វៀតណាម៖ នៅក្នុងខេត្តយេនបាយ ភាគខាងជើង គិតមកត្រឹមរសៀលថ្ងៃសុក្រ សប្តាហ៍នេះ ទឹកជំនន់បានសម្លាប់មនុស្ស៨នាក់ ហើយ៦នាក់ទទួលរងរបួស និង១០នាក់ទៀតកំពុងបាត់ខ្លួននៅឡើយ។ គ្រោះធម្មជាតិនេះ បានបំផ្លាញលំនៅដ្ឋានអស់រាប់រយខ្នង ដំណាំកសិកម្ម និងជលវប្បកម្មរាប់រយហិកតា ហើយវាក៏បានកាត់ផ្តាច់សហគមន៍នៅក្នុងខេត្តផងដែរ។

កូរ៉េខាងជើង៖ កូរ៉េខាងជើង តាមរយៈប្រព័ន្ធផ្សព្វផ្សាយរដ្ឋរបស់ខ្លួនបានធ្វើការវាយប្រហារធ្ងន់ៗទៅលើកូរ៉េខាងត្បូងថា មិនបានធ្វើអ្វីទាល់តែសោះ ដើម្បីជួយឲ្យទំនាក់ទំនងរវាងប្រទេសបងប្អូនកូរ៉េទាំងពីរបានប្រសើរឡើង ហើយថា សារព័ត៌មានកូរ៉េខាងត្បូងខ្លះមិនបានអនុវត្តន៍ជាលក្ខណៈស្ថាបនា ដើម្បីជំរុញទំនាក់ទំនងឲ្យល្អរវាងកូរ៉េទាំងពីរនោះឡើយ។

សហរដ្ឋអាម៉េរិក៖ ប្រព័ន្ធផ្សព្វផ្សាយសហរដ្ឋអាម៉េរិកបានរាយការណ៍ថា តួលេខជនរងគ្រោះបាត់បង់ជីវិត ដោយសារតែយានយន្តអាចបើកលើទឹកមួយគ្រឿងដែលដឹកអ្នកដំណើរប្រមាណ៣១នាក់បានជួបឧប្បតិ្តហេតុលិចនៅក្នុងបឹងមួយ រដ្ឋMissouri កាលពីយប់ថ្ងៃព្រហស្បតិ៍សប្តាហ៍នេះ បានបន្តកើនឡើងដល់១៧នាក់ហើយ។

ថៃ៖ នាយកដ្ឋានឧតុនិយមថៃបានសេចក្តីព្រមានកាលពីថ្ងៃព្រហស្បតិ៍ថា ព្យុះទីហ្វុង សុន ទីញ ដែលបាននិងកំពុងបង្កើនឥទ្ធិពលខ្លួនកាន់តែខ្លាំងក្លានៅសមុទ្រចិនខាងត្បូងនោះ នឹងនាំយកភ្លៀងខ្លាំងធ្វើដំនើរឆ្ពោះទៅកាន់ភាគខាងជើង និងភាគឦសាន ប្រទេសនៅក្នុងថ្ងៃសៅរ៍ ស្អែកនេះ។

អ៊ីរ៉ង់៖ តាមរយៈគេហទំព័រធ្វីតធើ រដ្ឋមន្ត្រីការបរទេសអ៊ីរ៉ង់លោក ម៉ូហាម៉េដ ហ្សាដាដ ហ្សារីហ្វ បានបង្ហោះសារមួយដោយបញ្ជាក់ថា សហរដ្ឋអាម៉េរិក ជាមេបង្កអស្ថេរភាពដល់សន្តិភាពពិភពលោក តាមរយៈការលក់គ្រឿងសព្វាអាវុធយ៉ាងច្រើនសន្ធឹកសន្ធាប់ទៅកាន់តំបន់កំពុង មានជម្លោះ ជាពិសេសនៅក្នុងតំបន់មជ្ឈិមបូព៌ា។

អេមីរ៉ាត់អារ៉ាប់រួម៖ ប្រធានាធិបតីចិន ស៊ី ជិនពីង ធ្វើដំណើរទៅដល់ទឹកដីអេមីរ៉ាត់អារ៉ាប់រួម ដើម្បីចាប់ផ្តើមដំណើរទស្សនកិច្ចជាផ្លូវការរបស់លោកទៅកាន់ប្រទេសជាប់ឈូងសមុទ្រហ្គូលមួយនេះ ហើយវាគឺជាដំណើរទស្សនកិច្ចផ្លូវរដ្ឋលើកដំបូងរបស់មេដឹកនាំចិន សម្រាប់រយៈពេល២៩ឆ្នាំកន្លងទៅនេះ។ ក្នុងអំឡុងដំណើរទស្សនកិច្ចនេះ លោក ស៊ី បានតាំងចិត្តនឹងព្យាយាមលើកកម្ពស់ទំនាក់ទំនងរវាងប្រទេសចិន និងអេមីរ៉ាត់អារ៉ាប់រួម តាមរយៈការធ្វើការងាររួមគ្នា និងការបង្កើតអនាគតដ៏ល្អប្រសើរ ។ នេះបើតាមការចេញផ្សាយរបស់ប្រព័ន្ធផ្សព្វផ្សាយរបស់អេមីរ៉ាត់អារ៉ាប់រួម ។

ស៊ីរី៖ កងកម្លាំងរដ្ឋាភិបាលក្រុងដាម៉ាស់ បានចូលគ្រប់គ្រងទីក្រុង អាល់ហារ៉ាហ៍ និងទីទួលយុទ្ធសាស្រ្តដ៏សំខាន់មួយនៅភាគពាយ័ព្យខេត្ត ដារ៉ាអា ក្រោយចរចាជោគជ័យជាមួយក្រុមឧទ្ទាម ខណៈអង្គការឃ្លាំមើលសិទ្ធិមនុស្សស៊ីរីក៏បានធ្វើសេចក្តីរាយការណ៍ពីវឌ្ឍនភាពគួរឲ្យកត់សម្គាល់ ដែលសម្រេចបានដោយយោធាស៊ីរីនៅ ក្នុងខេត្តនេះផងដែរ។

បរទេស៖ រុស្ស៊ី និងចិនបានចេញមុខជំទាស់ទៅនឹងការអំពាវនាវរបស់សហរដ្ឋអាម៉េរិកមួយ ដែលមានគោលបំនងបញ្ជាឲ្យគណៈកម្មាធិការនៃក្រុមប្រឹក្សាសន្តិសុខ អង្គការសហប្រជាជាតិ បញ្ឈប់ការនាំចេញផលិតផលប្រេងចម្រាញ់រួចពីប្រទេសកូរ៉េខាងជើង។

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ បានអះអាងថា ជំនួបកំពូល រវាងលោក និងសមភាគីរុស្ស៊ីលោក វ៉្លាឌីមៀ ពូទីន នាពេលថ្មីៗនេះ បានដំណើរទៅដោយរលូន និងទទួលបានជោគជ័យលើសការរំពឹងទុក ហើយលោក ត្រាំ ថែមទំាងនិយាយទៀតថា រូបលោកក៏កំពុងសម្លឹងឆ្ពោះទៅរកជំនួបកំពូលម្តងទៀតផងដែរ។ ដោយឡែក ប្រធានាធិបតីរុស្ស៊ីលោក វ៉្លាឌីមៀ ពូទីន ក៏បានអះអាងដូចគ្នាផងដែរ អំពីការទទួលបាន លទ្ធផលជាផ្លែផ្លាដែលកើតចេញពីជំនួបកំពូលទ្វេភាគីនេះ។