ថៃ៖ រដ្ឋមន្រ្តីមហាផ្ទៃថៃ លោក អនុពង្ស ផៅចិន្តា បានបង្គាប់ឲ្យអភិបាលនៅខេត្តភាគខាងជើងប្រទេសទាំងអស់ រៀបចំចាត់ចែងជម្លៀសប្រជាជនចេញទៅកាន់ទីទួលសុវត្ថិភាពជាបន្ទាន់ ស្របពេលដែលកម្ពស់ទឹកនៅឯដងទន្លេមេគង្គ នៅតែបន្តកើនឡើងយ៉ាងគំហុក។

ជប៉ុន៖ នៅក្នុងចំណោមប្រជាជនរស់នៅក្នុងទីក្រុងតូក្យូ ដែលបានបាត់បង់ជីវិតកន្លងមកនេះ ត្រូវបានគេសង្ស័យថា មានចំនួនរហូតដល់៩៦នាក់ឯណោះ ដែលបានស្លាប់ ដោយសារតែជំងឺបេះដូងកាលពីខែកក្កដា ឆ្នាំ២០១៨។ យោងតាមប្រភពរបស់នាយកដ្ឋានប៉ូលិសក្រុងតូក្យូ និងនាយកដ្ឋានផ្សេងទៀតបានឱ្យដឹងថា ជនរងគ្រោះដែលបាត់បង់ជីវិតទាំអស់ មានអាយុចាប់ពី៤០ដល់៩០ឆ្នំា ខណៈតួលេខនេះ បានកើនឡើងជិត៤ដង បើធៀបទៅនឹងកាលពីឆ្នំាមុនមានចំនួន២៥នាក់។

មីយ៉ាន់ម៉ា៖ នៅមីយ៉ាន់ម៉ា ភ្លៀងរដូវវស្សាបាននឹងកំពុងបង្កជាគ្រោះទឹកជំនន់យ៉ាងធ្ងន់នៅទូទាំងប្រទេសអាស៊ីមួយនេះ ដែលជាលទ្ធផលនោះ សម្លាប់ជីវិតមនុស្ស២៥នាក់ ហើយការកើនឡើងនៃកម្ពស់ទឹកជំនន់ក៏កំពុងតែបង្ខំឱ្យប្រជាជនប្រមាណ១២០,០០០នាក់ភៀសខ្លួនចេញពីផ្ទះសម្បែងទៅកាន់ទីទួលសុវត្ថិភាព។

សហរដ្ឋអាម៉េរិក៖ រដ្ឋាភិបាលទីក្រុងវ៉ាស៊ីនតោនបានលើកឡើងថា សហរដ្ឋអាម៉េរិកនឹងមិនចំណាយប្រាក់សូម្បីតែមួយសេនឲ្យកូរ៉េខាងត្បូង ជុំវិញការបញ្ជូនអដិ្ឋធាតុកងទ័ពអាម៉េរិកដែលបានស្លាប់នៅក្នុងអំឡុងសង្គ្រាមកូរ៉េ មកកាន់ប្រទេសកំណើតវិញឡើយ។

រុស្ស៊ី៖ ក្រសួងបរទេសរុស្ស៊ីបានលើកឡើងថា រដ្ឋមន្រ្តីការបរទេស និងរដ្ឋមន្រ្តីការពារជាតិរុស្ស៊ី ព្រមទាំងសមភាគីជប៉ុន នៅក្នុងថ្ងៃអង្គារ៍ សប្តាហ៍នេះ (ម៉ោងក្នុងតំបន់) បានព្រមព្រៀងរួមគ្នាក្នុងការខិតខំព្យាយាមពង្រឹងពង្រីកកិច្ចសហប្រតិបត្តិការខាងផ្នែកសន្តិសុខ។

អ៊ីរ៉ង់៖ ប្រទេសអ៊ីរ៉ង់ តាមរយៈក្រសួងការបរទេសរបស់ខ្លួនបានប្រកាសច្រានចោលការលើកឡើងរបស់ប្រធានាធិបតីអាម៉េរិកលោក ដូណាល់ ត្រាំ ដែលថា លោកអាចជួបជាមួយសមភាគីអ៊ីរ៉ង់លោក ហាសាន់ រូហានី បានគ្រប់ពេលវេលាដោយគ្មានលក្ខខណ្ឌ ហើយបានចាត់ទុកថា វាគឺជារឿងដែលមិនអាចទៅរួច។

ម៉ាឡេស៊ី៖ ប្រធានអាជ្ញាធរអាកាសចរណ៍ស៊ីវិលម៉ាឡេស៊ីលោក អាហ្សារូដឌីន អាប់ឌុល រ៉ាម៉ាន់ បានសម្រេចចិត្តលាឈប់ពីមុខតំណែងរបស់ខ្លួនហើយក្នុងថ្ងៃអង្គារ៍នេះ (ម៉ោង ក្នុងតំបន់) បន្ទាប់ពីជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ីបានបាត់ខ្លួនយ៉ាងអាថ៌កំបាំង ក្នុងរយៈពេល៤ឆ្នាំមកនេះ។

កូរ៉េខាងត្បូង៖ រដ្ឋាភិបាលទីក្រុងសេអ៊ូល និងទីក្រុងព្យុងយ៉ាង បានចាប់ផ្តើមបើកកិច្ចពិភាក្សាផ្នែកយោធាក្នុងកម្រិតទូទៅ នៅក្នុងថ្ងៃអង្គារ៍នេះ (ម៉ោង ក្នុងតំបន់) នៅឯភូមិជាប់ព្រំដែន Panmunjom (ផាន់មុនជុម)។