ប្រេស៊ីល៖ ទីភ្នាក់ងារជួយសង្គ្រោះនៅអាកាសយានដ្ឋានបាននិយាយថា យន្ដហោះខ្នាតតូចមួយគ្រឿងបានជួបគ្រោះថ្នាក់ធ្លាក់ នៅអំឡុងពេលចុះចតនៅឯអាកាសយានដ្ឋាន  Sao Paulo’s Campo de Marte កាលពីល្ងាចថ្ងៃអាទិត្យម្សិលមិញនេះ (ម៉ោងក្នុងតំបន់) បណ្តាលឲ្យអ្នកបញ្ជាយន្តហោះម្នាក់ស្លាប់ ប៉ុន្តែអ្នកដំណើរ៦នាក់ផ្សេងទៀតនៅរួចរស់ជីវិត។

ឥណ្ឌូណេស៊ី៖ អាជ្ញាធរគ្រប់គ្រងគ្រោះមហន្តរាយឥណ្ឌូណេស៊ី បានរាយការណ៍ថា តួលេខជនរងគ្រោះបាត់បង់ជីវិត ក្នុងហេតុការណ៍គ្រោះរញ្ជួយដីកម្រិត៦.៤វ៉ិកទ័រវាយប្រហារលើកោះ លុមបុក ដែលជាគោលដៅទេសចរណ៍មួយដ៏សំខាន់របស់ ប្រទេសឥណ្ឌូណេស៊ី កាលពីព្រឹកថ្ងៃអាទិត្យម្សិលមិញនេះ (ម៉ោងក្នុងតំបន់) បាន កើនដល់១៤នាក់ និង១៦២នាក់ផ្សេងទៀតទទួលរងរបួស។ 

មីយ៉ាន់ម៉ា៖ អាជ្ញាធរមីយ៉ាន់ម៉ាបានប្រាប់អ្នកសារព័ត៌មាននៅក្នុងថ្ងៃច័ន្ទដើមសប្តាហ៍ នេះថា សាកសពសរុប២៣នាក់ត្រូវបានគេរកឃើញកាលពីថ្ងៃអាទិត្យ ម្សិលមិញ នេះ (ម៉ោងក្នុងតំបន់) បន្ទាប់ពីការស្រាវជ្រាវអស់រយៈពេលជាច្រើនថ្ងៃមកនេះ ដើម្បីស្វែងរកមនុស្សបាត់ខ្លួន២៧នាក់ ក្នុងហេតុការណ៍បំណាក់ដីដ៏អាក្រក់មួយវាយប្រហារលើរដ្ឋកាឈីន កាលពីសប្តាហ៍មុន។

រុស្ស៊ី៖ ប្រធានាធិបតីរុស្ស៊ីលោក វ៉្លាឌីមៀ ពូទីន បាននិយាយថា រូបលោកបានត្រៀមខ្លួនរួចរាល់ហើយ ក្នុងការធ្វើដំណើរទៅបំពេញទស្សនកិច្ចនៅរដ្ឋធានីវ៉ាស៊ីនតោន បើសិនជា មានការអញ្ជើញ ហើយលោកថែមទាំងបញ្ជាក់ដែរថា រូបលោកក៏បានស្នើទៅកាន់សមភាគីអាម៉េរិកលោក ដូណាល់ ត្រាំ រួចហើយដែរ ដើម្បីបំពេញទស្សនកិច្ចមកកាន់រដ្ឋធានីម៉ូស្គូល។

ឥណ្ឌា៖ យោងតាមប្រភពរបស់អាជ្ញាធរឥណ្ឌាក្នុងតំបន់ បានឱ្យដឹងនៅថ្ងៃសៅរ៍នេះ ថា មនុស្ស៣៧នាក់បានបាត់បង់ជីវិតនៅក្នុងសប្តាហ៍នេះ ស្របពេលដែលអំណាចព្យុះភ្លៀង មូសុង បានធ្វើការបំផ្លិចបំផ្លាញលំនៅដ្ឋានអស់ជាច្រើនខ្នង និងបង្កជាគ្រោះទឹកជំនន់លាតសន្ធឹងនៅភាគខាងជើងប្រទេសឥណ្ឌា។

ថៃ៖ ថ្នាំញៀនចំនួន២ប្រភេទ ក្នុងនោះរួមមានប្រភេទយ៉ាម៉ាជាង១១លានគ្រាប់ និងម៉ាទឹកកក ជិត៧០០គីឡូក្រាម ត្រូវបានក្រុមអាជ្ញាធរថៃចេញប្រតិបត្តិការបង្ក្រាបបានពីមុខសញ្ញា៣នាក់ បន្ទាប់ពីពួកគេបានស៊ីឈ្នួលដឹកឲ្យឈ្មួញចេញពីខ្សែបន្ទាត់នៃភាគខាងជើងរបស់ប្រទេសថៃ បំណងយកមកចែកចាយនៅក្នុងខេត្តមួយចំនួនក្បែរៗទីក្រុងបាងកក។

សហរដ្ឋអាម៉េរិក៖ រដ្ឋមន្រ្តីការពារជាតិអាម៉េរិកលោក ចែម ម៉ាត់ទីស បាននិយាយថា ប្រទេសលោកបាននឹងកំពុងធ្វើការពិចារណាក្នុងការបញ្ជូនយោធាទៅកាន់ប្រទេសកូរ៉េខាងជើង ក្នុងគោលបំណងចេញប្រតិបតិ្តការស្រាវជ្រាវរកអដិ្ឋធាតុកងទ័ពអាម៉េរិកបន្ថែមទៀត ដែលបាតបង់ជីវិតក្នុងអំឡុងសង្គ្រាមកូរ៉េឆ្នំា១៩៥០-១៩៥៣។

ជប៉ុន៖ មន្រ្តីអាកាសធាតុជប៉ុនបានរាយការណ៍ថា ព្យុះទីហ្វុងដ៏កំណាចមួយទំនងជាធ្វើដំណើរទៅដល់តំបន់Tokai ភាគកណ្តាលប្រទេសជប៉ុននាពេលឆាប់ៗនេះ ហើយបើតាមការព្យាករណ៍នោះ ខ្យល់ព្យុះនេះ អាចនឹងធ្វើដំណើរមកដល់នៅយប់ថ្ងៃសៅរ៍នេះ ឬអាចជាពេលព្រឹកព្រលឹមថ្ងៃអាទិត្យចុងសប្តាហ៍នេះ (ម៉ោងក្នុងតំបន់)។

សហរដ្ឋអាម៉េរិក៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា ភ្នាក់ងារពន្លត់អគ្គីភ័យ​២នាក់បានបាត់បង់ជីវិត និងលំនៅដ្ឋានជាច្រើនខ្នងទៀតត្រូវទទួលរងការបំផ្លិចបំផ្លាញស្ទើរទំាងស្រុង ដោយសារតែអំណាចភ្លើងឆេះព្រៃនៅតំបន់ Shasta ក្នុងរដ្ឋកាលីហ្វ័រញ៉ា ភាគខាងលិចសហរដ្ឋអាម៉េរិក។

រុស្ស៊ី៖ ប្រទេសរុស្ស៊ី តាមរយៈក្រសួងការបរទេសខ្លួនបានចេញមុខអំពាវនាវយ៉ាងទទូចឲ្យរដ្ឋាភិបាលទីក្រុងវ៉ាស៊ីនតោន បោះបង់ចោលផែនការពង្រឹងវិស័យការពារជាតិនៅលើទីអវកាស  ហើយថែមទំាំងអះអាងទៀតថា គម្រោងមួយនេះ អាច នឹងបង្កផលប៉ះពាល់យ៉ាងធ្ងន់ដល់ស្ថេរភាពរបស់ពិភពលោក។