ញូដេលី៖ អនុប្រធានាធិបតីអាមេរិកលោកស្រី កាម៉ាឡា ហារីស បានជួបពិភាក្សា ជាមួយនាយករដ្ឋមន្រ្តីឥណ្ឌាលោក ណារិនដ្រា ម៉ូឌី និងបានគូសបញ្ជាក់អំពីសារៈសំខាន់នៃការរក្សាសេរីភាព និងការបើកចំហនៅតំបន់ឥណ្ឌូ-ប៉ាស៊ីហ្វិក ស្របពេលដែលទីក្រុងវ៉ាស៊ីនតោនកំពុងព្យាយាមពង្រឹងនយោបាយឆ្ពោះមកកាន់តំបន់អាស៊ី និងបង្កើនទំនាក់ទំនងជាមួយសម្ពន្ធមិត្ត ដើម្បីទប់ទល់ឥទ្ធិពលរបស់ចិនក្នុងតំបន់។

យូអិន៖ តំណាងអចិន្ត្រៃយ៍ចិនប្រចាំនៅអង្គការសហប្រជាជាតិ លោក ចាង ជន បានថ្លែងថា ការបម្រែបម្រួលអាកាសធាតុ គឺជាបញ្ហាប្រឈមរួមដែលមនុស្សជាតិកំពុងជួបប្រទះ ហើយត្រូវការការឆ្លើយតបជាសកល ហើយថា ទំនាក់ទំនងរវាងអាកាសធាតុ និងសន្តិសុខ គឺពិតជាស្មុគស្មាញណាស់។

ប៉េកាំង៖ រដ្ឋមន្ត្រីការបរទេសចិនលោក វ៉ាង យី បានប្រាប់អង្គការសហប្រជាជាតិថា ការធានាឱ្យមានការចែកចាយវ៉ាក់សាំងប្រកបដោយសមធម៌ ដោយគោរពតាមកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ និងការដោះស្រាយភាពក្រីក្រ គឺជាអាទិភាពកំពូលរបស់ប្រទេសចិន។

វ៉ាស៊ីនតោន៖ រដ្ឋមន្ត្រីការបរទេសអាមេរិកលោក អាន់តូនី ប្លីងគែន បានប្រាប់សមាជិកក្រុមប្រឹក្សាសន្តិសុខអង្គការសហប្រជាជាតិថា ការប្រែប្រួលអាកាសធាតុបានក្លាយជាការគំរាមកំហែងដល់សន្តិភាព និងសន្តិសុខ ហើយថា វិបត្តិអាកាសធាតុដ៏អាក្រក់ៗកំពុងធ្វើអោយការឆ្លើយតបរបស់អង្គការសហប្រជាជាតិ នៅក្នុងប្រទេសខ្លះកាន់តែមានការប្រកួតប្រជែង។

ប៉ារីស៖ រដ្ឋមន្ត្រីក្រសួងហិរញ្ញវត្ថុបារាំងលោក Bruno Le Maire បញ្ជាក់ថា វិបត្តិការទូតរវាងប្រទេសរបស់លោក និងអូស្ត្រាលី សហរដ្ឋអាមេរិក និងចក្រភពអង់គ្លេសបង្ហាញថា សហភាពអឺរ៉ុបមិនអាចពឹងផ្អែកលើអាមេរិកទៀតទេ ដើម្បីធានាការការពាររបស់ខ្លួន។