-
ថៃ៖ អភិបាលខេត្តសាមុត សាខន ឆ្លងកូវីដ១៩
អភិបាលខេត្តសាមុត សាខន នៃប្រទេសថៃបានឆ្លងជំងឺកូវីដ១៩ ។ លោក Veerasak Vichitsangsri ត្រូវបានគេប្រកាសថា វិជ្ជមាន នៅថ្ងៃចន្ទ ទី២៨ ធ្នូនេះ ហើយអ្នកដែលបានទាក់ទងជិតស្និតជាមួយលោកនឹងត្រូវតេស្តទាំងអស់។ តាមសេចក្តីរាយការណ៍ រដ្ឋមន្ត្រីសុខាភិបាលក៏ត្រូវធ្វើចត្តាឡីស័កដែរ។ ថៃ នៅព្រឹកមិញនេះ បានប្រកាសពីវិជ្ជមានកូវីដ១៩ ចំនួន១៤៤នាក់ទៀត ក្នុងនោះ ១១៥នាក់ជាករណីឆ្លងក្នុងសហគមន៍ ផ្សេងទៀតជាករណីនាំចូល។ ថៃមានអ្នកកើតកូវីដ១៩ ចំនួន៦២៨៥នាក់ ជា៤១៨០នាក់ សម្រាកព្យាបាល១៩៨៣នាក់ ស្លាប់៦០នាក់។ក្នុងចំណោមឆ្លងថ្មី១១៥នាក់ មានពលករអន្តោប្រវេសន៍ចំនួន១៤នាក់។ ខេត្តសាមុត សាខន គឺជាតំបន់ផ្ទុះក្នុងសហគមន៍ឡើងវិញ នៅប្រទេសថៃ៕ ប្រភពពី The Nation
-
កូរ៉េខាងត្បូងរកឃើញអ្នកឆ្លងវីរុស Covid-19 ទម្រង់ថ្មីជាលើកដំបូង ដែលមានប្រភពនៅអង់គ្លេស
កូរ៉េខាងត្បូង៖ អាជ្ញាធរសុខាភិបាលកូរ៉េខាងត្បូង នៅថ្ងៃចន្ទនេះ បានអះអាងថា ខ្លួនបានរកឃើញអ្នកផ្ទុកវីរុស Covid-19 ទម្រង់ថ្មីជាលើកដំបូង ដូចគ្នាទៅនឹងប្រភេទវីរុសដែលកំពុងឆ្លងរាតត្បាតយ៉ាងរហ័សនៅចក្រភពអង់គ្លេស នេះបើតាមសារព័ត៌មានស៊ីនហួរនៅថ្ងៃទី២៨ ខែធ្នូ ឆ្នាំ២០២០ ។ ទីភ្នាក់ងារគ្រប់គ្រង និងបង្ការជំងឺកូរ៉េ KDCA បានបញ្ជាក់នៅក្នុងសេចក្តីថ្លែងការណ៍ថា ការរកឃើញវីរុស Covid-19 ទម្រង់ថ្មីនេះ បានកើតមានឡើងនៅក្នុងគ្រួសារមួយមានសមាជិកចំនួន០៣នាក់ ដែលចូលមកកូរ៉េខាងត្បូងកាលពីថ្ងៃ២២ ខែធ្នូកន្លងទៅនេះ ដោយពួកគេមកពីអង់គ្លេស និងត្រូវបានធ្វើចត្តាឡីស័ក ។ នៅក្នុងថ្ងៃចន្ទដដែលនេះ កូរ៉េខាងត្បូងក៏បានប្រកាសអំពីការឆ្លង Covid-19 ថ្មីៗក្នុងទ្រង់ទ្រាយធំរហូតដល់៨០៨នាក់ឯណោះ ដែលនាំអោយចំនួនអ្នកឆ្លងសរុបនៅទូទាំងប្រទេសនេះ កើនឡើងដល់៥ម៉ឺន៧ពាន់៦៨០នាក់ ក្នុងនោះមានអ្នកស្លាប់សរុប៨១៩នាក់ និងជាសះស្បើយឡើងវិញសរុប៣ម៉ឺន៩ពាន់២៦៨នាក់ ៕
-
អាជ្ញាធរសុខាភិបាលថៃទទួលស្គាល់ថា ស្ថានភាពឆ្លងរាតត្បាត Covid-19 បច្ចុប្បន្ននេះកាន់តែធ្ងន់ធ្ងរមិនធ្លាប់មាន
ថៃ៖ មជ្ឈមណ្ឌលរដ្ឋបាលស្ថានភាព Covid-19 របស់ប្រទេសថៃ CCSA នៅថ្ងៃចន្ទនេះទទួលស្គាល់ថា ស្ថានភាពឆ្លងរាតត្បាតនៃវីរុសនេះនៅទូទាំងប្រទេសគឺធ្ងន់ធ្ងរជាងរលកទី១កាលពីដើមឆ្នាំនេះទៅទៀត នេះបើតាមសារព័ត៌មាន បាងកកប៉ុស្តិ៍ នៅថ្ងៃទី២៨ ខែធ្នូ ឆ្នាំ២០២០ ។ អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺ Covid-19 (CCSA) លោកវេជ្ជបណ្ឌិត តាវីសិប វីសានុយ៉ូធិន បាននិយាយថា ចំនួនអ្នកឆ្លងក្នុងសហគមន៍បានហក់ឡើងលើសមួយពាន់នាក់ ត្រឹមរយៈពេលប៉ុន្មានថ្ងៃប៉ុណ្ណោះ ដោយលោកថែមទាំងប្រកាសថា ការរាតត្បាតពេលនេះ គឺធ្ងន់ធ្ងរខ្លាំងជាងរលករាតត្បាតលើកទី១ ដែលផ្ទុះឡើងកាលពីដើមឆ្នាំទៅទៀត ។ រហូតមកទល់នឹងពេលនេះ ការរាតត្បាតចេញពីផ្សារលក់គ្រឿងសមុទ្រនៅខេត្ត សាមុតសាខន បានរីករាលដាលដល់ចំនួន៣៨ខេត្ត/ក្រុងហើយនៅទូទាំងប្រទេសថៃ ៕
-
ធនាគារពិភពលោក World Bank បញ្ជាក់ថា វៀតណាមនឹងស្ថិតក្នុងចំណោមប្រទេសមានសេដ្ឋកិច្ចលូតលាស់លឿនបំផុតលើពិភពលោកក្នុងឆ្នាំ២០២០នេះ
វៀតណាម៖ ជាមួយនឹងកំណើនផលិតផលក្នុងស្រុកសរុប GDP ចំនួន២.៨ ភាគរយ វៀតណាមនឹងស្ថិតក្នុងចំណោមប្រទេស ដែលមានកំណើនសេដ្ឋកិច្ចលឿនបំផុតលើពិភពលោក ដែលកំពុងទទួលរងផលប៉ះពាល់ដោយសារតែជម្ងឺ Covid-19 នៅឆ្នាំ២០២០ នេះបើតាមធនាគារពិភពលោក WB ចុះផ្សាយដោយសារព័ត៌មាន VNExpress ។ វៀតណាមនឹងក្លាយជាប្រទេសមួយក្នុងចំណោមប្រទេសចំនួន០៣ប៉ុណ្ណោះនៅក្នុងទ្វីបអាស៊ីដែលនឹងមានកំណើនវិជ្ជមាននៅក្នុងឆ្នាំ២០២០នេះ ហើយប្រទេសដទៃទៀតគឺចិន និងមីយ៉ាន់ម៉ា នេះបើតាមរបាយការណ៍របស់ធនាគារពិភពលោក WB ។ បណ្តាសេដ្ឋកិច្ចផ្សេងទៀតនឹងធ្លាក់ចុះ ខណៈបណ្តាសេដ្ឋកិច្ចអាស៊ីអាគ្នេយ៍ធំៗដូចជាថៃ និងហ្វីលីពីនទំនងជាធ្លាក់ចុះ ៧.១ភាគរយ និង ៨.៣ភាគរយរៀងៗខ្លួន ។ សូមជម្រាបថា វៀតណាមអាចទទួលបាននូវកំណើនសេដ្ឋកិច្ចវិជ្ជមានដូចនេះ គឺដោយសារតែការខិតខំប្រឹងប្រែងប្រកបដោយប្រសិទ្ធភាពបានយ៉ាងឆាប់រហ័ស ក្នុងការទប់ទល់ការផ្ទុះឡើងនៃជំងឺកូវីដ១៩ ។ បន្ទាប់ពីការបិទប្រទេសរយៈពេលបីសប្តាហ៍នៅក្នុងខែមេសាកន្លងទៅ សកម្មភាពឧស្សាហកម្ម និងសេវាកម្មភាគច្រើនបានស្ទុះងើបឡើងវិញ នៅពេលអតិថិជន និងវិនិយោគិនក្នុងស្រុកមានទំនុកចិត្តខ្លាំងឡើងវិញ ៕
-
ក្រុមជំនាញផ្នែកសេដ្ឋកិច្ចអង់គ្លេសព្យាករណ៍ថា ចិននឹងវ៉ាដាច់សហរដ្ឋអាមេរិកក្លាយជាប្រទេសមានសេដ្ឋកិច្ចធំបំផុតរបស់ពិភពលោកនៅត្រឹមឆ្នាំ២០២៨
អង់គ្លេស៖ ចិននឹងវ៉ាដាច់សហរដ្ឋអាមេរិក ក្លាយជាប្រទេសដែលមានសេដ្ឋកិច្ចធំបំផុតរបស់ពិភពលោកនៅត្រឹមឆ្នាំ២០២៨ខាងមុខនេះ ពោលគឺ០៥ឆ្នាំលឿនជាងការប៉ាន់ស្មានលើកមុន ដោយសារតែការស្ទុះងើបឡើងវិញមានភាពផ្ទុយគ្នារវាងប្រទេសទាំងពីរ ក្រោយវិបត្តិ COVID-19 នេះបើតាមការព្យាករណ៍របស់ក្រុមអ្នកជំនាញផ្នែកសេដ្ឋកិច្ចមានមូលដ្ឋាននៅ អង់គ្លេស ចុះផ្សាយដោយសារព័ត៌មាន CNA ។ ប្រភពដដែលបានអោយដឹងទៀតថា ចិនបានកំណត់គោលដៅសម្រេចឲ្យបានកំណើនសេដ្ឋកិច្ចជាមធ្យម៥.៧ភាគរយក្នុងមួយឆ្នាំ សម្រាប់ឆ្នាំ២០២១ ដល់ឆ្នាំ២០២៥ មុននឹងការថមថយមកត្រឹម៤.៥ភាគរយវិញក្នុងមួយឆ្នាំ សម្រាប់ឆ្នាំ២០២៦ ដល់ឆ្នាំ២០៣០ ។ ដោយឡែកសេដ្ឋកិច្ចសហរដ្ឋអាមេរិក ទំនងជាមានការស្ទុះងើបឡើងវិញខ្លាំង នៅក្រោយវិបត្តិ COVID-19 ចាប់ពីឆ្នាំ២០២១ ប៉ុន្តែកំណើនសេដ្ឋកិច្ចនោះ នឹងធ្លាក់ចុះមកត្រឹម១.៩ភាគរយ ក្នុងមួយឆ្នាំ សម្រាប់ឆ្នាំ២០២២ ដល់ឆ្នាំ២០២៤ និង ១.៦ភាគរយបន្ទាប់ពីឆ្នាំ២០២៤ខាងមុខ ៕
-
ទីបំផុតលោក ដូណាល់ ត្រាំ ចុះហត្ថលេខាលើកញ្ចប់ថវិកាសង្គ្រោះពីវិបត្តិ Covid-19 និងដើម្បីជៀសវាងការបិទរដ្ឋាភិបាល
ថៃ៖ ទីបំផុតប្រធានាធិបតីអាមេរិកជិតផុតអាណត្តិ លោក ដូណាល់ ត្រាំ បានសម្រេចចុះហត្ថលេខាលើច្បាប់មួយ ស្តីពីការផ្តល់ជំនួយសង្គ្រោះបន្ទាន់ និងការចំណាយលើកញ្ចប់ថវិកា ពាក់ព័ន្ធនឹងជំងឺ Covid-19 ដើម្បីបញ្ចៀសការបិទរដ្ឋាភិបាល នេះបើតាមសារព័ត៌មាន BBC នៅថ្ងៃទី២៨ ខែធ្នូ ឆ្នាំ២០២០ ។ កន្លងមក លោក ត្រាំ បានបដិសេធចុះហត្ថលេខា ដោយនិយាយថា លោកចង់ផ្តល់ឲ្យប្រជាជននូវប្រាក់កាន់តែធំ ខណៈការពន្យាពេលនេះ នឹងធ្វើអោយពលរដ្ឋអាមេរិករាប់លាននាក់ដែលគ្មានការងារធ្វើ ត្រូវបាត់បង់អត្ថប្រយោជន៍ជាបណ្តោះអាសន្ន ។ ក្នុងករណីដែលលោក ដូណាល់ ត្រាំ មិនចុះហត្ថលេខាលើសេចក្តីព្រាងច្បាប់ខាងលើនេះអោយទៅជាច្បាប់នៅពាក់កណ្តាលអធ្រាត្រថ្ងៃ ចន្ទ ដើមនេះទេនោះ ការបិទរដ្ឋាភិបាលមួយផ្នែកនឹងចាប់ផ្តើមឡើង ខណៈប្រធានាធិបតីជាប់ឆ្នោតអាមេរិកលោក ចូ បៃដិន ក៏បានព្រមានពីផលវិបាកធ្ងន់ធ្ងរ ប្រសិនបើលោក ត្រាំ បន្តពន្យារពេលការចុះហត្ថលេខាផងដែរ ។ សូមជម្រាបថា កញ្ចប់ជំនួយដែលមានទំហំទឹកប្រាក់៩០០ពាន់លានដុល្លារ ត្រូវបានអនុម័តដោយសភា បន្ទាប់ពីការចរចាអស់រយៈពេលជាច្រើនខែ ។ វាជាផ្នែកមួយនៃកញ្ចប់ចំណាយ២.៣ទ្រីលានដុល្លារ ដែលរួមបញ្ចូលទាំងទឹកប្រាក់១.៤ទ្រីលានដុល្លារសម្រាប់ការចំណាយរបស់រដ្ឋាភិបាលសហព័ន្ធធម្មតាផងដែរ ៕
-
ប្រធានាធិបតីរុស្ស៊ីសម្រេចចិត្តទទួលការចាក់វ៉ាក់សាំង Sputnik V របស់ប្រទេសខ្លួន
រុស្ស៊ី៖ ប្រធានាធិបតីរុស្ស៊ីលោក Vladimir Putin នឹងទទួលចាក់វ៉ាក់សាំង Sputnik V ប្រឆាំងនឹងជំងឺវីរុសកូរ៉ូណា នេះបើតាមអ្នកនាំពាក្យវិមានក្រឹមឡាំង លោក Dmitry Peskov ប្រាប់ទូរទស្សន៍រដ្ឋរបស់រុស្ស៊ីនៅថ្ងៃអាទិត្យនេះ ដកស្រង់ចុះផ្សាយសារព័ត៌មានរ៉យទ័រនៅយប់ថ្ងៃទី២៧ ខែធ្នូ ឆ្នាំ២០២០ ។ អ្នកនាំពាក្យវិមានក្រឹមឡាំង លោក Dmitry Peskov បានលើកឡើងថា លោក ពូទីន បញ្ជាក់ថា លោកនឹងទទួលចាក់វ៉ាក់សាំង… លោកបានធ្វើការសម្រេចចិត្តបែបនេះ ហើយកំពុងរង់ចាំរហូតដល់បែបបទទាំងអស់ត្រូវបានបញ្ចប់ ។ សូមជម្រាបផងដែរថា រុស្ស៊ីបានចាប់ផ្តើមយុទ្ធនាការចាក់វ៉ាក់សាំង Sputnik V ទៅលើប្រជាពលរដ្ឋរបស់ខ្លួនដោយស្ម័គ្រចិត្តកាលពីដើមខែធ្នូកន្លងមកនេះ ដោយចាប់ផ្តើមជាមួយក្រុមងាយរងគ្រោះបំផុតនៅទីក្រុងមូស្គូ ៕
-
អនុប្រធានាធិបតីប្រេស៊ីលធ្វើតេស្តវិជ្ជមាន Covid-19 ចំពេលមានអ្នកស្លាប់ដោយសារវីរុសនេះចំនួន៣៤៤នាក់បន្ថែមទៀត
ប្រេស៊ីល៖ អនុប្រធានាធិបតីប្រេស៊ីល លោក ហាមីលតុន មូរ៉ាវ ធ្វើតេស្ដរកឃើញវិជ្ជមាន COVID-19 នេះបើតាមការបញ្ជាក់ពីការិយាល័យរបស់លោកផ្ទាល់នៅថ្ងៃអាទិត្យម្សិលមិញ ដកស្រង់ចុះផ្សាយដោយសារព័ត៌មានរ៉យទ័រនៅថ្ងៃទី២៨ ខែធ្នូ ឆ្នាំ២០២០ ។ អនុប្រធានាធិបតីប្រេស៊ីលរូបនេះ ត្រូវបានធ្វើតេស្ដវិជ្ជមាន COVID-19 កាលពីរសៀលថ្ងៃអាទិត្យម្សិលមិញ (ម៉ោងក្នុងតំបន់) ដោយលោក មូរ៉ាវ មានសុខភាពល្អធម្មតា ហើយនឹងត្រូវស្ថិតនៅដាច់ដោយឡែកពីគេ ។ លោក មូរ៉ាវ គឺជាមន្ត្រីកំពូលចុងក្រោយគេបំផុតរបស់ប្រធានាធិបតីប្រេស៊ីល លោក ហ៊ែរ បុលសូណារ៉ូ ដែលបានឆ្លង COVID-19 ។ លោក បុលសូណារ៉ូ ដែលតែងតែចាត់ទុកថា COVID-19 ជាជំងឺផ្ដាសាយធម្មតា ក៏ធ្លាប់បានឆ្លងជំងឺនេះដែរ កាលពីខែកក្កដាកន្លងទៅ និងបន្ទាប់មកត្រូវបានគេព្យាបាលជាសះស្បើយឡើងវិញ ៕
-
ថៃរកឃើញអ្នកឆ្លង Covid-19 ថ្មីៗចំនួន១២១ករណីទៀត ក្នុងនោះមាន៩០នាក់ជាករណីឆ្លងក្នុងសហគមន៍ នៅក្នុងរបាយការណ៍ប្រចាំថ្ងៃអាទិត្យម្សិលមិញ
ថៃ៖ អាជ្ញាធរសុខាភិបាលថៃ នៅថ្ងៃអាទិត្យម្សិលមិញ បានប្រកាសពីការរកឃើញករណីឆ្លងថ្មីៗនៃជំងឺ COVID-19 រហូតដល់ទៅ១២១នាក់ទៀត ក្នុងនោះ១៨នាក់ត្រូវបានគេដឹងថា មានជាប់ពាក់ព័ន្ធទៅនឹងករណីផ្ទុះការឆ្លងយ៉ាងគំហុកនៅក្នុងខេត្តសាមុត សាខន ភាគនិរតីប្រទេសថៃ នេះបើតាមសារព័ត៌មាន CNA នៅថ្ងៃទី២៧ ខែធ្នូ ឆ្នាំ២០២០ ។ អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩ CCSA លោកវេជ្ជបណ្ឌិត Taweesilp Visanuyothin បានថ្លែងក្នុងសន្និសិទខ្លីមួយថា នៅក្នុងចំណោមករណីឆ្លងថ្មីៗខាងលើនេះ មាន៩៤នាក់ គឺជាករណីឆ្លងក្នុងសហគមន៍ និង១៨នាក់ គឺជាពលករចំណាកស្រុក ដែលមានជាប់ពាក់ព័ន្ធទៅនឹងករណីឆ្លងរាលដាលនៅផ្សារលក់គ្រឿងសមុទ្រក្នុងខេត្តសាមុត សាខន ។ រហូតមកទល់ពេលនេះ ករណីឆ្លងក្នុងសហគមន៍នៅប្រទេសថៃ បានរីករាលដាលរហូតដល់៣៨ខេត្តហើយ ចាប់តាំងពីផ្ទុះឡើងកាលពីសប្តាហ៍កន្លងទៅ លើក្រុមពលករចំណាកស្រុកមកពីមីយ៉ាន់ម៉ា ដែលស្ថិតនៅក្នុងខេត្តសាមុតសាខន និងកំពុងបង្កឲ្យមានការរើសអើងយ៉ាងធ្ងន់ធ្ងរនៅក្នុងសង្គមថៃផងដែរ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៨១លាននាក់ ក្នុងនោះស្លាប់ជាង១លាន៧៧ម៉ឺននាក់ និងជាសះស្បើយជាង៥៧លាន២៩ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៨១លាន១៤ម៉ឺន២ពាន់១១៣ករណី ក្នុងនោះមានអ្នកជម្ងឺសរុបចំនួន១លាន៧៧ម៉ឺន១ពាន់៨៨៤នាក់ស្លាប់ និង ជាសះស្បើយឡើងវិញសរុបចំនួន៥៧លាន២៩ម៉ឺន១ពាន់២២២នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៨ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៩លាន៥៧ម៉ឺន៣ពាន់៨៤៧នាក់ ស្លាប់ចំនួន៣៤ម៉ឺន១ពាន់១៣៨នាក់ និងជាសះស្បើយចំនួន១១លាន៤៩ម៉ឺន៥ពាន់៨៧៥នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន២០ម៉ឺន៨ពាន់៧២៥នាក់ ស្លាប់ចំនួន១៤ម៉ឺន៧ពាន់៩៤០នាក់ និងជាសះស្បើយ៩លាន៧៨ម៉ឺន១ពាន់៩៤៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន៤៨ម៉ឺន៤ពាន់២៨៥នាក់ ស្លាប់១៩ម៉ឺន១ពាន់១៤៦នាក់ និងជាសះស្បើយ៦លាន៥១ម៉ឺន៥ពាន់៣៧០នាក់ ៕