ម៉ាឡេស៊ី ៖ ធនាគារអភិវឌ្ឍន៍អាស៊ី ហៅកាត់ (ADB) បានឲ្យដឹងថា កំណើនផលិតផលសរុប ក្នុងស្រុក (GDP) របស់ប្រទេសម៉ាឡេស៊ីនៅថេរដដែល ដោយកំណើនសេដ្ឋកិច្ចរបស់ប្រទេសមួយនេះក្នុងឆ្នាំ២០១៨ នឹងកើនឡើង៥,៣ភាគរយ ហើយសម្រាប់ឆ្នាំ២០១៩ខាងមុខ នឹងកើនឡើង៥ភាគរយ ។

វៀតណាម៖ ក្រុមហ៊ុនផលិតយន្ដហោះសហរដ្ឋអាម៉េរិក Boeing បានឈានដល់កិច្ចព្រម ព្រៀងលើការបញ្ជាទិញយន្ដហោះដឹកអ្នកដំណើរ១០០គ្រឿងហើយ ជាមួយក្រុមហ៊ុនអាកាសចរណ៍វៀតណាម VietJet Air។  

សហរដ្ឋអាម៉េរិក៖ អនុប្រធានាធិបតីអាម៉េរិកលោក ម៉ៃ ផែន បានអះអាងថា ការបញ្ជូនត្រឡប់មកវិញនូវអដិ្ឋធាតុកងទ័ពអាម៉េរិកដែលបានបាត់បង់ជីវិត ក្នុងអំឡុងសម័យសង្គ្រាមកូរ៉េឆ្នំា១៩៥០-១៩៥៣ គឺជាសញ្ញាដ៏វិជ្ជមានថ្មីមួយ សម្រាប់ដំណើរការស្វែងរកសន្តិភាពដ៏ពេញលេញនៅលើតំបន់ឧបទ្វីបកូរ៉េ។

សហរដ្ឋអាម៉េរិក៖ មន្រ្តីជាន់ខ្ពស់រដ្ឋាភិបាលអាម៉េរិកលើកឡើងថា ប្រទេសខ្លួន គ្រោងនឹងបង្កើនអត្រាយកពន្ធចំពោះទំនិញនាំចូលពីប្រទេសចិនបន្ថែមទៀត ពីលើគម្រោងបន្ថែមពន្ធស្រាប់ក្នុងទំហំប្រមាណ២០០ពាន់លានដុល្លារ ដែលបានគ្រោងទុករួចជាស្រេច ខណៈទីក្រុងវ៉ាស៊ីនតោនកំពុងបន្តការដាក់សម្ពាធទីក្រុងប៉េកាំង ឲ្យធ្វើការផ្លាស់ប្តូររបៀបធ្វើពាណិជ្ជកម្ម។

សហរដ្ឋអាម៉េរិក៖ ព្រឹទ្ធសភាសហរដ្ឋអាម៉េរិកបានសម្រេចអនុម័តលើកញ្ចប់ថវិកាដ៏ច្រើនសន្ធឹកសន្ធាប់សម្រាប់វិស័យការពារជាតិប្រទេសរបស់ខ្លួន ក្នុងទំហំទឹកប្រាក់៧១៦ប៊ីលានដុល្លារអាម៉េរិកនៅក្នុថ្ងៃ ពុធ សប្តាហ៍នេះ (ម៉ោងក្នុងតំបន់)។

សហរដ្ឋអាម៉េរិក៖ សេតវិមានបានចេញមុខទទួលស្គាល់ថា រដ្ឋាភិបាលឥណ្ឌាបានអញ្ជើញប្រធានាធិបតីអាម៉េរិកលោក ដូណាល់ ត្រាំ ទៅបំពេញទស្សនកិច្ចនៅប្រទេសរបស់ខ្លួន ប៉ុន្តែការសម្រេចចិត្តចុងក្រោយនៅពុំទាន់ធ្វើឡើងនោះទេ។ ថ្លែងប្រាប់អ្នកយកព័ត៌មានក្នុងសន្និសិទសារព័ត៌មានខ្លីមួយ អ្នកនាំពាក្យសេតវិមាន លោកស្រី សារ៉ា សាន់ឌើ បានគូសបញ្ជាក់ថា ការអញ្ជើញេនះ ត្រូវបានពន្យារពេលសិន ប៉ុន្តែលោកស្រីជឿជាក់ថា ការសម្រេចចុងក្រោយនឹងត្រូវធ្វើឡើងនាពេលឆាប់ៗខាងមុខនេះ។

សហរដ្ឋអាម៉េរិក៖ មន្រ្តីអង្គការសហប្រជាជាតិទទួលបន្ទុកកិច្ចការមនុស្សធម៌បាននិយាយ ថា យូអិនបានប្រុងប្រៀបខ្លួនរួចជាស្រេចហើយ ដើម្បីជួយដល់បណ្តាប្រទេសនៅតំបន់អាស៊ីអាគ្នេយ៍ ដែលទទួលរងផលប៉ះពាល់ធ្ងន់ ដោយសារតែគ្រោះទឹកជំនន់បង្កឡើងពីឥទ្ធិពលភ្លៀងរដូវវស្សា។

ឡាវ៖ មន្រ្តីមួយរូបមកពីកងពលទាហានឡាវ ក្នុងអំឡុងធ្វើសន្និសីទសារព័ត៌មានមួយ នៅក្នុងសង្កាត់ Sanamxay ខេត្ត Attapeu បានបញ្ជាក់ថា មនុស្ស១៣នាក់ ត្រូវបានគេអះអាងថា បានបាត់បង់ជីវិត និង១១៨នាក់ផ្សេងទៀតកំពុងបាត់ខ្លួននៅឡើយ បន្ទាប់ពីហេតុការណ៍បាក់ទំនប់វារីអគ្គិសនីនៅឡាវ ដែលបង្កជាគ្រោះទឹកជំនន់ជន់លិចលង់យ៉ាងធ្ងន់នៅភាគខាងត្បូងប្រទេសអាស៊ីមួយនេះ កាលពីថ្ងៃច័ន្ទ ដើមសប្តាហ៍មុន។

ចិន៖ ប្រទេសចិននៅថ្ងៃពុធនេះ បានព្រមានថា ខ្លួននឹងចាត់វិធានការឆ្លើយតបវិញភ្លាមៗ បើសិនជាសហរដ្ឋអាម៉េរិក ដំឡើងពន្ធលើផលិតផលនាំចូលពីចិន។ ការព្រមានបែបនេះ ធ្វើឡើងបន្ទាប់ពីរដ្ឋបាលលោក ដូណាល់ ត្រាំ បានស្នើឱ្យមានការដំឡើងពន្ធបន្ថែម២៥ភាគរយលើមុខទំនិញនាំចូលពីចិន ដែលមានតម្លៃជាង២០០ពាន់លានដុល្លារអាម៉េរិក។