ឡាវ៖ អាជ្ញាធរឡាវបាននិយាយថា ក្រុមហ៊ុនពាក់ព័ន្ធត្រូវទទួលខុសត្រូវ ចំពោះមហន្តរាយបាក់ទំនប់វារីអគ្គិសនីដ៏អាក្រក់កាលពីពេលថ្មីៗកន្លងទៅនេះ ខណៈមន្រ្តីជាន់ខ្ពស់ម្នាក់មកពីក្រុមហ៊ុន Xe Pian-Xe Namnoy Power Company បានបញ្ជាក់ថា ក្រុមហ៊ុនខ្លួននឹងទទួលខុសត្រូវទាំងស្រុងនៅក្រោមច្បាប់ តាមកិច្ចព្រមព្រៀងរបស់ខ្លួន ចំពោះការបាក់ទំនប់នេះ ។ ចំណែករដ្ឋមន្រ្តីក្រសួងថាមពល និងរ៉ែឡាវ បានថ្លែងថា ក្រុមហ៊ុនមិនអាចប្រកែកមិនព្រមទទួលខុសត្រូវ ចំពោះការជន់លិច ដែលបង្កគ្រោះមហន្តរាយទូទៅ ក៏ដូចជាការស្លាប់អាយុជីវិតមនុស្ស និងសត្វ។ ទំនប់ដែលបាក់នេះ ជាផ្នែកនៃគម្រោងវារីអគ្គិសនីមួយសាងសង់ឡើងដោយក្រុមហ៊ុន Xe Pian Xe Namnoy Power Company ឬ PNPC នៅទីក្រុងវៀងចន្ទ ជាការរកស៊ីរួមគ្នាមួយរវាងឡាវ និងកូរ៉េខាងត្បូងចាប់ពីឆ្នាំ២០១២។ ការងារលើគម្រោងតម្លៃ ១.០២០លានដុល្លារអាម៉េរិកនេះ បានចាប់ផ្តើមនៅខែកុម្ភៈ ឆ្នាំ២០១៣ និងត្រូវបញ្ចប់ នៅឆ្នាំក្រោយ ដោយផលិតចរន្តអគ្គិសនីលក់ទៅឲ្យប្រទេសថៃ។

សហរដ្ឋអាម៉េរិក៖ រដ្ឋបាលរបស់ប្រធានាធិបតីអាម៉េរិកលោក ដូណាល់ ត្រាំ បានគូសបញ្ជាក់ថា ពួកគេបានរៀបចំឲ្យមានការជួបជុំគ្នាវិញរវាងកុមារជាង១៨០០នាក់ ជាមួយសមាជិកក្រុមគ្រួសាររបស់ពួកគេ តាមឱសានវាទកំណត់ដោយតុលាការសហព័ន្ធ។

សហរដ្ឋអាម៉េរិក៖ អភិបាលរដ្ឋកាលីហ្វ័រញ៉ាលោក ជែរី ប្រោន បានប្រកាសដាក់តំបន់ចំនួនពីររបស់រដ្ឋទៅក្នុងគ្រាអាសន្ន នៅភាគខាងត្បូងរដ្ឋកាលីហ្វ័រញ៉ា ក្នុងនោះ រួមមាន រីវើសាយ និង ហ្សាស្តា ដោយសារតែអំណាចភ្លើងឆេះព្រៃ ដែលគេដាក់ឈ្មោះឲ្យថា ក្រេនស្តុន និងខារ ដែលបានដុតបំផ្លាញលំនៅឋាន និងសំណង់ អគារផ្សេងជាច្រើនខ្នង ក៏ដូចជាបង្កការគំរាមកំហែងដល់ប្រព័ន្ធហេដ្ឋារចនាសម្ព័ន្ធសំខាន់ៗ និងបង្ខំឲ្យមានការជម្លៀសមនុស្សផងដែរ។

អង្គការសហប្រជាជាតិ៖ អ្នកនាំពាក្យអគ្គលេខាធិការអង្គការសហប្រជាជាតិ លោក ស្ទេហ្វិន ឌូហ្សារិច បានលើកឡើងថា អង្គការសហប្រជាជាតិសូមស្នើឲ្យបណ្ដាប្រទេសជាសមាជិកទាំងអស់ បង់ប្រាក់កតាព្វកិច្ចរបស់ខ្លួនក្នុងនាមជាសមាជិក ស្របពេលដែលអង្គការពិភពលោកមួយនេះកំពុងប្រឈមមុខនឹងកង្វះថវិកា ហើយថា លោក អាន់តូនីញូ ហ្គូដទ័ររេស ក៏បានសរសេរលិខិតមួយទៅកាន់មន្រ្តីយូអិន ពាក់ព័ន្ធនឹងការព្រួយបារម្ភរបស់លោក ជុំវិញបញ្ហាមួយនេះដែរ។

កូរ៉េខាងត្បូង៖ រដ្ឋាភិបាលក្រុងព្យុងយ៉ាង និងសេអ៊ូល បានព្រមព្រៀងគ្នាថា នឹងរៀបចំកិច្ចប្រជុំពិភាក្សាផ្នែកយោធាកម្រិតទូទៅថ្មីមួយទៀត ដែលនឹងត្រូវធ្វើឡើងនៅឯវិមានសន្តិភាព ដែលជាអគារមួយគ្រប់គ្រងដោយភាគីកូរ៉េខាងត្បូងនៅឯភូមិជាប់ព្រំដែន ផាន់មុនជុម នាថ្ងៃអង្គារ៍សប្តាហ៍ក្រោយនេះ ។

កូរ៉េខាងត្បូង៖ ប្រព័ន្ធផ្សព្វផ្សាយកូរ៉េខាងត្បូងបានរាយការណ៍ថា យន្ដហោះដឹកអដ្ឋិធាតុកងទ័ពអាម៉េរិក ដែលបានបាត់បង់ជីវិតក្នុងអំឡុងសម័យសង្រ្គាមកូរ៉េកាលពីឆ្នំា១៩៥០-១៩៥៣ បានវិលត្រឡប់មកកាន់មូលដ្ឋានទ័ពអាកាស អូសាន ប្រទេសកូរ៉េ ខាងត្បូងហើយ។

ឡាវ៖ គិតត្រឹមល្ងាចថ្ងៃព្រហស្បតិ៍ត ទី២៦ ខែកក្កដា ឆ្នាំ២០១៨នេះ សាកសពសរុបចំនួន២៧នាក់ ហើយដែលត្រូវបានរកឃើញ និង១៣០នាក់ទៀតកំពុងបាត់ខ្លួន ក្រោយពីទំនប់វារីអគ្គិសនីនៅខេត្ត អាត់តាពើ ភាគខាងត្បូង ប្រទេសឡាវ ដែលជាប់ព្រំដែនភាគឦសានប្រទេសកម្ពុជា និងភាគកណ្តាល វៀតណាម បានបាក់កាលពីថ្ងៃចន្ទ ដើមសប្តាហ៍នេះ។

កូរ៉េខាងត្បូង៖ សារព័ត៌មានរដ្ឋកូរ៉េខាងត្បូងបានរាយការណ៍ថា កូរ៉េខាងជើងបានអះអាងថា នឹងប្រគល់អដ្ឋិធាតុទាហានអាម៉េរិកដែលបានបាត់បង់ជីវិតនៅអំឡុងសម័យសង្រ្គាមកូរ៉េ ឲ្យសហរដ្ឋអាម៉េរិកវិញ នៅក្នុងថ្ងៃសុក្រសប្ដាហ៍នេះ ក្រោយពីទទួលបានក្ដាមឈូសចំនួន១០០ពីទីក្រុងវ៉ាស៊ីនតោន ដែលពិធីប្រគល់នោះដែរ ត្រូវនឹងថ្ងៃបា្ររព្ធខួបលើកទី៦៥ នៃការចុះហត្ថលេខលើបទឈប់បាញ់ឆ្នាំ១៩៥៣។

ចិន៖ អ្នកនាំពាក្យស្ថានទូតអាម៉េរិកប្រចាំប្រទេសចិន បានប្រាប់ស្ថានីយ៍ទូរទស្សន៍ CNN ឲ្យដឹងថា គ្រឿងផ្ទុះកែច្នៃ ពិតជាត្រូវបានបំផ្ទុះនៅក្បែររបងរបស់ស្ថានទូតអាម៉េរិកប្រចាំទីក្រុងប៉េកាំងប្រាកដមែន ប៉ុន្តែក្រៅពីជនបង្កពុំមានជនណាផ្សេងទទួលរងរបួស ឬជួបគ្រោះថ្នាក់ធ្ងន់ឡើយ។