ឥណ្ឌូណេស៊ី៖ យោងតាមប្រភពរបស់អាជ្ញាធរឥណ្ឌូណេស៊ីបានរាយការណ៍ថា តួលេខជនរងគ្រោះបាត់បង់ជីវិត ដោយសារតែការវាយប្រហារពីគ្រោះរញ្ជួយដីក្នុង កម្រិត៧វ៉ិកទ័រនៅកោះទេសចរណ៍ដ៏ល្បី លុមបុក ស្ថិតនៅភាគកណ្តាលប្រទេស កាលពីថ្ងៃអាទិត្យចុងសប្តាហ៍មុននេះ បានបន្តកើនឡើងដល់១០៥នាក់ហើយ។

ឡាវ៖ អត្រាគ្រួសារអ្នកក្រីក្រទំនងជាមានការកើនឡើងវិញក្នុងប្រទេសឡាវ នៅឆ្នាំ២០១៨នេះ ដោយសារតែគ្រោះមហន្តរាយទឹកជំនន់ ដែលបានវាយប្រហារនៅតាមតំបន់ជាច្រើនរបស់ប្រទេសអាស៊ានមួយនេះ ដោយជាលទ្ធផលនោះ បណ្តាលឲ្យមានមនុស្សស្លាប់ និងបាត់ខ្លួនជាច្រើននាក់ ព្រមទាំងបំផ្លិចបំផ្លាញទ្រព្យសម្បត្តិក្នុងតំបន់យ៉ាងច្រើន។

អង្គការសហប្រជាជាតិ៖ ក្រុមប្រឹក្សាអង្គការសហប្រជាជាតិ UNSC បានសម្រេចអនុម័ត លើសេចក្តីព្រាងរបស់សហរដ្ឋអាម៉េរិក ដែលមានគោលបំណងធានាបានថា ការដាក់ទណ្ឌកម្មលើកូរ៉េខាងជើង នឹងមិនបង្កផលប៉ះពាល់ដល់ការផ្តល់ជំនួយមនុស្សធម៌ដល់រដ្ឋកុម្មុយនីស្តមួយនេះឡើយ។

តួកគី៖ សារព័ត៌មានតួកគីបានចេញផ្សាយនូវប្រភពទទួលបានពីមន្រ្តីការទូត ដោយបញ្ជាក់ថា គណៈប្រតិភូតួកគីមួយក្រុមគ្រោងនឹងធ្វើដំណើរទៅកាន់រដ្ឋធានីវ៉ាស៊ីនតោន ដើម្បីបំពេញទស្សនកិច្ចរយៈពេល២ថ្ងៃនៅសហរដ្ឋអាម៉េរិក ក្នុងគោលបំណងជជែកពិភាក្សាគ្នាពាក់ព័ន្ធនឹងភាពតានតឹងនានា រវាងប្រទេសសម្ព័ន្ធមិត្តអង្គការណាតូទាំងពីរនេះ។

កាណាដា៖ រដ្ឋមន្ត្រីការបរទេសកាណាដា លោកស្រី គ្រីស្ទៀ ហ្វ្រីឡេន បាននិយាយថា រដ្ឋាភិបាលកាណាដានឹងមិនផ្លាស់ប្ដូរគោលជំហររបស់ខ្លួនឡើយ បើទោះជាត្រូវប្រឈមមុខនឹងជម្លោះការទូតជាមួយអារ៉ាប៊ីសាអូឌីត នោះគឺបន្តនិយាយពីបញ្ហាសិទ្ធិមនុស្ស និងសិទ្ធិស្ត្រី។ ការអះអាងរបស់ប្រមុខការទូតកាណាដារូបនេះ ត្រូវបានធ្វើឡើងបន្ទាប់ពីអារ៉ាប៊ី សាអូឌីតសម្រេចចិត្តបណ្ដេញអគ្គរដ្ឋទូតកាណាដាចេញពីប្រទេសរបស់ខ្លួន ដើម្បីជាការឆ្លើយតបនឹងការរិះគន់របស់រដ្ឋាភិបាលកាណាដា ពាក់ព័ន្ធនឹងការចាប់ខ្លួន សកម្មជនការពារសិទ្ធិមនុស្សនៅក្នុងរដ្ឋអារ៉ាប់មួយនេះ។

ជប៉ុន៖ មន្រ្តីគ្រប់គ្រងអាកាសធាតុជប៉ុនបាននិយាយថា ព្យុះទីហ្វុងមួយ ត្រូវបានគេរំពឹងថានឹងធ្វើដំណើរទៅដល់ដែនកោះ អ៊ីហ្ស៊ូ ស្ថិតនៅភាគខាងត្បូងទីក្រុងតូក្យូ នៅក្នុងថ្ងៃពុធ សប្តាហ៍នេះ (ម៉ោងក្នុងតំបន់)។

ហ្វីលីពីន៖  ស្ថាប័នប៉ូលិសជាតិហ្វីលីពីន ដែលហៅកាត់ (PNP) បានសម្រេចបណ្តេញមន្ត្រីដែលប្រព្រឹត្តខុសច្បាប់សរុបចំនួន២១៨១នាក់ចេញពីក្របខណ្ឌប៉ូលិសគិតចាប់តាំងពីប្រធានាធិបតីហ្វីលីពីនលោក រ៉ូឌ្រីហ្គោ ឌូទើតេ បានចូលកាន់មុខតំណែងកាលពីខែមិថុនា ឆ្នាំ២០១៦មក។

ស្វីស៖ សហភាពអឺរុបបានបង្ហាញការសោកស្ដាយ ចំពោះគម្រោងដាក់ទណ្ឌកម្មសេដ្ឋកិច្ចឡើងវិញ ប្រឆាំងនឹងអ៊ីរ៉ង់ពីសំណាក់សហរដ្ឋអាម៉េរិក ហើយថា ប្រទេសជាហត្ថលេខីដទៃទៀតនឹងធ្វើការរួមគ្នា ដើម្បីរក្សាបណ្ដាញទំនាក់ទំនងហិរញ្ញវត្ថុជាមួយរដ្ឋាភិបាលទីក្រុងតេហេរ៉ង់។