អ៊ីស្រាអ៊ែល៖ ក្រសួងការពារជាតិអ៊ីស្រាអ៊ែល បានគូសបញ្ជាក់ថា កងយន្តហោះចម្បាំងរបស់ខ្លួនបានបើកការវាយប្រហារយ៉ាងកក្រើក ទៅលើមូលដ្ឋានយោធាយុទ្ធសាស្រ្តរបស់ក្រុមជ្រុលនិយមហាម៉ាស់ជាង១៤០កន្លែង នៅក្នុងតំបន់ហ្គាហ្សារបស់ប៉ាឡេស្ទីន។

កូរ៉េខាងត្បូង៖ មន្រ្តីជាន់ខ្ពស់មកពីកូរ៉េខាងត្បូង និងកូរ៉េខាងជើងបានធ្វើកិច្ចពិភាក្សា គ្នាទ្វេភាគី ដោយផ្តោតសំខាន់លើកិច្ចសហប្រតិបតិ្តការ ដើម្បីធ្វើទំនើបកម្ម និងការតភ្ជាប់បណ្តាញផ្លូវរថភ្លើងគ្មានដែនកំណត់ ឆ្លងកាត់ព្រំដែនរវាងប្រទេសទាំងពីរ។

ឥណ្ឌូណេស៊ី៖ ទីភ្នាក់ងារឧតុនិយម និងភូមិសាស្ត្រឥណ្ឌូណេស៊ី បានរាយការណ៍នៅ ក្នុងថ្ងៃព្រហស្បតិ៍តនេះ (ម៉ោងក្នុងតំបន់)ថា គ្រោះរញ្ជួយដីថ្មីមួយទៀតមានកម្រិត ៦.២ វ៉ិកទ័របានធ្វើការវាយប្រហារទៅលើកោះ លុមបុក ដោយបង្កឲ្យអគារមួយចំនួនរដួលរលំ។ ប៉ុន្តែស្របពេលជាមួយគ្នានោះដែរ មិនទាន់មានការបញ្ជាក់ពីជនរងគ្រោះនៅឡើយទេ ខណៈគ្រោះមហន្តរាយធម្មជាតិនេះ បានកើតឡើងតែប៉ុន្មានថ្ងៃប៉ុណ្ណោះ ក្រោយគ្រោះរញ្ជួយផែនដីកម្រិត៦.៩វ៉ិកទ័រ បានធ្វើការវាយប្រហារលើកោះទេសចរណ៍ដ៏ល្បីមួយនេះ កាលពីថ្ងៃអាទិត្យកន្លងទៅ ហើយបានផ្ដាច់ជីវិតមនុស្សកើនដល់៣៤៧នាក់ និង១,៤៧៧នាក់រងរបួស ហើយ១៦៥,០០៣ នាក់ត្រូវបានជម្លៀសខ្លួនចេញពីផ្ទះសម្បែងរបស់ពួកគេ៕

មីយ៉ាន់ម៉ា៖ ទីភ្នាក់ងារសារព័ត៌មានមីយ៉ាន់ម៉ាបានរាយការណ៍ថា អនុប្រធានាធិបតីមីយ៉ាន់ម៉ាលោក U Henry Van Thio (យូ ហិនរី វ៉ាន់ ធីអូ) បានធ្វើការអំពាវនាវយ៉ាងទទូចឱ្យបង្កើតអង្គការសម្របសម្រួលមួយ ដើម្បីពន្លឿនការស្តាឡើងវិញនៅក្នុងតំបន់រងគ្រោះដោយសារតែទឹកជំនន់ ក៏ដូចជាកំណត់តំបន់រងគ្រោះដោយគ្រោះមហន្តរាយ។

អ៊ីរ៉ង់៖ ថ្លែងក្នុងជំនួបពិភាក្សាជាមួយរដ្ឋមន្រ្តីការបរទេសកូរ៉េខាងជើង លោក រី យ៉ុងហួ ដែលកំពុងបំពេញទស្សនកិច្ចរយៈពេល២ថ្ងៃនៅក្នុងរដ្ឋធានីតេហេរ៉ង់ ប្រធានាធិបតីអ៊ីរ៉ង់ លោក ហាសាន់ រ៊ូហាន់នី បានធ្វើការរិះគន់ធ្ងន់ៗជាថ្មីម្តងទៀត ពាក់ព័ន្ធនឹងការសម្រេចចិត្តដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ពីសំណាក់សហរដ្ឋអាម៉េរិក ហើយថែមទាំងហៅមហាអំណាចនេះថា ជារដ្ឋមិនគួរឲ្យទុកចិត្ត។

រុស្ស៊ី៖ ទីភ្នាក់ងារសារព័ត៌មានរុស្ស៊ីបានរាយការណ៍នៅក្នុងថ្ងៃពុធសប្តាហ៍នេះ (ម៉ោងក្នុងតំបន់)ថា កងកម្លាំងឆ្មាំជាតិរុស្ស៊ី៤រូបបានបាត់បង់ជីវិត ដោយសារតែផ្ទាំងទឹកកក នៅលើភ្នំ Caucasus ធ្លាក់បាក់សង្កត់ពួកគេ។ បើតាមសេចក្តីថ្លែងការណ៍របស់កងកម្លាំងឆ្មាំជាតិរុស្ស៊ី ជនរងគ្រោះទាំង៤រូបនេះ ត្រូវបានគេដឹងថា បានស្លាប់ក្នុងសោកនាដកម្មបាក់ផ្ទាំងទឹកកក ក្នុងអំឡុងពេលហ្វឹកហាត់ នៅឯភ្នំ Caucasus នៃតំបន់ Kabardino-Balkaria។ ស្របពេលជាមួយគ្នានេះដែរ មន្រ្តីមួយក្រុមរបស់កងកម្លំាងឆ្មាំជាតិរុស្ស៊ីបានចាកចេញពីទីស្នាក់ការកណ្តាល ធ្វើដំណើរឆ្ពោះទៅកាន់ទីតាំងកើតហេតុ ដើម្បីបើកប្រតិបត្តិការស៊ើបអង្កេតមូលហេតុ និងទៅទទួលសាកសពដែលគេបានរៀបចំនៅទីនោះផងដែរ៕

ឡាវ៖ រដ្ឋាភិបាលឡាវនឹងធ្វើការផ្អាកការសម្រេចយល់ព្រមលើគម្រោងសាងសង់ទំនប់វារីអគ្គិសនីថ្មីៗបន្ថែមទៀត ស្របពេលដែលខ្លួនកំពុងពិនិត្យលើគម្រោងវារីអគ្គិសនីចំនួនជាង៥០គម្រោងនាពេលបច្ចុប្បន្ននេះ បន្ទាប់ពីមានហេតុការណ៍បាក់ទំនប់វារីអគ្គិសនីដ៏មហន្តរាយមួយបានកើតឡើងកាលពីចុងខែមុន។

ហ្វីលីពីន៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូទ័រតេ បានព្រមានថា រូបលោកនឹងតាមឃ្លាំមើលយ៉ាងយកចិត្តទុកដាក់លើមន្ត្រីប៉ូលិសទាំងឡាយណា ដែលប្រព្រឹត្ត ឬមានជាប់ពាក់ព័ន្ធនឹងអំពើពុករលួយ ហើយថា លោកនឹងមិនញញើតឡើយ ក្នុងការសម្លាប់អ្នកទាំងនេះ បើពួកគេហ៊ានធ្វើឱ្យប៉ះពាល់ដល់កិត្តិយសប៉ូលិសជាតិហ្វីលីពីន។

ស៊ីរី៖ ជម្លោះឥតឈប់រយៈ៧ឆ្នាំនៅប្រទេសស៊ីរី បានបង្កការបំផ្លិចបំផ្លាញហិនហោច  ដែលអង្គការសហប្រជាជាតិបាននិយាយកាលពីថ្ងៃពុធសប្តាហ៍នេះថា គឺអស់ទឹកប្រាក់ជិត៤០០ពាន់លានដុល្លារអាម៉េរិក។

ឥណ្ឌូណេស៊ី៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា តួលេខជនរងគ្រោះបាត់បង់ជីវិតបន្តកើនឡើងដល់៣៤៧នាក់ និងប្រមាណជាង១៦៥,០០៣នាក់ត្រូវ បានជម្លៀសខ្លួនចេញពីទីលំនៅដ្ឋានរបស់ពួកគេ បន្ទាប់ពីគ្រោះរញ្ជួយដីក្នុងកម្រិត ៦.៩វ៉ិកទ័រវាយប្រហារនៅកោះ លុមបុក ភាគកណ្តាលប្រទេសឥណ្ឌូណេស៊ី។