តួកគី៖ រដ្ឋមន្ត្រីការបរទេសរុស្ស៊ី លោក សឺហ្គៃ ឡាវរ៉ូវ នឹងត្រូវស្ថិតនៅក្នុងប្រទេសតួកគីនៅក្នុងថ្ងៃ ច័ន្ទ ដើមសប្តាហ៍នេះ (ម៉ោងក្នុងតំបន់) សម្រាប់ជំនួបរយៈពេលពីរថ្ងៃ ស្របពេលដែលភាពតានតឹងរវាងតួកគី និងសហរដ្ឋអាម៉េរិកកាន់តែកើនឡើង ដោយសារតែការដាក់ទណ្ឌកម្ម។

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ បានចុះហត្ថលេខាលើសេចក្ដីព្រាងច្បាប់ស្ដីពីកញ្ចប់ថវិកាយោធា៧១៦ពាន់លានដុល្លារ ដែលនឹងត្រូវប្រើប្រាស់ក្នុងការចំណាយលើវិស័យយោធា និងរួមបញ្ចូលទាំងការត្រួតពិនិត្យឡើងវិញ លើកិច្ចសន្យានាពេលកន្លងមករវាងរដ្ឋាភិបាលអាម៉េរិក ជាមួយក្រុម ហ៊ុនចិន ZTE និងក្រុមហ៊ុន Huawei។ 

ឥណ្ឌូណេស៊ី៖ ទីភ្នាក់ងារកាត់បន្ថយគ្រោះមហន្តរាយជាតិរបស់ឥណ្ឌូណេស៊ី BNPB បាននិយាយនៅក្នុងថ្ងៃចន្ទ នេះថា ចំនួនអ្នកស្លាប់ដោយសារការវាយប្រហារពីគ្រោះរញ្ជួយដីដ៏អាក្រក់ជាបន្តបន្ទាប់មកនេះ នៅលើកោះទេសចរណ៍ លុមបុក បានកើនឡើងដល់៤៣៦នាក់ហើយ ខណៈមនុស្ស១,៣៥៣នាក់ទៀតរងរបួស និងច្រើនជាង៣៧០,០០០នាក់ បង្ខំចិត្តភៀសខ្លួនទៅកាន់ទីសុវត្ថិភាព។

កូរ៉េខាងត្បូង៖ មន្រ្តីជាន់ខ្ពស់មកពីប្រទេសកូរ៉េខាងត្បូង និងកូរ៉េខាងជើងបានបើកកិច្ចប្រជុំកម្រិតខ្ពស់ទ្វេភាគីមួយនៅក្នុងថ្ងៃច័ន្ទ ដើមសប្តាហ៍នេះ (ម៉ោងក្នុងតំបន់) ដើម្បីធ្វើការជជែកពិភាក្សាគ្នាអំពីកាលបរិច្ឆេទ និងទីកន្លែងសម្រាប់រៀបចំជំនួបកំពូលលើកទី៣ រវាងប្រធានាធិបតីកូរ៉េខាងត្បូង លោក មូន ជែអ៊ីន និងប្រមុខដឹកនាំកូរ៉េខាងជើងលោក គីម ជុងអ៊ុន នៅចុងខែសីហាខាងមុខនេះ។

ចិន៖ យោងតាមប្រភពរបស់អាជ្ញាធរក្នុងតំបន់បានឱ្យដឹងថា មនុស្ស៥នាក់បានទទួលរងរបួស បន្ទាប់ពីគ្រោះរញ្ជួយដីក្នុងកម្រិត៥.០វ៉ិកទ័របានធ្វើការវាយប្រហារ ខេត្តយូណាន ភាគនិរតីប្រទេសចិន នៅព្រឹកថ្ងៃច័ន្ទ ដើមសប្តាហ៍នេះ (ម៉ោងក្នុង តំបន់) ។

ឡាវ៖ តាមរយៈបាយការណ៍មួយរបស់ធនាគារពិភពលោក (World Bank) បានឱ្យ ដឹងថា ឡាវកំពុងដើរលើផ្លូវឆ្ពោះទៅការលេចត្រដែតឡើងក្លាយជាប្រទេសមួយដ៏សំខាន់នៅក្នុងតំបន់ ខណៈបណ្ដាក្រុមហ៊ុនបរទេសចាត់ទុកថា ប្រទេសអាស៊ីអាគ្នេយ៍មួយនេះ គឺជាចំណុចកណ្តាលផលិតកម្មនៅក្នុងតំបន់។ 

ឥណ្ឌូណេស៊ី៖ យោងតាមប្រភពរបស់អាជ្ញាធរឥណ្ឌូណេស៊ីបានរាយការណ៍ថា ក្មេងអាយុ១២ឆ្នាំម្នាក់គត់ដែលនៅមានជីវិត បន្ទាប់ពីហេតុការណ៍ធ្លាក់យន្តហោះមួយគ្រឿង បានសម្លាប់ជីវិតមនុស្សសរុប៨នាក់នៅប្រទេសឥណ្ឌូនេស៊ីខាងកើត។

ស៊ីរី៖ ក្រុមអង្គការឃ្លាំមើលសិទ្ធិមនុស្សស៊ីរីបានរាយការណ៍ថា មានមនុស្ស៣៩នាក់បាត់បង់ជីវិត ក្នុងនោះមានកុមារ១២នាក់ ខណៈមនុស្សរាប់សិបនាក់ផ្សេងទៀតបាត់ខ្លួន បន្ទាប់ពីការផ្ទុះដ៏កក្រើកមួយ ដែលបណ្ដាលឲ្យអគារមួយកន្លែងដួលរលំនៅឯខេត្ត អ៊ីដលីប។