នៅល្ងាចនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានបញ្ជាក់ក្នុងបណ្តាញសង្គម Facebook ផ្លូវការរបស់សម្តេចថា: បងប្អូនជនរួមជាតិជាទីគោរពស្រឡាញ់! កន្លងមកជាមួយនឹងការតាមដាននូវដំណើរការផលិតវ៉ាក់សាំងប្រឆាំងកូវីដ១៩ របស់ប្រទេសនានា ខ្ញុំបានណែនាំរដ្ឋមន្ត្រីក្រសួងសុខាភិបាល និងរដ្ឋមន្ត្រីក្រសួងសេដ្ឋកិច្ចហិរញ្ញវត្ថុអោយត្រៀមបំរុងថវិកាសម្រាប់ទិញវ៉ាក់សាំងនេះយកមកចាក់ជូនប្រជាជនយើងដោយឥតគិតថ្លៃជាជំហានដំបូងផងដែរ។ ពេលនេះប្រទេសមួយចំនួនផលិតបាននិងដាក់អោយប្រើប្រាស់ហើយនឹងកំពុងបញ្ចេញលក់អោយប្រទេសនានាផងដែរ។ ល្ងាចនេះខ្ញុំបានណែនាំអោយរដ្ឋមន្ត្រីក្រសួងសុខាភិបាលពិភាក្សាជាមួយដៃគូអភិវឌ្ឍន៍ ពិសេសអង្គការសុខភាពពិភពលោក ដើម្បីកំណត់ថា តើយើងគួរទិញវ៉ាក់សាំងពីប្រទេសណា? ខ្ញុំក៏បានណែនាំរដ្ឋមន្ត្រីក្រសួងសេដ្ឋកិច្ចហិរញ្ញវត្ថុត្រៀមថវិកាសម្រាប់ការទិញ១លានដូស (មួយលានដូស) ក្នុងដំណាក់កាលដំបូងដើម្បីចាក់ជូនចំពោះអ្នកដែលធ្វើការនៅកន្លែងដែលមានហានិភ័យខ្ពស់ និងអ្នកដែលមានហានិភ័យ។ មួយលានដូសចាក់បានត្រឹមតែមនុស្ស៥០ម៉ឺននាក់ប៉ុណ្ណោះ (ព្រោះម្នាក់ត្រូវការចាក់២ដង) ក្នុងពេលយើងមានប្រជាជន១៦លាននាក់ ទាំងចាស់ទាំងក្មេង ដែលក្នុងនោះអាចមានមនុស្សប្រមាណ១០លាននាក់ត្រូវការចាក់វ៉ាក់សាំង។ ក្នុងស្ថានភាពដែលប្រទេសយើងនៅក្រខ្វះថវិកាសម្រាប់ទិញបន្ថែម ខ្ញុំបានណែនាំរដ្ឋមន្ត្រីទាំង២រូបអោយពិភាក្សាជាមួយដៃគូអភិវឌ្ឍន៍ទាំងទ្វេភាគី ទាំងពហុភាគី ដើម្បីស្វែងរកជំនួយបន្ថែមមកជួយដល់ប្រជាជនយើង។ យើងសង្ឃឹមថាដៃគូអភិវឌ្ឍន៍របស់យើងនឹងផ្តល់ជំនួយដល់ប្រជាជនយើងឬយ៉ាងហោចលក់ក្នុងតម្លៃថោកសមរម្យអោយយើង។ ខ្ញុំក៏បានណែនាំរដ្ឋមន្ត្រីក្រសួងសេដ្ឋកិច្ចហិរញ្ញវត្ថុត្រៀមថវិកាសម្រាប់ទិញ២ទៅ៣លានដូសថែមទៀតផងដែរសម្រាប់ដំណាក់កាលបន្ទាប់៕

បរទេស៖ទូរទស្សន៍ BBC ចេញផ្សាយនៅថ្ងៃចន្ទនេះបានឲ្យដឹងថា កិច្ចពិភាក្សាគ្នារវាងអង់គ្លេស និងសហភាពអ៊ឺរ៉ុបនឹងចាប់ផ្តើមដំណើរការឡើងវិញនាពេលខាងមុខដើម្បីអាចបញ្ចប់ទៅនៃកិច្ចព្រមព្រៀងពាណិជ្ជកម្មក្រោយពេលអង់គ្លេសចាកចេញពីប្លុកអ៊ឺរ៉ុបជាផ្លូវការ។ ប្រភពដដែលបានសរសេរទៀតថានៅក្រោយការជួបជុំគ្នាដ៏តានតឹងកាលពីចុងសប្តាហ៍កន្លងមកកិច្ចព្រមព្រៀងស្ទើរតែអាចបញ្ចប់ទាំងស្រុងទៅហើយ ប៉ុន្តែជឿជាក់ថាដោយសារតែភាគីខាងអង់គ្លេសនៅមានបញ្ហាមួយចំនួនតូចដើម្បីពិនិត្យឡើងវិញ។ តំណាងអ្នកពិភាក្សារបស់អង់គ្លេស លោក Lord Frost នឹងត្រូវបានគេដឹងថាបន្តជួបជាមួយលោក Michel Barnier ម្តងទៀតហើយលោកនាយករដ្ឋមន្ត្រីអង់គ្លេស Boris Johnson ក៏នឹងត្រូវទូរស័ព្ទជួបជាមួយនឹងលោកស្រី Ursula von der Leyen ប្រធានគណកម្មការអ៊ឺរ៉ុបផងដែរ។ ប្រភពដ៏គួរឲ្យទុកចិត្តមួយរបស់សហភាពអ៊ឺរ៉ុបដែលថ្លែងប្រាប់ទៅកាន់ក្រុមការងារ BBC បានបញ្ជាក់ដែរថា ទោះបីជាកិច្ចព្រមព្រៀងពាណិជ្ជកម្មនឹងមិនអាចរៀបចំរួចរាល់ជាផ្លូវការមុនពេលចុងឆ្នាំក្តី ប៉ុន្តែគោលការណ៍ត្រួតពិនិត្យនិងកិច្ចការងារបង់ពន្ធគំរូថ្មីនឹងដាក់ឲ្យអនុវត្តន៍សម្រាប់ការចរាចរណ៍ទំនិញនៅតាមព្រំដែនអង់គ្លេសជាមិនខាន៕

បរទេស៖កាលពីចុងសប្តាហ៍កន្លងទៅប្រទេសដាណឺម៉ាកបានក្លាយទៅជាគំរូប្រទេសដ៏ឆ្នើមមួយក្នុងការបោះបង់ចោលនូវគម្រោងធំៗជាច្រើនដែលនឹងត្រូវធ្វើការរុករកឧស្ម័នធម្មជាតិព្រមទាំងប្រេងនៅក្នុងសមុទ្រភាគខាងជើងប្រទេសរបស់ខ្លួន។ ក្រៅតែពីគម្រោងថ្មីៗទាំងនេះ រដ្ឋាភិបាលដាណឺម៉ាកក៏បានបញ្ជាក់យ៉ាងច្បាស់ដែរថានឹងដកអជ្ញាបណ្ណចុងក្រោយជាច្រើនទៀតពីក្រុមហ៊ុនមួយចំនួនដែលកំពុងបន្តការងាររុករកប្លុកថ្មី និងផលិតប្រេង ហ្គាសនៅក្នុងប្រទេសមួយនេះផងដែរ។ គួរឲ្យដឹងដែរថា ដាណឺម៉ាកគឺជាប្រទេសដែលផលិតប្រេងបានច្រើនជាងគេបំផុតនៅក្នុងតំបន់អ៊ឺរ៉ុបប៉ុន្តែមិនច្រើនដូចជាប្រទេសមិនមែនសមាជិកដូចជានរវេស ឬអង់គ្លេស នោះទេ។ យោងតាមតួលេខដែលចេញផ្សាយដោយក្រុមហ៊ុនវិភាគរបស់អង់គ្លេស BP បានបង្ហាញថាដាណឺម៉ាកអាចបូមប្រេងបានរហូតទៅដល់ 103,000 បារ៉ែលក្នុងមួយថ្ងៃកាលពីឆ្នាំ 2019 ហើយបច្ចុប្បន្នដាណឺម៉ាកមានម៉ាស៊ីនជីករុករករ៉ែនេះដល់ទៅ 55នៅទូទាំងតំបន់រុករកទាំង20 របស់ខ្លួន។ BBC ចេញផ្សាយថាការសម្រេចចិត្តរបស់រដ្ឋាភិបាលដាណឺម៉ាកលើកនេះបានធ្វើឲ្យប្រទេសរបស់ខ្លួនខាតប្រង់ប្រាក់កម្រៃដល់ទៅជាង 1.1 ពាន់លានផោន ប៉ុន្តែហេតុអ្វីបានជាដាណឺម៉ាកហាក់ដូចជាមិនរុញរាក្នុងការអនុវត្តការងារនេះ? យោងតាមការបញ្ជាក់របស់លោករដ្ឋមន្ត្រីក្រសួងទទួលបន្ទុកកិច្ចការងារបម្រែបម្រូលអាកាសធាតុ Dan Jorgensen បាននិយាយថា ចាប់តាំងតែពីឆ្នាំ 1970 មកប្រទេសរបស់លោកបានប្រមូលបានប្រាក់ចំណូលបានរាប់ពាន់លានដុល្លាររួចមកហើយពីរ៉ែទាំងនេះនៅសមុទ្រភាគខាងជើងរបស់ខ្លួន ប៉ុន្តែជាផ្នែកមួយនៃផែនការយក្សរបស់ដាណឺម៉ាកដើម្បីបញ្ចប់ទៅនៃការប្រើប្រាស់ថាមពលឥន្ធនៈ និងហ្វូស៊ីលទាំងស្រុងឲ្យបានត្រឹមឆ្នាំ2050ដូចនេះរដ្ឋាភិបាលគឺសម្រេចចាប់ផ្តើមអនុវត្តការងារនេះចាប់ពីឆ្នាំនេះតទៅតែម្តង។ ដាណឺម៉ាកកន្លងមក និងបច្ចុប្បន្នត្រូវបានគេទទួលស្គាល់ថាជាប្រទេសដែលគោរពសន្យាបំផុតចំពោះការប្តេជ្ញាចិត្តរបស់ខ្លួនទៅលើបញ្ហាបម្រែបម្រូលអាកាសធាតុដោយក្នុងនោះខ្លួនធ្លាប់បានដាក់ផែនការថានឹងបន្ថយការបំភាយឧស្ម័នផ្ទះកញ្ចក់ឲ្យបានត្រឹមកម្រិត 70 ភាគរយនៃប្រើប្រាស់កាលពីឆ្នាំ 1990 ឲ្យបានត្រឹមឆ្នាំ2030 និងលុបចោលទាំងស្រុងឲ្យបាននៅត្រឹមឆ្នាំ 2050 ហើយសេចក្តីព្រាងច្បាប់ទាំងពីរគឺការបញ្ចប់ការរុករករ៉ែ និងការបំភាយឧស្ម័នផ្ទះកញ្ចក់នេះគឺត្រូវបានចូលជាធរមានទៅហើយផងដែរ៕

CNN៖អ្នកណាក៏បានដឹងហើយថា ចិនតែងតែមានបំណងចង់បំបែកឥទ្ធិពល និងភាពរឹងម៉ាំរបស់រូបិយវត្ថុអាមេរិកគឺលុយដុល្លារចេញពីប្រព័ន្ធរូបិយប័ណ្ណជាសកលដើម្បីអាចឲ្យលុយយ័នរបស់ខ្លួនមានលទ្ធភាពកាន់តែខ្លាំងឡើងក្នុងការគ្រប់គ្រងលើទីផ្សារ ។ បន្ទាប់ពីបានត្រៀមខ្លួនអស់រយៈពេលជាច្រើនឆ្នាំរួចមក នៅក្នុងពេលនេះអ្នកជំនាញបានមើលឃើញថាចិនគឺកំពុងចាប់ផ្តើមធ្វើតេស្តទៅលើមហិច្ឆតាដំធំមួយនេះ ហើយតាមរយៈការដំណើរការច្របាច់លុយយ័នរបស់ខ្លួនជាមួយនឹងបច្ចេកវិទ្យាឌីជីថល ហើយវាបានកើតឡើងតាំងតែពីដើមឆ្នាំ2020 មកម្ល៉េះដោយសង្ឃឹមថាលុយយ័ននឹងក្លាយទៅជារូបិយបណ្ណដ៏មានឥទ្ធិពលខ្លាំងលើសដុល្លារទាំងប្រព័ន្ធឌីជីថលនិងប្រព័ន្ធមិនឌីជីថល។ ប្រភពដដែលបានអះអាងទៀតថា ការតេស្តសាកល្បងខ្នាតយក្សនេះគឺត្រូវបានធ្វើឡើងនៅក្នុងទីក្រុងធំៗរបស់ខ្លួនចំនួន4 ខណៈដែលទំហំប្រតិបត្តិការទៅលើសេវាកម្មឌីជីថលនេះគឺមានទំហំរហូតទៅដល់ 2000លានយ័ន ឬប្រមាណជា 300 លានដុល្លារអាមេរិករួចទៅហើយ។ អ្នកវិភាគមើលឃើញទៀតដែរថា ប្រសិនបើជោគជ័យផែនការនេះហើយចិនអាចដំណើរការប្រព័ន្ធលុយឌីជីថលមួយនេះទៅទូទាំងប្រទេសរបស់ខ្លួននោះវានឹងមិនមានប្រទេសណាមហាអំណាចសេដ្ឋកិច្ចមួយណាមានកម្លាំងខ្លាំងដូចចិននោះឡើយពាក់ព័ន្ធទៅនឹងរូបិយបណ្ណវត្ថុបែបឌីជីថលនេះខណៈដែលបច្ចុប្បន្នធនាគារកណ្តាលរបស់អ៊ឺរ៉ុបទើបតែបានត្រៀមខ្លួនសម្រាប់ដំណើរការឌីជីថលលុយអ៊ឺរ៉ូនៅឡើយ។ មន្ត្រីរដ្ឋាភិបាលចិនបានស្រែកផ្សព្វផ្សាយខ្លាំងៗថា អនាគតរបស់លុយយ័ន ក្នុងប្រព័ន្ធឌីជីថលគឺនឹងធ្វើឲ្យការទិញទំនិញ និងការចាយវាយកាន់តែងាយស្រួល និងសុវត្ថិភាពហើយបើទោះបីអ្នកប្រើប្រាស់មិនមានគណនេយ្យធនាគារ ឬសេវាកម្មហិរញ្ញវត្ថុណាក្តី។ ក្រៅតែពីនេះយើងអាចមើលឃើញទៀតថាប្រតិបត្តិការលុយស្ទើរតែនៅទូទាំងប្រទេសចិនគឺបានដំណើរការតាមប្រព័ន្ធឌីជីថលរួចទៅហើយ ហើយកាន់តែច្បាស់នោះគឺថាក្រុមហ៊ុនរ៉ាប់រងការចាយវាយទាំងនោះក៏សុទ្ធតែជាក្រុមហ៊ុនរបស់រដ្ឋទាំងអស់ផង។ លោក Frank Xie សាស្ត្រាចារ្យផ្នែកពាណិជ្ជកម្មនៅសកលវិទ្យាល័យ South Carolina Aiken បានមានប្រសាសន៍ថា ៖ ក្រៅតែពីអាចគ្រប់គ្រងទៅលើចំនួនព័ត៌មានដ៏លើសលប់មិនដែលធ្លាប់បានធ្វើពីមុនមក និងអំពីរបៀបដែលមនុស្សប្រើប្រាស់លុយរបស់គេហើយនោះឌីជីថលសម្រាប់លុយយ័នក៏នឹងអាចរារាំងលុយឌីជីថលផ្សេងទៀតដូចជា Bitcoin ផងដើម្បីអាចក្លាយទៅជាអង្គភាពតែមួយគត់ដែលនឹងគ្រប់គ្រងទៅលើប្រព័ន្ធនៃការប្រមូលផ្តុំទិន្នន័យបែបវិមជ្ឈកាល ឬប្រមូលផ្តុំទិន្នន័យតែម្នាក់ឯង (Decentralized Blockchain System)។ លោកបន្តថា ៖សារៈសំខាន់ដ៏ធំមួយទៀតសម្រាប់ចិនសម្រាប់កម្មវិធីប្រព័ន្ធឌីជីថលលើប្រាក់យ័ននោះគឺនឹងអាចអនុញ្ញាតិឲ្យរដ្ឋាភិបាលមានអំណាចកាន់តែខ្លាំងក្នុងការធ្វើការឃ្លាំមើលទៅលើសេដ្ឋកិច្ចនិងសង្គមទាំងមូល។ នេះហើយដែលជាមូលដ្ឋានគ្រឺះកន្លងមកចិនតែងតែបានព្យាយាមប្រញាប់ប្រញ៉ាល់ក្នុងការរុញច្រានពាណិជ្ជកម្ម និងអាជីវកម្មទាំងឡាយឲ្យក្លាយទៅជាអង្គភាពក្រោមចំណុះរបស់រដ្ឋ៕

ភ្នំពេញ ៖ ក្នុងខណៈពេលដែលវីរុសកូវីដ-19 កំពុងតែរាតត្បាតលើពិភពលោកធ្វើឱ្យវិស័យជាច្រើនកំពុងតែរងគ្រោះ ប៉ុន្តែវិស័យកសិកម្មមិនមានផលប៉ះពាល់ធ្ងន់ធ្ងរនៅឡើយ ហើយថែមទាំងអាចជំរុញវិស័យនេះឱ្យបង្កើនសង្វាក់ផលិតកម្មបន្ថែមទៀត ដែលការអភិវឌ្ឍវិស័យកសិកម្មដែលអាចជួយស្តារសេដ្ឋកិច្ចបានទៀតផង។ បច្ចុប្បន្ន វិស័យកសិកម្មកម្ពុជា ដែលមានផលិតផលកសិ-ឧស្សហកម្មនាំមុខរួមមានអង្ករ-ស្រូវ កៅស៊ូ ដំឡូងមី ម្រេច ស្ករជាដើមដែលបាននឹងកំពុងនាំចេញ តែមិនទាន់អាចប្រកួតប្រជែងជាមួយនឹងបណ្តាប្រទេសជិតខាងបាននៅឡើយ ដោយសារផលិតផលទាំងនោះ ភាគច្រើនជាផលិតផលសម្គាល់ភូមិសាស្ត្រនៃប្រទេសកម្ពុជា និងមិនអាចធ្វើពាណិជ្ជកម្មក្នុងទ្រង់ទ្រាយធំបាននៅឡើយ។ ទីប្រឹក្សាឯករាជ្យនៃក្រុមហ៊ុនផ្លាស-អេជ លោក សម វិទូ បានប្រាប់ភ្នាក់ងារ AMSដែរថា៖ «ផលិតផលកសិកម្មកម្ពុជាដែលនាំចេញរបស់យើងមានដូចជាកៅស៊ូ ដំឡូង ដូង ស្រូវ (កែច្នៃជាអង្ករ) ដែលជាដំណាំកសិ-ឧស្សហកម្ម និងមួួចំនួនតូចជាប្រភេទបន្លែមិនទាន់កែច្នៃ ដែលយើងបាននាំចេញជាផលិតផលវត្ថុធាតុដើមនៅឡើយ»។ លោកថា «បើយើងនិយាយពីការនាំចេញ យើងគួររកផលិតផលអីសម្រាប់ទីផ្សារ ឧទាហរណ៍ គឺផលិតផលណាដែលមានលក្ខណៈពិសេសសម្រាប់ប្រទេសខ្មែរយើងតាមតំបន់ដូចជា អង្ករក្រអូប ក្រយា ក្រចកចាបជាពូជពីដើម ជាពូជពិសេសដែលមានតាមតំបន់ និងអាចនាំចេញបាន តែក៏ចាំបាច់យើងត្រូវធ្វើការផ្សព្វផ្សាយ បើយើងមិនផ្សាយពីភាពល្អរបស់ផលិតផលយើង ក៏មិនអាចធ្វើការប្រកួតប្រជែងបានដែរ។ដើម្បីឱ្យមានការប្រកួតប្រជែងបានល្អ បើយើងចង់ដាំបន្លែធ្វើម៉េច ឱ្យមានការប្រកួតប្រជែងបាន បើមើលពីតម្លៃ ផលិតផលបន្លែយើងដែលលក់ក្នុងស្រុកមានតម្លៃ ថ្លៃជាងបន្លែនាំចូលផងនោះ?។ លោកសម វិទូ បានបញ្ជាក់ទៀតថា «យើងអាចគិតថាផលិតណាខ្លះដែលជាផលិតផលពិសេសដូចម្រេចកំពតរបស់យើង ទោះបីមានតម្លៃធ្លាក់ចុះនៅលើពិភពលោក…

បរទេស៖ទីបំផុតសេដ្ឋកិច្ចរបស់ប្រទេសអូស្ត្រាលីគឺត្រូវបានគេមើលឃើញថាបានហក់ឡើងបន្តិចវិញហើយក្រោយពេលដែលកូវីដ19បានរុញច្រានឲ្យប្រទេសនេះធ្លាក់ចុះទៅក្នុងវិបត្តិសេដ្ឋកិច្ចដ៏អាក្រក់បំផុតមិនធ្លាប់មានរយៈពេល 3 ទសវត្សមកហើយនោះ។ យោងតាមការចេញផ្សាយរបស់ទូរទស្សន៍ CNN បានបង្ហាញថាថាគិតត្រឹមចុងខែកញ្ញាកន្លងទៅសេដ្ឋកិច្ចរបស់អូស្ត្រាលីបានកើនឡើងប្រមាណជា 3.3 ភាគរយធៀបទៅនឹងត្រីមាសមុន។ ការិយាល័យទទួលបន្ទុកកិច្ចការងារស្ថិតិជាតិក៏បានបញ្ជាក់ដែរថាការងើបឡើងវិញនៃសេដ្ឋកិច្ចរបស់ខ្លួនអាចធ្វើឡើងដោយសារតែការធ្វើឲ្យប្រសើរឡើងនៃការចំណាយប្រចាំថ្ងៃរបស់ពលរដ្ឋនិងជាពិសេសការដកបម្រាមការធ្វើដំណើរដ៏តឹងរ៉ឹងកាលពីប៉ុន្មានខែចុងក្រោយនេះចេញពីផ្នែកសំខាន់ជាច្រើននៅក្នុងប្រទេស។ ទេសាភិបាលនៃធនាគារជាតិអូស្ត្រាលីធ្លាប់បាននិយាយកាលពីដើមសប្តាហ៍មកថាអូស្ត្រាលីបានបត់ក្បាលចេញពីវិបត្តិសេដ្ឋកិច្ចហើយកំពុងស្ថិតនៅក្នុងតំណាក់កាលងើបឡើងវិញនៅឡើយ ប៉ុន្តែជឿជាក់ថានឹងនៅតែមានបញ្ហាប្រឈមសំខាន់ជាច្រើនទៀតដើម្បីដោះស្រាយស្របពេលដែលប្រទេសជាច្រើននៅលើលោកក៏កំពុងបន្តការប្រយុទ្ធប្រឆាំងទៅនឹងការរីករាលដាលនៃវិរុសហើយនិងចាប់ផ្តើមពិចារណាឡើងវិញដើម្បីអាចបើកទ្វាប្រទេសឡើងវិញជាធម្មតាផង។ ហិរញ្ញិកនៃរតនាគារជាតិអូស្ត្រាលីលោក Frydenberg ទោះបីជាយ៉ាងណាក្តីក៏បានលើកឡើងពីបញ្ហាដ៏ធំមួយទៀតសម្រាប់ត្រៀមដោះស្រាយនៅក្រោយពេលដែលសេដ្ឋកិច្ចបានងើបបន្តិចមែន។ លោកកត់សំគាល់ថាបញ្ហាតានតឹងរវាងរដ្ឋាភិបាលក្រុង Canberra និងក្រុង Beijing មកដល់ពេលនេះគឺបានឈានចូលទៅដល់កម្រិតធ្ងន់ធ្ងរមួយ។ លោកបន្ថែមទៀតថា ចិនគឺជាដៃគូពាណិជ្ជកម្មដ៏ធំបំផុតមួយរបស់ប្រទេស។ការងាររបស់អូស្ត្រាលីជាច្រើនដែលពឹងផ្អែកទៅលើពាណិជ្ជកម្មទ្វេភាគីនេះ។អូស្ត្រាលីជាប្រទេសដែលតែងតែព្យាយាមក្នុងការចុះកិច្ចព្រមព្រៀងពាណិជ្ជកម្មសេរីជាមួយនឹងបណ្តាប្រទេសទាំងឡាយលើលោកដោយមិនប្រកាន់និន្នាកាអ្វីឡើយសូម្បីតែសហភាពអ៊ឺរ៉ុបដើម្បីធ្វើយ៉ាងណាអាចកាត់បន្ថយហនិភ័យឲ្យបានកម្រិតខ្ពស់បំផុត។ គួររំលឹកដែរថា ចាប់តាំងតែពីនាយករដ្ឋមន្ត្រីអូស្ត្រាលីបានអំពាវនាវឲ្យតុលាការអន្តរជាតិក្នុងការចាប់ផ្តើមស្រាវជ្រាវបញ្ហារីករាលដាលកូវីដ19ចេញពីទីក្រុងវូហានមករដ្ឋាភិបាលចិនបានសំដែងភាពមិនពេញចិត្តឡើយហើយឆ្លើយតបវិញជាការដាក់បន្ថែមពន្ធដ៏ធ្ងន់ធ្ងរនិងរឹតបន្តឹងការនាំចូលពីអូស្ត្រាលីដូចទៅលើទំនិញសាច់ និងស្រាក្រហមផងដែលអ្នកជំនាញបានមើលឃើញថាគឺជាចំណុចដ៏អាចនឹងធ្វើឲ្យឈឺចាប់បំផុតសម្រាប់ទំនាក់ទំនងពាណិជ្ជកម្មទ្វេភាគី ហើយលើសពីនេះចិនមកដល់ពេលបច្ចុប្បន្នក៏នឹងមិនទំនងជានឹងបញ្ចប់ត្រឹមនេះដែរនិងអាចបន្តទៅដល់វិស័យផ្សេងៗទៀតដូចជាការជីកយករ៉ែជាដើមផង៕

បរទេស៖ រដ្ឋបាលរបស់លោក Trump កាលពីសប្ដាហ៍កន្លងទៅបានធ្វើការចោទប្រកាន់ និងប្តឹងក្រុមហ៊ុនយក្ស Facebook ថាបានផ្តល់ឱកាសជាច្រើនជូនទៅដល់ជនអន្តោប្រវេសសម្រាប់ការងាររាប់ពាន់កន្លែងជាជាងពលរដ្ឋអាមេរិក។ បណ្តឹងដែលបានផ្ញើទៅដល់តុលាការអាមេរិកបានអះអាងថា ចាប់តាំងតែពីឆ្នាំ 2018 រហូតដល់ខែកញ្ញា ឆ្នាំ 2019 ក្រុមហ៊ុន Facebook មានទំនោររើសអើងបុគ្គលិកដែលជនជាតិអាមេរិក ហើយផ្តល់ការងារអចិន្ត្រៃយ៍ទៅឲ្យជនអន្តោប្រវេសក្នុងប្រទេសដែលកាន់វិសាប្រភេទ H-1B វិញ។ ជាការឆ្លើយតបនៅក្នុងសេចក្តីថ្លែងការណ៍មួយដែលត្រូវបានធ្វើឡើងដោយអ្នកនាំពាក្យរបស់ Facebook លោក Andy Stone បាននិយាយថា៖ Facebook បានសហការជាមួយនឹងតុលាការអាមេរិករួចហើយ និងកំពុងត្រួតពិនិត្យទៅលើការចោទប្រកាន់នេះ ប៉ុន្តែមកដល់ពេលនេះយើងនឹងមិនទាន់ធ្វើការបកស្រាយអ្វីបន្ថែមនៅឡើយដែរ។ បណ្តឹងដែលមានទាំងការស៊ើបអង្កេតដោយតុលាការរយៈពេល២ឆ្នាំមកហើយផងនោះ រដ្ឋបាលលោក Trump គឺកំពុងតែស្វែងរកការពិន័យផ្នែករដ្ឋប្បវេណីប្រឆាំងនឹង Facebook និងព្រមទាំងការសងប្រាក់វិញចំពោះអ្វីដែល តុលាការបានហៅថាជាការជំពាក់លុយកម្មករអាមេរិកដែលត្រូវបានក្រុមហ៊ុនបដិសេធមិនឱ្យធ្វើការជាមួយខ្លួននាពេលកន្លងមកផង៕

ក្នុងរយៈពេល11ខែដើមឆ្នាំ2020នេះ លទ្ធផលនៃការនាំចេញផលិតផលកសិកម្មទៅកាន់ទីផ្សារអន្តរជាតិ ក្រៅពីអង្ករមានចំនួន 5,057,181.54តោន ក្នុងនោះមានផលិតផលកសិកម្មមួយចំនួនមានកំណើនល្អប្រសើរ។ នៅក្នុងរបាយការណ៍ដែលផ្សព្វផ្សាយដោយឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្រៅពីអង្ករ បរិមាណដំឡូងមីដែលកម្ពុជានាំចេញទៅក្រៅប្រទេសនៅក្នុងរយៈពេល11 ខែ ឆ្នាំ2020 គឺមានចំនួន រហូតដល់ទៅ 1,312,913.30តោន គឺមានកំណើន8.26% ធៀបនឹងរយៈពេលដដែលកាលពីឆ្នាំ2019 កន្លងទៅ ។ ឯកឧត្តម ស្រី វុឌ្ឍី អគ្គលេខាធិការក្រសួងកសិកម្មរុក្ខាប្រមាញ់ និងនេសាទ បានប្រាប់ AMSថា៖ « មូលហេតុដែលនាំឱ្យមានការកើនឡើងនូវទិន្នន័យផលិតផលកសិកម្ម គឺមកពីតម្រូវការពីខាងក្រៅប្រទេស នៅតែមានត្បិតតែក្នុងស្ថានភាពកូវីដមែន តែមនុស្សយើងនៅតែត្រូវការហូប។ ដូច្នេះអង្ករ និងផលិតផលកសិកម្មមួយចំនួន ក៏មានតម្រូវការ នៅអឺរ៉ុបនិងប្រទេសចិនជាដើម នៅតែមានតម្រូវការជាធម្មតា និងមានតម្រូវការកាន់តែច្រើនទៀតផង។គាត់មានតម្រូវការដោយគាត់បានស្គាល់ថាអង្ករយើងឆ្ងាញ់ ធ្វើឱ្យផលិតផលរបស់យើងដំណើរការតម្រូវការទីផ្សារ និងតម្រូវការនៃការផ្គត់ផ្គង់នៅដដែល»។ ឯកឧត្តមបានបន្តថា ថ្វីត្បិតតែជួបប្រទះនឹងគ្រោះទឹកជំនន់ តែយើងធ្វើបាននិងមានកំណើនច្រើនផងដែរ បើមិនមានគ្រោះទឹកជំនន់ វាកើនខ្លាំងដែរ អាចខ្ពស់ជាងតួលេខ ដែលបញ្ជាក់ក្នុងទិន្នន័យខាងលើផង។ កំណើននេះ ខ្ញុំយល់ថាអាចនឹងបន្តទៀតបាន ព្រោះនិយាយពីកំណើនទិន្នផលច្រើន គឺវាមានការពាក់ព័ន្ធ ពីកំណើនទិន្នផលដែលកើនពីមួយឆ្នាំទៅមួយឆ្នាំ។…

ភ្នំពេញ៖ នៅព្រឹកថ្ងៃទី7 ខែធ្នូ ឆ្នាំ2020នេះ ក្រសួងសុខាភិបាលបានចេញសេចក្តីប្រកាសព័ត៌មាន បញ្ជាក់ពីការរកឃើញអ្នកឆ្លងជំងឺកូវីដ_19 ថ្មីចំនួន2នាក់ទៀត ដែលពាក់ព័ន្ធព្រឹត្តិការណ៍ «សហគមន៍ 28វិច្ឆិកា»។ អ្នកទាំង2នាក់ដែលរកឃើញឆ្លងកូវីដ_19 នេះ រួមមានបុរសឈ្មោះ អ៉ី តារា អាយុ21ឆ្នាំ មានអាស័យដ្ឋានជិតវត្តសន្សំកុសល សង្កាត់បឹងទំពន់ ខណ្ឌមានជ័យ ធ្លាប់ស្នាក់នៅជាមួយអ្នកជំងឺ ឈ្មោះ ញិល សុខកូឡា ដែលធ្វើការនៅហាង Pedro ផ្លូវព្រះមុនីវង្ស និងស្ត្រីឈ្មោះ ជី ពេជ្រឆារ៉ា អាយុ29ឆ្នាំ មានស្នាក់នៅសង្កាត់ចាក់អង្រែលើ ខណ្ឌមានជ័យ ជាមន្ត្រីរាជការនៅក្រសួងមហាផ្ទៃ បានចូលហាង Zando បឹងកេងកង នៅថ្ងៃទី27 ខែវិច្ឆិកា ឆ្នាំ2020 នៅម៉ោង8:30នាទីយប់ ដោយមិនមានពាក់ម៉ាសការពារ។ បច្ចុប្បន្នអ្នកទាំង2នាក់នេះ ត្រូវបានដាក់ឲ្យសម្រាកព្យាបាលនៅមណ្ឌលសុខភាព ចាក់អង្រែ រាជធានីភ្នំពេញ។ ជាមួយគ្នានេះ ក្រសួងសូមអញ្ជើញអ្នកប៉ះពាល់ព្រឹត្តិការណ៍សហគមន៍ 28វិច្ឆិកា ទាំងអស់ អញ្ជើញទៅធ្វើតេស្តលើកទី2 នៅថ្ងៃទី7 ខែធ្នូ ឆ្នាំ2020 នេះ នៅបរិវេណក្រសួងមហាផ្ទៃ…