-
ថៃព្រមានថា ចំនួនអ្នកឆ្លង Covid-19 ថ្មីៗអាចនឹងកើនឡើងដល់ខ្ទង់ម៉ឺននាក់ បើគ្មានវិធានការគ្រប់គ្រងបាន ក្រោយទើបរកឃើញអ្នកឆ្លង១៥៥ករណីទៀត
ថៃ៖ អាជ្ញាធរសុខាភិបាលថៃ នៅថ្ងៃអង្គារ៍នេះ បានរាយការណ៍ពីការរកឃើញអ្នកឆ្លង Covid-19 ថ្មីៗចំនួន១៥៥ករណីបន្ថែមទៀត ក្នុងនោះមាន១៣៤ជាករណីឆ្លងក្នុងសហគមន៍, ១១ករណីជាជនចំណាកស្រុក និង១០ជាករណីនាំចូលពីក្រៅប្រទេស នេះបើតាមសារព័ត៌មានបាងកកប៉ុស្តិ៍នៅថ្ងៃទី២៩ ខែធ្នូ ឆ្នាំ២០២០ ។ អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩ លោកវេជ្ជបណ្ឌិត តាវីសិប វីសានុយោធិន បញ្ជាក់ថា ១០ករណីថ្មីគឺជាការនាំចូលពីប្រទេសអាល្លឺម៉ង់ វៀតណាម ឥណ្ឌា ស៊ុយអែត សហរដ្ឋអាមេរិក ទួរគី និងបារ៉ែន ។ ករណីថ្មីចំនួន១២ត្រូវបានផ្សារភ្ជាប់ទៅនឹងការរីករាលដាលនៅផ្សារលក់គ្រឿងសមុទ្រក្នុងខេត្ត សាមុត សាខន និងករណីថ្មីចំនួន២ទៀតត្រូវបានផ្សារភ្ជាប់ទៅនឹងវង់ល្បែងក្នុងខេត្ត រ៉ាយ៉ង ។ ផ្អែកលើការគណនារបស់អាជ្ញាធរសុខាភិបាលថៃ បានឲ្យដឹងថា បើគ្មានវិធានការគ្រប់គ្រងទេនោះ ចំនួនករណីឆ្លងថ្មីៗប្រចាំថ្ងៃ អាចនឹងកើនឡើងដល់១ម៉ឺន៨ពាន់ករណីគិតត្រឹមថ្ងៃទី១៤ ខែមករា ឆ្នាំក្រោយនេះ ។ វិធានការគ្រប់គ្រងកម្រិតមធ្យមអាចបណ្តាលឲ្យមានករណីឆ្លងថ្មីៗប្រចាំថ្ងៃប្រមាណ៨ពាន់ករណី ហើយវិធានការគ្រប់គ្រងតឹងរ៉ឹងអាចកំណត់ករណីឆ្លងថ្មីៗប្រចាំថ្ងៃទាបជាង១ពាន់ករណី ៕
-
ប្រធានាធិបតីជាប់ឆ្នោតអាមេរិកអះអាងថា មន្រ្តីជំនិតរបស់លោក ដូណាល់ ត្រាំ បានបង្កជាឧបសគ្គដល់ការផ្ទេរអំណាច
អាមេរិក៖ ប្រធានាធិបតីជាប់ឆ្នោតអាមេរិកលោក ចូ បៃដិន បានអះអាងនៅថ្ងៃចន្ទនេះថា ទីភ្នាក់ងារសន្តិសុខអាមេរិកស្ថិតក្រោមរដ្ឋបាលរបស់លោក ដូណាល់ ត្រាំ បានបង្កការរាំងស្ទះដល់ការផ្ទេរអំណាច ដែលនេះគឺជាទង្វើគ្មានភាពទទួលខុសត្រូវ នេះបើតាមសារព័ត៌មានរ៉យទ័រនៅថ្ងៃទី២៩ ខែធ្នូ ឆ្នាំ២០២០ ។ ប្រធានាធិបតីជាប់ឆ្នោតអាមេរិករូបនេះបញ្ជាក់ថា យើងបានជួបប្រទះការរារាំង ដែលបង្កឡើងដោយថ្នាក់ដឹកនាំនយោបាយមួយចំនួន នៃក្រសួងការពារជាតិ និងការិយាល័យគ្រប់គ្រងកញ្ចប់ថវិកា ។ លោកបានសង្កត់ធ្ងន់ថា បច្ចុប្បន្ន យើងមិនបានទទួលព័ត៌ មានគ្រប់គ្រាន់ តាមដែលយើងត្រូវការនោះទេ ពីសំណាក់រដ្ឋបាលជិតផុតអាណត្តិ ជាពិសេសពាក់ព័ន្ធនឹងការងារសន្តិសុខជាតិ ហើយសម្រាប់ខ្ញុំផ្ទាល់ នេះគឺជាទង្វើគ្មានភាពទទួលខុសត្រូវ ។ ការអត្ថាធិប្បាយខាងលើនេះរបស់លោក ចូ បៃដិន ធ្វើឡើងបន្ទាប់ពីប្រធានាធិបតីជាប់ឆ្នោតអាមេរិករូបនេះ បានចូលរួមក្នុងកិច្ចប្រជុំមួយ ជាមួយក្រុមមន្ត្រីចាត់ចែង គោលនយោបាយការបរទេសរបស់លោក ៕
-
ក្រុមហ៊ុនផលិតឱសថអាមេរិក Pfizer ពន្យារពេលដឹកជញ្ជូនវ៉ាក់សាំងទៅអោយប្រទេសចំនួន០៨នៅអឺរ៉ុប ក្រោយជួបបញ្ហាក្នុងការផ្ទុក និងដឹកជញ្ជូនពីរោងចក្រ
អេស្ប៉ាញ៖ ក្រុមហ៊ុនឱសថអាមេរិក ភីហ្វីហ្សឺ បានពន្យារពេលដឹកជញ្ជូនវ៉ាក់សាំង COVID-19របស់ខ្លួនទៅអោយប្រទេសចំនួន៨នៅអ៊ឺរ៉ុប ក្នុងនោះក៏មានអេស្ប៉ាញផងដែរ នេះបើតាមក្រសួងសុខាភិបាលអេស្ប៉ាញ ចុះផ្សាយដោយសារព័ត៌មាន CNA នៅយប់ថ្ងៃទី២៨ ខែធ្នូ ឆ្នាំ២០២០ ។ សាខាក្រុមហ៊ុនឱសថ ភីហ្វីហ្សឺ ប្រចាំប្រទេសអេស្ប៉ាញ បានជូនដំណឹងដល់រដ្ឋាភិបាលទីក្រុងម៉ាឌ្រីត នៅល្ងាចថ្ងៃអាទិត្យសប្តាហ៍មុន (ម៉ោងក្នុងតំបន់) ពីការពន្យាពេលដឹកជញ្ជូនវ៉ាក់សាំងទៅកាន់ប្រទេសអឺរ៉ុបចំនួន៨ ដោយសារមានបញ្ហានៅក្នុងដំណើរការផ្ទុក និងដឹកជញ្ជូនពីរោងចក្ររបស់ខ្លួននៅប្រទេសបែលហ្ស៊ិក ។ បើតាមការគ្រោងទុកនោះ ប្រទេសអេស្ប៉ាញនឹងទទួលវ៉ាក់សាំង Covid-19 ពីក្រុមហ៊ុនឱសថអាមេរិក-អាល្លឺម៉ង់ ភីហ្វីហ្សឺ-បាយអូអិនធិច ចំនួន៣៥ម៉ឺនដូសក្នុងមួយសប្តាហ៍ សម្រាប់រយៈពេល០៣ខែបន្ទាប់ ៕
-
អតីតរដ្ឋមន្ត្រីការបរទេសជប៉ុនស្លាប់ដោយសារកូវីដ១៩ ក្នុងវ័យ៥៣ឆ្នាំ
លោក Yuichiro Hata អតីតរដ្ឋមន្ត្រីការបរទេសជប៉ុនវ័យ៥៣ឆ្នាំបានស្លាប់ដោយសារជំងឺកូវីដ១៩ នេះបើតាមការបញ្ជាក់របស់គណបក្សរបស់លោក កាលពីថ្ងៃចន្ទ ទី២៨ ធ្នូ ម្សិលមិញ។ អតីតរដ្ឋមន្ត្រីការបរទេស ដែលត្រូវបានបន្តក្លាយជារដ្ឋមន្ត្រីដឹកជញ្ជូនកាលពីឆ្នាំ២០១២ផងដែររូបនេះ ក៏ជាកូនប្រុសរបស់អតីតនាយករដ្ឋមន្ត្រីជប៉ុន Tsutomu Hata ដែរ ហើយលោកបានទទួលមរណៈភាព កាលពីថ្ងៃអាទិត្យ នេះបើតាមការបញ្ជាក់របស់គណបក្សប្រជាធិបតេយ្យអាស្រ័យរដ្ឋធម្មនុញ្ញនៃជប៉ុន (Constitutional Democratic Party of Japan)។ មរណៈភាពរបស់អតីតរដ្ឋមន្ត្រីការបរទេសជប៉ុននេះបានកើតមានឡើង ស្របពេលដែលជប៉ុនទើបសម្រេចដាក់បំរាមមិនឲ្យជនបរទេសទេសទាំងអស់ចូលទៅប្រទេសរបស់ខ្លួន បន្ទាប់ពីរកឃើញករណីវីរុសកូវីដ១៩ បំលែងថ្មី ឬ New Strain៕
-
សហរដ្ឋអាមេរិកអនុញ្ញាតអោយមានការហោះហើរ Drone តូចៗនៅលើពីលើមនុស្ស និងនៅពេលរាត្រី ក្នុងគោលដៅពង្រីកការផ្សព្វផ្សាយពាណិជ្ជកម្ម
អាមេរិក៖ យន្តហោះ Drone តូចៗនឹងត្រូវបានអនុញ្ញាតអោយហោះហើរនៅពីលើមនុស្ស និងនៅពេលរាត្រី ដោយការហោះហើរនេះ គឺក្នុងគោលដៅពង្រីកការផ្សព្វផ្សាយពាណិជ្ជកម្ម នេះបើតាមរដ្ឋបាលអាកាសចរណ៍សហព័ន្ធអាមេរិក FAA ចុះផ្សាយដោយសារព័ត៌មានរ៉យទ័រនៅថ្ងៃទី២៩ ខែធ្នូ ឆ្នាំ២០២០ ។ ជាមួយគ្នានេះ រដ្ឋបាលអាកាសចរណ៍សហព័ន្ធអាមេរិក FAA បញ្ជាក់ថា ក្រុមហ៊ុនដែលអនុញ្ញាតឱ្យមានការហោះហើរនៃពពួកយន្តហោះ Drone តូចៗនេះ ត្រូវតែមានច្បាប់ និងអត្តសញ្ញាណសម្រាប់សម្គាល់ក្រុមហ៊ុនច្បាស់លាស់ សំដៅរក្សាសន្តិសុខ និងសុវត្តិភាព ជាពិសេសគឺត្រូវចុះឈ្មោះ ដើម្បីទទួលបាន Remote ID ពី FAA ។ សូមជម្រាបថា យន្តហោះ Drone ឬយន្តហោះគ្មានមនុស្សបើកបរតូចៗនេះ នឹងជួយសម្រួលដល់ការផ្សព្វផ្សាយពាណិជ្ជកម្ម និងការដឹកជញ្ជូនមួយចំនួន ដោយពួកគេគ្រាន់តេកំណត់ទីតាំងរបស់អតិថិជន និង ធ្វើការបញ្ជាពីចម្ងាយ ៕
-
ថៃមានអ្នកស្លាប់ដោយសារ Covid-19 ដំបូងគេក្នុងរយៈពេល០២ខែមកនេះ នាំអោយអ្នកស្លាប់សរុបនៅទូទាំងប្រទេសកើនដល់៦១នាក់ហើយ
ថៃ៖ បុគ្គលិកកាស៊ីណូម្នាក់ក្នុងខេត្ត Rayong បានបាត់បង់ជីវិត ខណៈរូបគាត់ជាអ្នកស្លាប់ដំបូងគេ ដោយសារជំងឺ Covid-19 ក្នុងប្រទេសថៃនារយៈពេល០២ខែមកនេះ ដែលជាហេតុនាំអោយចំនួនអ្នកស្លាប់សរុបកើនឡើងដល់៦១នាក់ហើយ នេះបើតាមសារព័ត៌មានបាងកកប៉ុស្តិ៍នៅយប់ថ្ងៃ២៨ ខែធ្នូ ឆ្នាំ២០២០ ។ គាត់បានធ្វើតេស្តវិជ្ជមាន Covid-19 កាលពីថ្ងៃអាទិត្យសប្តាហ៍មុន ហើយនៅព្រឹកថ្ងៃចន្ទម្សិលមិញ គាត់មានអាការៈពិបាកដកដង្ហើម ហើយត្រូវបានគេបញ្ជូនទៅមន្ទីរពេទ្យ ប៉ុន្តែគាត់បានដាច់ខ្យល់ស្លាប់នៅតាមផ្លូវ ។ ការស្លាប់របស់គាត់ គឺជាការស្លាប់ដោយសារជំងឺ Covid-19 ដំបូងបង្អស់របស់ប្រទេសថៃ គិតចាប់តាំងពីថ្ងៃទី០៥ ខែវិច្ឆិកាកន្លងមក ។ ជាមួយគ្នានេះ អនុរដ្ឋមន្រ្តីសុខាភិបាលសាធារណៈថៃលោក Satit Pitutecha បាន បង្ហោះសារនៅលើ Facebook កាលពីយប់ថ្ងៃចន្ទម្សិលមិញថា បុរសមានវ័យ៤៥ឆ្នាំដែលជាសន្តិសុខយាមឡានម៉ូតូ និងសម្រួលចរាចរណ៍នៅកន្លែងលេងល្បែងរូបនេះ គឺមានជំងឺប្រចាំកាយស្រាប់ ដូចជាជំងឺបេះដូង និងទឹកនោមផ្អែម ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៨១លាននាក់ ក្នុងនោះស្លាប់ជាង១លាន៧៨ម៉ឺននាក់ និងជាសះស្បើយជាង៥៧លាន៧៩ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៨១លាន៦៦ម៉ឺន៩ពាន់៥២១ករណី ក្នុងនោះមានអ្នកជម្ងឺសរុបចំនួន១លាន៧៨ម៉ឺន១ពាន់៤៤២នាក់ស្លាប់ និង ជាសះស្បើយឡើងវិញសរុបចំនួន៥៧លាន៧៩ម៉ឺន៥ពាន់៧៨៦នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៩ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៩លាន៧៨ម៉ឺន១ពាន់៦២៤នាក់ ស្លាប់ចំនួន៣៤ម៉ឺន៣ពាន់១៨២នាក់ និងជាសះស្បើយចំនួន១១លាន៦៩ម៉ឺន៦ពាន់៧២៧នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន២២ម៉ឺន៤ពាន់៧៩៧នាក់ ស្លាប់ចំនួន១៤ម៉ឺន៨ពាន់១៩០នាក់ និងជាសះស្បើយ៩លាន៨០ម៉ឺន៦ពាន់៧៦៧នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន៥០ម៉ឺន៦ពាន់៨៩០នាក់ ស្លាប់១៩ម៉ឺន១ពាន់៦៤១នាក់ និងជាសះស្បើយ៦លាន៥៦ម៉ឺន៨ពាន់៨៩៨នាក់ ៕
-
កូរ៉េខាងត្បូងមានករណីកូវីដ១៩ បំលែងថ្មីដែរហើយ បន្ទាប់ពីជប៉ុននិងសិង្ហបុរី
អាជ្ញាធរសុខាភិបាលកូរ៉េខាងត្បូង នៅថ្ងៃចន្ទ ទី២៨ ធ្នូនេះ បានរាយការណ៍ឲ្យដឹងថា ខ្លួនបានរកឃើញករណីឆ្លងដំបូងនៃវីរុស COVID-19 ទម្រង់ថ្មី ដែលមានប្រភពចេញពីចក្រភពអង់គ្លេស ជាការរកឃើញបន្ទាប់ពីសិង្ហបុរី និងជប៉ុនទើបរកឃើញដែរ សម្រាប់តំបន់អាស៊ី។ ទីភ្នាក់ងារត្រួតពិនិត្យ និងបង្ការជំងឺកូរ៉េខាងត្បូងបានគូសបញ្ជាក់នៅក្នុងសេចក្តីថ្លែងការណ៍មួយថា ជនជាតិកូរ៉េ ០៣នាក់ ដែលធ្លាប់បានស្នាក់នៅក្នុងទីក្រុងឡុងដ៍ របស់អង់គ្លេស និងបានមកដល់ប្រទេសកូរ៉េខាងត្បូងវិញ កាលពីថ្ងៃទី២២ ខែធ្នូកន្លងទៅនេះ បានធ្វើតេស្តវិជ្ជមានចំពោះវីរុស COVID-19 ទម្រង់ថ្មី ដោយបច្ចុប្បន្ននេះពួកគេត្រូវបានដាក់ ឲ្យស្ថិតនៅដាច់ដោយឡែកពីគេឯងហើយ។ ចំណែកឯជនជាតិកូរ៉េ ០៤នាក់ផ្សេងទៀត ដែលបានមកដល់ប្រទេសកូរ៉េខាងត្បូងកាលពីថ្ងៃទី០៨ ខែវិច្ឆិកា និងថ្ងៃទី១៣ ខែធ្នូកន្លងទៅនេះ ពីប្រទេសអង់គ្លេស ក៏បានធ្វើតេស្ដវិជ្ជមានចំពោះវីរុស COVID-19 ដែរ និងត្រូវបានដាក់ឲ្យស្ថិតនៅក្រោមការស៊ើបអង្កេតនៅឡើយថា តើពួកគេបានឆ្លងវីរុស COVID-19 ទម្រង់ថ្មីនេះដែរឬទេ៕
-
ក្រុមហ៊ុនឱសថអង់គ្លេស AstraZeneca បញ្ជាក់ថា វ៉ាក់សាំងរបស់ខ្លួននឹងមានប្រសិទ្ធភាពក្នុងការប្រឆាំងជាមួយវីរុស Covid-19 ទម្រង់ថ្មី
អង់គ្លេស៖ ប្រធានក្រុមហ៊ុនផលិតឱសថ អាស្រ្តាហ្សេណេកា ដែលកំពុងបង្កើតវ៉ាក់សាំង Covid-19 ដែលត្រូវបានរំពឹងថា នឹងទទួលការអនុម័តអោយប្រើដោយអាជ្ញាធរអង់គ្លេសនៅសប្តាហ៍នេះ បានបញ្ជាក់នៅថ្ងៃអាទិត្យម្សិលមិញថា ក្រុមអ្នកស្រាវជ្រាវជឿថា វ៉ាក់សាំងរបស់ខ្លួននឹងមានប្រសិទ្ធភាពប្រឆាំងជាមួយវីរុស Covid-19 ទម្រង់ថ្មី ដែលកំពុងឆ្លងរាតត្បាតយ៉ាងរហ័សនៅប្រទេសអឺរ៉ុបនេះ ។ នាយកប្រតិបត្តិក្រុមហ៊ុនឱសថអង់គ្លេស អាស្រ្តាហ្សេណេកា លោក ប៉ាស្កាល់ សូរៀត ក៏បានប្រាប់កាសែត Sunday Times ថា អ្នកស្រាវជ្រាវដែលកំពុងអភិវឌ្ឍវ៉ាក់សាំងរបស់ខ្លួន បានរកឃើញរូបមន្តឈ្នះ ដែលធ្វើអោយវ៉ាក់សាំងមានប្រសិទ្ធភាពដូចវ៉ាក់សាំងរបស់គូប្រជែងដែរ ។ លោក សូរៀត បានសង្កត់ធ្ងន់ថា បន្ទាប់ពីចាក់ពីរដូស យើងគិតថា យើងបានរកឃើញរូបមន្តឈ្នះ និងវិធីដើម្បីទទួលបានប្រសិទ្ធភាព… វាត្រៀមរួចហើយសម្រាប់មនុស្សគ្រប់គ្នា… ខ្ញុំមិនអាចប្រាប់អ្នកបន្ថែមទៀតបានទេ ព្រោះយើងនឹងចេញផ្សាយលទ្ធផលនៅពេលឆាប់ៗខាងមុខនេះ ។ សូមជម្រាបថា យោងតាមលទ្ធផលមួយផ្នែកបង្ហាញថា វ៉ាក់សាំង Covid-19 របស់ក្រុមហ៊ុន អាស្រ្តាហ្សេណេកា មានប្រសិទ្ធភាពប្រហែល៧០ភាគរយ ក្នុងការប្រឆាំងនឹង Covid-19 បើធៀបទៅនឹងប្រសិទ្ធភាព៩៥ភាគរយ ដែលរាយការណ៍ដោយក្រុមហ៊ុនឱសថអាមេរិក ភីហ្វីហ្សឺ និងដៃគូអាល្លឺម៉ង់ បាយអូអិនធិច ៕
-
តួកគីនិយាយថា ក្រុមហ៊ុនឱសថចិន Sinovac ផ្អាកដឹកជញ្ជូនវ៉ាក់សាំង Covid-19 របស់ខ្លួនទៅតួកគី បន្ទាប់ពីមានករណីឆ្លងនៅការិយាល័យគយក្រុងប៉េកាំង
តួកគី៖ ការដឹកជញ្ជូនដំបូងនៃវ៉ាក់សាំង Covid-19 របស់ក្រុមហ៊ុន ស៊ីណូវ៉ាក់ ពីប្រទេសចិនមកកាន់ប្រទេសតួកគី ត្រូវសម្រេចផ្អាកក្នុងពេលមួយថ្ងៃ ឬពីរថ្ងៃជាបណ្តោះអាសន្នសិន ក្រោយផ្ទុះករណីឆ្លងវីរុសនេះនៅឯការិយាល័យគយក្រុងប៉េកាំង នេះបើតាមរដ្ឋមន្រ្តីសុខាភិបាលតួកគីលោក ហ្វារ៉េតធីន ខូកា នៅថ្ងៃអាទិត្យម្សិលមិញ ចុះផ្សាយដោយសារព័ត៌មាន CNA នៅថ្ងៃទី២៨ ខែធ្នូ ឆ្នាំ២០២០ ។ រដ្ឋមន្រ្តីសុខាភិបាលតួកគីរូបនេះបានបង្ហោះនៅលើ Twitter ថា ដោយសារតែការព្រមានពី Covid-19 ក្នុងទីក្រុងប៉េកាំង និងករណីឆ្លងវីរុសនេះនៅឯការិយាល័យគយក្រុងប៉េកាំងនោះ ការដឹកជញ្ជូនត្រូវពន្យារពេលសិន ។ សម្រាប់ហេតុផលនេះ ការមកដល់នៃវ៉ាក់សាំងរបស់យើង ដែលត្រូវបានគេរំពឹងថា នឹងចេញដំណើរ បន្ទាប់ពីប្រតិបត្តិការការិយាល័យគយ នឹងត្រូវយឺតរយៈពេលមួយ ឬពីរថ្ងៃ ។ សូមជម្រាបថា តួកគីបានព្រមព្រៀងទិញវ៉ាក់សាំង CoronaVac របស់ក្រុមហ៊ុនឱសថ ស៊ីណូវ៉ាក់ ចំនួន៥០លានដូស ហើយរំពឹងថា នឹងផ្តល់វ៉ាក់សាំងចំនួន៣លានដូសជាលើកដំបូងនៅក្នុងថ្ងៃចន្ទនេះ (ម៉ោងក្នុងតំបន់) ។ បន្ថែមលើនេះ តួកគីក៏នឹងទិញវ៉ាក់សាំង៤.៥លានដូសពីក្រុមហ៊ុនឱសថអាមេរិក-អាល្លឺម៉ង់ ភីហ្វីហ្សឺ-បាយអូអិនធិច ជាមួយនឹងជម្រើសទទួលបាន៣០លានដូសបន្ថែមទៀតនៅពេលក្រោយ ៕