សហរដ្ឋអាម៉េរិក៖ ក្រសួងការពារជាតិអាម៉េរិក ត្រូវបានគេរំពឹងថា នឹងចំណាយប្រាក់យ៉ាងច្រើនសន្ធឹកសន្ធាប់ ក្នុងការអភិវឌ្ឍប្រព័ន្ធមីស៊ីលការពារដែនអាកាស ក្រោមក្របខណ្ឌនៃកញ្ចប់ថវិកាយោធាឆ្នាំ២០១៩ ស្ថិតក្នុងគោលបំណងទប់ស្កាត់ការវាយប្រហារដោយគ្រាប់មីស៊ីលជាយថាហេតុណាមួយពីសំណាក់អ៊ីរ៉ង់ ឬក៏កូរ៉េខាងជើង។ 

អ៊ីតាលី៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា តួលេខជនរងគ្រោះបាត់បង់ជីវិតបន្តកើនឡើងដល់៣៥នាក់ហើយ និងជាច្រើនផ្សេងទៀតទទួលរងរបួសធ្ងន់-ស្រាល បន្ទាប់ពីហេតុការណ៍បាក់ស្ពានមួយកន្លែង ស្ថិតនៅភាគខាងជើងទីក្រុង ជេនណោ ប្រទេសអ៊ីតាលី។ 

អ៊ីរ៉ង់៖ ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានរាយការណ៍ថា អ៊ីរ៉ង់នឹងលក់ប្រេង និងឧស្ម័នបញ្ចុះតម្លៃដល់អតិថិជនអាស៊ី ស្របពេលដែលប្រទេសក្នុងតំបន់មជ្ឈិមបូព៌ាមួយនេះ កំពុងទទួលរងការដាក់ទណ្ឌកម្មឯកតោភាគីរបស់សហរដ្ឋអាម៉េរិក។ បើតាមទីភ្នាក់ងារព័ត៌មាន Bloomberg ថា ក្រុមហ៊ុន National Iranian Oil Company របស់រដ្ឋកំពុងកាត់បន្ថយតម្លៃផ្លូវការ សម្រាប់ការលក់នៅខែកញ្ញាខាងមុខនេះ ដល់អាស៊ី មកនៅត្រឹមកម្រិតទាបបំផុតក្នុងរយៈពេល១៤ឆ្នាំ បើធៀបនឹងប្រេងឆៅរបស់ប្រទេសអារ៉ាប៊ីសាអ៊ូឌីត។ យ៉ាងណាមិញ សហរដ្ឋអាម៉េរិកនឹងរារាំងការលក់ប្រេងអន្តរជាតិរបស់ប្រទេសអ៊ីរ៉ង់ចាប់ពីថ្ងៃទី៥ ខែវិច្ឆិកាខាងមុខនេះ នៅពេលដំណាក់កាលទី២នៃការដាក់ទណ្ឌកម្មត្រូវបានដាក់ជាថ្មី ដែលជាផ្នែកមួយនៃការដកខ្លួនចេញរបស់រដ្ឋាភិបាលទីក្រុងវ៉ាស៊ីនតោន ពីកិច្ចព្រមព្រៀងនុយក្លេអ៊ែរឆ្នាំ២០១៥។ ប្រភពព័ត៌មាននៅក្នុងក្រសួងប្រេងរបស់ប្រទេសអ៊ីរ៉ង់ មិនបានផ្ដល់ព័ត៌មានលម្អិតនៃការបញ្ចុះតម្លៃនេះទេ ប៉ុន្តែបានព្យាយាមនិយាយសម្រាលវិធានការនេះថា ជាការអនុវត្តរបស់ឧស្សាហកម្មជាទូទៅ ហើយការបញ្ចុះតម្លៃ គឺជាផ្នែកមួយនៃលក្ខណៈទូទៅរបស់ទីផ្សារពិភពលោក ដែលត្រូវបានផ្ដល់ដោយក្រុមហ៊ុននាំចេញប្រេងទាំងអស់។ ជាមួយគ្នានេះ ក្រុមអ្នកវិភាគបានធ្វើការព្យាករណ៍ថា ការលក់របស់អ៊ីរ៉ង់អាចនឹងធ្លាក់ចុះប្រហែល៧០ម៉ឺនបារ៉ែលក្នុងមួយថ្ងៃពីកម្រិតបច្ចុប្បន្នប្រហែល២,៣លានបារ៉ែល។ ដោយឡែកក្រុមហ៊ុនថាមពលបារាំង Total ឲ្យដឹងថា ខ្លួនកំពុងដកគម្រោងវិនិយោគរាប់ពាន់លានដុល្លារអាម៉េរិកនៅអណ្ដូងប្រេង South Pars នៅភាគខាងត្បូងប្រទេសអ៊ីរ៉ង់ ដោយសារការដាក់ទណ្ឌកម្មជាថ្មីនេះ ៕

សហរដ្ឋអាម៉េរិក៖ ក្រុមហ៊ុន Boeing បានឲ្យដឹងថា ខ្លួនកំពុងគាំទ្រការអំពាវរបស់ប្រធានាធិបតីអាម៉េរិកលោក ដូណាល់ ត្រាំ ដែលចង់ឲ្យមានការបង្កើនចំនួនការងារឲ្យកាន់ច្រើនថែមទៀត តាមរយៈការសន្យាថា នឹងបង្កើតឱកាសការងារសម្រាប់ពលករអាម៉េរិកប្រមាណ១០០,០០០កន្លែងនៅក្នុងអំឡុងពេល៥ឆ្នាំខាងមុខនេះ។

បរទេស៖ យោងតាមរបាយការណ៍ថ្មីមួយរបស់អង្គការសហប្រជាជាតិបានបង្ហាញថា ក្រុមសកម្មប្រយុទ្ធISIL ចន្លោះពី២០,០០០នាក់ ទៅ៣០,០០០នាក់ បន្តមានវត្តមាន នៅឡើយនៅលើទឹកដីរបស់ប្រទេសស៊ីរី និងអ៊ីរ៉ាក់ បើទោះជាពួកឧទ្ទាមនេះ បានបរាជ័យផ្នែកយោធា និងបាត់បង់ឥទ្ធិពលមួយផ្នែកធំនៅក្នុងតំបន់មជ្ឈិមបូព៌ា។

សហរដ្ឋអាម៉េរិក៖ រដ្ឋាភិបាលទីក្រុងវ៉ាស៊ីនតោនបានធ្វើការពន្យារពេលលក់យន្តហោះចម្បំាងដ៏មានអនុភាព ធន់ F-35 ទៅឲ្យប្រទេសតួកគី ខណៈការសម្រេចចិត្តនេះ បានបង្កការព្រួយបារម្ភថា ចំណងទំនាក់ទំនងទ្វេភាគីអាចនឹងមានការប៉ះទង្គិចគ្នាបន្ថែមទៀត ក្រោយសហរដ្ឋអាម៉េរិកទើបដាក់ទណ្ឌកម្មលើរដ្ឋាភិបាលទីក្រុងអង់ការ៉ា។

អាល្លឺម៉ង់៖ អ្នកនាំពាក្យរដ្ឋាភិបាលអាល្លឺម៉ង់បានលើកឡើងថា អធិការបតីអាល្លឺម៉ង់ លោកស្រី អាន់ជែលឡា មឺគែល នឹងត្រូវជួបពិភាក្សាការងារជាមួយប្រធានាធិបតី រុស្ស៊ី លោក វ្ល៉ាឌីមៀ ពូទីន នៅក្នុងថ្ងៃសៅរ៍សប្ដាហ៍នេះ (ម៉ោងក្នុងតំបន់) នៅខាងក្រៅទីក្រុងប៊ែរឡាំង។