បរទេស៖ ខណៈដែលឥណ្ឌូនេស៊ីកំពុងរៀបចំខ្លួនត្រៀមធ្វើការចាក់វ៉ាក់សាំងទ្រង់ទ្រាយធំនោះ ត្រូវបានគេដឹងថា រដ្ឋាភិបាលប្រទេសនេះបានដាក់គោលដៅសំខាន់សម្រាប់តែមនុស្សពេញវ័យប៉ុណ្ណោះក្រោមហេតុផលថាមានភាពប្រឈមខ្ពស់ជាងកុមារ និងមនុស្សចាស់ជរា។ បណ្តាញសារព័ត៌មាន WeForum បានចេញផ្សាយថា ឥណ្ឌូនេស៊ី នឹងចាប់ផ្តើមធ្វើការចាក់វ៉ាក់សាំងតែទៅលើក្រុមមនុស្សដែលមានវ័យចន្លោះពី18 ទៅ59 ឆ្នាំប៉ុណ្ណោះ ហើយនឹងប្រើប្រាស់វិធីក្នុងការពន្លឿនការចាក់ឲ្យបានលឿនបំផុតដើម្បីអាចជួយជំរុញឱ្យសេដ្ឋកិច្ចរបស់ខ្លួនងើបឡើងវិញ។ វ៉ាក់សាំងរបស់ឥណ្ឌូនេស៊ីដែលបានប្រកាសទទួលស្គាល់ និងយកមកប្រើប្រាស់នៅក្នុងតំណាក់កាលនេះ គឺជាវ៉ាក់សាំងរបស់ប្រទេសចិនដែលអភិវឌ្ឍដោយក្រុមហ៊ុន Sinovac Biotec ។ បច្ចុប្បន្ន ប្រទេសដែលស្ថិតនៅក្នុងតំបន់អាស៊ីអាគ្នេយ៍មួយនេះបានចុះកិច្ចព្រមព្រៀងទិញយកវ៉ាក់សាំងរបស់ Sinovac ចំនួន 125.5 លានដូសរួចទៅហើយ ដោយកញ្ចប់វ៉ាក់សាំងទី1 មានចំនួន3 លានដូស ត្រូវបានគេបញ្ជូនមកដល់ប្រទេសរួចរាល់ហើយ។ ជាមួយគ្នានេះ ឥណ្ឌូនេស៊ីក៏បានចុះកិច្ចព្រមព្រៀងជាមួយនឹងវ៉ាក់សាំងរបស់ Pfizer និង AstraZeneca របស់សកលវិទ្យាល័យអង់គ្លេស Oxford ផងដែរ ប៉ុន្តែតាមផែនការវានឹងមិនអាចមានវត្តមាននៅក្នុងប្រទេសរបស់ខ្លួនឡើយរហូតដល់ត្រីមាសទី2 និងត្រីមាសទី3 ឆ្នាំ2021៕

ភ្នំពេញ ៖ តាមរយៈអគ្គនាយកដ្ឋានពន្ធដារ រាជរដ្ឋាភិបាលកម្ពុជាទទួលបានចំណូលសរុបជាង11ពាន់ប៊ីលានរៀល ស្មើនឹងប្រមាណ2,889លានដុល្លារ ពីការប្រមូលពន្ធអាករគ្រប់ប្រភេទ មានទំហំប្រមាណ101ភាគរយនៃផែនការប្រចាំឆ្នាំដែលបានកំណត់។ ប្រតិភូរាជរដ្ឋាភិបាលកម្ពុជា ឯកឧត្តម គង់ វិបុល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារបានបង្ហាញក្នុងកិច្ចប្រជុំបូកសរុបលទ្ធផល ប្រមូលចំណូលពន្ធប្រចាំខែធ្នូ និងប្រចាំឆ្នាំ2020 នៅថ្ងៃទី11 ខែមករា ឆ្នាំ2020ម្សិលមិញនេះថា ការប្រមូលពន្ធគ្រប់ប្រភេទនៅក្នុងឆ្នាំ2020គឺនៅតែរក្សាបាននូវស្ថានភាពប្រសើរ និងកើនលើសផែនការដែលបានកំណត់។ ឯកឧត្តមបញ្ជាក់ថា “ដោយមានការខិតខំប្រឹងប្រែង និងយកចិត្តទុកដាក់ក្នុងការប្រមូលចំណូលពន្ធរបស់មន្ត្រីគ្រប់លំដាប់ថ្នាក់ និងការកែទម្រង់ប្រព័ន្ធគ្រប់គ្រងជាច្រើនរបស់អគ្គនាយកដ្ឋានពន្ធដារ ការប្រមូលចំណូលប្រចាំឆ្នាំ2020 អគ្គនាយកដ្ឋានពន្ធដារប្រមូលចំណូលពន្ធបានជាង11ពាន់ប៊ីលានរៀល ត្រូវប្រមាណជាង2,889លានដុល្លារ ស្មើជាង101ភាគរយនៃផែនការប្រចាំឆ្នាំដែលបានកំណត់ដោយច្បាប់”។ ឯកឧត្តមបន្តថា “សម្រាប់តែការប្រមូលចំណូលពន្ធនៅក្នុងខែធ្នូ ឆ្នាំ2020កន្លងទៅនេះ អគ្គនាយកដ្ឋានពន្ធដារប្រមូលចំណូលពន្ធបានប្រមាណជាង972ប៊ីលាន រៀលត្រូវប្រមាណជាង240 លានដុល្លារត្រូវនឹងប្រមាណជាង101ភាគរយនៃផែនប្រចាំខែដែលបានកំណត់”។ ឯកឧត្តមបញ្ជាក់ថា ជុំវិញនៃការប្រមូលចំណូលពន្ធរបស់អគ្គនាយកដ្ឋានពន្ធដារ ទោះបីកម្ពុជាកំពុងប្រឈម និងការរីករាលដាល និងជំងឺកូវីដ19 យ៉ាងណាក្តី ក៏ការប្រមូលចំណូលពន្ធអាករគ្រប់ប្រភេទនៅមានលក្ខណៈល្អប្រសើរនៅឡើយ ពោលគឺចំនួនទឹកប្រាក់ដែលប្រមូលបាននៅតែបន្តហក់ឡើងឈរក្នុងស្ថានភាពរឹងមាំដដែល ហើយតាមរយៈការដាក់ទិសដៅសម្រាប់អនុវត្តបន្តនៅឆ្នាំបន្ទាប់ចំណូលពន្ធអាចនឹងមានការកើនឡើងបន្ថែមទៀត៕

នៅក្នុងទសវត្សរ៍នេះ ការដឹកជញ្ជូនតាមផ្លូវអាកាស គឺពិតជាមានសារៈសំខាន់យ៉ាងខ្លាំង ជាពិសេសតាមរយៈវិស័យដឹកជញ្ជូនតាមការហោះហើរមួយនេះ នឹងជួយជំរុញឱ្យមានកំណើនទេសចរជាតិ និងអន្តរជាតិ ក៏ដូចជាបង្កើនទំហំនៃការវិនិយោគដែលជាខឿនសេដ្ឋកិច្ចយ៉ាងប្រសើរ ខណៈដែលនៅតាមបណ្តាប្រទេសនានាក្នុងតំបន់ក៏កំពុងពង្រឹងវិស័យមួយនេះដូចគ្នា។ រាជរដ្ឋាភិបាលកម្ពុជាក្រោមការដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានរៀបចំគោលនយោបាយសាងសង់ព្រលានយន្តហោះថ្មីស្ថិតតំបន់ភាគឦសាននៃប្រទេស ជាមួយនឹងក្ដីរំពឹងអាចនឹងចាប់ផ្តើមនៅក្នុងអំឡុងខែកញ្ញា ឆ្នាំ2021ខាងមុខនេះ ដើម្បីជំរុញភាពទាក់ទាញក្នុងវិស័យទេសចរណ៍ និងការវិនិយោគពាណិជ្ជកម្មនៅក្នុងខេត្តមួយនេះ។ បច្ចុប្បន្នគម្រោងសាងសង់ព្រលានយន្តហោះនេះកំពុងស្ថិតនៅក្នុងការសិក្សាជិតបញ្ចប់ និងត្រូវការរយៈពេលសម្រាប់សិក្សាពីផលចំណេញ និងផលប្រយោជន៍សេដ្ឋកិច្ចមួយចំនួនទៀត ដើម្បីឱ្យការសាងសង់ព្រលានក្លាយទៅជាសមិទ្ធផលថ្មី ដែលអាចបំពេញនូវសេចក្តីត្រូវការជាចាំបាច់ដល់ប្រជាពលរដ្ឋតំបន់ និងបម្រើដល់វិស័យទេសចរណ៍ផងដែរ។ លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានប្រាប់ AMSថា ផែនការនៃការសាងសង់ព្រលានយន្តហោះថ្មីខេត្តមណ្ឌលគីរី គឺស្របទៅតាមផែនការអន្តរក្រសួងដែលបានរៀបចំ ដោយរាជរដ្ឋាភិបាលចង់ជំរុញខេត្តនៃតំបន់ភាគឦសាននេះ ក្លាយទៅជាទីតាំងនៃពហុបំណង ដោយសារខេត្តមានសក្ដានុពលក្នុងវិស័យទេសចរណ៍ និងមានវិសាលភាពធំ ក្នុងការធ្វើពិពិធកម្មកសិកម្ម និងឧស្សហកម្មផងដែរ។ លោកជំទាវបានមានប្រសាសន៍ថា៖« ការសាងសង់ព្រលានយន្តហោះនេះ ពិតជាល្អសម្រាប់គម្រោងការថ្មី ដើម្បីផ្សារភា្ជប់ខេត្តមណ្ឌលគីរី ជាមួយខេត្តផ្សេងទៀត។ បើវិស័យទេសចរណ៍ខ្លាំង មានភ្ញៀវទេសចរទៅដល់ទីណា ទីនោះនឹងមានការវិនិយោគទៅដល់។ នៅពេលមានព្រលានយន្តហើយ មនុស្សអាចធ្វើដំណើរបានលឿន ព្រោះការធ្វើដំណើរបច្ចុប្បន្នត្រូវប្រើរយៈពេលយ៉ាងហោចណាស់6ម៉ោងទើបទៅដល់។ បើមានព្រលានយើងអាចធ្វើដំណើរលឿនជាង ដោយយើងអាចផ្សារភ្ជាប់ជាមួយខេត្តដទៃ ដូចជាខេត្តព្រះសីហនុ ដែលគាត់ធ្វើដំណើរក្នុងថ្ងៃតែមួយ គាត់អាចទៅបាន2-3កន្លែង”។ លោកជំទាវបន្តថា…

បរទេស៖ យោងតាមតួលេខនៃការព្យាករណ៍ថ្មីរបស់មជ្ឈមណ្ឌលស្រាវជ្រាវអាជីវកម្ម និងសេដ្ឋកិច្ច CEBR (Centre for Economic and Business Research) កាលពីថ្ងៃចន្ទម្សិលមិញនេះបានអះអាងថា ចិននឹងវ៉ាដាច់អាមេរិកឡើងទៅកាន់តំណែងជាមហាអំណាចសេដ្ឋកិច្ចទី1 លើសាកលលោកត្រឹមឆ្នាំ2028 ខាងមុខនេះប៉ុណ្ណោះ។ ការសិក្សាស្រាវជ្រាវ និងព្យាករណ៍ទុកលើកនេះត្រូវបានគេមើលឃើញថាកំណើនសេដ្ឋកិច្ចចិនមានសន្ទុះខ្លាំង ជាពិសេសនៅក្នុងអំឡុងពេលកូវីដនេះដែលវាបានធ្វើឲ្យល្បឿនសេដ្ឋកិច្ចរបស់ខ្លួនមានល្បឿនខ្លាំង ហើយបើប្រៀបធៀបទៅនឹងការព្យាករណ៍ទុកគ្រាមុន ចិនគឺល្បឿនលឿនជាងការព្យាករណ៍ទុកមុនរយៈពេល 5ឆ្នាំ។ មជ្ឈមណ្ឌល CEBR បានលើកឡើងទៀតថាការរឹតបន្តឹង និងបំរាមក្នុងប្រទេសដូចជាការបិទទីក្រុងជាច្រើននាពេលកន្លងមករបស់ចិនគឺ នៅតែអាចបន្តកំណើនសេដ្ឋកិច្ច ដដែលបើប្រៀបធៀបទៅនឹងស្ថានភាពរបស់លោកខាងលិចនាពេលបច្ចុប្បន្នដែលកំពុងជួបបញ្ហាជាច្រើន។ តួលេខបានបង្ហាញទៀតថាកំណើនសេដ្ឋកិច្ចចិននឹងកើនឡើងជាមធ្យម 5.7 ភាគរយក្នុងមួយឆ្នាំចន្លោះពីឆ្នាំ2021 ទៅដល់ឆ្នាំ2025 មុនពេលដែលវានឹងថយល្បឿនបន្តិចមកត្រឹមតែ 4.5 ភាគរយក្នុងមួយឆ្នាំពីឆ្នាំ2026 ដល់ឆ្នាំ2030។ បន្ទាប់ពីអាមេរិកដែលឈរនៅលេខរៀងទី២ក្នុងនាមជាមហាអំណាចសេដ្ឋកិច្ចពិភពលោក តាមការព្យាករណ៍ដដែលបានបញ្ជាក់ទៀតថា ជប៉ុននឹងបន្តស្ថិតនៅក្នុងលេខរៀងទី 3 ជាមហាអំណាចសេដ្ឋកិច្ចរហូតដល់ដើមឆ្នាំ2030មុនពេលដែលត្រូវបានឥណ្ឌាដណ្តើម ហើយនឹងរុញច្រានអាល្លឺម៉ង់ពីលេខរៀងទី 4 ទៅឈរនៅលំដាប់លេខរៀងទី 5 ជំនួសវិញ ខណៈដែលអង់គ្លេសដែលឈរនៅលេខរៀងទី 5 នោះនឹងធ្លាក់ទៅលេខរៀងទី6 វិញចាប់ពីឆ្នាំ2024ខាងមុខនេះទៅ ៕

បរទេស៖ កិច្ចខំប្រឹងប្រែងរបស់ប្រទេសជាច្រើនក្នុងចាក់វ៉ាក់សាំងការពារជំងឺផ្លូវដង្ហើមកូវីដ-19 បានចាប់ផ្តើមតាំងពីដើមខែធ្នូមកម្ល៉េះ ហើយរហូតដល់ពេលនេះមានប្រទេសចំនួន 40 បានចាប់ផ្តើមដំណើរការចុះឈ្មោះ និងចាក់វ៉ាក់សាំងជូនពលរដ្ឋរបស់ខ្លួន។ យោងតាមការចេញផ្សាយរបស់ The Business Insider នៅថ្ងៃចន្ទនេះ បានឱ្យដឹងថា គិតជាមធ្យមប្រទេសអ៊ីស្រាអ៊ែលបានចែកចាយនិងចាក់វ៉ាក់សាំងទៅដល់ពលរដ្ឋរបស់ខ្លួនបានច្រើនជាងគេ ក្នុងនោះមនុស្សប្រមាណជា 20 នាក់ក្នុងចំណោម 100នាក់បានចុះឈ្មោះនិងទទួលយកវ៉ាក់សាំង។ ប្រភពដដែលបានបង្ហាញទៀតថា សហភាពអារ៉ាប់រួម អាចទទួលបានវ៉ាក់សាំងក្នុងអត្រា 8.98 នាក់ក្នុងចំណោម 100នាក់ជាប្រទេសលេខ2 (អត្រាជាមធ្យម) ហើយប្រទេសបារ៉ែន បានទទួលចំណាត់ថ្នាក់លេខរៀងទី3 ដែលចាក់វ៉ាក់សាំងទៅលើមនុស្សប្រមាណជា 4.25 នាក់ក្នុងចំណោមមនុស្ស 100នាក់។ និយាយដល់ប្រទេសអង់គ្លេសវិញ ទោះបីជាប្រទេសនេះ បានចាប់ផ្តើមចាក់វ៉ាក់សាំងឱ្យប្រជាពលរដ្ឋរបស់ខ្លួនមុនគេ ក្តី ប៉ុន្តែអង់គ្លេសអាចធ្វើបានក្នុងអត្រា 1.91នាក់ប៉ុណ្ណោះ​ ក្នុងចំណោមប្រជាពលរដ្ឋ 100នាក់ស្ថិតនៅក្នុងចំណាតថ្នាក់លេខរៀងទី4។ ដោយឡែកប្រទេសដែលទទួលរងការរិះគន់ខ្លាំងជាងគេអំពីល្បឿននៃការចែកចាយនិងចាក់វ៉ាក់សាំងនៅតំបន់អ៊ឺរ៉ុប​នោះ គឺប្រទេសបារាំង។ បារាំងខ្លួនឯងអាចចាក់វ៉ាក់សាំងលើពលរដ្ឋរបស់ខ្លួន បានត្រឹមតែ 516 នាក់ប៉ុណ្ណោះក្នុងរយៈពេលប្រាំមួយថ្ងៃដំបូងនៃការដំណើរការចាក់វ៉ាក់សាំង ហើយប្រទេសជាបន្តបន្ទាប់ទៀត រួមមាន ប្រទេសដាណឺម៉ាក អ៊ីឡដន៍ អ៊ីតាលី និងកាណាដា៕ ប្រភព៖ Business Insider

ប៉េកាំង៖ យោងតាមការចេញផ្សាយរបស់ CNA នៅព្រឹកថ្ងៃចន្ទនេះបានឲ្យដឹងថា ក្រុមហ៊ុនផលិតរថយន្តអគ្គិសនីយក្ស Telsa ត្រូវបានគេដឹងថាកំពុងតែធ្វើការស្វែងរកបុគ្គលិកដ៏សំខាន់ម្នាក់មកកាន់តំណែងជាប្រធានផ្នែកឌីសាញរថយន្តសម្រាប់ទីផ្សារនៃប្រទេសចិន។ ប្រភពដដែលបានសរសេរទៀតថា ការព្យាយាមនេះគឺស្ថិតនៅក្នុងផ្នែកមួយនៃកិច្ចខំប្រឹងប្រែងរបស់ Telsa ដែលធ្វើយ៉ាងណាដើម្បីអាចដំណើរការពេញប្រតិបត្តិការ 100 ភាគរយនៅក្នុងរោងចក្ររបស់ខ្លួននៅក្រុងសៀងហៃ និងទីក្រុងប៉េកាំងប្រទេសចិន ជាពិសេសគឺការបញ្ចេញគំរូរថយន្តដែលនឹងអាចចាប់យកទំនោរចំំណង់ចំណូលចិត្តនៃអតិថិជនជាជនជាតិចិនតែម្តង។ ក្រៅពីនេះ Telsa បានប្រើប្រាស់ពេលវេលាអស់ 4 ខែមកដើម្បីធ្វើការងារទៅលើបញ្ហានេះដោយក្នុងនោះទាំងប្រធានផ្នែកគ្រប់គ្រងបុគ្គលិក និងប្រធានផ្នែកផ្សេងៗទៀតបាននាំគ្នាជួយប្រកាសរកតាមរយៈបណ្តាញរបស់ខ្លួនយ៉ាងខ្លាំងក្លាផងដែរ។ បេក្ខភាពដែលអាចមានសមត្ថភាពមកបំពេញការងារនេះបាន Telsa តម្រូវឱ្យមានបទពិសោធយ៉ាងហោចណាស់ 20ឆ្នាំ មានបទពិសោធ និងស្គាល់ច្បាស់ចំណង់ចំណូលចិត្ត ជាមួយនឹងទីផ្សារជាជនជាតិចិន ជាពិសេសអាចមានគំនិតច្នៃប្រឌិតក្នុងការផ្សារភ្ជាប់ចន្លោះប្រហោងរវាងទីផ្សារចិន និងអាមេរិកផងដែរ។ យោងតាមការបញ្ជាក់របស់ក្រុមហ៊ុនប្រឹក្សាផ្នែករថយន្តដែលមានឈ្មោះថា LMC Automotive បានបញ្ជាក់ថា ចិនជាទីផ្សារទិញរថយន្តអគ្គិសនីដ៏ធំបំផុតរបស់ Telsa ក៏ដូចជាក្រុមហ៊ុនអ្នកផលិតរថយន្តអគ្គិសនីផ្សេងទៀតលើសាកលលោកផងដែរ។ ទីផ្សារប្រទេស ស្ថិតនៅលំដាប់ទី1 របស់ Tesla ខណៈដែលអាមេរិកគឺជាទីផ្សារលក់រថយន្តធំបំផុតទី2របស់ខ្លួន៕

បរទេស ៖ ព្រះអង្គម្ចាស់ Mohammed bin Salman របស់អារ៉ាប៊ីសាអូឌីតកាលពីថ្ងៃអាទិត្យម្សិលមិញនេះបានបង្ហាញព្រះវត្តមានយ៉ាងកម្រនៅក្នុងកញ្ចក់ទូរទស្សន៍ដើម្បីប្រកាសបើកការដ្ឋាននៃគម្រោងសាងសង់ទីក្រុងគ្មានផ្សែងកាបូនដ៏អស្ចារ្យមួយដែលមានទីតាំងស្ថិតនៅក្នុងទីក្រុងដ៏ធំនៃតំបន់សេដ្ឋកិច្ចពិសេស NEOM។ គម្រោងសាងសង់ទីក្រុងគ្មានផ្សែងកាបូន ឬ zero-carbon city បានក្លាយទៅជាការដ្ឋានដំបូងគេបង្អស់នៅក្នុងតំបន់សេដ្ឋកិច្ចពិសេសដែលមានតម្លៃរហូតទៅដល់500 ពាន់លានដុល្លារ ហើយក៏ត្រូវបានគេមើលឃើញថាគឺជាផែនការដ៏មានមហិច្ឆិតារបស់អារ៉ាប៊ីសាអូឌីតក្នុងការធ្វើឲ្យខ្លួនក្លាយទៅជាប្រទេសសេដ្ឋកិច្ចចម្រុះទោះបីជាមានឈ្មោះជាប្រទេសដែលនាំប្រេងឆៅធំបំផុតលើសកលលោករួចទៅហើយក្តី។ ព្រះអង្គម្ចាស់ជារាជទាយាទអង្គនេះបានបញ្ជាក់ថា ទីក្រុងគ្មានផ្សែងកាបូននេះមានឈ្មោះថា The Line នឹងលាតសន្ធឹងនៅលើផ្ទៃដីដែលមានប្រវែងរហូតទៅដល់ 170គីឡូម៉ែត្រ និងមានសមត្ថភាពក្នុងការផ្តល់ជម្រកដល់ពលរដ្ឋរហូតទៅដល់ 1 លាននាក់ និងផ្គត់ផ្គង់ទៅដោយថាមពលស្អាត Clean Energy 100 ភាគរយ ស្ថិតនៅក្នុងទីតាំងនៃសមុទ្រក្រហម ដែលគ្រោងនឹងបញ្ចប់ការសាងសង់នៅត្រឹមឆ្នាំ2025។ គួរឱ្យដឹងថែរដា សម្រាប់តែគម្រោងនៃការកសាងតំបន់សេដ្ឋកិច្ចពិសេសដែលពោរពេញទៅដោយបច្ចេកវិទ្យាទំនើបបំផុត NEOM ស្ថិតនៅលើផ្ទៃដីទំហំប្រមាណ 26,500 គីឡូម៉ែត្រការ៉េ។ តំបន់សេដ្ឋកិច្ចពិសេសមួយនេះ មានការគាំទ្រយ៉ាងពេញទំហឹងពីសំណាក់រដ្ឋាភិបាលនៃប្រទេសអារ៉ាប៊ីសាអូឌីត៕

វ៉ាស៊ីនតោន៖ លោកប្រធានាធិបតីអាមេរិកអាណត្តិថ្មី Joe Biden នឹងត្រូវចាក់វ៉ាក់សាំងរបស់ក្រុមហ៊ុន Pfizer ជាលើកទី 2 របស់គាត់នៅថ្ងៃចន្ទទី11 ខែមករា នេះហើយ។ នេះបើយោងតាមការប្រកាសរបស់ការិយាល័យផ្ទាល់ខ្លួនរបស់លោក។ ការចាក់វ៉ាក់សាំងលើកទី2 នេះគឺធ្វើឡើងបន្ទាប់ពីលោក Biden បានទទួលយកវ៉ាក់សាំងលើកដំបូកាលពី3សប្តាហ៍មុនជាមួយនឹងការបង្ហាញពីជំនឿជឿជាក់ទៅលើគុណភាពនៃវ៉ាក់សាំងតាំងពីគ្រាធ្វើតេស្ត។ ទោះបីជាយ៉ាងណា ការិយាល័យរបស់លោក Biden មិនបានបញ្ជាក់លំអិតទេថា តើការចាក់វ៉ាក់សាំងទី2នេះនឹងត្រូវធ្វើនៅកន្លែងណា ម៉ោងប៉ុន្មាននោះទេ។ គួរឲ្យដឹងដែរថា មកដល់ពេលនេះពលរដ្ឋអាមេរិកប្រមាណជា 374,000 នាក់ហើយដែលបានបាត់ជីវិតដោយសារតែកូវីដ។ ដោយឡែក កាលពីថ្ងៃសុក្រសប្តាហ៍កន្លងទៅនេះ លោក Biden បានប្រើពាក្យស្តីបន្ទោសធ្ងន់ៗទៅលើដំណើរការចែកចាយវ៉ាក់សាំងក្រោមការដឹកនាំរបស់លោក Donald Trump ។ គិតមកត្រឹមពេលនេះពលរដ្ឋអាមេរិកប្រមាណជា 6.7 លាននាក់ប៉ុណ្ណោះដែលបានទទួលបានការចាក់វ៉ាក់សាំងដំបូងរបស់ពួកគេ ប៉ុន្តែវាគឺជាទំហំដែលមានចំនួនខុសគ្នាឆ្ងាយពីការរំពឹងទុកថានឹងអាចចាក់បានទៅដល់ 20លាននាក់នៅត្រឹមចុងឆ្នាំ 2020៕