សហរដ្ឋអាម៉េរិក៖ ក្រសួងការពារជាតិអាម៉េរិក បានឱ្យដឹងថា ព្យុហយាត្រាយោធា ដែលស្នើឡើងដោយប្រធានាធិបតី ដូណាល់ ត្រាំ ដែលគ្រោងនឹងធ្វើឡើងនៅក្នុងខែវិច្ឆិកាខាងមុខនេះ ក្នុងរដ្ឋធានីវ៉ាស៊ីនតោន ត្រូវបានពន្យារពេលទៅឆ្នាំក្រោយវិញ ហើយថា គម្រោងធ្វើព្យុហយាត្រាយោធាដ៏ធំនេះ ទំនងជាត្រូវចំណាយប្រាក់អស់ជាង៩២លានដុល្លារ។

សហរដ្ឋអាម៉េរិក៖ រដ្ឋាភិបាលទីក្រុងវ៉ាស៊ីនតោនបានបង្ហាញការពេញចិត្តជាខ្លាំងសម្រាប់ជំនួយ១០០លានដុល្លាររបស់រដ្ឋាភិបាលទីក្រុងរីយ៉ាដ ដើម្បីជួយរក្សាស្ថេរភាពនៅក្នុងតំបន់ដែលត្រូវបានរំដោះពីពួកឧទ្ទាមរដ្ឋអ៊ីស្លាម ISIS។

ឥណ្ឌា៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា តួលេខជនរងគ្រោះបាត់បង់ជីវិតបានបន្តកើនឡើងដល់១១៤នាក់ហើយ ដោយសារតែគ្រោះមហន្តរាយទឹកជំនន់ដ៏ធ្ងន់វាយប្រហារនៅរដ្ឋ Kerala ភាគខាងត្បូងប្រទេស ចំពេលមានការព្រមានថា នឹងកើតមានព្យុះភ្លៀងបន្ថែមទៀត។ រហូតមកទល់ពេលនេះ ប្រតិបត្តិការជួយសង្រ្គោះបាននិងកំពុងធ្វើឡើងយ៉ាងដុតដៃដុតជើង ខណៈអាជ្ញាធរឥណ្ឌាក៏បានព្យាករណ៍ផងដែរថា ភ្លៀងអាចនឹងបន្តធ្លាក់ខ្លាំងបន្ថែមទៀត ហើយអាកាសយានដ្ឋានដ៏សំខាន់មួយត្រូវបានបិទដំណើរការ រហូតដល់ថ្ងៃទី២៦ ខែសីហាខាងមុខនេះផងដែរ។ គិតមកត្រឹមថ្ងៃសុក្រនេះ ក្រុមអ្នកជួយសង្រ្គោះនៅតែបន្តប្រតិបត្តិការរបស់ពួកគេ ដើម្បីផ្ដល់ជំនួយដល់ប្រជាជននៅក្នុងតំបន់រងគ្រោះ ដែលគេបានប៉ាន់ប្រមាណថា មានមនុស្ស១៥០,០០០នាក់កំពុងគ្មានផ្ទះសម្បែង ហើយភាគច្រើននៃមនុស្សបាត់បង់ជីវិតត្រូវបានទាញចេញពីគំនរបាក់បែក និងល្បាប់ភក់ដែលបង្កឡើងដោយគ្រោះបំណាក់ដី៕

សហរដ្ឋអាម៉េរិក៖ មន្ទីរបញ្ចកោណបានគូសបញ្ជាក់ថា យោធាចិនបានពង្រីកប្រតិបត្តិការធ្វើសមយុទ្ធយោធា យន្ដហោះទម្លាក់គ្រាប់បែកនារយៈពេលប៉ុន្មានចុងក្រោយនេះ ទំនងជាមានគោលបំណងបង្កើនសមត្ថភាពវាយប្រហារលើសហរដ្ឋអាម៉េរិក និងសម្ព័ន្ធមិត្តអាម៉េរិក។

កាណាដា៖ អ្នកអ៊ីស្លាមនៅប្រទេសកាណាដា ដែលគ្រោងធ្វើដំណើរទៅចូលរួមពិធីធម្មយាត្រា «ហាជ» ដែលជាបុណ្យសាសនាដ៏ធំប្រចាំឆ្នាំរបស់ពួកគេនោះ កំពុងប្រឈមនឹងការពន្យាពេលធ្វើដំណើរ ដោយសារតែ បញ្ហាជម្លោះការទូតជាមួយអារ៉ាប៊ីសាអូឌីតនាពេលថ្មីៗនេះ។ 

អ៊ីតាលី៖ យោងតាមប្រភពរបស់់អាជ្ញាធរអ៊ីតាលី បានបញ្ជាក់ថា គិតមកទល់ពេលនេះ មនុស្សចន្លោះពី១០ ទៅ២០នាក់ផ្សេងទៀតនៅតែបន្តបាត់ខ្លួននៅក្រោមគំនរស្ពាន ដែលបានបាក់នៅទីក្រុង ចេនណោ ភាគពាយ័ព្យប្រទេស កាលពីថ្ងៃអង្គារ៍សប្តាហ៍នេះ។ បច្ចុប្បន្នក្រុមអ្នកស៊ើបអង្កេតកកំពុងស្រាវជ្រាវរកមូលហេតុដែលបណ្តាលឲ្យស្ពាន ម៉ូរ៉ាន់ឌី ដែលត្រូវបានសាងសង់ឡើងតាំងតែពីទសវត្សរ៍ទី៦០មកម្ល៉េះ ពោល គឺកាលពីឆ្នំា១៩៦០នេះបាក់ដួលរំលំ។

បរទេស៖ ការសិក្សាស្រាវជ្រាវថ្មីមួយដែលទើបតែចេញផ្សាយនាពេលថ្មីៗនេះ បានឲ្យដឹងថា ការកើនឡើងកម្តៅសកលបង្កឡើងដោយមនុស្ស នឹងរួមគ្នាជាមួយកំនើនធម្មជាតិនៃសីតុណ្ហភាពផែនដី ធ្វើឲ្យរយៈពេល៥ឆ្នាំខាងមុខ មានអាកាសធាតុក្តៅខ្លាំងខុសពីធម្មតា។

ឥណ្ឌា៖ ប្រព័ន្ធផ្សព្វផ្សយក្នុងតំបន់បានរាយការណ៍ថា គ្រោះទឹកជំនន់នៅរដ្ឋខេរ៉ាឡាដែលជាគោលដៅទេសចរណ៍ដ៏សំខាន់នៅភាគខាងត្បូងប្រទេសឥណ្ឌា បានធ្វើឱ្យមនុស្សប្រមាណ៦៧នាក់បាត់បង់ជីវិត ខណៈជនរងគ្រោះជាង៥ម៉ឺននាក់កំពុងស្វែងរកទីជ្រកកោននៅក្នុងជំរំបណ្តោះអាសន្ន។

ចិន៖ រដ្ឋាភិបាលទីក្រុងប៉េកំាង នឹងបញ្ជូនប្រតិភូជាន់ខ្ពស់មួយក្រុមទៅកាន់សហរដ្ឋអាម៉េរិកនាចុងខែសីហាខាងមុខនេះ ដើម្បីចាប់ផ្ដើមធ្វើកិច្ចចរចាពាណិជ្ជកម្មឡើងវិញ នៅក្នុងបរិបទដែលជម្លោះពាណិជ្ជកម្មរវាងមហាយក្សសេដ្ឋកិច្ចទាំងពីរនៅតែបន្តកើនឡើង។

អាល្លឺម៉ង់៖ អ្នកនាំពាក្យអធិការបតីអាល្លឺម៉ង់បានលើកឡើងថា ប្រធានាធិបតីតួកគី លោក តាយយ៉ីប អឺដូហ្កាន់ និងអធិការបតីអាល្លឺម៉ង់ លោកស្រី អាន់ជែលឡា មឺគែល បានពិភាក្សាគ្នាតាមទូរសព្ទនៅថ្ងៃពុធសប្ដាហ៍នេះ ពាក់ព័ន្ធនឹងការពង្រឹងទំនាក់ទំនងទ្វេភាគីរវាងប្រទេសទាំងពីរ ក៏ដូចជាស្ថានភាពនាបច្ចុប្បន្ននៅស៊ីរី។