាទី ដល់ម៉ោង៥និង៣៤នាទីល្ងាចថ្ងៃទី២០មេសាឆ្នាំ២០២១។ សេចក្ដីរាយការណ៍បានឲ្យដឹងថា អ្នកជំងឺកូវីដ-១៩ទាំងពីនាក់នោះ បានបានទៅកាន់ទីតាំងផ្សារទំនើបនោះ ហើយបានប៉ះពាល់ទំនិញស្ទើរគ្រប់ទីកន្លែងក្នុងផ្សារ។អនុគណៈកម្មការស្រាវជ្រាវជំងឺកូវីដ-១៩ឲ្យប្រជាពលរដ្ឋ ដែលបានទៅកាន់ផ្សារនោះ ត្រូវដាក់ខ្លួនដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬបានទៅទីកន្លែងមានហានិភ័យនោះ។

កិច្ចសម្ភាសន៍៖ ឯ.ឧ ផៃ ស៊ីផាន ប្រធានក្រុមអង្គភាពអ្នកនាំពាក្យរាជរដ្ឋាភិបាលកម្ពុជាប្រធានបទទី១ស្តីពី (រាជរដ្ឋាភិបាលកម្ពុជា ចេញសេចក្តីសម្រេចលេខ៥៣សសរ នៅថ្ងៃទី២៥ ខែមេសា ឆ្នាំ២០២១ បញ្ចប់ការហាមឃាត់ធ្វើដំណើរ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេស លើកលែងតែតំបន់បិទខ្ទប់ដូចជារាជធានីភ្នំពេញ ក្រុងតាខ្មៅខេត្តកណ្តាល និងក្រុងព្រះសីហនុ)៕ ប្រធានបទទី២ ស្តីពី ៖ ទណ្ឌិតរត់ចោលស្រុក ស្រែកញុះញង់ប្រជាពលរដ្ឋនៅកម្ពុជាមិនឱ្យ គោរពនិងអនុវត្តវិធានការរបស់រាជរដ្ឋាភិបាល ក្នុងការបិទខ្ទប់រាជធានីភ្នំពេញ និងក្រុងតាខ្មៅ ដោយញុះញង់ឱ្យពលរដ្ឋចេញពីលំនៅដ្ឋានធ្វើសកម្មភាពធម្មតាដោយមិនគិតគូរពីការឆ្លងរីករាលដាលនៃជំងឺកូវីដ១៩ និងការស្លាប់របស់ពលរដ្ឋ៕