កូរ៉េខាងត្បូង៖ រដ្ឋាភិបាលកូរ៉េខាងត្បូងបានលើកឡើងថា ខ្លួនគ្រោងនឹងរៀបចំកិច្ចប្រជុំថ្នាក់រដ្ឋមន្រ្តីជាមួយកូរ៉េខាងជើងនាសប្តាហ៍ក្រោយនេះ ស្ថិតក្នុងគោលបំណង ពិភាក្សាស្តីអំពីវិធីសាស្រ្តអនុវត្តតាមសេចក្តីថ្លែងការណ៍រួមគ្នា ដែលត្រូវបានចុះហត្ថលេខាដោយមេដឹកនាំកំពូលប្រទេសទាំងពីរ កាលពីខែមេសាកន្លងទៅនេះ។

ឥណ្ឌា៖ ភ្លៀងរដូវវស្សាបានបង្កជាគ្រោះមហន្តរាយទឹកជំនន់ និងល្បាប់ភក់វាយ ប្រហារនៅទូទំាងប្រទេសឥណ្ឌា ហើយបណ្តាលឲ្យប្រជាជនប្រមាណ៨០០នាក់ ត្រូវបានគេអះអាងថា បានបាត់បង់ជីវិតនៅតាមបណ្តារដ្ឋចំនួន៨ ចាប់តាំងពីចុងខែមិថុនាកន្លងទៅនេះ។

សហរដ្ឋអាមេរិក៖ ក្រុមហ៊ុនបច្ចេកវិទ្យលំដាប់ពិភពលោករបស់សហរដ្ឋអាម៉េរិក Apple បានក្លាយជាក្រុមហ៊ុនដំបូងគេនៅលើពិភពលោក ដែលមានតម្លៃឈានដល់១ទ្រីលានដុល្លារអាម៉េរិក។ បើតាមសារព័ត៌មានក្នុងស្រុក Apple បានក្លាយជាក្រុមហ៊ុនដំបូងគេដែលមានតម្លៃប្រមាណ៩០០ប៊ីលានដុល្លារអាម៉េរិក កាលពី៩ខែមុន ពោលគឺនៅថ្ងៃទី៣ ខែវិច្ឆិកា ឆ្នាំ២០១៧កន្លងទៅនេះ។ ដោយមានលោក Tim Cook ជានាយកប្រតិបត្តិ Apple ដែលជាក្រុមហ៊ុនផលិតទូរស័ព្ទម៉ាក iPhone នេះ មានតម្លៃភាគហ៊ុនរបស់ក្រុមហ៊ុនបានកើនឡើងដល់២០៧.០៥ ខណៈភាគហ៊ុនរបស់ក្រុមហ៊ុនបច្ចេកវិទ្យាលំដាប់ពិភពលោកនេះ បានកើនឡើង បន្ទាប់ពីមានសេចក្តីរាយការណ៍ថា លទ្ធផលនៃការលក់របស់ក្រុមហ៊ុនមានភាពរឹងមាំនៅក្នុងត្រីមាសចុងក្រោយនេះ។ គួរបញ្ជាក់ផងដែរថា ក្រុមហ៊ុន Apple បានលក់ទូរសព្ទ iPhones ចំនួន៤១.៣លានគ្រឿង កាលពីត្រីមាសកន្លងទៅ ហើយសេចក្តីរាយការណ៍បានឲ្យដឹងថា តម្លៃលក់ជាមធ្យមគឺ៧២៤ដុល្លារអាម៉េរិកក្នុងមួយគ្រឿង។ ស្របពេលជាមួយគ្នានោះដែរ ក្រុមហ៊ុន Apple បានផ្ដួលក្រុមហ៊ុន Amazon និងក្រុមហ៊ុន Microsoft ដើម្បីក្លាយជាក្រុមហ៊ុនឯកជនដំបូងគេលើពិភពលោក ដែលមានទ្រព្យ១ទ្រីលានដុល្លារអាម៉េរិក៕

រុស្ស៊ី៖ សមាជិកសភារុស្ស៊ី លោក សឺហ្គៃ រីយ៉ាបាក់ឃីន បានថ្លែងឲ្យដឹងកាលពីថ្ងៃព្រហស្បតិ៍តថា រដ្ឋាភិបាលទីក្រុង ម៉ូស្គូ អាចនឹងរឹតត្បិតទៅលើការនាំចេញក្បាលម៉ាស៊ីនបាញ់គ្រាប់រ៉ុក្កែត RD-180 ទៅកាន់សហរដ្ឋអាម៉េរិក បើសិនណាជារដ្ឋាភិបាលទីក្រុងវ៉ាស៊ីនតោនដាក់ទណ្ឌកម្មថ្មីមែននោះ។ សូមរំលឹកថា សហរដ្ឋអាម៉េរិកបានប្រកាសកាលពីថ្ងៃពុធសប្តាហ៍នេះថា ខ្លួននឹងដាក់ទណ្ឌកម្មបន្ថែមទៀតទៅលើប្រទេសរុស្ស៊ី ក្រោយពីបានកំណត់ឃើញថា ទីក្រុងម៉ូស្គូជាអ្នកទទួលខុសត្រូវទៅលើរឿងដាក់ថ្នាំបំពុលទៅលើអតីតអ្នកស៊ើបការណ៍សម្ងាត់របស់រុស្ស៊ី គឺលោក សឺហ្គៃ ស្គ្រីផាល់ និងកូនស្រីរបស់គាត់ នៅក្នុងប្រទេសអង់គ្លេស។ ប៉ុន្តែប្រទេសរុស្ស៊ី បានបដិសេធជាច្រើនលើកច្រើនសាថា មិនមានអ្វីដែលជាប់ពាក់ព័ន្ធទៅនឹងរឿងអស់នេះនោះទេ៕

សហរដ្ឋអាម៉េរិក៖ រដ្ឋបាលរបស់ប្រធានាធិបតីអាម៉េរិកលោក ដូណាល់ ត្រាំ បាន ប្រកាសអំពីផែនការមួយថា នឹងបង្កើតកងកម្លាំងអាវកាសមួយ ដែលជាសាខាទី៦ នៃយោធាសហរដ្ឋអាម៉េរិកនៅត្រឹមឆ្នាំ២០២០ខាងមុខនេះ។ តាមរយៈផែនការនេះដែរ ត្រូវបានដាក់បង្ហាញដោយអនុប្រធានាធិបតីអាម៉េរិក លោក ម៉ៃ ផែន ក្នុងគោលបំណងដើម្បីពង្រឹងអំណាចរបស់សហរដ្ឋអាម៉េរិកសម្រាប់ទប់ទល់នឹងការរីកចម្រើនរបស់សត្រូវ ក្នុងនោះរួមមាន រុស្ស៊ី និងចិនជាដើម។

អង្គការសហប្រជាជាតិ៖ អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូទែរែស បានធ្វើការអំពាវនាវឲ្យមានការស៊ើបអង្កេតឯករាជ្យមួយ ទៅលើការវាយប្រហារតាមដែនអាកាសរបស់ក្រុមចម្រុះអារ៉ាប់ ដឹកនាំដោយអារ៉ាប៊ីសាអូឌីតទៅលើរថយន្ដក្រុងដឹកសិស្សសាលាមួយគ្រឿងនៅប្រទេសយ៉េមែន ដែលបណ្តាលឲ្យមានមនុស្សស្លាប់ និងរងរបួសជាច្រើននាក់។

ជប៉ុន៖ ទីក្រុងណាហ្គាសាគី ប្រទេសជប៉ុន នៅក្នុងថ្ងៃព្រហស្បតិ៍តនេះ បានរៀបចំពិធីរំលឹកខួបប្រចាំឆ្នាំលើកទី៧៣ នៃការទម្លាក់គ្រាប់បែកបរមាណូរបស់សហរដ្ឋអាម៉េរិក ក្រោមការចូលរួមជាលើកដំបូងពីសំណាក់អគ្គលេខាធិការរបស់អង្គការសហប្រជាតិ លោក អាន់តូនីញ៉ូ ហ្គួទែរ៉ែស ខណៈក្រុមអ្នកប្រវត្តិសាស្រ្តអន្តរជាតិបានឆ្លៀតរំលឹកជប៉ុនឲ្យចងចាំពីទង្វើដែលខ្លួនបានប្រព្រឹត្តកាលពីសម័យសង្រ្គាមលោកផងដែរ។ 

សហរដ្ឋអាម៉េរិក៖ រដ្ឋាភិបាលទីក្រុងវ៉ាស៊ីនតោនគ្រោងដាក់ទណ្ឌកម្មសេដ្ឋកិច្ចថ្មីមួយ ប្រឆាំងនឹងរុស្ស៊ី បន្ទាប់ពីបានកំណត់ថា រុស្ស៊ីគឺជាអ្នកនៅពីក្រោយការវាយប្រហារដោយសារធាតុគីមីលើអតីតមន្ត្រីនៃទីភ្នាក់ងារស៊ើបការណ៍សម្ងាត់របស់រុស្ស៊ីម្នាក់នៅក្នុងប្រទេសអង់គ្លេស។

ថៃ៖ នាយករដ្ឋមន្រ្តីថៃ លោក ប្រាយុទ្ធ ចាន់អូចា នៅក្នុងថ្ងៃពុធសប្តាហ៍នេះ បានចុះត្រួតពិនិត្យតាមដានទំនប់ទឹក Kaeng Krachan ស្របពេលមានការព្រួយបារម្ភខ្លាំង នៅក្នុងចំណោមប្រជាជនរស់នៅក្នុងតំបន់ ខណៈកម្រិតទឹកនៃទំនប់នេះ គឺនៅខាងលើគែម ដែលអាចនឹងហៀហូរចេញពីទំនប់។