-
សមាជិកសភាអាមេរិកមកពីគណបក្សប្រជាធិបតេយ្យលោកស្រី ណាន់ស៊ី ផេឡូស៊ី ជាប់ឆ្នោតម្តងទៀតជាប្រធានសភាអាមេរិកក្នុងអាណត្តិថ្មី
អាមេរិក៖ សមាជិកសភាអាមេរិកមកពីគណបក្សប្រធានាធិបតេយ្យ លោកស្រី ណាន់ស៊ី ផេឡូស៊ី ត្រូវបានបោះឆ្នោតជ្រើសតាំងសាជាថ្មីម្តងទៀត សម្រាប់មុខតំណែងជាប្រធានសភាអាមេរិកក្នុងអាណត្តិថ្មី នេះបើតាមសារព័ត៌មាន CGTN នៅថ្ងៃទី០៤ ខែមករា ឆ្នាំ២០២០ ។ លោកស្រី ណាន់ស៊ី ផេឡូស៊ី បានទទួលសំឡេងគាំទ្រ២១៦សំឡេង ពីសមាជិកសភាក្នុងបក្សប្រជាធិបតេយ្យ ស្របពេលដែលសមាជិកបក្សកាន់អំណាចនេះ ចំនួន០២រូបទៀតបានបោះឆ្នោតគាំទ្របេក្ខជនមកពីសាធារណរដ្ឋ និង ០៣រូបទៀតបានធ្វើអនុប្បវាទ ។ សូមជម្រាបថា លោកស្រី ណាន់ស៊ី ផេឡូស៊ី ដែលមានដើមកំណើតមកពីរដ្ឋកាលីហ្វ័រញ៉ា និងមានវ័យ៨០ឆ្នាំរូបនេះ ធ្លាប់បានក្លាយជាស្ត្រីដំបូងក្នុងប្រវត្តិសាស្ត្រអាមេរិក ដែលបានឡើងមកកាន់តំណែងជាប្រធានសភាតំណាងរាស្ត្រ (congress) កាលពីឆ្នាំ២០០៧ និងបានកាន់តំណែងនេះជាថ្មីម្តងទៀតកាលពីឆ្នាំ២០១៩ នៅពេលដែលគណបក្សលោកស្រីគ្រប់គ្រងសភា ៕
-
អ្នកចាក់វ៉ាក់សាំង Covid-19 រួចហើយ គួរតែជៀសវាងការពិសារស្រា នេះបើតាមការព្រមានរបស់អ្នកជំនាញ
បរទេស៖ អ្នកដែលចាក់វ៉ាក់សាំង Covid-19 រួចហើយ គួរតែចៀសវាងការផឹកស្រាដោយសារតែវាអាចកាត់បន្ថយការឆ្លើយតបប្រព័ន្ធភាពស៊ាំរបស់រាងកាយទៅនឹងវ៉ាក់សាំង នេះបើតាមការអះអាងរបស់អ្នកជំនាញ ចុះផ្សាយដោយសារព័ត៌មាន Daily Mail នៅថ្ងៃទី០៤ ខែមករា ឆ្នាំ២០២១ ។ ប្រភពខាងលើនេះបានអោយដឹងថា គ្រឿងស្រវឹងនឹងផ្លាស់ប្តូរធាតុផ្សំ នៃមីក្រូសរីរាង្គរាប់ពាន់លានដែលរស់នៅក្នុងពោះវៀន ដែលដើរតួយ៉ាងសំខាន់ក្នុងការការ ពារការវាយប្រហារពីបាក់តេរី និងវីរុស ។ ប្រការនេះនាំអោយមានការបំផ្លាញកោសិកាភាពស៊ាំនៅក្នុងឈាម ដែលត្រូវបានគេស្គាល់ថា ជាកោសិកាឈាមស រួមទាំងប្រភេទ នៃកោសិការ Lymphocyte ដែលបញ្ជូនអង្គបដិប្រាណ ដើម្បីវាយប្រហារវីរុសផងដែរ ។ ស្ថិតក្រោមការសិក្សាស្រាវជ្រាវខាងលើនេះ ក្រុមអ្នកជំនាញបានធ្វើការជំរុញអោយប្រជាជនជៀសវាងការផឹកស្រា ក្នុងអំឡុងពេលនៃការចាក់វ៉ាក់សាំងការពារជំងឺដ៏កាចសាហារមួយនេះ ៕
-
អ្នកវិទ្យាសាស្រ្តអង់គ្លេសអះអាងថា កុមារអាយុចន្លោះពី១២ទៅ១៦ឆ្នាំទំនងជាធ្វើអោយ Covid-19 ឆ្លងរាលដាលខ្លាំងជាងក្រុមអាយុដទៃទៀតរហូតដល់៧ដង
អង់គ្លេស៖ កុមារដែលមានអាយុចន្លោះពី១២ទៅ១៦ឆ្នាំប្រហែលជាធ្វើអោយជំងឺ Covid-19 ឆ្លងរីករាលដាលខ្លាំងជាងក្រុមអាយុដទៃទៀត នេះបើតាមការអះអាងរបស់អ្នកវិទ្យាសាស្រ្តរបស់រដ្ឋាភិបាលអង់គ្លេស ចុះផ្សាយដោយសារព័ត៌មាន Daily Star នៅថ្ងៃទី០៤ ខែមករា ឆ្នាំ២០២១ ។ ជាមួយគ្នានេះ លោកសាស្រ្តាចារ្យ Sir Mark Walport ដែលមកពីក្រុមប្រឹក្សាវិទ្យាសាស្ត្រដើម្បីភាពអាសន្ន (SAGE) បានប្រាប់កម្មវិធី Andrew Marr Show របស់ទូរទស្សន៍ BBC ថា យើងដឹងថា មនុស្សម្នាក់អាយុចន្លោះពី១២ទៅ១៦ឆ្នាំងាយនឹងចម្លងរោគចូលក្នុងគ្រួសារខ្លាំងជាងមនុស្សក្រុមអាយុដទៃទៀត រហូតដល់ទៅ៧ដង ។ ហើយយើងដឹងថា មានការធ្លាក់ចុះតិចតួចនៃករណីឆ្លងក្នុងចំណោមកុមារនៅសាលារៀន បន្ទាប់ពីឆមាសទីមួយ ប៉ុន្តែវាបានកើនឡើងម្តងទៀតនៅពេលពួកគេត្រឡប់មកសាលារៀនវិញ ។ ការអត្ថាធិប្បាយខាងលើនេះរបស់លោកសាស្រ្តាចារ្យ Sir Mark Walport បានកើតមានឡើងចំពេលដែលនាយករដ្ឋមន្រ្តីអង់គ្លេស លោក បូរីស ចនសុន កំពុងជំរុញអោយឪពុកម្តាយបញ្ជូនកូនៗរបស់ពួកគេត្រឡប់ទៅសាលារៀនវិញ ប៉ុន្តែក្រុមប្រឹក្សាមូលដ្ឋានមួយចំនួន កំពុងទទូចអោយរដ្ឋាភិបាលពន្យារពេលបើកទ្វារសិន ៕
-
ថៃគ្រោងហាមឃាត់មិនអោយភ្ញៀវទេសចរអង់គ្លេសចូលប្រទេសខ្លួន ដោយសារព្រួយបារម្ភពីវីរុស Covid-19 ទម្រង់ថ្មី
ថៃ៖ ក្រសួងសុខាភិបាលថៃនឹងអំពាវនាវអោយមជ្ឈមណ្ឌលរដ្ឋបាលស្ថានការណ៍ជំងឺCovid-19ផ្អាកការចូលរបស់ភ្ញៀវទេសចរអង់គ្លេសមកក្នុងប្រទេសខ្លួន ក្រោយ វីរុស Covid-19 ប្រភេទថ្មី B117 ត្រូវបានរកឃើញលើជនជាតិអង់គ្លេស០៤នាក់ដែលចូលប្រទេសថៃកាលពីថ្ងៃទី២១ ខែធ្នូ នេះបើតាមសារព័ត៌មានបាងកកប៉ុស្តិ៍នៅថ្ងៃទី០៤ ខែមករា ឆ្នាំ២០២១ ។ ប្រធានមជ្ឈមណ្ឌលឧត្តមភាពផ្នែករោគវិទ្យានៅមហាវិទ្យាល័យវេជ្ជសាស្ត្រ នៃសាកលវិទ្យាល័យ ឆូឡាឡុងកន លោកវេជ្ជបណ្ឌិត Yong Poovorawan បញ្ជាក់ថា អ្នកជំងឺអង់គ្លេសទាំងបួននាក់ គឺជាគ្រួសារតែមួយមកពីតំបន់ ខេន ។ ពួកគេត្រូវបានគេដាក់នៅក្នុងបន្ទប់សម្ពាធអវិជ្ជមានរបស់មន្ទីរពេទ្យ ដើម្បីការពារការឆ្លង ហើយនឹងមិនត្រូវបានអនុញ្ញាតអោយចេញទេ រហូតដល់មន្រ្តីពេទ្យធ្វើតេស្ត និងបញ្ជាក់ថា ពួកគេលែងមានហានិភ័យនៃជំងឺ Covid-19 ទៀតហើយ ។ ស្របពេលជាមួយគ្នានេះដែរ លោកវេជ្ជបណ្ឌិត Yong សង្កត់ធ្ងន់ថា មជ្ឈមណ្ឌលបាននិងកំពុងប្រមូលទិន្នន័យហ្សែនពីអ្នកជំងឺ Covid-19 សម្រាប់ការស្រាវជ្រាវ ហើយប្រជាជនថៃមិនចាំបាច់មានការព្រួយបារម្ភនោះទេ ប៉ុន្តែព្រមានថា អាជ្ញាធរត្រូវតែយកចិត្តទុកដាក់បន្ថែមទៀតចំពោះភ្ញៀវទេសចរអង់គ្លេស ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៨៥លាននាក់ ក្នុងនោះស្លាប់ជាង១លាន៨៥ម៉ឺននាក់ និងជាសះស្បើយជាង៦០លាន៤៤ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៨៥លាន៤៩ម៉ឺន៣ពាន់៣៨៤ករណី ក្នុងនោះមានអ្នកជម្ងឺសរុបចំនួន១លាន៨៥ម៉ឺន២៤៣នាក់ស្លាប់ និង ជាសះស្បើយឡើងវិញសរុបចំនួន៦០លាន៤៤ម៉ឺន៤ពាន់៤៥៨នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៤ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២១លាន១១ម៉ឺន៣ពាន់៥២៨នាក់ ស្លាប់ចំនួន៣៦ម៉ឺន៧៨នាក់ និងជាសះស្បើយចំនួន១២លាន៤៣ម៉ឺន៦ពាន់៩៥៨នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៣៤ម៉ឺន១ពាន់២៩១នាក់ ស្លាប់ចំនួន១៤ម៉ឺន៩ពាន់៦៨៦នាក់ និងជាសះស្បើយ៩លាន៩៤ម៉ឺន៦ពាន់១៣១នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន៧៣ម៉ឺន៣ពាន់៧៤៦នាក់ ស្លាប់១៩ម៉ឺន៦ពាន់១៨នាក់ និងជាសះស្បើយ៦លាន៨១ម៉ឺន៣ពាន់៨នាក់ ៕
-
កូវីដ១៩៖ ឥណ្ឌូនេស៊ីបានវ៉ាក់សាំងចិនលើកទី២ ត្រៀមទទួលវ៉ាក់សាំងអង់គ្លេសនិងអាមេរិកទៀត
ឥណ្ឌូនេស៊ីបានទទួលវ៉ាក់សាំងប្រឆាំងវីរុស COVID-19 ដែលអភិវឌ្ឍឡើងដោយក្រុមហ៊ុនផលិតឱសថចិន Sinovac ជាលើកទី២ហើយ កាលពីម្សិលមិញ ខណៈប្រទេសនេះកំពុងរៀបចំយុទ្ធនាការចាក់វ៉ាក់សាំងជាលក្ខណៈទ្រង់ទ្រាយធំជូនប្រជាជនរបស់ខ្លួន។ ឥណ្ឌូនេស៊ីបានទទួលវ៉ាក់សាំងចិន ចំនួន ១.៨លានដូសបន្ថែម បន្ទាប់ពីបានទទួលវ៉ាក់សាំងនេះចំនួន ១.២លានដូស កាលពីថ្ងៃទី០៦ ខែធ្នូកន្លងទៅ។ ឥណ្ឌូនេស៊ីក៏រំពឹងថានឹងទទួលបានវ៉ាក់សាំង COVID-19 ពីក្រុមហ៊ុនផលិតឱសថអង់គ្លេស AstraZeneca និងក្រុមហ៊ុនផលិតឱសថអាមេរិក Pfizer នៅមុនដំណាច់ឆ្នាំ២០២០នេះ ឬនៅសប្តាហ៍ដំបូងនៃខែមករា ឆ្នាំ២០២១ខាងមុខនេះផងដែរ ខណៈដែលខ្លួនបានចុះកិច្ចព្រមព្រៀងទិញវ៉ាក់សាំងពីក្រុមហ៊ុនទាំងពីរនេះ ចំនួន ១០០លានដូស។
-
កូវីដ១៩៖ ថៃឆ្លងកើនដល់៥១ខេត្តហើយ ពលរដ្ឋបង្ខំចិត្តឆ្លងឆ្នាំថ្មីតាមផ្ទះ យប់មិញ
សារព័ត៌មានបាងកកប៉ុស្តិ៍បានចុះផ្សាយ នៅថ្ងៃទី១ មករា ២០២១នេះថា មានរាជធានី-ខេត្តចំនួន៦ត្រូវបានចាត់ទុកថាជាតំបន់គ្រប់គ្រងខ្លាំងជាងគេ ទាក់ទងករណីជំងឺកូវីដ១៩ ដែលផ្តើមចេញពីករណីខេត្តសាមុត សាខុន ខណៈដែលករណីឆ្លងនេះបានរាលដាលកើនដល់៥១ខេត្តហើយ។ រាជធានីខេត្តទាំងនោះរួមមាន បាងកក ឈុនប៊ូរី ណាខនផាទុម នុតថាប៊ូរី រ៉ាយ៉ង និងសាមុត សាខន ដោយក្នុងតំបន់នីមួយៗ មានឆ្លងជាង៥០ករណីឡើងទៅ តម្រូវឲ្យមានវិធានការពិសេស ទប់ស្កាត់ខ្លាំងជាងគេ។ ព្រោះតែការឆ្លងរាលដាលកាន់តែធ្ងន់ធ្ងរនោះ ទើបបង្ខំចិត្តពលរដ្ឋពិបាកជួបជុំឆ្លងឆ្នាំ ហើយមើលការផ្សព្វផ្សាយព្រឹត្តិការណ៍ឆ្លងឆ្នាំនៅតាមផ្ទះរៀងៗខ្លួន។ ម្សិលមិញនេះ ថៃមានឆ្លងថ្មី១៩៤នាក់ទៀត ក្នុងនោះ ១៨១ឆ្លងក្នុងសហគមន៍ និង១៣នាក់គឺជាករណីនាំចូល នាំឲ្យថៃមានកូវីដ១៩សរុប ៦៨៨៤នាក់ហើយ។ កាលពីថ្ងៃពុធ ក៏មាន២៥០ករណីថ្មីដែរ៕
-
កូវីដ១៩៖ WHOសម្រេចឲ្យប្រើបន្ទាន់ វ៉ាក់សាំង Pfizer-BioNTech
អង្គការសុខាភិបាលពិភពលោក (WHO) កាលពីថ្ងៃម្សិលមិញ បានសម្រេចឲ្យប្រើប្រាស់បន្ទាន់នូវវ៉ាក់សាំងប្រឆាំងជំងឺកូវីដ១៩ចំនួន២ គឺ Pfizer និង BioNTech ក្នុងគោលបំណងជំរុញល្បឿនបញ្ជូនវ៉ាក់សាំងទៅកាន់ពិភពលោក នេះបើតាមការចេញផ្សាយរបស់ CNA ។ ទីភ្នាក់ងារសុខភាពរបស់អង្គការសហប្រជាជាតិមួយនេះបានឲ្យដឹងថា ខ្លួននឹងធ្វើការជាមួយបណ្តាដៃគូតាមតំបន់ក្នុងការប្រាប់ដល់អាជ្ញាធរសុខាភិបាលប្រទេសនីមួយៗ អំពីការចាក់វ៉ាក់សាំង២ដូសនេះ និង អំពីអត្ថប្រយោជន៍នៃការសហការ។ ប្រធានកម្មវិធីថ្នាំវេជ្ជសាស្ត្ររបស់អង្គការសុខភាពពិភពលោក Mariangela Simao បាននិយាយថា «នេះគឺជាជំហានវិជ្ជមានបំផុត ក្នុងការធានាដល់ដល់ច្រកចូលវ៉ាក់សាំងកូវីដ១៩ សម្រាប់ពិភពលោក»។វ៉ាក់សាំងអាមេរិកនិងអាល្លឺម៉ង់នេះ Pfizer និង BioNTech ត្រូវបានរកឃើញថា មានប្រសិទ្ធភាព៩៥ភាគរយ ក្រោយពេលចាក់ទៅលើមនុស្ស២ដូស ក្នុងពេល២១ថ្ងៃ៕
-
មនុស្សស្លាប់ និងរបួសជាង៧០នាក់ ក្រោយយន្តហោះដឹករដ្ឋាភិបាលយ៉េមែនរងការវាយប្រហារ
យ៉េមែន៖ យ៉ាងហោចណាស់មានមនុស្សចំនួន២២នាក់បាត់បង់ជីវិត និងច្រើនជាង៥០នាក់ទៀតរងរបួស នៅក្នុងករណីវាយប្រហារមួយនៅឯព្រលានយន្តហោះទីក្រុង អាឌេន ភាគអាគ្នេយ៍ប្រទេសយ៉េមែន នេះបើតាមមន្រ្តីរដ្ឋាភិបាលយ៉េមែន ចុះផ្សាយដោយសារព័ត៌មានរ៉យទ័រនៅថ្ងៃទី៣១ ខែធ្នូ ឆ្នាំ២០២០ ។ យ៉ាងហោចណាស់មានការផ្ទុះមួយភ្លាមៗ បន្ទាប់ពីយន្តហោះមួយគ្រឿងដែលដឹករដ្ឋាភិបាលទើបបង្កើតថ្មីរបស់ប្រទេសយ៉េមែន បានមកដល់ពីប្រទេសអារ៉ាប៊ីសាអ៊ូឌីត ខណៈដែលបុគ្គលិកជំនួយ និងមន្រ្តីស្ថិតក្នុងចំណោមអ្នកស្លាប់ និងរបួសទាំងនោះ ។ វីដេអូនៃឧប្បត្តិហេតុនៅថ្ងៃពុធនេះបានបង្ហាញថា មានការផ្ទុះដ៏ធំមួយនៅពេលអ្នកដំណើរចាប់ផ្តើមចុះពីយន្តហោះ ដែលដឹកគណៈរដ្ឋមន្រ្តីថ្មីទៅកាន់ទីក្រុង អាឌេន ។ ហ្វូងមនុស្សដែលប្រមូលផ្តុំគ្នានៅព្រលាន ដើម្បីស្វាគមន៍ក្រុមរដ្ឋមន្រ្តីបានរត់គេចខ្លួន នៅពេលផ្សែងយ៉ាងក្រាស់ហុយចេញពីអាកាសយានដ្ឋាន ។ មូលហេតុនៃការផ្ទុះនេះ មិនទាន់ត្រូវបានគេដឹងច្បាស់ទេ ប៉ុន្តែប្រភពសន្តិសុខបានប្រាប់ទីភ្នាក់ងារសារព័ត៌មានរ៉យទ័រថា គ្រាប់កាំភ្លើងត្បាល់ចំនួន ០៣ គ្រាប់បានធ្លាក់នៅឯព្រលានយន្តហោះ ។ ពាក់ព័ន្ធនឹងហេតុការណ៍នេះដែរ រដ្ឋមន្រ្តីក្រសួងព័ត៌មានយ៉េមែនបានចោទប្រកាន់ក្រុមឧទ្ទាម ហ៊ូតធី ថា ជាអ្នកធ្វើសកម្មភាពភេរវកម្មដ៏កំសាកនេះ ៕
-
លោកស្រី អាន់ជែឡា មើគែល អះអាងថា អាល្លឺម៉ង់នឹងប្រឈមមុខជាមួយការលំបាកនៃវិបត្តិ Covid-19 រហូតដល់ឆ្នាំ២០២១
អាល្លឺម៉ង់៖ អធិការបតីអាល្លឺម៉ង់លោកស្រី អាន់ជែឡា មើគែល នៅថ្ងៃព្រហស្បតិ៍នេះថ្លែងថា វិបត្តិ COVID-19 ជាប្រវត្តិសាស្ត្ររបស់អាល្លឺម៉ង់ នឹងអូសបន្លាយរហូតដល់ឆ្នាំ២០២១ បើទោះជាការចាក់វ៉ាក់សាំងកំពុងផ្ដល់ក្ដីសង្ឃឹមខ្លះក៏ដោយនោះ នេះសារព័ត៌មានរ៉យទ័រនៅថ្ងៃទី៣១ ខែធ្នូ ឆ្នាំ២០២០ ។ អាល្លឺម៉ង់ក៏មិនខុសពីបណ្តាប្រទេសផ្សេងៗទៀតដែរ ដោយប្រទេសអឺរ៉ុបមួយនេះកំពុងត្រៀមខ្លួនសម្រាប់ការផ្ទុះករណីឆ្លង COVID-19 យ៉ាងគំហុក នៅក្រោយទិវាឆ្លងឆ្នាំសកល ជាពេលដែលមនុស្សម្នានឹងជួបជុំគ្នា ស្របពេលដែលអាកាសធាតុចុះត្រជាក់ខ្លាំង ។ ជុំវិញបញ្ហានេះដែរ នៅក្នុងសុន្ទរកថាអបអរសាទរឆ្នាំថ្មីទៅកាន់ប្រជាជាតិអាល្លឺម៉ង់ នៅថ្ងៃពុធនេះ អធិការបតីអាល្លឺម៉ង់លោកស្រី អាន់ជែឡា មើគែល បញ្ជាក់ថា ថ្ងៃនេះ និងសប្ដាហ៍នេះ គឺជាពេលវេលាដ៏លំបាកសម្រាប់ប្រទេសរបស់យើង… រដូវរងារនឹងក្លាយជាពេលកាន់តែពិបាក ហើយវិបត្តិ COVID-19 អាចនឹងអូសបន្លាយរហូតដល់ឆ្នាំ២០២១ បើទោះបីជាចាក់វ៉ាក់សាំងកំពុងផ្ដល់ក្ដីសង្ឃឹមខ្លះក៏ដោយ ៕