ឥណ្ឌូណេស៊ី៖ ចំនួនមនុស្សស្លាប់ ដោយសារគ្រោះរញ្ជួយដី ជម្រៅរាក់ មួយ កម្រិត ៦.៩វ៉ិកទ័រ ដែលបានវាយប្រហារ កោះ លុមបុក (Lombok) ភាគ កណ្តាលប្រទេស ឥណ្ឌូណេស៊ី បានកើនដល់១៣១នាក់ ហើយ ខណៈប្រជាជន ឥណ្ឌូណេស៊ី ប្រហែល ១៥៦,០០០នាក់ ត្រូវបានជម្លៀសខ្លួនចេញពីទីលំនៅរបស់ពួកគេ ។

ចិន៖ ក្រុមហ៊ុនកាហ្វេ Starbucks និងក្រុមហ៊ុនចិន Alibaba បានប្រកាសចាប់ដៃគូជាយុទ្ធសាស្ត្រជាមួយគ្នា ដើម្បីផ្តល់សេវាដឹកជញ្ជូនកាហ្វេនៅក្នុងប្រទេសចិនឲ្យកាន់តែឆាប់រហ័ស ដែលនឹងចាប់ផ្តើមនៅខែកញ្ញាខាងមុខ នៅតាមហាងកាហ្វេ១៥០កន្លែងនៅទីក្រុងប៉េកាំង និងទីក្រុង សៀងហៃ។ គិតត្រឹមដំណាច់ឆ្នាំនេះ ក្រុមហ៊ុនទាំងពីរក៏មានផែនការពង្រីកសេវាដឹកជញ្ជូនកាហ្វេនេះ ឲ្យបានដល់ជាង២ពាន់ហាងនៅតាម៣០ទីក្រុង។

សហរដ្ឋអាម៉េរិក៖ រដ្ឋមន្រ្តីការពារជាតិអាម៉េរិកលោក ចែម ម៉ាត់ទីស បាននិយាយថា រូបលោកកំពុងសម្លឹងមើលឱកាសដ៏ល្អមួយ ដើម្បីបន្តធ្វើកិច្ចពិភាក្សាជាមួយសមភាគីចិន ដែលគ្រោងនឹងបំពេញទស្សនកិច្ចនៅរដ្ឋធានីវ៉ាស៊ីនតោន ក្នុងឆ្នាំ២០១៨នេះ។

ហ្វីលីពីន៖ ឆ្មាំល្បាតដែនសមុទ្រហ្វីលីពីន PCG បានបញ្ជាក់ក្នុងថ្ងៃពុធនេះថា ពួកគេបាននិងកំពុងចេញប្រតិបត្តិការតាមដែនសមុទ្រ នៅជាប់ព្រំដែនជាមួយប្រទេសម៉ាឡេស៊ី បន្ទាប់ពីមានសេចក្តីរាយការណ៍មួយបានអះអាងថា ទូកដឹកអ្នកដំណើរចំនួន១៦នាក់ មួយគ្រឿងបានលិចចាប់តាំងពីថ្ងៃទី៣០ ខែកក្កដាកន្លងទៅនេះ។

កូរ៉េខាងត្បូង៖ ក្រសួងបង្រួបបង្រួមកូរ៉េខាងត្បូងទទួលបន្ទុកកិច្ចការអន្តរកូរ៉េមានក្តីរំពឹងថា ជំនួយមនុស្សធម៌នឹងកើនឡើងសម្រាប់ប្រជាជនកូរ៉េខាងជើង ស្ថិតក្រោមគោលការណ៍ណែនាំថ្មីរបស់អង្គការសហប្រជាជាតិ។

កូឡុំប៊ី៖ លោក អ៊ីរ៉ាន ឌូកេ បានស្បថចូលកាន់ដំណែងជាផ្លូវការហើយ ក្នុងនាមជាប្រធានាធិបតីទី៦០របស់ប្រទេសកូឡុំប៊ី នៅក្នុងថ្ងៃអង្គារ៍ សប្ដាហ៍នេះ (ម៉ោងក្នុងតំបន់) ដែលពិធីនេះ ធ្វើឡើងស្របពេលដែលកូឡុំប៊ីកំពុងមានភាពតានតឹងជាមួយប្រទេសវេណេស៊ុយអេឡា។

អ៊ីរ៉ង់៖ រដ្ឋមន្រ្តីការបរទេសកូរ៉េខាងជើងលោក រី យ៉ុង ហូ បានធ្វើដំណើរទៅដល់រដ្ឋធានីតេហេរ៉ង់ហើយ នៅក្នុងថ្ងៃអង្គារ៍ សប្តាហ៍នេះ (ម៉ោងក្នុងតំបន់) ដោយរូបលោកបានជួបពិភាក្សាជាមួយសមភាគីអ៊ីរ៉ង់ លោក ម៉ូហាំម៉េដ ហ្សាវ៉ាដ ហ្សារីហ្វ។

វេណេស៊ុយអេឡា៖ ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ បានសន្យាថា នឹងបង្ហាញភ័ស្ដុតាងដែលបញ្ជាក់ថា រដ្ឋាភិបាលកូឡុំប៊ីមានជាប់ពាក់ព័ន្ធនឹងការប៉ុនប៉ងធ្វើឃាតរូបលោក កាលពីចុងសប្ដាហ៍កន្លងទៅ។

សហរដ្ឋអាម៉េរិក៖ ទីប្រឹក្សាសន្តិសុខជាតិអាម៉េរិក លោក ចន បូលតុន បានគូសបញ្ជាក់ថា រដ្ឋាភិបាលទីក្រុងព្យុងយ៉ាងមិនបានចាត់វិធានការចាំបាច់ណាមួយ ក្នុងការរំសាយអាវុធនុយក្លេអ៊ែរនោះទេ បើទោះជាមានកិច្ចព្រមព្រៀងរវាងប្រធានាធិបតីអាម៉េរិកលោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន កាលពី ខែមិថុនាកន្លងទៅនេះ។