ជប៉ុន៖ យោងតាមប្រភពរបស់អាជ្ញាធរជប៉ុន បានបញ្ជាក់ថា តួលេខជនរងគ្រោះ បាត់បង់ជីវិត ដោយសារតែគ្រោះទឹកជំនន់ និងបំណាក់ដីដ៏ធ្ងន់ ដែលបង្កឡើងពីភ្លៀងធ្លាក់ខ្លាំងនៅភាគខាងលិចប្រទេសនោះ ត្រូវបានគេរាយការណ៍ថា បន្តកើនឡើងដល់២១៧នាក់ហើយ និង១៤នាក់ផ្សេងទៀតកំពុងបាត់ខ្លួននៅឡើយ គិតក្នុងរយៈពេលជាង១០ថ្ងៃមកនេះ។

ស៊ីរី៖ កងកម្លាំងរដ្ឋាភិបាលស៊ីរីបានចាប់ផ្តើមប្រតិបត្តិការយោធាទ្រង់ទ្រាយធំមួយ នៅភាគកណ្តាលខេត្តហាម៉ា ដើម្បីបោសសម្អាតមីននៅតំបន់នោះ បន្ទាប់ពីការចាកចេញរបស់ក្រុមភេរវករ ឌេស កាលពីដើមឆ្នាំ២០១៨កន្លងមកនេះ។

សហរដ្ឋអាម៉េរិក៖ រដ្ឋមន្រ្តីការបរទេសអាម៉េរិក លោក ម៉ៃ ប៉ុមប៉េអូ បានអះអាងថា ប្រទេសលោកនឹងទទួលបានអដ្ឋិធាតុកងទ័ពអាម៉េរិកលើកដំបូងពីកូរ៉េខាងជើង នៅក្នុងរយៈពេល២ទៅ៣សប្តាហ៍ខាងមុខទៀតនេះ។

សហរដ្ឋអាម៉េរិក៖ សហរដ្ឋអាម៉េរិក តាមរយៈការក្រសួងបរទេសរបស់ខ្លួន បានចេញមុខបញ្ជាក់ជាថ្មីទៀតថា គ្មានទេថ្ងៃកំណត់ពេលវេលាសម្រាប់ កូរ៉េខាងជើង ដើម្បីរំសាយអាវុធនុយក្លេអ៊ែរទាំងស្រុងរបស់រដ្ឋកុម្មុយនីស្តីមួយនេះ។ ការអះអាងពេលនេះ គឺស្របទៅនឹងអ្វីដែលលោក ដូណាល់ ត្រាំ បាននិយាយកាលពីប៉ុន្មានថ្ងៃមុននេះ ពាក់ព័ន្ធនឹងពេលវេលាកំណត់ ព្រមទាំងល្បឿននៃកិច្ចចរចាអាវុធនុយក្លេអ៊ែររបស់សហរដ្ឋអាម៉េរិក និង កូរ៉េខាងជើង។

ឥណ្ឌា៖ យោងតាមប្រភពព័ត៌មានរបស់អាជ្ញាធរឥណ្ឌាក្នុងតំបន់ បានរាយការណ៍ថា មនុស្ស១០នាក់បានបាត់បង់ជីវិត និងជាច្រើននាក់ផ្សេងទៀត ទទួលរងរបួសធ្ងន់-ស្រាល នៅក្នុងថ្ងៃព្រហស្បត្តិ៍នេះ (ម៉ោងក្នុងតំបន់) បន្ទាប់ពីរថយន្តក្រុងដឹកអ្នកដំណើរមួយគ្រឿងបានជួបគ្រោះថ្នាក់ ខណៈពេលបើកបរនៅលើផ្លូវភ្នំមួយកន្លែង ហើយក៏បានធ្លាក់ចូលជ្រោះដ៏ជ្រៅមួយនៅរដ្ឋ Uttarakhand ភាគ ខាងជើងប្រទេសឥណ្ឌា៕

ថៃ៖ ក្មេងៗកីឡាករបាល់ទាត់ថៃទាំង១២នាក់ និងគ្រូបង្វឹករបស់ពួកគេ ដែលត្រូវបានជួយសង្រ្គោះចេញពីរូងភ្នំថាំលួង នឹងត្រូវអនុញ្ញាតឲ្យចាកចេញពីមន្ទីរពេទ្យនៅថ្ងៃពុធនេះ ហើយនឹងត្រូវចូលរួមក្នុងសន្និសីទសារព័ត៌មានជាលើកដំបូងក្នុងថ្ងៃតែមួយផងដែរ ដើម្បីរៀបរាប់ពីរឿងរ៉ាវដែលកើតឡើងលើពួកគេ។

ថៃ៖ សារព័ត៌មានថៃបានរាយការណ៍ថា ករណីគ្រោះថ្នាក់ធ្លាក់ឧទ្ធម្ភាគចក្រស៊ីវិលមួយគ្រឿង បានបណ្តាលឲ្យមនុស្ស៤នាក់ បានបាត់បង់ជីវិត នៅភាគឦសានប្រទេសថៃ ក្នុងថ្ងៃពុធ នេះ។ ជាមួយគ្នានេះ នាយកអាកាសយានដ្ឋានខនកែន លោក អាតថាយ៉ា ឡាបម៉ាក បាននិយាយថា ឧទ្ធម្ភាគចក្រធុន AS355 មួយគ្រឿង បានជួបប្រទះគ្រោះថ្នាក់ធ្លាក់ នៅក្នុងសង្កាត់ឆនណាបុត ខេត្តខនកែន មានចម្ងាយប្រហែល៤៥០គីឡូម៉ែត្រ ភាគឦសានទីក្រុងបាងកក នៅម៉ោងប្រមាណ៩និង៣០នាទីព្រឹកថ្ងៃពុធ នេះ (ម៉ោងក្នុង តំបន់) ហើយជនរងគ្រោះដែលបានបាត់បង់ជីវិតទាំង៤នាក់នោះ នៅមិនទាន់គេស្គាល់អត្តសញ្ញាណនៅឡើយទេ។

វៀតណាម៖ ប្រព័ន្ធផ្សព្វផ្សាយវៀតណាមបានរាយការណ៍ថា ព្យុះទីហ្វុង សាន់ ធីន គឺជាខ្យល់ព្យុះត្រូពិចទី៣ហើយ នៅសមុទ្រចិនខាងត្បូងក្នុងឆ្នាំ២០១៨នេះ ត្រូវបានគេព្យាករណ៍ថា នឹងធ្វើដំណើរទៅដល់តំបន់ឆ្នេររបស់ប្រទេសវៀតណាម ដែលជាតំបន់ភាគកណ្តាលដ៏សំខាន់មួយ នៅរសៀល ឬក៏ល្ងាចថ្ងៃពុធ នេះ។

មីយ៉ាន់ម៉ា៖ យោងតាមប្រភពរបស់នាយកដ្ឋានឧតុនិយម និងជលសាស្ត្រមីយ៉ាន់ម៉ា បានបញ្ជាក់ថា គ្រោះរញ្ជួយដីក្នុងកម្រិត៤.៣វ៉ិកទ័រ នៅក្នុងថ្ងៃ ពុធ នេះ បានធ្វើការវាយប្រហារតំបន់សឺហ្គៃ។ ប្រភពខាងលើនេះបានឲ្យដឹងទៀតថា គ្រោះមហន្តរាយធម្មជាតិនេះ បានវាយប្រហារនៅម៉ោងប្រមាណ៨និង៣៥នាទីព្រឹកថ្ងៃពុធ នេះ (ម៉ោងក្នុងតំបន់) ក្នុងរយៈជម្រៅ៨គីឡូម៉ែត្រភាគពាយ័ព្យក្រុង យីនម៉ាប៊ីន និងមានចម្ងាយប្រមាណ១៣៨គីឡូម៉ែត្រពីទីស្នាក់ការអង្កេតការណ៍បាតុភូតធម្មជាតិ កាន់បាលូ។ រហូតមកទល់ពេលនេះ របាយការណ៍លម្អិតពាក់ព័ន្ធនឹងទំហំនៃការខូតខាត ឬក៏មនុស្សរងរបួស ដោយសារគ្រោះរញ្ជួយដីខាងលើនេះ នៅពុំទាន់មានសេចក្តីរាយការណ៍នៅឡើយនោះទេ៕