ឥណ្ឌូណេស៊ី៖ អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូណេស៊ី បានបញ្ជាក់ក្នុងថ្ងៃអង្គារ៍នេះថា អ្នកឡើងភ្នំជាង៥០០នាក់ត្រូវបានជួយសង្គ្រោះ ដោយសុវត្ថិភាពចេញពីតំបន់ភ្នំភ្លើងរបស់ឥណ្ឌូណេស៊ីមួយកន្លែង បន្ទាប់ពីបានជាប់គាំងដោយសារគ្រោះបំណាក់ដី ដែលបង្កឡើងពីគ្រោះមហន្តរាយរញ្ជួយដីដ៏កក្រើកនាពេលថ្មីៗនេះ។ នៅក្នុងចំណោមអ្នកឡើងភ្នំដែលជាប់គាំងទាំងអស់ ក្នុងនោះក៏រួមមានទំាងជនជាតិអាម៉េរិក បារំាង ហូឡង់ និងថៃផងដែរ។ ប្រព័ន្ធផ្សព្វផ្សាយក្នុងតំបន់បានរាយការណ៍ថា គ្រោះរញ្ជួយផែនដីក្នុងកម្រិត ៦.៤ វ៉ិចទ័របានវាយប្រហារយ៉ាងកក្រើកទៅលើកោះ លុមបុក កាលពីព្រឹកថ្ងៃអាទិត្យ សប្តាហ៍មុននេះ (ម៉ោងក្នុងតំបន់) បណ្តាលឲ្យកើតមានជាហេតុការណ៍បំណាក់ដី នៅតំបន់ភ្នំភ្លើង រីនចានី ដែលជាគោលដៅទេសចរណ៍ដ៏ទាក់ទាញមួយរបស់ឥណ្ឌូណេស៊ី។

ឥណ្ឌា៖ សញ្ញាអាសន្ននៃគ្រោះទឹកជំនន់ត្រូវបានប្រកាសឲ្យដឹងនៅក្នុងទីក្រុង Delhi ខណៈកម្ពស់ទឹកទន្លេ Yamuna ដែលហូរហៀរទៅកាន់ទីក្រុងមួយនេះ បានហក់ឡើងដល់កម្រិតគ្រោះថ្នាក់ក្នុងរយៈពេលប៉ុន្មានថ្ងៃកន្លងមកនេះ។   ទឹកទន្លេ Yamuna បាននឹងកំពុងហក់ឡើងដល់កម្រិតគ្រោះថ្នាក់ ជាពិសេស បន្ទាប់ពីរដ្ឋ Haryana ដែលនៅជិតខាងគ្នានេះ បានបញ្ចេញទឹកយ៉ាងច្រើនចេញពីទំនប់ Hathnikund Barrage មានចម្ងាយប្រមាណ១៥០ម៉ាយភាគខាងជើងទីក្រុង Delhi កាលពីថ្ងៃសៅរ៍សប្តាហ៍មុន (ម៉ោងក្នុងតំបន់) ។ ចំណែក ភ្លៀងធ្លាក់ខ្លាំងក្នុងទីក្រុង Delhi និងតំបន់ជុំវិញក្រុងនេះ ក៏ជាមូលហេតុនៃការប្រកាសអាសន្នផងដែរ។

វៀតណាម៖ យោងតាមប្រភពរបស់អាជ្ញាធរវៀតណាមបានឲ្យដឹងថា មនុស្ស ៨២០០នាក់ បានបាត់បង់ជីវិត ដោយសារតែគ្រោះថ្នាក់ចរាចរណ៍នៅទូទាំងប្រទេសកាលពីឆ្នាំ២០១៧ ហើយតួលេខនេះ គឺធ្លាក់ចុះបើធៀបទៅនឹងឆ្នាំ២០១៦ ដែលមានមនុស្សស្លាប់៨៦០០នាក់។ របាយការណ៍ខាងលើនេះ ត្រូវបានអាជ្ញាធរវៀតណាមបង្ហាញឲ្យដឹង ស្របពេលដែលមនុស្ស១៤នាក់ជាសមាជិកក្នុងគ្រួសារតែមួយ ដែលរួមមានទាំងកូនកំលោះផងនោះ បានបាត់បង់ជីវិត នៅក្នុងគ្រោះថ្នាក់ចរាចរណ៍ដ៏អាក្រក់មួយ នៅឯភាគកណ្ដាលប្រទេសនៅថ្ងៃច័ន្ទនេះ (ម៉ោងក្នុងតំបន់)។ គ្រោះថ្នាក់ចរាចរណ៍នេះ កើតឡើងនៅពេលរថយន្តដឹកពួកគេក្នុងដំណើរផ្លូវឆ្ពោះទៅផ្ទះកូនក្រមុំ បានបុកពេញទំហឹងជាមួយរថយន្ដកុងតឺន័រមួយគ្រឿង។  

សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ កាលពីថ្ងៃសៅរ៍ សប្តាហ៍មុន (ម៉ោងក្នុងតំបន់) បានបង្ខំចិត្តប្រកាសដាក់រដ្ឋកាលីហ្វ័រញ៉ា ក្នុងគ្រាអាសន្ន ហើយថែមទាំងផ្តល់សិទ្ធិឱ្យទីភ្នាក់ងារសហព័ន្ធជួយជ្រៀមជ្រែងដល់កិច្ចខិតខំប្រឹងប្រែង ក្នុងការផ្តល់ជំនួយសង្គ្រោះបន្ទាន់ក្នុងតំបន់ ប៉ុន្តែការខូចខាតកាន់តែមានទំហំធំឡើងៗ ដោយសារតែការកើនឡើងកំដៅ និងខ្យល់ស្ងួត ដែលកំពុង ជួយបង្កើនកម្លាំងភ្លើងឆេះព្រៃ។ ហេតុការណ៍ភ្លើងឆេះព្រៃយ៉ាងសន្ធោរសន្ធៅនៅរដ្ឋកាលីហ្វ័រញ៉ា ត្រូវបានគេអះអាងថា បានសម្លាប់ជីវិតមនុស្ស២នាក់បន្ថែមទៀត ដែលចំនួននេះ ធ្វើឱ្យចំនួនមនុស្សស្លាប់សរុបកើនដល់៨នាក់ ខណៈភ្លើងឆេះព្រៃចំនួន២០កន្លែងកំពុងរីករាលដាលនៅឯរដ្ឋជាប់ឆ្នេរសមុទ្រភាគខាងលិច។

សហរដ្ឋអាម៉េរិក៖ ប្រធានាធិបតីអាមេរិកលោក ដូណាល់ ត្រាំ បានព្រមានបិទដំណើរការរដ្ឋាភិបាលអាម៉េរិកជាថ្មីទៀត ប្រសិនបើជាគណបក្សប្រជាធិបតេយ្យ មិនព្រមផ្ដល់កិច្ចសហការលើដោះស្រាយបញ្ហាសន្តិសុខព្រំដែនទេនោះ។ ការព្រមានរបស់លោក ដូណាល់ ត្រាំ គឺជាការឆ្លើយតបមួយទៅនឹងការរិះគន់លើគោលនយោបាយអន្តោប្រវេសន៍នៃរដ្ឋាភិបាលរបស់លោក ជាពិសេសជុំវិញការបំបែកកុមារចេញពីឪពុកម្ដាយ ដែលជាជនអន្តោប្រវេសន៍ខុសច្បាប់ ខណៈរដ្ឋាភិបាលសហព័ន្ធអាម៉េរិក ជារឿយៗតែងតែបិទដំណើរការក្នុងករណីសភាអាម៉េរិកបរាជ័យក្នុងការចេញកញ្ចប់ថវិកា។