-
វៀតណាមផ្អាកជើងហោះហើរពីប្រទេស និងដែនដីដូចជាអង់គ្លេស និងអាហ្វ្រិកខាងត្បូងដែលផ្ទុះវីរុស Covid-19 ទម្រង់ថ្មី
វៀតណាម៖ នាយករដ្ឋមន្ត្រីវៀតណាមលោក ង្វៀន សួន ភុក បានហាមឃាត់ជើងហោះហើរពីបណ្តាប្រទេស និង ដែនដី ដូចជាអង់គ្លេស និងអាហ្វ្រិកខាងត្បូងដែលកំពុងកត់ត្រាករណីវីរុស Covid-19 ទម្រង់ថ្មី នេះបើតាមសារព័ត៌មាន VNExpress នៅយប់ថ្ងៃទី០៥ ខែមករា ឆ្នាំ២០២១ ។ នាយករដ្ឋមន្ត្រីវៀតណាម នៅថ្ងៃអង្គារនេះថ្លែងថា ក្រសួងការបរទេស ក្រសួងសុខាភិបាល និងក្រសួងដឹកជញ្ជូន ត្រូវសម្របសម្រួលជាមួយគ្នា និងរៀបចំបញ្ជីឈ្មោះប្រទេស និងដែនដី ដែលបទប្បញ្ញត្តិថ្មីនេះនឹងត្រូវអនុវត្តចំពោះ ។ សម្រាប់ពេលនេះ បញ្ជីខាងលើនេះ រួមបញ្ចូលចក្រភពអង់គ្លេស និងអាហ្វ្រិកខាងត្បូង ជាទីដែលវីរុស Covid-19 ទម្រង់ថ្មីផ្សេងគ្នាចំនួនពីរត្រូវបានរកឃើញ ។ រហូតមកទល់ពេលនេះ វីរុស Covid-19 ទម្រង់ថ្មីមានប្រភពនៅចក្រភពអង់គ្លេស ត្រូវបានរកឃើញនៅក្នុងប្រទេសចំនួន ៣៨ ៕
-
ថៃបន្តដាក់ប្រទេសក្នុងគ្រាអាសន្នរហូតដល់ចុងខែកុម្ភៈខាងមុខ ដើម្បីទប់ស្កាត់ Covid-19 រលកថ្មី
ថៃ៖ ឯកអគ្គរាជទូតកម្ពុជាប្រចាំប្រទេសថៃ បានជូនដំណឹងដល់ប្រជាពលរដ្ឋខ្មែរ ដែលកំពុងស្នាក់នៅ សិក្សា និងធ្វើការនៅក្នុងប្រទេសថៃអោយដឹងថា រាជរដ្ឋាភិបាលថៃបានប្រកាសបន្តដាក់ប្រទេសក្នុងគ្រាអាសន្នរយ:ពេលជាង១ខែ ចាប់ពីថ្ងៃទី១៦ ខែមករា ដល់ទី២៨ ខែកុម្ភៈ ឆ្នាំ២០២១ ដើម្បីបន្តទប់ស្កាត់ និងគ្រប់គ្រងការរីករាលដាលការឆ្លងនៃជំងឺកូវីដ១៩រលកថ្មីនៅក្នុងប្រទេសថៃ ។ ស្ថានទូតកម្ពុជាបានសើ្នឱ្យប្រជាពលរដ្ឋខ្មែរនៅប្រទេសថៃទាំងអស់ បន្តចូលរួម សហការយ៉ាងសកម្មថែមទៀត ដើម្បីអនុវត្តនូវវិធានការនានារបស់រាជរដ្ឋាភិបាលថៃ ឱ្យបានខ្ជាប់ខ្លួន និងមានប្រសិទ្ធភាពខ្ពស់ ព្រមទាំងរក្សាសុខភាពអនាម័យ ដើម្បីចូលរួមបង្ការ និងទប់ស្កាត់ការរីករាលដាលនៃជំងឺកូវីដ-១៩ បន្តទៀត ។ សូមជម្រាបថា នៅទូទាំងប្រទេសថៃបច្ចុប្បន្នមានអ្នកឆ្លង COVID-19 ចំនួន៨ពាន់៩៦៦នាក់ ក្នុងនោះស្លាប់៦៥នាក់ និងជាសះស្បើយឡើងវិញ៤ពាន់៣៥២នាក់ ៕
-
ផ្ទុះកូវីដ១៩ជាថ្មី នាយករដ្ឋមន្ត្រីថៃប្រកាសបញ្ចេញថវិកាដ៏ច្រើនជួយរ៉ាប់រងជីវភាពពលរដ្ឋ៤០លាននាក់
នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីម្សិលមិញ បានប្រកាសសន្យាថានឹងជួយដោះស្រាយនិងជួយទ្រទ្រង់ជីវភាពដល់ប្រជាពលរដ្ឋ៤០លាននាក់ ដែលរងផលប៉ះពាល់ដោយសារតែការផ្ទុះចម្លងវីរុសកូវីដ១៩ ក្នុងសហគមន៍ជាថ្មី។ អាជ្ញាធរបានអនុវត្តវិធានការរឹតត្បិតក្នុងខេត្តជាច្រើន ដែលរងផលប៉ះពាល់ដោយសារតែវីរុសកូវីដ១៩ ដែលប៉ះពាល់ដល់អាជីវកម្មនានា និងជីវភាពប្រចាំថ្ងៃរបស់ប្រជាពលរដ្ឋទូទាំងប្រទេស។ លោកប្រាយុទ្ធបានប្រាប់ឧបនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុ Supattanapong Panmeechao ព្រមទាំងក្រុមមន្ត្រីជាន់ខ្ពស់នៃក្រុមប្រឹក្សាអភិវឌ្ឍសង្គមនិងសេដ្ឋកិច្ចជាតិ ឲ្យជួបប្រជុំគ្នារកវិធានការបន្ថែមជួយដល់ប្រជាពលរដ្ឋ រយៈពេល២ខែបន្ទាប់។ លោកនាយករដ្ឋមន្ត្រីបានសន្យាថា «វិធានការជំនួយថ្មីនេះ ដែលមានគោលបំណងជួយដល់មនុស្សប្រមាណ៤០លាននាក់ នឹងមានតម្រូវការថវិកាដ៏ច្រើន»៕
-
ថៃទិញវ៉ាក់សាំងកូវីដ ៣៥លានដូសថែមទៀត កើនដល់៦៣លានដូស ក្នុងពេលវឹកវរខ្លាំង
លោកនាយករដ្ឋមន្ត្រីថៃបានប្រកាសនៅថ្ងៃនេះថា ប្រទេសរបស់លោកបានបញ្ជាទិញវ៉ាក់សាំងប្រឆាំងកូវីដ១៩ ចំនួន៣៥លានដូសបន្ថែមទៀត ពីក្រុមហ៊ុន AstraZenca នាំឲ្យវ៉ាក់សាំងដែលថៃទិញសរុបទាំងលើកមុន កើនដល់៦៣លានដូស។ គិតត្រឹមថ្ងៃទី៥ មករា ២០២១នេះ ថៃមានអ្នកស្លាប់ដោយសារកូវីដ១៩ ចំនួន៦៥នាក់ហើយ ខណៈអ្នកឆ្លងសរុបជិត៩ម៉ឺននាក់ ខណៈដែល២ថ្ងៃជាប់ៗគ្នាមកនេះ ថៃឆ្លងថ្មីក្នុងសហគមន៍ប្រមាណ១ពាន់នាក់។ នាយករដ្ឋមន្ត្រី ប្រាយុទ្ធ ចាន់អូចា និយាយប្រាប់អ្នកសារព័ត៌មានថា «ថ្ងៃនេះ ពួកយើងបានសម្រេចទិញបន្ថែមពី ក្រុមហ៊ុន AstraZenca ចំនួន៣៥លានដូស»៕ ប្រភពពី CNA
-
ថៃរកឃើញអ្នកឆ្លង Covid-19 ថ្មីៗចំនួន៥២៧ករណីទៀត ភាគច្រើនជាពលករចំណាកស្រុក
ថៃ៖ រដ្ឋាភិបាលថៃនៅថ្ងៃអង្គារនេះ បានកត់ត្រាករណីឆ្លង Covid-19 ថ្មីៗចំនួន៥២៧ករណីបន្ថែមទៀត ហើយលើកលែងតែ០៦នាក់ចេញ នៅសល់ពីនេះជាករណីឆ្លងនៅក្នុងស្រុកទាំងអស់ នេះបើតាមសារព័ត៌មានបាងកកប៉ុស្តិ៍នៅថ្ងៃទី០៥ ខែមករា ឆ្នាំ២០២១ ។ បើបូកបញ្ចូលទាំងករណីឆ្លងខាងលើនេះ នៅទូទាំងប្រទេសថៃមានអ្នកឆ្លង Covid-19 សរុបកើនឡើងដល់៨ពាន់៩៦៦ករណី ចាប់តាំងពីវីរុសដ៏កាចសាហាវមួយនេះផ្ទុះឡើងនៅថៃកាលពីខែមករា ឆ្នាំ២០២០កន្លងទៅ ។ ទន្ទឹមនឹងរបាយការណ៍នេះដែរ មិនមានអ្នកស្លាប់ថ្មីត្រូវបានគេរាយការណ៍ទេ ពោលគឺមានចំនួន៦៥នាក់ដដែល ។ ករណីបន្ថែមនៅថ្ងៃអង្គារនេះ គឺតិចជាងករណីឆ្លងថ្មីចំនួន៧៤៥ករណីដែលត្រូវបានកត់ត្រាកាលពីថ្ងៃចន្ទម្សិលមិញ ខណៈចំនួននេះគឺមានជាង៥០០ករណីនៅក្នុងខេត្ត សាមុត សាខន ដែលជាចំណុចកណ្តាល នៃការផ្ទុះឡើងចុងក្រោយបង្អស់ ៕
-
កូរ៉េខាងជើងស្ថិតក្នុងចំណោមប្រទេសដែលបានស្នើសុំវ៉ាក់សាំង Covid-19 បើទោះបីជាប្រទេសខ្លួនគ្មានករណីឆ្លងក៏ដោយ
កូរ៉េខាងជើង៖ កូរ៉េខាងជើងបានដាក់ពាក្យសុំវ៉ាក់សាំង Covid-19 ជាមួយអង្គការសម្ព័ន្ធវ៉ាក់សាំង Gavi ជាដៃគូសុខភាពសាធារណៈឯកជន ដែលធ្វើការដើម្បីធ្វើឲ្យប្រសើរឡើងនូវការចាក់វ៉ាក់សាំងនៅក្នុងប្រទេសដែលមានប្រាក់ចំណូលទាប នេះបើតាមសារព័ត៌មាន WSJ នៅថ្ងៃទី០៥ ខែមករា ឆ្នាំ២០២១ ។ ជាមួយគ្នានេះ អង្គការសម្ព័ន្ធវ៉ាក់សាំង Gavi មិនបានផ្តល់ការបញ្ជាក់ដោយផ្ទាល់អំពីសេចក្តីថ្លែងការណ៍នេះនោះទេ ប៉ុន្តែបាននិយាយថា ការធ្វើបច្ចុប្បន្នភាពនឹងត្រូវធ្វើឡើងនៅដើមឆ្នាំ២០២១នេះ ។ ប៉ុន្តែសម្ព័ន្ធភាពវ៉ាក់សាំងបាននិយាយថា ប្រទេសកំពុងអភិវឌ្ឍន៍ចំនួន៨៦ ក្នុងចំណោម៩២ បានស្នើសុំវ៉ាក់សាំងនេះ ខណៈកូរ៉េខាងជើងក៏បានស្នើសុំព័ត៌មានស្តីពីការទទួលបានវ៉ាក់សាំង ពីបណ្តាប្រទេសអឺរ៉ុបផងដែរ ៕
-
ពលរដ្ឋអាល្លឺម៉ង់ប្រមាណ២៦ម៉ឺន៥ពាន់នាក់ទទួលការចាក់វ៉ាក់សាំង Covid-19
អាល្លឺម៉ង់៖ ប្រជាជនអាល្លឺម៉ង់សរុប២៦ម៉ឺន៥ពាន់៩៨៦នាក់ហើយ បានទទួលការចាក់វ៉ាក់សាំង COVID-19 នៅទូទាំងប្រទេស គិតត្រឹមថ្ងៃចន្ទម្សិលមិញ នេះបើតាមវិទ្យាស្ថានអាល្លឺម៉ង់ រ៉ូប៊ឺត ខូច ឬ RKI ចុះផ្សាយដោយសារព័ត៌មានស៊ីនហួរ នៅថ្ងៃទី០៥ ខែមករា ឆ្នាំ២០២១ ។ ស្របពេលជាមួយគ្នានេះដែរ រដ្ឋមន្រ្តីសុខាភិបាលអាល្លឺម៉ង់ លោក ហ្សែនស៍ ស្ពេន បញ្ជាក់ថា ការចាក់វ៉ាក់សាំង គឺជាផ្លូវដើរចេញពីការឆ្លងរីករាលដាលនៃវីរុស COVID-19 … មួយជំហានៗ យើងនឹងអាចចាក់វ៉ាក់សាំងដល់ប្រជាជនរបស់យើងបានកាន់តែច្រើន ដូច្នេះយើងនឹងអាចវិលត្រលប់មករកសភាពធម្មតាវិញបាន ។ សូមជម្រាបថា នៅក្នុងចំណោមអ្នកដែលត្រូវបានចាក់វ៉ាក់សាំង COVID-19 ខាងលើនេះ គឺមានប្រជាជនជាង១១ម៉ឺន៤ពាន់៦០០នាក់ដែលរស់នៅតាមមជ្ឈ មណ្ឌលថែទាំ រួមទាំងបុគ្គលិកពេទ្យជាង១២ម៉ឺន៣ពាន់១០០នាក់ផងដែរ នេះបើតាមទិន្នន័យដែលប្រមូលបានពីបណ្តារដ្ឋរបស់ប្រទេសអាល្លឺម៉ង់ ខណៈយុទ្ធនាការចាក់វ៉ាក់សាំងនេះ បានចាប់ផ្តើមនៅថ្ងៃទី២៧ ខែធ្នូ ឆ្នាំ២០២០ ៕
-
អ៊ីរ៉ង់អះអាងថា ខ្លួនចាប់ផ្តើមចម្រាញ់សារធាតុអ៊ុយរ៉ាញ៉ូមដល់កម្រិត២០ភាគរយ ដោយមិនខ្វះពីក្រសែភ្នែករបស់សហរដ្ឋអាមេរិក
អាមេរិក៖ អង្គការថាមពលអាតូមិកអ៊ីរ៉ង់ (AEOI) នៅល្ងាចថ្ងៃចន្ទនេះប្រកាសថា សារធាតុអ៊ុយរ៉ាញ៉ូម២០ភាគរយ បានចាប់ផ្តើមចម្រាញ់នៅឯរោងចក្រនុយក្លេអ៊ែរក្រោមដី ហ្វ័រដូវ របស់ខ្លួន និងបានឈានដល់កម្រិតស្ថេរភាពហើយ នេះបើតាមសារព័ត៌មានស៊ីនហួរនៅថ្ងៃទី០៥ ខែមករា ឆ្នាំ២០២១ ។ ទន្ទឹមគ្នា រដ្ឋមន្រ្តីការបរទេសអ៊ីរ៉ង់ លោក ម៉ូហាំម៉ាត់ ហ្សាវ៉ាដ ហ្សារីហ្វ ក៏បានបង្ហោះសារនៅលើ Twitter របស់លោកនៅថ្ងៃដដែលថា សកម្មភាពរបស់អ៊ីរ៉ង់ បានអនុលោមយ៉ាងពេញលេញ ស្របទៅតាមកថាខណ្ឌទី៣៦ នៃកិច្ចព្រមព្រៀងនុយក្លេអ៊ែរអ៊ីរ៉ង់ (JCPOA) បន្ទាប់ពីការមិនគោរពច្បាប់អស់រយៈពេលជាច្រើនឆ្នាំ ដោយអ្នកចូលរួម នៃកិច្ចព្រមព្រៀងនេះជាច្រើនផ្សេងទៀត ។ ជាការឆ្លើយតប អ្នកនាំពាក្យក្រសួងការបរទេសអាមេរិកម្នាក់ បានបញ្ជាក់នៅក្នុងសេចក្តីថ្លែងការណ៍មួយថា អ៊ីរ៉ង់ដែលបានចាប់ផ្ដើមចម្រាញ់សារធាតុអ៊ុយរ៉ាញ៉ូមដល់កម្រិត២០ភាគរយ គឺជាការប៉ុនប៉ងយ៉ាងច្បាស់មួយ ដើម្បីបង្កើនយុទ្ធនាការនៃការគំរាមកំហែងនុយក្លេអ៊ែរ ដែលជាការប៉ុនប៉ងមួយដែលនឹងបន្តទៅរកការបរាជ័យ ។ បន្ថែមលើនេះ សហរដ្ឋអាមេរិក និងសហគមន៍អន្តរជាតិ នឹងបន្តឃ្លាំមើលអធិការ នៃទីភ្នាក់ងារអន្តរជាតិថាមពលអាតូមិក (IAEA) ដើម្បីរាយការណ៍អំពីអង្គហេតុនៅនឹងកន្លែង ៕
-
កូវីដ១៩រាលដាលខ្លាំង វាំងថៃនិងទីតាំងរាជទ្រព្យផ្សេងៗទៀត បិទទ្វាររហូតដល់ថ្ងៃទី៣១ មករា
ការិយាយព្រះរាជវាំងថៃបានប្រកាស កាលពីថ្ងៃទី៤ មករា ២០២១ថា ដោយសារតែការរាតត្បាតជំងឺកូវីដ១៩ ព្រះរាជវាំងនិងទីតាំងរាជទ្រព្យផ្សេងៗទៀត នឹងត្រូវបិទមិនឲ្យសាធារណជនចូលទស្សនា រហូតដល់ថ្ងៃទី៣១ មករា ២០២១។ តំបន់ទាំងនោះរួមមាន វាំង Grand Palace និង ប្រាសាទ Temple of the Emerald Buddha, វិមានBang Pa-In Palace, វិមាន Bhubing Palace, គម្រោង Chang Hua Man, សារមន្ទីរវាយនភណ្ឌ Queen Sirikit, សារមន្ទីរជាតិ Arts of the Kingdom Museum និង រោងភាពយន្ត Sala Chalermkrung Royal Theatre៕ ប្រភពពី The Nation
-
វៀតណាមទិញអង្ករពីឥណ្ឌា លើកដំបូងក្នុងពេលរាប់សិបឆ្នាំ
វៀតណាមដែលជាប្រទេសនាំចេញអង្ករលំដាប់ទី៣ លើពិភពលោកនោះ បានចាប់ផ្តើមបញ្ជាទិញអង្ករពីគូប្រជែងរបស់ខ្លួន គឺឥណ្ឌា ជាលើកដំបូងក្នុងរយៈពេលរាប់សិបឆ្នាំមកនេះ ពោលគឺបន្ទាប់ពីតម្លៃអង្ករក្នុងស្រុករបស់ប្រទេសទាំងពីរទាំងពីរបានហក់ឡើងខ្លាំងបំផុតក្នុងពេល៩ឆ្នាំមកនេះ ហើយការផ្គត់ផ្គង់ក្នុងស្រុកត្រូវបានកំណត់នោះ។ «ជាលើកដំបូងហើយ ដែលពួកយើងនាំចេញទៅវៀតណាម» នេះបើតាមលោក B.V. Krishna Rao ប្រធានសមាគមន៍នាំចេញអង្ករឥណ្ឌា ប្រាប់សារព័ត៌មានរយធឺ កាលពីថ្ងៃចន្ទ ទី៤ មករា ដោយលោកបន្ថែមទៀតថា«តម្លៃ (អង្ករ) របស់ឥណ្ឌាគឺទាក់ទាញខ្លាំងណាស់ ភាពខុសគ្នានៃតម្លៃធ្វើឲ្យការនាំចេញអាចធ្វើបាន» ។ ក្រុមហ៊ុននាំចេញអង្ករនៅឥណ្ឌាចំនួន៤បានចុះកុងត្រា ចាប់ផ្តើមនាំចេញ៧ម៉ឺនតោននៃអង្ករទៅវៀតណាម នៅខែមករា និងខែកុម្ភះ ក្នុងតម្លៃប្រមាណ៣១០ដុល្លារ ក្នុង១តោន នេះបើតាមសមាគម៍៕ ប្រភពពីបាងកកប៉ុស្តិ៍