សហរដ្ឋអាម៉េរិក៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ បាននិយាយ នៅថ្ងៃអង្គារ៍ ថា មិនមានការបង្ខិតបង្ខំ ឬក៏កំណត់ពេលវេលាជាក់លាក់ ដើម្បីរំសាយអាវុធនុយក្លេអ៊ែររបស់កូរ៉េខាងជើង ក្រោមកិច្ចព្រមព្រៀងរបស់លោកជាមួយ លោកប្រមុខដឹកនំាគីម ជុងអ៊ុន ឡើយ ខណៈការអះអាងនេះ ផ្ទុយពីការលើកឡើង កាលពីពេលមុនដែលមេដឹកនាំអាម៉េរិករូបនេះ បានបញ្ជាក់ថា វានឹងចាប់ផ្តើមដំណើរការនាពេលឆាប់ៗនេះ។

សហរដ្ឋអាម៉េរិក៖ លោក ដូណាល់ ត្រាំ បានគូសបញ្ជាក់ថា រូបលោកទទួលស្គាល់ការសន្និដ្ឋានរបស់ទីភ្នាក់ងារស៊ើបការណ៍សម្ងាត់អាម៉េរិក FBI ដែលរកឃើញថា រុស្ស៊ីជាអ្នកលូកលាន់ចូលក្នុងកិច្ចការបោះឆ្នោតប្រធានាធិបតីអាម៉េរិក កាលពីឆ្នាំ២០១៦ ខណៈការអះអាងនេះ គឺផ្ទុយទាំងស្រុងទៅនឹងអ្វីដែលលោកបានឡើងក្នុងអំឡុងកិច្ចជំនួបកំពូលជាមួយលោក វ៉្លាឌីមៀ ពូទីន។

ថៃ៖ សួនឧស្យានព្រៃឈើ ថាំលួង ណាងខុន ណាមណាងនុន ស្ថិតនៅខេត្តឈៀងរ៉ៃ ត្រូវបានអាជ្ញាធរថៃក្នុងតំបន់សម្រេចបិទដំណើរការដោយមិនកំណត់ពេល ដើម្បីធ្វើការជួសជុលការខូតខាតដែលបង្កផលប៉ះពាល់បរិស្ថាន ក្នុងអំឡុងពេលប្រតិបត្តិការជួយសង្គ្រោះ ក្មេងៗកីឡាករបាត់ទាត់ទាំង១២នាក់ និងគ្រូបង្វឹកបាល់ទាត់របស់ពួកគេម្នាក់ទៀតនាពេលថ្មីៗនេះ។ បើតាមមន្រ្តីរដ្ឋបាលព្រៃឈើថៃបាននិយាយថា ព្រៃឈើត្រូវការការស្តា និងជួសជុលឡើងវិញជាច្រើន។

សហរដ្ឋអាម៉េរិក៖ នៅក្នុងសេចក្ដីថ្លែងការណ៍របស់ខ្លួន ក្រសួងយុត្តិធម៌សហរដ្ឋអាម៉េរិក បានបញ្ជាក់ថា ស្ត្រីជាជនជាតិរុស្ស៊ីម្នាក់ឈ្មោះថា ម៉ារៀ ប៊ូទីណា អាយុ២៩ឆ្នាំ ត្រូវបានចាប់ខ្លួនក្នុងទីក្រុងវ៉ាស៊ីនតោន កាលពីថ្ងៃអាទិត្យ សប្តាហ៍មុននេះ ដោយចោទប្រកាន់ថា ស្រ្តីជាជនសង្ស័យរូបនេះ បានធ្វើសកម្មភាពក្នុងនាមជាទីភ្នាក់ងាររុស្ស៊ី តាមរយៈការអភិវឌ្ឍទំនាក់ទំនងជាមួយប្រជាជនអាម៉េរិក និងអង្គការនានា ដែលមានឥទ្ធិពលលើនយោបាយរបស់សហរដ្ឋអាម៉េរិក។

សហរដ្ឋអាម៉េរិក៖ មេបញ្ជាការកំពូលកងទ័ពអាម៉េរិកលោក ចន នីគឆូសុន បាន និយាយក្នុងថ្ងៃច័ន្ទ ដើមសប្តាហ៍នេះថា រដ្ឋាភិបាលក្រុងវ៉ាស៊ីនតោនបានប្រុងប្រៀបខ្លួនរួចជាស្រេច ដើម្បីចូលរួមក្នុងកិច្ចចរចាដោយផ្ទាល់ជាមួយក្រុមភេវរករ តាលីបង់ សំដៅឈានឆ្ពោះទៅបញ្ចប់ភ្លើងសង្គ្រាមនៅក្នុងប្រទេសអាហ្គានីស្ថាន នារយៈពេល១៧ឆ្នាំមកនេះ ខណៈការលើកឡើងរបស់លោក ចំពេលមានការរំពឹងទុកកាន់តែច្រើនអំពីកិច្ចពិភាក្សាសន្តិភាព។

ហ្វាំងឡង់៖ ក្នុងអំឡុងជំនួបកំពូលជាមួយសមភាគីរុស្ស៊ីលោក វ៉្លាឌីមៀ ពូទីន នៅឯ វិមានប្រធានាធិបតីក្នុងទីក្រុងហែលស៊ីនគី ប្រទេសហ្វាំងឡង់ លោក ដូណាល់ ត្រាំ បានចេញមុខគាំត្ររុស្ស៊ី ដោយប្រឆំាងនឹងទីភ្នាក់ងារស៊ើបការណ៍សម្ងាត់ FBI ពាក់ព័ន្ធនឹងការចោទប្រកាន់ថា រុស្ស៊ីបានជ្រៀតជ្រែកក្នុងកិច្ចបោះឆ្នោតប្រធានាធិបតីអាម៉េរិកកាលពីឆ្នាំ២០១៦។

អាហ្គានីស្ថាន៖ ទីភ្នាក់ងារបេសកម្មផ្តល់ជំនួយអង្គការសហប្រជាជាតិប្រចាំប្រទេស អាហ្គានីស្ថាន ហៅកាត់ថា UNAMA បានរាយការណ៍ថា ចំនួនជនស៊ីវិលស្លូតត្រង់ ដែលត្រូវបានគេសម្លាប់បន្តកើនឡើងដល់១.៦៩២នាក់នៅក្នុងការប៉ះទង្គិចគ្នាដោយអាវុធ និងអំពើភេវរកម្មនានា បើគិតត្រឹមរយៈពេលពាក់កណ្តាលឆ្នំា២០១៨ ខណៈតួលេខចុងក្រោយនេះ ជាប់ក្នុងកំណត់ត្រាដ៏ខ្ពស់បំផុតមួយ។