-
លោក ដូណាល់ ត្រាំ សាទរចំពោះបទឈប់បាញ់រវាងអាហ្សែបៃហ្សង់ និងអាមេនីក្នុងតំបន់ណាហ្គ័រណូ-ការ៉ាបាក
អាមេរិក៖ ប្រធានាធិបតីអាមេរិកលោក ដូណាល់ ត្រាំ សម្តែងការសាទរចំពោះប្រទេសអាហ្សែបៃហ្សង់ និងអាមេរិនីដែលបានឯកភាពគ្នាបង្កើតបទឈប់បាញ់ក្នុងតំបន់ ណាហ្គ័រណូ-ការ៉ាបាក ដែលបានចូលជាធរមាននៅថ្ងៃចន្ទនេះតែម្តង នេះបើតាមសារព័ត៌មានស្ពូតនីគនៅថ្ងៃទី២៦ ខែតុលា ឆ្នាំ២០២០ ។ ប្រធានាធិបតីអាមេរិករូបនេះបានបង្ហោះសារនៅលើបណ្តាញ Twitter ថា អបអរសាទរដល់នាយករដ្ឋមន្ត្រីអាមេនី លោក នីកូល ផាស៊ីនយ៉ាន និងប្រធានាធិបតីអាហ្សែរបៃហ្សង់ លោក អ៊ីលហាម អាលីយ៉េវ ដែលយល់ព្រមទទួលយកបទឈប់បាញ់ ដែលនឹងចូលជាធរមាននៅថ្ងៃចន្ទដើមសប្តាហ៍នេះ ។ សូមបញ្ជាក់ថា កិច្ចព្រមព្រៀងលើបទឈប់បាញ់លើកទី២នេះ សម្រេចបានក្រោមការជ្រោមជ្រែងរបស់សហរដ្ឋអាមេរិក បន្ទាប់ពីរដ្ឋមន្ត្រីការបរទេសអាហ្សែបៃហ្សង់ និងអាមេរិនី មានជំនួបដោយឡែកជាមួយរដ្ឋមន្ត្រីការបរទេសអាមេរិកលោក ម៉ៃ ប៉ុមប៉េអូ កាលពីថ្ងៃទី២៤ ខែតុលាកន្លងទៅ ៕
-
ប្រធានអង្គការ WHO ព្រមានប្រឆាំងនឹងការចាក់វ៉ាក់សាំងជាតិនិយម
អាល្លឺម៉ង់៖ ប្រធានអង្គការសុខភាពពិភពលោក WHO លោក ថេដ្រូស អាដាណម បានគូសបញ្ជាក់ថា ការចាក់វ៉ាក់សាំងជាតិនិយម នឹងអូសបន្លាយរយៈពេលអោយកាន់តែវែង សម្រាប់ជំងឺ COVID-19 ដោយមិនមែនជាការបន្ថយរយៈពេលអោយខ្លីនោះទេ នេះបើតាមសារព័ត៌មានរ៉យទ័រនៅថ្ងៃទី២៦ ខែតុលា ឆ្នាំ២០២០ ។ នៅក្នុងសុន្ទរកថាតាមវីដេអូមួយនាឱកាសបើកកិច្ចប្រជុំកំពូលផ្នែកសុខភាពពិភពលោក មានរយៈពេល០៣ថ្ងៃនៅទីក្រុងប៊ែរឡាំង ប្រទេសអាល្លឺម៉ង់ ប្រមុខអង្គការ WHO រូបនេះបានសង្កត់ធ្ងន់ថា មធ្យោបាយតែមួយគត់ ដើម្បីឲ្យពិភពលោកបានជាសះស្បើយពីជំងឺ COVID-19 គឺមានតែការសាមគ្គីគ្នា និងការធ្វើឱ្យប្រាកដថា បណ្តាប្រទេសក្រីក្រនានាអាចមានសិទ្ធិទទួលបាន នូវវ៉ាក់សាំងដូចបណ្ដាប្រទេសអ្នកមានដែរ ។ សូមជំរាបថា គិតមកទល់ពេលនេះ អ្នកវិទ្យាសាស្ត្រនៅជុំវិញពិភពលោកកំពុងតែប្រណាំងគ្នា ដើម្បីអភិវឌ្ឍន៍វ៉ាក់សាំង COVID-19 ហើយបេក្ខភាពវ៉ាក់សាំងជាច្រើនកំពុងស្ថិតក្រោមការធ្វើតេស្ត ក្នុងនោះមានវ៉ាក់សាំងចំនួន១០ហើយ ដែល ស្ថិតក្រោមការធ្វើតេស្តដំណាក់កាលទី៣ ឬចុងក្រោយដោយមានការចូលរួមពីសំណាក់ក្រុមអ្នកស្ម័គ្រចិត្តរាប់ម៉ឺននាក់ ៕
-
មនុស្សប្រមាណ២ម៉ឺន៥ពាន់នាក់បង្ខំចិត្តភៀសខ្លួនពីផ្ទះសម្បែង ស្របពេលដែលព្យុះទីហ្វុង ម៉ូឡាវ វាយប្រហារប្រទេសហ្វីលីពីន
ហ្វីលីពីន៖ យ៉ាងហោចណាស់មានអ្នកស្រុក២ម៉ឺន៥ពាន់នាក់ត្រូវបានជម្លៀសទៅកាន់ជំរុំស្នាក់នៅបណ្ដោះអាសន្ន ដែលរៀបចំដោយរដ្ឋនៅតាមសាលារៀន និងអគាររដ្ឋាភិបាលក្នុងខេត្ត បាតាងហ្គាស់ ស្ថិតនៅភាគខាងត្បូងរដ្ឋធាននីម៉ានីល ស្របពេលដែលភូមិរបស់ពួកគេត្រូវបានទឹកជំនន់ជនលិច ដោយសារឥទ្ធិពលព្យុះទីហ្វុង ម៉ូឡាវ នេះបើតាមសារព័ត៌មាន CNA នៅថ្ងៃទី២៦ ខែតុលា ឆ្នាំ២០២០ ។ ព្យុះទីហ្វុងដ៏កំណាចខាងលើនេះ បានវាយប្រហារប្រទេសហ្វីលីពីនយ៉ាងដំណម ជាមួយល្បឿនខ្យល់បោកបក់១៨០គីឡូម៉ែត្រក្នុងម៉ោង ហើយបន្ទាប់មកបានថម ថយកម្លាំងមកនៅត្រឹម២៥គីឡូម៉ែត្រ ។ ភ្លាមៗនោះ ក្រុមមន្ត្រីហ្វីលីពីននៅពុំទាន់ធ្វើសេចក្តីរាយការណ៍អំពីចំនួនអ្នកស្លាប់ ឬរងរបួសដោយសារព្យុះទីហ្វុង ម៉ូឡាវ នោះទេ ក៏ប៉ុន្តែពួកគេបានឱ្យដឹងថា មនុស្សម្នាក់បានបាត់ខ្លួន និង ០៧នាក់ផ្សេងទៀតត្រូវបានជួយសង្រ្គោះទាន់ពេលវេលា ។ ព្យុះទីហ្វុង ម៉ូឡាវនេះ ត្រូវបានគេរំពឹងថា នឹងចាប់ផ្ដើមធ្វើដំណើរចេញពីហ្វីលីពីននៅថ្ងៃចន្ទនេះ រួចបន្តឆ្ពោះទៅកាន់សមុទ្រចិនខាងត្បូង ៕
-
អនុប្រធានាធិបតីអាមេរិកនៅតែបន្តធ្វើយុទ្ធនាការបោះឆ្នោត បើទោះបីជាជំនួយការរបស់លោកធ្វើតេស្តវិជ្ជមាន Covid-19
អាមេរិក៖ អនុប្រធានាធិបតីលោក ម៉ៃ ផេន មានផែនការរក្សាការធ្វើយុទ្ធនាការបោះឆ្នោតតាមកាលវិភាគនៅសប្តាហ៍នេះដដែល បើទោះបីជាលោកបានទាក់ទងជាមួយជំនួយការរបស់លោកម្នាក់ ដែលត្រូវបានធ្វើតេស្តវិជ្ជមានជម្ងឺ Covid-19 នេះបើតាមសារព័ត៌មាន CGTN នៅថ្ងៃទី២៦ ខែតុលា ឆ្នាំ២០២០ ។ អ្នកនាំពាក្យរបស់អនុប្រធានាធិបតីអាមេរិកលោក ដេវីន អូម៉ាលី ថ្លែងថា លោក ម៉ៃ ផេន និងភរិយាបានធ្វើតេស្តអវិជ្ជមានជម្ងឺ Covid-19 នៅថ្ងៃនេះ ហើយនៅតែមានសុខភាពល្អដដែល ។ សូមជំរាបថា លោក ម៉ៃ ផេន បានទាក់ទងជិតស្និទ្ធជាមួយនឹងប្រធានបុគ្គលិករបស់លោក គឺលោក ម៉ាក សត ដែលបានឆ្លង Covid-19 តែលោកមិនបានដាក់ខ្លួននៅដាច់ពីគេទេ ហើយថែមទាងប្តេជ្ញាធ្វើដំណើរចេញឃោសនាតាមកាលកំណត់ ដោយសារតែគោលការណ៍របស់មជ្ឈមណ្ឌលគ្រប់គ្រងជំងឺអាមេរិក តម្រូវអោយពេទ្យតាមដាន និង តម្រូវអោយពាក់ម៉ាស់មុខចំពោះនរណាដែលបានទាក់ទងជាមួយអ្នកឆ្លង Covid-19 ៕
-
នាយករដ្ឋមន្រ្តីអេស្ប៉ាញប្រកាសដាក់ប្រទេសក្នុងគ្រាអាសន្នជាថ្មីទៀត ស្របពេលដែលករណីឆ្លង Covid-19 កើនឡើងខ្លាំង
អេស្ប៉ាញ៖ នាយករដ្ឋមន្ត្រីអេស្ប៉ាញ លោក ផេតដ្រូ សាន់ឆេស សម្រេចចិត្តប្រកាសដាក់ប្រទេសក្នុងស្ថានភាពគ្រាអាសន្នជាថ្មី នៅថ្ងៃអាទិត្យម្សិលមិញ ដើម្បីទប់ស្កាត់ការឆ្លងរាលដាលនៃជំងឺ Covid-19 ដោយដាក់បម្រាមគោចរនៅពេលយប់ និង ហាមឃាត់ការធ្វើដំណើររវាងតំបន់ក្នុងករណីខ្លះ នេះបើតាមសារព័ត៌មាន AFP នៅថ្ងៃទី២៦ ខែតុលា ឆ្នាំ២០២០ ។ នាយករដ្ឋមន្ត្រីអេស្ប៉ាញរូបនេះបានថ្លែងក្នុងសន្និសីទសារព័ត៌មាន បន្ទាប់ពីកិច្ចប្រជុំគណៈមន្រ្តីថា យើងកំពុងរស់នៅក្នុងស្ថានភាពធ្ងន់ធ្ងរ… វាគឺជាវិបត្តិសុខភាពធ្ងន់ធ្ងរបំផុតនៅសតវត្សរ៍ចុងក្រោយ ។ សូមជំរាបថា វិធានការណ៍ខាងលើនេះ បានចូលជាធរមានចាប់ពីយប់ថ្ងៃអាទិត្យចុងសប្តាហ៍មុននេះ ហើយតម្រូវឱ្យគ្រប់តំបន់ទាំងអស់ លើកលែងតែប្រជុំកោះCanary ដាក់បំរាមគោចរនៅពេលយប់ និង កម្រិតចំនួនមនុស្សដែលត្រូវបានអនុញ្ញាតឱ្យជួបជុំត្រឹមតែ០៦នាក់ចុះ ៕
-
អាមេរិកឲ្យវៀតណាមបង់ពន្ធប្រឆាំងនឹងការលក់បង្ខូចថ្លៃលើការនាំចូលបង្គារ តែក្រុមហ៊ុនវៀតណាមជំទាស់
-
អ្នកឆ្លង COVID-19 នៅទូទាំងពិភពលោកកើនឡើងជាង៤៣លាន៣សែននាក់ ក្នុងនោះស្លាប់ជាង១លាន១៥ម៉ឺននាក់ និងជាសះស្បើយជាង៣១លាន៩សែននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៤៣លាន៣២ម៉ឺន៨ពាន់៣៤ករណី ក្នុងនោះមានអ្នកជម្ងឺសរុបចំនួន១លាន១៥ម៉ឺន៩ពាន់៩នាក់ស្លាប់ និង ជាសះស្បើយឡើងវិញសរុបចំនួន៣១លាន៩០ម៉ឺន៦៣៦នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៦ ខែតុលា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៨លាន៨៨ម៉ឺន៩ពាន់១៧៩នាក់ ស្លាប់ចំនួន២៣ម៉ឺន៥១០នាក់ និងជាសះស្បើយចំនួន៥លាន៧៧ម៉ឺន២ពាន់៤៩៨នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៧លាន៩០ម៉ឺន៩ពាន់៥០នាក់ ស្លាប់ចំនួន១១ម៉ឺន៩ពាន់៣០នាក់ និងជាសះស្បើយ៧លាន១៣ម៉ឺន៣ពាន់៩៩៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៥លាន៣៩ម៉ឺន៤ពាន់១២៨នាក់ ស្លាប់១៥ម៉ឺន៧ពាន់១៦៣នាក់ និងជាសះស្បើយ៤លាន៨៣ម៉ឺន៥ពាន់៩១៥នាក់ ៕
-
បាតុករថៃគ្រោងដាក់ញាត្តិទៅកាន់អាល្លឺម៉ង់ ដើម្បីស៊ើបអង្កេតចំពោះការប្រើប្រាស់អំណាចរបស់ព្រះមហាក្សត្រខ្លួននាអំឡុងស្នាក់នៅប្រទេសអឺរ៉ុបនេះ
ថៃ៖ ក្រុមបាតុករថៃនៅថ្ងៃអាទិត្យម្សិលមិញបញ្ជាក់ថា ពួកគេនឹងដាក់ញាតិ្តទៅកាន់ប្រទេសអាល្លឺម៉ង់ ដើម្បីស្នើអោយមានការបើកការស៊ើបអង្កេតចំពោះការប្រើប្រាស់អំណាចរបស់ព្រះមហាក្សត្រថៃថ្មី ព្រះបាទ មហា វិជ្ជរ៉ាឡុងកន អំឡុងពេលទ្រង់ស្នាក់នៅក្នុងប្រទេសអឺរ៉ុបមួយនេះ ខណៈមនុស្សរាប់ពាន់នាក់បានប្រមូលផ្តុំគ្នាធ្វើបាតុកម្មសាជាថ្មីទៀត នៅចំកណ្តាលទីក្រុងបាងកក នេះបើតាមសារព័ត៌មានរ៉យទ័រនៅថ្ងៃទី២៦ ខែតុលា ឆ្នាំ២០២០ ។ នៅថ្ងៃអាទិត្យម្សិលមិញនេះ មនុស្សរាប់ពាន់នាក់បានប្រមូលផ្តុំគ្នាធ្វើបាតុកម្មសាជាថ្មីម្តងទៀត នៅចំកណ្តាលទីក្រុងបាងកករបស់ប្រទេសថៃ ដែលជាបាតុកម្មលើកដំបូង ចាប់តាំងពីនាយករដ្ឋមន្រ្តីថៃលោក ប្រាយុទ្ធ ចាន់អូចា បានព្រងើយកន្តើយនឹងកាលកំណត់បីថ្ងៃរបស់ពួកគេ ដែលទាមទារឲ្យលោក ប្រាយុទ្ធ ចុះចេញពីមុខតំណែងបានផុតកំណត់កាលពីថ្ងៃសៅរ៍សប្តាហ៍មុន ។ បាតុកម្មថ្ងៃអាទិត្យនេះជាការប្រមូលផ្តុំគ្នាជាទ្រង់ទាយធំជាលើកដំបូង បន្ទាប់ពីលោក ប្រយុទ្ធ ចាន់អូចា បានប្រកាសលុបចោលបទបញ្ជាដាក់ប្រទេសក្នុងគ្រាអាសន្ន រួមទាំងបទបញ្ជាពាក់ព័ន្ធដទៃទៀត ។ ទោះយ៉ាងណា ការិយាល័យនាយករដ្ឋមន្រ្តីថៃបានបង្ហោះកំណត់ត្រានៅលើបណ្តាញសង្គម Twitter ដោយបានបញ្ជាក់ថា លោក ប្រយុទ្ធ នឹងមិនចុះចេញពីតំណែងទេ ហើយវិបត្តិនេះ គួរតែត្រូវបានពិភាក្សានៅក្នុងសភា ដែលត្រូវបើកសម័យប្រជុំពិសេសនៅថ្ងៃចន្ទ និងថ្ងៃអង្គារសប្តាហ៍នេះ ៕
-
នាយករដ្ឋមន្ត្រីប្រទេសមួយទៀតហើយដែលបានឆ្លងជំងឺកូវីដ១៩
-
លោក ចូ បៃដិន សន្យាថា បើសិនជាប់ឆ្នោត លោកនឹងផ្តល់វ៉ាក់សាំង Covid-19 ដោយឥតគិតថ្លៃដល់ប្រជាជនអាមេរិកគ្រប់គ្នា
អាមេរិក៖ បេក្ខជនមកពីគណបក្សប្រជាធិបតេយ្យអាមេរិកលោក ចូ បៃដិន នៅថ្ងៃសុក្រនេះប្រកាសថា រូបលោកនឹងផ្តល់វ៉ាក់សាំង Covid-19 ដោយឥតគិតថ្លៃដល់ប្រជាជនអាមេរិកគ្រប់គ្នា បើសិនជាលោកជាប់ឆ្នោតជាប្រធានាធិបតី នេះបើតាមសារព័ត៌មានស៊ីនហួរនៅថ្ងៃទី២៤ ខែតុលា ឆ្នាំ២០២០ ។ ការសន្យាខាងលើនេះធ្វើឡើងបន្ទាប់ពីលោក បៃដិន បានបញ្ចប់ការវេទិការតស៊ូមិតជាមួយលោក ត្រាំ នៅជុំចុងក្រោយ មុនពេលបោះឆ្នោតប្រធានាធិបតីអាមេរិកនៅថ្ងៃទី០៣ ខែវិច្ឆិកាខាងមុខនេះ ។ លោក បៃដិន បាននិយាយនៅក្នុងសុន្ទរកថាមួយ ដែលដាក់ចេញនូវផែនការឆ្លើយតបនឹងជំងឺរាតត្បាតរបស់លោកថា នៅពេលយើងមានវ៉ាក់សាំងដែលមានសុវត្ថិភាព និង មានប្រសិទ្ធភាព វាត្រូវតែឥតគិតថ្លៃសម្រាប់ប្រជាជនគ្រប់រូប មិនថា អ្នកត្រូវបានធានារ៉ាប់រង ឬអត់នោះទេ ។ ជាមួយគ្នានោះ លោក បៃដិន ថែមទាំងបាននិយាយរិះគន់លោក ត្រាំ សម្រាប់ការឆ្លើយតបរបស់គាត់ចំពោះជំងឺ Covid-19 ដោយនិយាយថា ប្រធានាធិបតីបក្សសាធារណរដ្ឋកាន់ អំណាចបច្ចុប្បន្នបានបោះបង់ចោលការប្រយុទ្ធប្រឆាំងនឹងវីរុស និង ឈប់ជួយអាមេរិកទៀតហើយ ៕